کراچی: وفاقی وزیر ریلوے شیخ رشید آج کراچی سرکلرٹرین کا افتتاح کریں گے ، جس کے بعد شہری کل 20 نومبر سے کراچی سٹی سے پیپری تک سفر کرسکیں گے۔
تفصیلات کے مطابق کراچی کے شہریوں کو 20 سال بعد بھی ادھوری خوشی ملی ، نامکمل کراچی سرکلرٹرین کا افتتاح آج ہوگا، وفاقی وزیر ریلوے شیخ رشید افتتاح کریں گے۔
سرکلرٹرین کا روٹ مختصراورٹرینوں کی تعدادمحدودکردی گئی ہے ، کراچی سرکلر ٹرین چلانے کے فیصلے میں آخری وقت میں مکمل تبدیلی کردی گئی تھی اور سرکلر ٹرین کراچی سٹی سے اورنگی تک چلانے کا فیصلہ مؤخرکردیا گیا۔
کراچی سرکلر ریلوے کی دس کوچز اور چارانجن پیپری سے اورنگی اپ اینڈ ڈاون چلائیں جائیں گے، بوگیوں میں آرم دہ نشستوں کے علاوہ علاوہ واش رومز، پنکھے، ٹی وی،وائی فائی اور موبائل چارج کرنے کی سہولیات بھی موجود ہوں گی۔
وزیرمنشن، لیاری، بلدیہ، منگھو پیر، شاہ لطیف، سائٹ،اورنگی اسٹیشن مکمل کھنڈر اور ناقابل استعمال ہیں، کے سی آرٹرین کو مین لائن ٹریک پر سٹی اسٹیشن سے پیر مارشل یارڈتک چلایا جارہا ہے۔
ریلوے ٹریک کے اطراف تاحال تجاوزات اور پکی کنسٹریکشن موجود ہے، ریلوے ذرائع کا کہنا ہے کراچی سٹی تا اورنگی کا روٹ دسمبر میں بھی بحال ہونا ممکن نہیں ہے۔
دوسری جانب وفاقی وزیر ریلوے شیخ رشید نے اے آر وائی نیوز سے گفتگو کرتے ہوئے کہا 14کلومیٹر پر فوری طورپر پھاٹک لگائے جارہے ہیں، سندھ حکومت نے بھی کے سی آرکیلئے ٹھیکے دیئے ہیں، 40ٹرینیں تیار کی گئی ہیں، 15 آج ٹریک پر آرہی ہیں۔
شیخ رشید کا کہنا تھا کہ کے سی آرکیلئے12اسٹیشنز آج سے فعال ہوجائیں گے ، ایک ٹرین میں 80مسافروں کی گنجائش ہے جبکہ ٹکٹ ٹرین کے اندر سے ملے گا۔
وفاقی وزیر نے کہا آج 2اپ اور 2ڈاؤن ٹرینیں چلائیں گے، 15دن بعد کےسی آر میں مزید14کلومیٹر کا اضافہ ہوجائے گا، کے سی آر کے 50روپے کے کرایوں میں کمی بھی کی جائے گی۔
ان کا کہنا تھا کہ سندھ حکومت کیساتھ ملکر کے سی آر چلانا چاہتے ہیں، کےسی آر25سال سے بند ہے ، 100مسائل ہیں ، 25 سال کا مردہ ٹریک زندہ ہورہا ہے، یہ چیف جسٹس کی کاوش ہے۔
