کراچی: شہر قائد کے سب سے بڑے غیر قانونی واٹر ہائیڈرنٹ سے محکمے کو اربوں روپے کے نقصان کا انکشاف ہوا ہے، واٹر کارپوریشن نے غیر قانونی پلانٹ کے خلاف مقدمہ درج کروا دیا۔
تفصیلات کے مطابق واٹر بورڈ کی جانب سے چند روز قبل ملیر سکھن کے علاقے لیبر اسکوائر میں غیر قانونی واٹر ہائیڈرنٹ اور کنکشنز کے خلاف آپریشن میں ایک بڑی کامیابی ملی تھی، جس میں آپریشن مکمل ہونے کے بعد اب واٹر کارپوریشن کے افسر یعقوب نے سکھن تھانے میں غیر قانونی زینت آر او پلانٹ ہائیڈرنٹ کے خلاف مقدمہ بھی درج کروا دیا۔
مقدمہ کاشف تسلیم، شعیب، عماد اقبال قائمخانی کے خلاف درج کیا گیا، عبدالخالق مروت اور محمد شفیق سمت 15 ملزمان کو مقدمے میں شامل کیا گیا ہے۔
درخواست گزار یعقوب کے مطابق غیر قانونی ہائیڈرنٹ اور کنکشن کے خلاف آپریشن کیے جا رہے تھے، اسی دوران مہران ہائی وے پر غیر قانونی کنکشن کے خلاف کام شروع کیا گیا، جہاں غیر قانونی زینت آر او پلانٹ ہائیڈرنٹ میں غیر قانونی طور پر چار انچ ڈایا والے 6 کنکشن ہالیجی 54 انچ ڈایا سے لگے ہوئے تھے، جس کی کنڈیوٹ کی گراؤنڈ لیول سے گہرائی 15 فٹ کے قریب تھی۔
درخواست گزار کے مطابق واٹر پائپ لائن گہری سرنگ سے کار سروس سینٹر سے گزاری گئی تھی، جب واٹر کارپوریشن کے مزدور اندر گئے تو بالٹی، چھنی اور کلیمپ ملا اور ایک خفیہ آر سی سی کی دیوار سامنے آ گئی، جہاں پائپ جا رہے تھے۔ جب دیوار کو توڑا گیا تو اندر پانی کے تین بڑے ٹینک بنائے گئے تھے۔
مقدمے کے متن کے مطابق ملزمان نے خودکار پمپنگ کا سسٹم بنایا ہوا تھا، درخواست گزار کے مطابق پانی کی اس چوری کی وجہ سے واٹر کارپوریشن کو اربوں روپے نقصان ہوا، جس کی وصولی قانونی طور پر ذمہ دار افراد سے کی جائے، اس کارروائی کے دوران 2 رائفل، ایک منی کلاشنکوف، ایک رپیٹر بھی ملے اور مدعی مقدمہ نے غیر قانونی ہائیڈرنٹ کی پراپرٹی کو سیل کرنے کی درخواست بھی کی۔
