Tag: کراچی لاک ڈاؤن

کراچی: لاک ڈاؤن میں نرمی کا وقت ختم ہو گیا، اب 3 دن سخت لاک ڈاؤن ہوگا، حکومت سندھ نے آج سہ پہر 3 بجے تک تمام دکانیں بند رکھنے کی ہدایت جاری کر دی ہے۔

اے آر وائی نیوز کے مطابق جمعہ، ہفتہ، اور اتوار کو تمام مارکٹیں بند رہیں گی، اس سلسلے میں سندھ حکومت کی جانب سے نوٹی فکیشن جاری ہو گیا، وزیر اعلیٰ سندھ نے بھی عوام سے گھروں تک محدود رہنے کی اپیل کر دی۔

آج لاک ڈاؤن کے دوران تمام اجتماعات اور جلوسوں پر پابندی ہوگی، سہ پہر تین بجے تک تمام دکانیں بند رہیں گی، سبزی کی دکانیں اور فارمیسی بھی سہ پہر 3 بجے تک بند رکھنے کا فیصلہ کیا گیا ہے، صوبائی وزیر ناصر شاہ کا کہنا تھا کہ صبح سے سہ پہر 3 بجے تک مکمل لاک ڈاؤن ہوگا۔

آج خصوصی طور پر کسی مذہبی، سیاسی جلسے جلوس اور اجتماع کی اجازت نہیں، مختلف علاقے کنٹینرز لگا کر سیل کر دیے گئے، اہم سڑکیں رکاوٹیں لگا کر بند کر دی گئیں، شارع فیصل، ایم اے جناح روڈ، کھارادر کو رکاوٹیں کھڑی کر کے بند کر دیا گیا۔

عید تک کتنے دن مارکیٹیں کھلیں گی؟ تفصیلات جاری

مساجد میں نماز جمعہ کے محدود اجتماعات ہوں گے، نماز جمعہ میں صرف 5 افراد کو شریک ہونے کی اجازت ہوگی، پنجاب اور خیبر پختون خوا میں بھی نماز جمعہ کے محدود اجتماعات کی اجازت دی گئی ہے، علمائے کرام نے عوام سے گھروں پر نماز ادا کرنے کی اپیل کی ہے۔

شہر قائد میں جگہ جگہ پولیس نے ناکہ بندی کر دی ہے، بھینس کالونی سے نکلنے والی دودھ کی گاڑیوں کو بھی پولیس نے روک لیا، جس پر صدر ڈیری ایسوسی ایشن شاکر عمر گجر نے کہا کہ کراچی میں یومیہ تقریباً 45 لاکھ لیٹر دودھ ترسیل کیا جاتا ہے، کولڈ سپلائی چین نہ ہونے سے دودھ 2 گھنٹے کے بعد خراب ہو سکتا ہے، اس لیے دودھ کی فراہمی کے لیے گاڑیوں کو جانے کی اجازت دی جائے۔

کراچی: شہر قائد میں آج لاک ڈاؤن میں نرمی کے بعد کاروبار کا پہلا روز ہے تاہم اجازت ملنے کے باوجود کاروباری سرگرمیاں صبح 6 بجے بحال نہ ہو سکیں، کاروباری افراد نے 50 روز بعد 8 بجے دکانیں کھول دیں۔

اے آر وائی نیوز کے مطابق کرونا وائرس وبا کے دوران لاک ڈاؤن میں سندھ حکومت نے آج سے دکانیں صبح 6 بجے سے شام 5 بجے تک کھولنے کی اجازت دے دی ہے لیکن صبح 6 بجے بھی شہر کی مارکیٹوں میں دکان دار پہنچے نہ ہی گاہک۔

ملک کے سب سے بڑے شہر میں صبح سویرے کاروباری سرگرمیاں بحال نہ ہو سکیں، دکان داروں کے وقت پر کاروبار پر نہ پہنچنے کی وجہ معلوم نہیں ہو سکی ہے تاہم ایسا لگتا ہے کہ مخصوص کاروبار کھولنے سے متعلق سندھ حکومت کے کنفیوژ فیصلوں کے اثرات اب کاروباری حضرات تک بھی پہنچ گئے ہیں۔

سندھ حکومت نے لاک ڈاؤن سے متعلق جاری نوٹیفکیشن میں ترمیم کردی

خیال رہے کہ لاک ڈاؤن میں نرمی کے دوران کاروبار کے لیے ایس او پی جاری کیے گئے ہیں، دکان پر آنے والے گاہکوں میں سماجی فاصلہ رکھنا دکان دار کی ذمہ داری ہوگی، جس پرعمل درآمد نہ کرانے والی مارکیٹوں کو بند کر دیا جائے گا۔ ایس او پی کے مطابق گاہکوں کے ماسک پہننے اور سماجی فاصلے رکھنے کے ذمہ دار مارکیٹ صدور ہوں گے۔

لاک ڈاؤن میں نرمی کے دوران جلوس، عوامی اجتماعات اور انٹر سٹی ٹرانسپورٹ بند رہے گی، سینما، ساحل سمندر، تفریحی مقامات بند رہیں گے، شاپنگ مالز اور تعلیمی ادارے بھی بند رہیں گے، اندرون اور بیرون شہر ٹرانسپورٹ بھی بند رہے گی، حجام کی دکانیں، سیلون، بیوٹی پارلرز اور کیفے بھی بند رہیں گے۔

ایس او پی کے مطابق جمعہ، ہفتہ اور اتوار کو مکمل لاک ڈاؤن رہے گا۔

کراچی: شہر قائد میں عوام کے لیے سخت لاک ڈاؤن ہے، ڈبل سواری پر پابندی عائد ہے لیکن اسٹریٹ کرمنلز آزاد گھوم پھر کر وارداتیں کر رہے ہیں۔

اے آر وائی نیوز کے مطابق سخت لاک ڈاؤن اور ڈبل سواری پر پابندی کے دوران کراچی کے مختلف علاقوں میں آزادانہ وارداتیں ہو رہی ہیں، عزیز آباد اور بلدیہ میں ڈکیتی اور چوری کی وارداتوں کی سی سی ٹی وی فوٹیج بھی منظر عام پر آ گئی ہے۔

کراچی کے علاقے عزیز آباد میں گزشتہ شام راہ چلتی خواتین طبی عملے سے لوٹ مار کی گئی، اس واردات کی سی سی ٹی وی فوٹیج بھی اے آر وائی نیوز نے چلائی، جس میں موٹر سائیکل پر سوار ملزمان کو لوٹ مار کرتے دیکھا جا سکتا ہے۔

ادھر کراچی کے ایک اور علاقے بلدیہ میں بھی 7 افراد موٹر سائیکل چوری کر کے فرار ہو گئے، ڈکیت گروہ گرفتاری سے بچنے کے لیے واردات میں بچوں کا استعمال کرنے لگے ہیں، اس سلسلے میں اے آر وائی نیوز پر چلائی گئی سی سی ٹی وی فوٹیج میں موٹر سائیکل لفٹر گروہ کو واضح دیکھا جا سکتا ہے۔

فوٹیج میں دیکھا گیا کہ 2 موٹر سائیکلوں پر گروہ کے کارندوں نے کم عمر بچوں کو بھی بٹھا رکھا ہے۔

گزشتہ روز کراچی میں موٹر سائیکل لفٹرز نے سرکاری ادارے واٹر بورڈ کی آنکھ میں بھی دھول جھونک دی تھی، ملزمان چوری کی موٹر سائیکل واٹر بورڈ کے دفتر میں لے جا کر رنگ کرنے کے بہانے کھول رہے تھے، اس دوران موٹر سائیکل کا مالک واٹر بورڈ کے دفتر پہنچ گیا اور ویڈیو بنا لی، پولیس نے ایک ملزم کو گرفتار کر لیا جب کہ 2 مفرور ساتھیوں کی تلاش جاری ہے۔

کراچی کے ایک اور علاقے سچل صفورا کے قریب دن دہاڑے ڈکیتی کی واردات کی گئی ہے، واردات کی سی سی ٹی وی فوٹیج کے مطابق ایک ڈکیت نے ماسک اور دوسرے نے ہیلمٹ پہن رکھا تھا، ڈکیت نے اسلحے کے زور پر دکان میں کسٹمر اور دکان دار سے لوٹ مار کی، کسٹمرز کو دھکے دیے گئے اور مارا پیٹا اور زمین پر بٹھا دیا، ڈکیتوں نے دکان سے 1 لاکھ سے زائد رقم اور موبائل فون چھینے۔

واضح رہے کہ کراچی میں لاک ڈاؤن کا 41 واں روز ہے، شہریوں کی بلا ضرورت نقل و حرکت پر پابندی عائد ہے، ڈبل سواری بھی ممنوع ہے۔

کراچی: شہر قائد سمیت سندھ بھر میں لاک ڈاؤن 32 ویں روز بھی جاری ہے، لاک ڈاؤن کے دوران ڈبل سواری پر پابندی سے کوئی مستثنیٰ نہیں، پولیس حکام نے اہل کار و افسران کو بھی موٹر سائیکل پر ڈبل سواری سفر نہ کرنے کی ہدایت جاری کر دی۔

اے آر وائی نیوز کے مطابق کراچی پولیس حکام نے اپنے اہل کاروں کو ہدایت کی ہے کہ ان کے لیے شٹل سروس شروع کر دی گئی ہے، یہ سروس ساؤتھ، ایسٹ، سینٹرل اور ملیر میں جاری ہے، ویسٹ زون کے اہل کاروں کو بھی پک اینڈ ڈراپ سروس دی جار ہی ہے، اہل کاروں کو تھانوں اور دفاتر کے قریب چھوڑا جا رہا ہے۔

ادھر کراچی شہر میں ایکسپورٹ سیکٹر کی مختلف صنعتوں کو کھلنے اور جزوی کاروبار کی اجازت دی گئی ہے، فیکٹریز کے لیے سخت ایس او پیز جاری کی گئی ہیں، ملازمین کو حفاظتی اقدامات کے بعد داخلے کی اجازت دی جا رہی ہے۔

شہریوں کے لیے بھی ڈبل سواری پر پابندی برقرار ہے، تمام استثنیٰ اور رعایت ختم کی جا چکی ہے، تعلیمی ادارے، سرکاری دفاتر، مارکیٹیں اور پبلک ٹرانسپورٹ بند ہیں، پٹرول پمپس، دواؤں اور اشیائے ضروریہ کی دکانیں اوقات مقررہ میں کاروبار کر سکتی ہیں۔

صدر آل سٹی تاجر اتحاد اور صوبائی وزیر سعید غنی آمنے سامنے

پولیس اور رینجرز کی جانب سے شہر کے مختلف مقامات پر ناکہ بندی ہے، شہریوں کو پوچھ گچھ کے بعد آمد و رفت کی اجازت دی جا رہی ہے، تاہم چند علاقوں میں ناکوں پر آزادانہ آمد و رفت بھی جاری ہے۔

تاجروں کے ایک دھڑے نے یکم رمضان سے کاروبار کھولنے کا اعلان کیا ہے، تاہم حکومت سندھ نے واضح طور پر کہا ہے کہ اس کی اجازت نہیں دی جائے گی، گزشتہ روز آئرن اور ٹمبر مارکیٹس کھلنے پر پولیس نے تاجروں پر تشدد بھی کیا تھا اور چند نمایاں تاجروں کے خلاف مقدمات بھی درج کر کے انھیں گرفتار کیا گیا تھا۔

کراچی: شہر قائد میں لاک ڈاؤن کا آج 30 واں روز ہے، شہر بھر میں مارکیٹیں، بازار اور کاروباری مراکز بند پڑے ہیں۔

اے آر وائی نیوز کے مطابق کراچی میں کرونا وائرس کی وبا کی وجہ سے لگائے گئے لاک ڈاؤن کے دوران شہر کی سڑکوں سے پبلک ٹرانسپورٹ غائب ہے اور شہر بھر کے کاروباری مراکز بند ہیں۔

لاک ڈاؤن کے دوران صبح 8 سے شام 5 بجے تک ہوٹلز اور کھانے پینے کی دکانوں کو کھلنے کی اجازت دے دی گئی، پٹرول پمپ بھی کھلے رکھنے کی اجازت دی گئی ہے۔

کراچی کی صنعتوں میں پیداوراری عمل شروع ہوتے ہی فیکٹریز میں ملازمین کی آمد کا سلسلہ بھی شروع ہو گیا ہے، تاہم فیکٹریز کو کرونا ایس او پیز کا پابند بنایا گیا ہے، گزشتہ روز 2 فیکٹریز کو ایس او پی کی خلاف ورزی پر تالا بند کر دیا گیا تھا، آج فیکٹریز میں ایس او پی پر سختی سے عمل درآمد کیا جا رہا ہے۔

کراچی: مزید 82 برآمدی فیکٹریوں کو کام کرنے کی اجازت مل گئی

کورنگی میں فیکٹریز کے باہر حفاظتی اقدامات کے بعد ملازمین کو داخلے کی اجازت دی گئی، فیکٹریوں میں ملازمین کو سینیٹائزر گیٹ سے گزارا گیا۔ ادھر شہر میں ڈبل سواری پر استثنیٰ کی رعایت ختم کر دی گئی ہے، اب ڈبل سواری کی کسی صورت اجازت نہیں ہوگی تاہم سڑکوں پر خود پولیس اور ٹریفک اہل کار اس ضابطے کی خلاف ورزی کرتے نظر آ رہے ہیں۔

واضح رہے کہ محکمہ داخلہ نے 7 صنعتی علاقوں سے فیکٹریوں کے مالکان کی درخواست پر مزید 82 برآمدی فیکٹریوں کو جمع کرائی گئی انڈر ٹیکنگ کے تحت کام شروع کرنے کی اجازت دے دی ہے، اس سے قبل 69 برآمدی یونٹس کو کام کی اجازت دی گئی تھی، صنعتی علاقوں میں مجموعی طور پر 151 برآمدی یونٹس کو کام شروع کرنے کی اجازت مل چکی ہے۔

کراچی: سندھ ہائی کورٹ نے شہر قائد میں لاک ڈاؤن کے دوران مساجد میں نماز کی ادائیگی پر پابندی کے خلاف درخواست مسترد کر دی۔

اے آر وائی نیوز کے مطابق سندھ ہائی کورٹ نے مساجد میں نماز کی ادائیگی پر پابندی کے خلاف درخواست ناقابل سماعت قرار دیتے ہوئے مسترد کر دی، عدالت کا کہنا تھا کہ انسانی زندگی محفوظ رکھنے کے لیے ایگزیکٹو اختیارات استعمال کیے جا رہے ہیں، اور عدالت اس پالیسی معاملات میں مداخلت نہیں کر سکتی۔

سندھ ہائی کورٹ کا کہنا تھا کہ مساجد میں عبادات کے سلسلے میں صدر پاکستان ڈاکٹر عارف علوی نے علما کا اجلاس بھی طلب کر رکھا ہے، علما کرام کے فتوؤں کی روشنی میں وبا کی وجہ سے عبادات محدود کی جا سکتی ہیں۔

کوشش ہےکہ رمضان میں مساجدکی رونقیں بحال ہوں، نور الحق قادری

ڈپٹی اٹارنی جنرل نے عدالت کو بتایا کہ 18 اپریل کو صدر مملکت کی زیر صدارت مختلف مکاتب فکر کے علما کا اجلاس ہے، جس میں مساجد میں نماز اور رمضان سے متعلق پالیسی وضع کی جائے گی۔

ایڈیشنل اے جی سندھ جواد ڈیرو نے عدالت کے روبرو پیش ہوتے ہوئے کہا کہ مساجد کو بند نہیں کیا گیا صرف محدود کیا گیا ہے، دنیا بھر میں 20 ملین افراد کرونا وائرس سے متاثر ہو چکے ہیں، پاکستان میں بھی وائرس پھیل رہا ہے، یہ اقدام عوام کو وائرس سے محفوظ رکھنے کے لیے اٹھایا گیا ہے۔