Tag: کراچی ٹریفک پولیس

کراچی: ٹریفک پولیس کی کارکردگی سال 2019 میں انتہائی مایوس کن رہی، ماضی کے مقابلے میں بھاری چالان کیے جانے کے باوجود بے ہنگم ٹریفک کا مسئلہ حل نہیں کیا گیا۔

تفصیلات کے مطابق رواں سال 77 کروڑ 33 لاکھ سے زائد کے بھاری چالان کیے گئے لیکن کراچی کی سڑکوں پر چلنے والی بے ہنگم ٹریفک میں تبدیلی نہیں لائی جا سکی۔

رواں سال سب سے زیادہ چالان ون وے اور ہیلمٹ قانون کی خلاف ورزی پر کیے گئے، اے آر وائی نیوز کے نمایندے کے مطابق سال 2019 میں ٹریفک پولیس کی تمام تر توجہ غریب عوام کے چالان کاٹنے پر مرکوز رہی، ٹریفک پولیس اگر اتنی ہی کوشش ٹریفک قوانین کے عمل درآمد پر کرتی تو آج ٹریفک کی صورت حال مختلف ہوتی۔

ایک طرف ٹریفک پولیس کی ساری توجہ سرکاری خزانے کو بھرنے پر مرکوز رہی، دوسری طرف رواں سال مختلف ٹریفک حادثات میں 850 سے زائد افراد جاں بحق جب کہ 15 ہزار سے زائد زخمی ہوئے۔

ڈی آئی جی ٹریفک جاوید مہر کا کہنا ہے کہ رواں سال 31 لاکھ کے چالان ہوئے، ٹریفک فائن کی مد میں پورے سال 75 کروڑ سے زائد کی رقم سرکاری خزانے میں جمع کرائی گئی۔ ایدھی فاؤنڈیشن کے احمد ایدھی کے مطابق رواں سال ہر ماہ تقریباً 12 سو افراد زخمی ہوئے، جس کا مطلب ہے کہ پورے سال میں تقریبآ پندرہ ہزار لوگ زخمی ہوئے۔

شہریوں نے ٹریفک پولیس کی جانب سے مختلف قسم کے چالان اور غریب طبقے کو نشانہ بنانے پر شدید رد عمل کا اظہار کیا، شہریوں کا کہنا تھا کہ بڑی گاڑیوں کو ٹریفک پولیس نہیں روکتی، یہ ہم برسوں سے اس شہر میں دیکھتے آ رہے ہیں، جب کہ غریبوں کو روکا جاتا ہے، ٹریفک اہل کار چابیاں نکال لیتے ہیں اور بد تمیزی کی جاتی ہے۔

کراچی: 80 کروڑ کا چالان کرنے والی ٹریفک پولیس کی سگنل بحالی میں عدم دل چسپی سامنے آ گئی ہے، شہر کی اہم شاہراہوں پر لگے 50 فی صد سے زائد ٹریفک سگنلز خراب ہونے کا انکشاف ہوا ہے۔

تفصیلات کے مطابق کراچی کی اہم شاہراہوں پر پچاس فی صد سے زیادہ ٹریفک سگنلز خراب ہیں، جس پر ٹریفک انجینئرنگ ڈپارٹمنٹ نے تحریری لیٹر لکھ کر جان چھڑا لی ہے۔

اے آر وائی نیوز کے نمایندے کا کہنا ہے کہ ٹریفک پولیس نے چالان کے نام پر شہریوں کی جیب سے 80 کروڑ روپے نکالے، سوال یہ ہے کہ وہ کہاں گئے؟ ٹریفک پولیس حکام نے اس سلسلے میں خاموشی اختیار کر لی ہے۔

ٹریفک انجینئرنگ ڈپارٹمنٹ کے مطابق شہر میں لگے تقریباً 100 سگنلز میں سے 52 سگنلز کی مرمت درکار ہے، جب کہ سب سے زیادہ سگنلز ڈسٹرکٹ سٹی اور ساؤتھ میں خراب ہوئے ہیں، سٹی میں 19، ساؤتھ میں 17، ایسٹ میں 8 سگنل خراب ہیں، جب کہ سینٹرل میں 4، ملیر میں 3 اور ویسٹ میں ایک سگنل خراب پڑا ہوا ہے۔

یہ بھی پڑھیں:  کراچی والوں نے 70 کروڑ روپے ٹریفک پولیس کی نذر کردیے

اے آر وائی نیوز کے مطابق سگنلز خرابی کے باعث آئی آئی چندریگر روڈ، پریڈی اسٹریٹ، ایم اے جناح روڈ پر ٹریفک کی روانی میں خلل معمول بن گیا ہے، کراچی کے مختلف علاقوں میں بد ترین ٹریفک جام کی صورت حال بھی اس غفلت کا ثبوت ہے، دوسری طرف بند سگنل توڑنے پر شہریوں سے ہاتھوں ہاتھ جرمانہ وصول کیا جا رہا ہے، اہل کار جرمانہ نہ دینے والے سے نظرانہ وصول کرتے بھی نظر آتے ہیں۔