Tag: کراچی پولیس آفس حملہ

کراچی : کراچی پولیس آفس حملے میں دہشت گردوں کے زیراستعمال گاڑی سے حملہ آوروں کے 5 فنگر پرنٹس حاصل کرلئے گئے۔

تفصیلات کے مطابق کراچی پولیس آفس حملے کی تحقیقات جاری ہے، دہشت گردوں کے زیراستعمال گاڑی کا فارنزک مکمل کر لیا گیا۔

تحقیقاتی ذرائع نے بتایا ہے کہ فارنزک کے دوران حملہ آوروں کے 5 فنگرپرنٹس حاصل کیے گئے، حاصل کردہ فنگرپرنٹس کا نادرا سے ریکارڈ چیک کیا جا رہا ہے۔

گاڑی سے حملہ آوروں کے جوتے،ٹوپی اوربنیان ملی جبکہ رسی ،پلاسٹک والی چٹائی ،رضائی، موزے ،کلاشنکوف کا میگزین بھی ملا ہے۔

اس کے علاوہ پلاسٹک کی بوری اوررومال بھی گاڑی میں موجود تھا، گاڑی کے اصل مالک کا تاحال سراغ نہ لگایا جا سکا۔

دوسری جانب مارے گئے تیسرے دہشت گرد کے فنگرپرنٹس نادرا کے ریکارڈ سے میچ نہیں ہوسکے۔

کراچی : سندھ میں پولیس اہلکاروں کے دوران ڈیوٹی اسمارٹ فون کے استعمال پر پابندی عائد کردی گئی۔

تفصیلات کے مطابق کراچی پولیس چیف کے دفتر پر حملے کے بعد سندھ پولیس متحرک ہوگئی۔

سندھ میں پولیس اہلکاروں کے دوران ڈیوٹی سمارٹ فون کے استعمال پر پابندی عائد کردی گئی۔

آئی جی سندھ آفس کی جانب سے حکم نامہ جاری کردیا گیا ہے ، جس میں کہا ہے کہ پولیس افسران اور اہلکار اکثر دوران ڈیوٹی سمارٹ فون استعمال میں مصروف پائے جاتے تھے، اب سندھ میں تمام پولیس اہلکار دوران ڈیوٹی سمارٹ فون استعمال نہیں کریں گے۔

حکم نامہ کے مطابق موبائل فون اپنی ڈیوٹی کے دوران خاص طور پر وہ اہلکار استعمال نہیں کرے گے جو فیلڈ سیکیورٹی ڈیوٹی پر تفویض کیے گئے ہیں۔

حکم نامے میں خبردار کیا ہے کہ جو افسران یا اہلکار دوران دیوٹی سمارٹ موبائل فون استعمال کرتا ہوا پایا گیا ان کے خلاف کارروائی کی جائے گی۔

حکم نامہ مجاز اتھارٹی کی منظوری سے جاری کیا گیا ہے ،حکم نامہ کی نقول سندھ میں تعینات تمام ایڈیشنل آئی جیز،ڈی ائی جیز،ایس ایس پیز،،ڈی ائی جیز ہیڈ کوارٹر کو بھیج دی گئی ہے۔

کراچی : قانون نافذ کرنے والے اداروں کو کراچی پولیس آفس حملے میں ہلاک ہونے والے خودکش بمبار کا ریکارڈ نہ مل سکا۔

تفصیلات کے مطابق کراچی پولیس آفس حملہ کیس میں تیسرے دہشت گرد کی شناخت تاحال نہ ہوسکی۔

پولیس ذرائع نے کہا ہے کہ قانون نافذ کرنے والے اداروں کو خودکش بمبار کا ریکارڈ نہیں ملا ، نادرا سسٹم میں خودکش بمبار کا ڈیٹا موجود نہیں۔

ذرائع کا کہنا تھا کہ خودکش بمبار غیر ملکی بھی نہیں ہے ، خودکش بمبار سے ملنے والا موبائل فون بھی کلیئر ہے۔

ذرائع کے مطابق کے پی او حملہ کیس کی تحقیقات تیزی سےکی جارہی ہیں، شناخت ہونے والے2 دہشت گردوں کےاہل خانہ سے تفتیش کی گئی۔

اس سے قبل انسپکٹر جنرل پولیس (آئی جی) سندھ غلام نبی میمن نے بتایا تھا کہ کراچی پولیس آفس حملے میں تیسرے دہشتگرد کی شناخت نہیں ہوئی ، تیسرے دہشتگرد سے متعلق مفروضوں اور بغیر تصدیق کی خبروں سے گریز کیا جائے۔

یاد رہے کراچی پولیس چیف کے دفتر پر حملہ کرنے والے دو دہشت گردوں کی شناخت ہوئی تھی۔

ایک دہشت گرد کی شناخت زالا نورکے نام سے ہوئی، جس کا تعلق وزیرستان سے تھا جبکہ مارے گئے دوسرے دہشت گرد کی شناخت کفایت اللہ کے نام سے ہوئی جو لکی مروت کا رہا ئشی تھا۔

کراچی : تفتیشی حکام نے کراچی پولیس آفس پر حملہ کرنے آنے والے دہشت گردوں کا روٹ میپ تیار کرنا شروع کردیا۔

تفصیلات کے مطابق کراچی پولیس آفس پر حملے سے متعلق تفتیشی حکام نے روٹ میپ تیار کرنا شروع کردیا۔

تفتیشی ٹیم نے اب تک ایمپریس مارکیٹ تک کی فوٹیجز حاصل کی ہیں ، ذرائع نے بتایا ہے کہ حملہ آور ایمپریس مارکیٹ کی جانب سے آئے تھے اور لکی اسٹار سے کار اور موٹرسائیکل پر شارع فیصل گئے۔

ذرائع کا کہنا ہے کہ دہشت گرد شارع فیصل سے ہوتے ہوئے کے پی او پہنچے، کار چلانے والے سہولتکار نے کے پی او تک پہنچایا۔

ذرائع کے مطابق کراچی پولیس آفس پہنچ کر ڈرائیور اترا اور بائیک سنبھالی اور مبینہ سہولتکار ساتھیوں سے گلے مل کر واپس چلے گئے۔

ذرائع نے مزید بتایا کہ دہشت گرد ہتھیار اور بیگ اٹھا کر کے پی او میں داخل ہوئے ، ملزمان کراچی پولیس آفس کے اندرونی راستوں سے واقف تھے، لوکل سہولتکار کی جانب سے مکمل تفصیلات فراہم کی گئی تھی۔

کراچی پولیس آفس (کے پی او) میں گزشتہ روز دہشت گردوں سے مقابلہ کرتے ہوئے ہیڈ کانسٹیبل غلام عباس لغاری بھی شہید ہوگئے۔

اے آر وائی نیوز کے مطابق کراچی پولیس آفس حملے میں دہشت گردوں کا مقابلہ کرتے ہوئے لاڑکانہ سے تعلق رکھنے والے ہیڈ کانسٹیبل غلام عباس لغاری نے جام شہادت نوش کیا۔

شہید غلام عباس لغاری نے پسماندگان میں بیوہ اور چار بچے چھوڑے ہیں۔

بھائی کے مطابق شہید غلام عباس لغاری آرمی سے ریٹائرمنٹ کے بعد پولیس میں بھرتی ہوئے تھے۔

واضح رہے کہ گزشتہ روز شاہراہ فیصل ایف ٹی سی پُل کے قریب کراچی پولیس آفس میں تین دہشتگرد داخل ہوئے تھے جس کے بعد قانون نافذ کرنے والے اداروں کے جوانوں نے ان سے تقریباً 3 گھنٹے مقابلہ کیا تھا۔ دو دہشتگرد فائرنگ میں ہلاک ہوگئے جبکہ آخری دہشتگرد نے خود کو دھماکا خیز مواد سے اڑا دیا تھا۔

یہ پڑھیں: کے پی او حملہ: سی سی ٹی وی فوٹیجز کے مناظر سامنے آگئے

کے پی او پر حملے کی تحقیقات کے لیے کمیٹی قائم کر دی گئی۔ ہلاک دہشتگردوں کا موبائل فون برآمد ہوا ہے جبکہ جائے وقوعہ سے ملنے والی شر پسندوں کی کلاشکوف پر درج نمبر مٹا ہوا ہے۔ موبائل فون اور اسلحہ کو فرانزک کے لیے بھیج دیا گیا۔

ڈی آئی جی ساؤتھ عرفان بلوچ کا کہنا تھا کہ دہشتگردوں نے حملے سے قبل کم از کم ایک ماہ تک ریکی کی، وہ ایڈیشنل آئی جی کراچی کو ٹارگٹ کرنا چاہتے تھے، انہیں ایڈیشنل آئی جی کا فلور بھی معلوم تھا۔