کراچی : ایم کیو ایم کے رہنما حیدرعباس رضوی کراچی پہنچ گئے، وہ والدہ کی عیادت کےلیے پاکستان آئے ہیں، ان کی والدہ عرصے سے پھیپھڑوں کےعارضےمیں مبتلا ہیں۔

تفصیلات کے مطابق متحدہ قومی موومنٹ پاکستان کے رہنما حیدرعباس رضوی اسلام آباد سے کراچی پہنچ گئے، کراچی پہنچنے پر حیدر عباس رضوی کو ایم کیو ایم کے رہنما عامر خان نے ایئرپورٹ پر خوش آمدید کہا۔

ذرائع کا کہنا ہے کہ حیدرعباس رضوی 2 روز پہلے دبئی سے پاکستان پہنچے تھے، وہ کافی عرصےسے پہلے کینیڈااورپھر دبئی میں مقیم رہے۔

ذرائع کے مطابق حیدرعباس رضوی والدہ کی عیادت کےلیےپاکستان آئے ہیں، ان کی والدہ عرصے سے پھیپھڑوں کےعارضے میں مبتلا ہیں۔

مزید پڑھیں : ایم کیو ایم پاکستان کے سینئررہنما حیدر عباس رضوی کی پاکستان واپسی

یاد رہے کہ 22 اگست کی متنازع تقریر کے بعد ایم کیو ایم رہنماء نے فاروق ستار کی سربراہی میں بننے والی جماعت کی کھل کر حمایت کرتے ہوئے پاکستان زندہ باد کا نعرہ لگایا تھا تاہم گزشتہ کچھ ماہ قبل ہونے والی ایم کیو ایم خلیج کے دوران فاروق ستار نے حیدر عباس رضوی کو براہ راست پریس کانفرنس کے دوران جھاڑ بھی پلائی تھی۔

فاروق ستار کا کہنا تھا کہ ’حیدر بھائی میں نے آپ کے میسج خود پڑھے جس میں آپ نے بہادر آباد کی حمایت کرنے کا اعلان کیا اور کارکنان کو بھی اسی بات کی ترغیب دی‘ْ

واضح رہے کہ سوشل میڈیا پر ایم کیو ایم رہنما کی ایک تصویر وائرل ہوئی تھی جس میں دعویٰ کیا گیا تھا کہ وہ کینیڈا میں آن لائن ٹیکسی سروس میں بطور ڈرائیور اپنی ذمہ داریاں انجام دیتے ہوئے ذریعہ معاش چلا رہے ہیں البتہ اس تصویر کی کوئی تصدیق یا تردید سامنے نہیں آئی تھی۔