ARYNews.tv | Urdu – Har Lamha Bakhabar

Tag: کراچی فائرنگ

  • کراچی : جھگڑے کے دوران فائرنگ سے ایک شخص جاں بحق

    کراچی : جھگڑے کے دوران فائرنگ سے ایک شخص جاں بحق

    کراچی : ایف بی ایریا گلشن مصطفی میں ذاتی جھگڑے کے دوران فائرنگ سے ایک شخص جاں بحق ہوگیا، مقتول شادی شدہ اور 2 بچوں کا باپ تھا۔

    تفصیلات کے مطابق کراچی کے علاقے ایف بی ایریا گلشن مصطفی میں فائرنگ سے ایک شخص جاں بحق ہوگیا، پولیس نے بتایا کہ فائرنگ کا واقعہ جھگڑے کے دوران پیش آیا، کچھ اوباش افراد حمزہ نامی شخص کی اہلیہ کو چھیڑتے تھے۔

    پولیس کا کہنا تھا کہ واقعہ کے وقت حمزہ اور اوباش نوجوانوں میں جھگڑا ہوا، جھگڑے کے دوران مقتول فیاض نے بیچ بچاؤ کرانے کی کوشش کی تو اوباش نوجوانوں کی فائرنگ سے فیاض جاں بحق ہوگیا۔

    لوگوں نے حمزہ کو پکڑ کر پولیس کے حوالے کردیا جبکہ جھگڑے میں ملوث چار افراد علی، ذیشان، نعمان اور ارسلان فرار ہیں۔

    پولیس نے بتایا کہ فائرنگ کاواقعہ ذاتی جھگڑےکےدوران پیش آیا،ایک شخص کوحراست میں لیاہے اور واقعے کے حوالے سے مزید تحقیقات کی جارہی ہے۔

    دوسری جانب مقتول فیاض کے بھتیجے وقار کا کہنا ہے کہ فائرنگ کا واقعہ ڈکیتی مزاحمت پرپیش آیا،مقتول فیاض میرےچچاتھے لوٹ مارکےدوران مزاحمت پر ملزمان نے فائرنگ کی۔

    بھتیجے نے کہا کہ مقتول فیاض پلمبرتھاآبائی تعلق ہری پورسےتھا، مقتول شادی شدہ اور2بچوں کاباپ تھا۔

  • ایم پی اے اسلم ابڑو کی گاڑی پر فائرنگ، بھائی اور ان کا بیٹا جاں بحق

    ایم پی اے اسلم ابڑو کی گاڑی پر فائرنگ، بھائی اور ان کا بیٹا جاں بحق

    کراچی: رکن صوبائی اسمبلی اسلم ابڑو کی گاڑی پر فائرنگ سے ان کے بھائی اکرم ابڑو اور ان کا بیٹا جاں بحق ہو گئے۔

    تفصیلات کے مطابق کراچی کے علاقے ڈیفنس فیز 7 میں ایم پی اے اسلم ابڑو کی گاڑی پر نامعلوم موٹر سائیکل سوار حملہ آوروں نے فائرنگ کی، جس سے گاڑی میں موجود ان کے بھائی وکیل اکرم ابڑو اور ان کا بیٹا شہریار ابڑو جاں بحق ہو گئے۔

    ایس پی انویسٹی گیشن ساؤتھ کے مطابق گاڑی میں موجود 2 افراد زخمی ہو گئے ہیں، الہٰی بخش نامی ملازم واقعے میں محفوظ رہا، ملزمان نے تعاقب کر کے گاڑی کو نشانہ بنایا، پولیس کا کہنا ہے کہ جائے وقوعہ سے بڑے ہتھیار اور نائن ایم ایم کے خول ملے ہیں، مزید تحقیقات کے لیے کرائم سین یونٹ کو طلب کر لیا گیا ہے۔

    پولیس حکام کے مطابق عینی شاہدین کے بیانات لیے جائیں گے، پولیس حکام متاثرہ فیملی سے بھی رابطے میں ہیں، ایس پی انویسٹی گیشن ساؤتھ نے بتایا کہ بظاہر ملزمان ایک سے زائد موٹر سائیکلوں پر سوار تھے، اور انھوں نے گاڑی پر تقریباً 25 کے قریب فائر کیے۔

    پولیس حکام کا یہ بھی کہنا ہے کہ واقعہ بظاہر ذاتی دشمنی کی نوعیت کا لگتا ہے، اسلم ابڑو کا تعلق جیک آباد سے ہے جہاں ان کی خاندانی دشمنی بھی چل رہی ہے، تاہم پولیس حکام واقعے سے متعلق مختلف پہلوؤں سے تحقیقات کر رہے ہیں، اور علاقے کے سی سی ٹی وی فوٹیجز بھی چیک کیے جا رہے ہیں۔

  • کراچی: شارع فیصل ایمبیسی ہوٹل کے قریب فائرنگ، 4 افراد زخمی

    کراچی: شارع فیصل ایمبیسی ہوٹل کے قریب فائرنگ، 4 افراد زخمی

    کراچی : شارع فیصل پر ایمبیسی ہوٹل کے قریب فائرنگ کے نتیجے میں 4 افراد زخمی ہوگئے ، پولیس کا کہنا ہے کہ ابتدائی طور پر واقعہ ڈکیتی مزاحمت کا لگتا ہے۔

    تفصیلات کے مطابق کراچی کے علاقے شارع فیصل پر ایمبیسی ہوٹل کے قریب فائرنگ کا واقعہ پیش آیا ، جس کے نتیجے میں 4 افراد زخمی ہوگئے۔

    پولیس نے بتایا کہ فائرنگ وین پر کی گئی، وین پر گولیوں کے نشانات دیکھے جا سکتے ہیں تاہم زخمیوں کو اسپتال منتقل کردیا گیا ہے۔

    پولیس کا کہنا تھا کہ ابتدائی طور پر واقعہ ڈکیتی مزاحمت کا لگتا ہے، کیش وین پر فائرنگ کی گئی، جس میں 2 سیکیورٹی گارڈ زخمی ہوئے۔

    حکام کے مطابق واردات میں ملزمان نے کیش وین سے رقم لوٹی تاہم واقعے کی مزید تحقیقات جاری ہے۔

  • کراچی سرجانی ٹاؤن میں گھر میں گھس کر ڈاکوؤں کی فائرنگ، ایک بھائی جاں بحق 3 زخمی

    کراچی سرجانی ٹاؤن میں گھر میں گھس کر ڈاکوؤں کی فائرنگ، ایک بھائی جاں بحق 3 زخمی

    کراچی: شہر قائد کے علاقے سرجانی ٹاؤن میں گھر میں گھس کر ڈاکوؤں کی فائرنگ سے ایک بھائی جاں بحق، 3 زخمی ہو گئے۔

    تفصیلات کے مطابق سرجانی ٹاؤن، شاہ بیگ گوٹھ کے قریب ایک گھر میں گھسے ڈاکوؤں نے فائرنگ کر کے ایک شخص کو قتل کر دیا، ڈکیتی مزاحمت پر فائرنگ سے جاں بحق ہونے والے شخص کے تین بھائی فائرنگ سے زخمی ہو گئے۔

    زخمی بلال نے میڈیا کو بتایا ’’ہم چاروں بھائیوں کو گھر کے اندر ڈکیتی مزاحمت پر گولیاں ماری گئیں، ہم سو رہے تھے کہ ماسک پہنے 5 سے 6 ڈاکو گھر میں گھس آئے۔‘‘ بلال نے بتایا ’’ڈاکوؤں کے پاس اسلحہ اور چھریاں موجود تھیں، ڈاکوؤں نے مزاحمت پر فائرنگ کی، اور گھر سے 3 لاکھ روپے لوٹ کر فرار ہو گئے۔‘‘

    زخمی بلال کے مطابق انھوں نے ایک ڈاکو کو پکڑ کر پولیس کے حوالے بھی کر دیا ہے، انھوں نے بتایا کہ احسن آباد کے علاقے میں ان کی گوشت کی دکان ہے۔

    پولیس حکام کا کہنا ہے کہ ہلاک و زخمی تمام افراد اسپتال منتقل کیے گئے، واقعے کی مزید تفتیش جاری ہے، جب کہ واقعےمیں زخمی ساجد کو کمر اور پیٹ میں 2 گولیاں لگی ہیں۔

    پولیس حکام کے مطابق جاں بحق شخص کی شناخت دانیال کے نام سے ہوئی ہے جب کہ زخمیوں کے نام ساجد، بلال اور عامل ہیں، 7 ڈاکورات گئے گھر میں داخل ہوئے اور خواتین سے دست درازی کی، جس پر تینوں بھائی مشتعل ہو گئے اور مزاحمت کی، پولیس حکام کے مطابق اہل محلہ نے ایک ڈاکو پکڑ کر تشدد کے بعد پولیس کے حوالے کیا، شواہد کی مدد سے دیگر ملزمان کی تلاش جاری ہے۔

  • کراچی: 2 گھنٹوں میں فائرنگ کے مختلف واقعات میں 2 خواتین سمیت 5 افراد جاں بحق

    کراچی: 2 گھنٹوں میں فائرنگ کے مختلف واقعات میں 2 خواتین سمیت 5 افراد جاں بحق

    کراچی: شہر قائد میں گزشتہ رات محض 2 گھنٹوں کے دوران فائرنگ کے مختلف واقعات میں 2 خواتین سمیت 5 افراد جاں بحق ہو گئے۔

    تفصیلات کے مطابق کراچی کے مختلف علاقوں میں فائرنگ سے پانچ افراد جاں بحق ہو گئے، فائرنگ کے واقعات میمن گوٹھ، سرجانی ٹاؤن، ڈیفنس، اور بلدیہ ٹاؤن میں پیش آئے، یہ واقعات محض دو گھنٹوں کے دوران ہوئے۔

    پولیس حکام کا کہنا ہے کہ گلشن سرجانی میں پیٹرول پمپ کے قریب ایک کار پر فائرنگ سے 2 افراد جاں بحق ہو گئے، جن کی شناخت بابر اور نسیم جاوید کے ناموں سے ہوئی ہے۔

    لواحقین کا کہنا ہے کہ مقتول نسیم دودھ کا کا کاروبار کرتا تھا، اور دودھ کی متعدد دکانیں ہیں، مقتول اپنے دوست بابر کے ساتھ دودھ کے پیسوں کی ریکوری کے لیے سرجانی گیا تھا۔ مقتول نسیم نارتھ ناظم آباد بلاک ایچ کا رہائشی تھا، تین بیٹیاں، ایک بیٹا ہے، آبائی تعلق مظفر گڑھ سے تھا۔

    پولیس حکام کا کہنا ہے کہ واقعہ بظاہر ڈکیتی مزاحمت کا لگتا ہے، مقتولین کو سینے پر گولیاں مار کر قتل کیا گیا، مقتولین کار میں تھے، شبہ ہے نہ رکنے پر فائرنگ کی گئی، جائے وقوعہ سے مزید شواہد اکٹھے کیے جا رہے ہیں۔

    ملیر سعود آباد میں شادی کی تقریب میں فائرنگ سے ایک شخص جاں بحق ہوا، مقتول کی شناخت محمد ارسلان کے نام سے ہوئی ہے، جس کی لاش جناح اسپتال منتقل کی گئی۔

    ڈیفنس فیز 6 خیابان حلال عربی محل کے گھر میں اتفاقیہ گولی چلنے خاتون جاں بحق ہو گئی، جس کی شناخت صفیہ کے نام سے ہوئی ہے، جس کی لاش جناح اسپتال منتقل کر دی گئی۔

    بلدیہ گلشن غازی بسم اللہ چوک کے قریب گھر میں فائرنگ سے خاتون جاں بحق ہو گئی، جس کی شناخت نورین کے نام سے ہوئی ہے، اور جس کی لاش سول اسپتال منتقل کی گئی۔

    پولیس نے کرائم سین سے شواہد اکٹھے کر لیے ہیں اور تحقیقات شروع کر دی ہے۔

  • نیو کراچی میں ڈاکوؤں نے خاتون کو گولی ماردی

    کراچی کے علاقے نیو کراچی میں اسٹریٹ کرمنلز نے خاتون کو ڈکیتی مزاحمت پر فائرنگ کرکے زخمی کردیا۔

    اے آر وائی نیوز کے مطابق نیو کراچی کے علاقے سیکٹر 11 اے میں ڈکیتی کے دوران مزاحمت کرنے پر معمر خاتون کو گولی مار دی گئی، خاتون کے ساتھ موجود نوجوان کی جانب سے مزاحمت کی گئی تھی۔

    عمر رسیدہ خاتون نوجوان کے ساتھ موٹر سائیکل پر بینک سے تین لاکھ روپے لے کر گھر پہنچی تھیں مسلح ملزمان تعاقب کرتے ہوئے پہنچ گئے۔

    خاتون ہاتھ میں گولی لگنے سے زخمی ہوگئیں انہیں طبی امداد کے لیے اسپتال منتقل کردیا گیا ہے جبکہ مسلح ملزمان رقم لوٹ کر فرار ہونے میں کامیاب ہوگئے۔

    واضح رہے کہ گزشتہ دنوں کراچی کے علاقے گلستان جوہر بلاک 17 میں ڈکیتی مزاحمت پر ڈاکوؤں کی فائرنگ سے خاتون جاں بحق ہوگئی تھی۔

    یہ پڑھیں: کراچی میں ڈکیتی مزاحمت پر فائرنگ سے خاتون جاں بحق

    مقتولہ کی شناخت ثنا زوجہ طارق کے نام سے ہوئی تھی، ایس ایس پی ایسٹ کا بتانا تھا کہ کار میں خاتون، ان کا بھائی اور ایک بچہ میڈیکل اسٹور پر آئے تھے، مقتولہ کو ایک گولی کندھے پر لگی تھی۔

  • کراچی : سپر ہائی وے پر فائرنگ ، ڈاکٹر جاں بحق

    کراچی : سپر ہائی وے پر فائرنگ ، ڈاکٹر جاں بحق

    کراچی : سپر ہائی وے پر نجی ہاؤسنگ سوسائٹی کے قریب فائرنگ کے نتیجے میں ڈاکٹر جاں بحق ہوگیا، ابتدائی تحقیقات کےمطابق واقعہ ذاتی دشمنی کا شاخسانہ ہے۔

    تفصیلات کے مطابق کراچی میں سپر ہائی و ے نجی ہاوسنگ سوسائٹی کے قریب کلینک پر نامعلوم افراد کی جانب سے فائرنگ کی گئی ، جس کے نیتجے میں کلینک میں موجود ڈاکٹر ہارون گولیاں لگنے سے جاں بحق ہوگئے۔

    ایس ایس پی ملیرعرفان بہادر نے بتایا کہ بحریہ سے متصل قاسم گوٹھ میں مقتول نے دکان میں کلینک بنا رکھی تھی، مقتول گھر سے کلینک جارہا تھا جب قتل کیا گیا۔

    سفید کار میں سوار 2 ملزمان نے فائرنگ کی ، ڈاکٹرہارون کو پانچ گولیاں لگیں ،قتل کے واقعے کی تحقیقات کررہےہیں۔

    لاش عباسی شہید اسپتال منتقل کردی گئی ہے، بتدائی تحقیقات کےمطابق واقعہ ذاتی دشمنی کا شاخسانہ ہے تاہم جائے وقوعہ سے مذید شواہد اکھٹے کر رہے ہیں۔

  • کراچی : فائرنگ سے برخاست پولیس افسر سمیت 2 افراد جاں بحق

    کراچی : فائرنگ سے برخاست پولیس افسر سمیت 2 افراد جاں بحق

    کراچی : صدر زیب النسااسٹریٹ کے قریب نامعلوم مسلح ملزمان کی فائرنگ سے برخاست پولیس افسر سمیت دو افراد جاں بحق ہوگئے، ممکنہ طور پر چاند خان نیازی کو گینگ وارکارندوں نے نشانہ بنایا۔

    تفصیلات کے مطابق کراچی کے علاقے صدر زیب النسااسٹریٹ کے قریب فائرنگ کے نتیجے میں 2افراد جاں بحق ہوگئے ، جاں بحق افراد میں چاند خان اور عبدالرحمان شامل ہیں، چاند خان نیازی سابق ایس ایچ او کلاکوٹ تھا۔

    ریسکیو ذرائع نے بتایا کہ جاں بحق سابق پولیس افسرعدالت سے پیشی پرواپس آرہا تھا ، جب فائرنگ کا واقعہ پیش آیا، ممکنہ طور پر چاند خان نیازی کو گینگ وارکارندوں نے نشانہ بنایا ، چاندخان نیازی کوگینگ وارکارندوں کی جانب سےدھمکیاں مل رہی تھیں۔

    ملزمان کی تصاویر اور واقعے کی سی سی ٹی وی فوٹیج سامنے آگئی ، پینٹ شرٹ میں ملبوس 2افراد نے مقتولین کا پیچھا کرکے فائرنگ کی۔

    اس حوالے سے آئی جی ساؤتھ شرجیل کھرل نے میڈیا سے گفتگو کرتے ہوئے کہا کہ صدرفائرنگ واقعے میں برخاست انسپکٹر اور ساتھی کونشانہ بنایاگیا، جاں بحق افراد عدالت سے پیشی کے بعد واپس جارہے تھے۔

    شرجیل کھرل کا کہنا تھا کہ جائے وقوعہ سے9 خول ملے ہیں، ملزمان کی تعداد 2 تھی اور وہ موٹرسائیکل پرسوارتھے، فی الحال ٹارگٹ کلنگ لگ رہی ہے اور واقعے کی لیاری گینگ وارسے کڑی مل رہی ہے۔

    ،ڈی آئی جی ساؤتھ نے بتایا کہ فائرنگ واقعے مختلف پہلووں پرتحقیقات کی جائیں گی ، سابق ایس ایس پی ایسٹ سےبھی بات کی ہے ، 3ماہ قبل بھی ایساواقعہ پیش آیا،دونوں ایک ہی سلسلےکی کڑی ہیں، ایڈیشنل آئی جی سے بات ہوئی، ایک ٹیم دونوں کیسز پر کام کرے گی ، ٹیم میں ایس آئی یو اے وی اور سی سی کے افسران شامل ہوں گے۔

  • ڈاکٹرز نے لاک ڈاؤن کا عندیہ دے دیا

    ڈاکٹرز نے لاک ڈاؤن کا عندیہ دے دیا

    کراچی: پاکستان میڈیکل ایسوسی ایشن نے ڈاکٹر پر فائرنگ کرنے والے اہلکار کو سخت سزا دینے کا مطالبہ کرتے ہوئے صوبائی حکومت کو بڑی دھمکی دے دی۔

    کراچی میں پریس کانفرنس کرتے ہوئے پاکستان میڈیکل ایسوسی ایشن (پی ایم اے) کے عہدیداران کا کہنا تھا کہ قومی ادارہ برائے امراضِ قلب (این آئی سی وی ڈی) کے ڈاکٹر پر فائرنگ کا واقعہ قابلِ مذمت ہے، ڈاکٹرزمشکل حالات کے باوجودفرائض انجام دیتے ہیں، فائرنگ کے واقعے کی اعلیٰ سطح پر تحقیقات کی جائے اور سی ٹی ڈی اہلکار کو سخت سزا دی جائے۔

    پی ایم اے عہدیداران نے ڈاکٹر کو سیکیورٹی فراہم کرنے کا مطالبہ کرتے ہوئے کہا کہ ’کرونا مسئلے کے باوجود بھی مختلف اسپتالوں میں تعینات ڈاکٹرز کو تحفظ فراہم نہیں کیا جارہا، سندھ اسمبلی،سندھ سیکریٹریٹ میں میٹل ڈیٹیکٹر ہیں مگر اسپتالوں میں مشینیں نصب نہیں کی گئیں، اسی وجہ سے ایک شخص اسپتال میں اسلحہ لے کر آیا۔

    ڈاکٹرز کی تنظیم کے عہدیداران نے صوبائی حکومت سے مطالبہ کیا کہ واقعے میں ملوث عناصر کے خلاف فوری کارروائی کی جائے، اگر ڈاکٹرز کو سیکیورٹی فراہم نہ کی گئی تو ہم بھی اسپتالوں میں لاک ڈاؤن کردیں گے۔

    مزید پڑھیں: این آئی سی وی ڈی میں فائرنگ : سی ٹی ڈی اہلکار کیخلاف مقدمہ درج

    پی ایم اے کے عہدیداران نے بتایا کہ ’گزشتہ روز مریض کے ایک تیماردار نے غصے میں آکر ڈاکٹر پر فائرنگ کی اور دھمکی دی کہ وہ بہت بااثر شخص ہے،  اس قسم کےسانحات ہمیں دیوارکے ساتھ لگاسکتے ہیں اور ایسی صورتحال میں ہم کچھ اور سوچنےپر مجبور بھی ہوسکتے ہیں۔

    پاکستان میڈیکل ایسوسی ایشن کے عہدیداران کا کہنا تھا کہ اس سے قبل اسپتالوں میں شیشے توڑنے کے واقعات پیش آئے مگر اب ڈاکٹر پر اسپتال میں براہ راست فائرنگ کی گئی۔ ڈاکٹرز نے متنبہ کیا کہ حکومت نے اگر مستقبل میں ڈاکٹروں کو تحفظ دینے کے اقدامات نہ کیے اور کوئی واقعہ پیش آیا تو ہم او پی ڈیز بند کرسکتے ہیں، جس سے صرف غریب مریضوں کو نقصان ہوگا، ہم غریب مریضوں کانقصان نہیں چاہتے۔

    واضح رہے کہ قومی ادارہ برائے امراض قلب (این آئی سی وی ڈی) میں گزشتہ روز ہونے والی فائرنگ سے ڈیوٹی ڈاکٹر زخمی ہوگیا تھا جب کہ ملزم موقع سے فرار ہوگیا تھا لیکن سی ٹی ڈی افسران نے فوری کارروائی کرتے ہوئے ملزم گرفتار کرکے پولیس کے حوالے کردیا۔ اسپتال میں فائرنگ کرنے والا ملزم سی ٹی ڈی کا اہلکار کانسٹیبل کامران ہے۔

    اس حوالے سے سی ٹی ڈی کے انچارج راجہ عمر خطاب کا کہنا تھا کہ فائرنگ کرنے والا سی ٹی ڈی سول لائنز میں تعینات ہے۔ انہوں نے بتایا کہ فائرنگ کرنے والے اہلکار کی طبیعت گزشتہ کئی دنوں سے خراب تھی۔

    راجہ عمر خطاب کے مطابق ملزم ایک دن قبل بھی این آئی سی وی ڈی گیا تھا جہاں ماسک نہ پہننے پر گارڈ سے اس کی تلخ کلامی ہوئی تھی۔ دوسری جانب اسپتال کے ذمہ دار ذرائع کا کہنا ہے کہ فائرنگ کرنے والا ملزم گزشتہ روز مریض بن کر آیا تھا اور نیند کی گولیاں مانگ رہا تھا۔

  • سالگرہ کی تقریب میں دو بھائیوں کی شدید ہوائی فائرنگ، پولیس محافظ بنی رہی

    سالگرہ کی تقریب میں دو بھائیوں کی شدید ہوائی فائرنگ، پولیس محافظ بنی رہی

    کراچی: شہر قائد کے علاقے ابراہیم حیدری کے تھانے کی حدود میں ایک سال گرہ کی تقریب میں دو بھائی شدید ہوائی فائرنگ کرتے رہے جنھیں گرفتار کر لیا گیا۔

    تفصیلات کے مطابق کراچی کے علاقے کورنگی کراسنگ پر با اثر افراد کی تقریب میں قانون کی کھلے عام خلاف ورزی ہوتی رہی جب کہ پولیس کی بھاری نفری سال گرہ پر سیکورٹی انجام دیتی رہی، اے آر وائی نیوز نے فائرنگ اور تقریب کی ویڈیو حاصل کر لی۔

    ایس ایس پی ملیر علی رضا کا کہنا ہے کہ ابراہیم حیدری تھانے کی حدود بھٹائی کالونی میں ہوائی فائرنگ میں ملوث دونوں بھائیوں کو گرفتار کر لیا گیا ہے، ذیشان ابڑو اور فیصل ابڑو نے ہوائی فائرنگ کی، ملزمان کے خلاف مقدمہ درج کر لیا، ایس ایچ اوز فائرنگ کے وقت تقریب میں موجود نہیں تھے، ان کے جانے کے بعد فائرنگ کا واقعہ پیش آیا۔

    اے آر وائی نیوز کے مطابق سال گرہ تقریب میں با اثر افراد کا باری باری ہوائی فائرنگ کا مقابلہ چلتا رہا، جب کہ پولیس کی بھاری نفری سیکورٹی پر مامور رہی، تقریب میں کئی افراد شدید ہوائی فائرنگ کرتے رہے، ’کبھی ریڈی اسٹیڈی گو‘ تو کبھی ’ون ٹو تھری‘ کے بعد فائرنگ ہوتی رہی، فائرنگ میں مبینہ طور پر سرکاری ایس ایم جی بھی استعمال کی گئی، تقریب میں پی ٹی آئی رکن صوبائی اسمبلی راجا اظہر بھی موجود تھے۔

    دریں اثنا، اے آر وائی نیوز نے ایس ایچ او عاصم الرحمان سے رابطہ کیا تو انھوں نے رُکھائی سے جواب دے کر فون بند کر دیا، ان کا جواب تھا کہ وہ سال گرہ کی تقریب میں موجود تھے، لیکن ان کی موجودگی میں فائرنگ نہیں کی گئی، ان کے جانے کے بعد کی گئی ہوگی۔ ایس ایچ او نے کہا کہ علاقہ ایم پی اے اور ایم این اے بھی دعوت میں موجود تھے، وہ ہر مہینے تقریب منعقد کرتے ہیں۔

    خیال رہے کہ عاصم الرحمان کو چند روز قبل ہی سائٹ سپر ہائی وے سے ہٹایا گیا تھا، جس کے بعد انھیں ایس ایچ او ابراہیم حیدری تعینات کیا گیا۔