اسلام آباد: وزیراعظم عمران خان آج کراچی ٹرانسفارمیشن پلان کے تحت شہر کے لیے 802 ارب روپے کا خصوصی پیکج کا اعلان کریں گے۔
تفصیلات کے مطابق وزیراعظم عمران خان کی زیر صدارت کراچی کمیٹی کا اجلاس ہوا جس میں وفاقی وزیر اسد عمر، شبلی فراز، علی زیدی، امین الحق، گورنر سندھ عمران اسماعیل اور وزیراعلیٰ سندھ مراد علی شاہ بھی موجود تھے۔
اجلاس میں کراچی سمیت سندھ کی صورت حال پر تبادلہ خیال کرنے سمیت وفاق اور صوبے میں باہمی تعاون،ورکنگ ریلیشن شپ پرگفتگو کی گئی۔
گورنر سندھ عمران اسماعیل نے وزیراعظم پاکستان کو کراچی میں بارش کے بعد کی صورت حال پر بریفنگ دی۔وزیراعظم کو کراچی کے علاقوں کی تباہ حالی سے متعلق بتایا گیا۔
اجلاس میں وزیراعظم عمران خان کو کے الیکٹرک کی جانب سے بجلی کی طویل لوڈشیڈنگ پر بھی بریفنگ دی گئی۔
قبل ازیں کراچی پہنچنے پر گورنر سندھ عمران اسماعیل اور وفاقی وزیر منصوبہ بندی اسد عمر نے وزیراعظم عمران خان کا استقبال کیا وفاقی وزیر اطلاعات شبلی فرار اور ممبر قومی اسمبلی عامر محمود کیانی بھی وزیراعظم کے ہمراہ کراچی آئے۔
وزیراعظم عمران خان نے کراچی پہنچنے کے فوراََ بعد ہیلی کاپٹر کے ذریعے بارشوں سے متاثرہ علاقوں کا فضائی جائزہ لیا۔
وزیراعظم آج کراچی ٹرانسفارمیشن پلان کے تحت شہر کے لیے 802 ارب روپے کے خصوصی پیکج کا اعلان کریں گے۔
وزیراعظم عمران خان سے ایم کیو ایم کا وفد اور جی ڈی اے کے رہنما سید صدر الدین شاہ بھی الگ الگ ملاقاتیں کریں گے۔
وزیراعظم پاکستان دورہ کراچی کے دوران پاکستان اسٹاک ایکسچینج بھی جائیں گے جس کے بعد وہ آج شام کراچی سے واپس اسلام آباد روانہ ہوجائیں گے۔
