ARYNews.tv | Urdu – Har Lamha Bakhabar

Tag: کراچی کنگز

  • پی ایس ایل 4: پشاور زلمی نے کراچی کنگز کے خلاف میچ جیت لیا

    پی ایس ایل 4: پشاور زلمی نے کراچی کنگز کے خلاف میچ جیت لیا

    کراچی: پاکستان سپرلیگ کے تیسویں میچ میں پشاور زلمی نے کراچی کنگز کو شکست دے دی، میزبان ٹیم ایلیمنٹری راؤنڈ کا میچ 14 مارچ کو اسلام آباد یونائیٹڈ کے خلاف کھیلے گی۔

    تفصیلات کے مطابق پی ایس ایل کے چوتھے سیزن کے پانچویں مرحلے کا تیسرا میچ نیشنل اسٹیڈیم میں کراچی کنگز اور پشاور زلمی کی ٹیموں کے درمیان کھیلا گیا۔

    کراچی کنگز کے کپتان عماد وسیم نے ٹاس جیت پر پہلے فیلڈنگ کا فیصلہ کیا۔

    پشاور زلمی کو اچھا آغاز ملا، اوپنر کامران اکمل اور امام الحق نے عمدہ بیٹنگ کی اور 137 رنز کی شراکت داری قائم کی، دونوں بلے بازوں نے کراچی کنگز کے باؤلرز کو گراؤنڈ کے چاروں طرف بہت اچھے طریقے سے کھیلا اور ٹیم کی پوزیشن مستحکم کی، کراچی کنگز کے لیے کولن منرو کا اوور ٹرننگ پوائنٹ ثابت ہوا کیونکہ انہوں نے اننگز کے 14ویں اوور میں کامران اکمل اور پولارڈ کو پویلین کی راہ دکھائی۔

    پشاور زلمی کی تیسری وکٹ 166 رنز پر گری جبکہ اس دوران اوپنر امام الحق نے اپنی نصف سنچری بھی مکمل کی، محمد عامر نے اسی اوور میں 171 کے مجموعی اسکور پر امام الحق کو 59 رنز پر دوسرا کلین بولڈ کیا اور سیمی الیون کے اسکور کو روکنے کی کوشش کی، محمد عامر نے وکٹ لینے کے سلسلے کے جاری رکھتے ہوئے اگلے ہی اوور میں سیمی کو بھی پویلین کی راہ دکھائی۔

    اننگز کے آخری اوور میں عثمان شنواری نے وہاب ریاض کو پویلین واپس بھیجا جبکہ آخری گیند پر حسن علی رن آؤٹ ہوئے یوں پشاور زلمی کی ٹیم نے مقررہ 20 اوورز میں 7 وکٹوں کے نقصان پر 203 رنز بنائے، کامران اکمل 86 اور امام الحق 59 کے ساتھ نمایاں بلے باز رہے، کراچی کنگز کے باؤلر محمد عامر نے تین کولن منرو نے دو اور عثمان شنواری نے ایک وکٹ حاصل کی۔

    کراچی کنگز اننگز

    ہدف کے تعاقب میں کراچی کنگز کو آغاز اچھا نہ مل سکا اور کولن منرو صرف تین رن پر آؤٹ ہوئے، انہیں امپائر نے غلط ایل بی ڈبلیو آؤٹ قرار دیا جبکہ ری ویو میں گیند وکٹ کے باہر کی طرف جارہی تھی، بعد ازاں بابر اعظم اور لیونگ اسٹون بالترتیب 13 اور 22 کے مجموعی اسکور پر پویلین روانہ ہوئے۔

    ڈنک اور کولن انگرام نے محتاط انداز میں بیٹنگ کرتے ہوئے اسکور 65 تک پہنچایا تو  چوتھی وکٹ بھی کر گئی، دوسری طرف انگرام نے جارحانہ انداز میں بیٹنگ جاری رکھی اور نصف سنچری مکمل کی، اگلے آؤٹ ہونے والے کھلاڑی افتخار احمد تھے جو 87 کے مجموعی اسکور پر پویلین روانہ ہوئے یوں کراچی کنگز کی آدھی ٹیم پویلین لوٹ گئی۔

    کولن انگرام چودہویں اوور میں ٹائمل ملز کی گیند پر 37 گیندوں پر چار چھکوں اور 7 چوکوں کی مدد سے 71 رنز کی شاندار اننگز کھیل کرکیچ آؤٹ ہوئے۔

    کراچی کنگز کی ساتویں وکٹ 138 کے مجموعی اسکور پر اُس وقت گری جب سہیل خان صرف ایک رن بنا کر پویلین واپس روانہ ہوئے، محمد عامر، عمر خان اور عماد وسیم بالترتیب 140 اور 142 پر آؤٹ ہوئے۔

    کراچی کنگز کی جانب سے کولن انگرام 71 اور کپتان عماد وسیم 30 رنز بنا کر نمایاں بلے باز رہے جبکہ زلمی کے حسن علی نے تین ، ثمین گل، ٹائمل ملز اور وہاب ریاض نے دو دو وکٹیں حاصل کیں، پشاور زلمی نے کراچی کنگز کو 61 رنز سے شکست دے کر فتح اپنے نام کی۔

    ایلیمنیٹری راؤنڈ

    میچ کے ساتھ پاکستان سپرلیگ کا گروپ مرحلہ اختتام پذیر ہوا، کراچی کنگز اب ایلیمنٹری راؤنڈ میں 14 مارچ کو اسلام آباد یونائیٹڈ سے مقابلہ کرے گی، اسی طرح کوئٹہ گلیڈی ایٹرز اور پشاور زلمی کے درمیان 13 مارچ کو مقابلہ ہوگا، فاتح ٹیم فائنل تک رسائی حاصل کرے گی۔

    دونوں ٹیموں نے اسکواڈ میں ایک ایک تبدیلی کی تھی کراچی کنگز نے عامر یامین کی جگہ محمد عامر جبکہ پشاور زلمی نے مصباح الحق کی جگہ صہیب مقصور کو ٹیم میں شامل کیا گیا تھا۔

    اسکواڈ

    کراچی کنگز

    عماد وسیم (کپتان)، کولن انگرام (نائب کپتان)،بابر اعظم ، کولن منرو، لیام لیونگ اسٹون، بین ڈنک، افتخار احمد، محمد عامر، سہیل خان، عثمان شنواری، عمر خان

    پشاور زلمی

    امام الحق، کامران اکمل، عمر امین، صہیب مقصود، لیام ڈاؤسن، کیورن پولارڈ، ڈیرن سیمی (کپتان)، وہاب ریاض، حسن علی، ٹائمل ملز، ثمین گل

    کراچی کنگز اور پشاور زلمی دونوں ہی ٹیمیں پلے آف مرحلے تک رسائی حاصل کرچکی ہیں، میزبان ٹیم فتح حاصل کر کے پوائنٹس ٹیبل پر رن ریٹ کی اوسط سے ایک درجہ ترقی کرسکتی تھی۔ میچ سے قبل پوائنٹس ٹیبل پر  پشاور زلمی 12 پوائنٹس کے ساتھ دوسرے جبکہ کراچی کنگز 10 پوائنٹس کے ساتھ چوتھے نمبر پر تھی۔

    یاد رہے کہ ایک روز قبل کھیلے جانے والے میچ میں کراچی کنگز نے سنسنی خیز مقابلے کے بعد کوئٹہ گلیڈی ایٹرز کو ایک رن سے شکست دی تھی، عماد اور سیمی الیون جیت کے تسلسل کو برقرار رکھنے کی خواہش مند تھیں۔

    ویڈیو دیکھیں: چار سال سے ہار ہار کر تھک گیا ہوں: رانا فواد

    قبل ازیں ملتان سلطانز اور لاہور قلندرز کی ٹیموں کے مابین پاکستان سپرلیگ کا 29واں میچ کھیلا گیا جس میں لاہور قلندرز کو ایک بار پھر شکست کا سامنا کرنا پڑا۔

  • پی ایس ایل4: کراچی کنگز اور پشاور زلمی کا ٹاکرا آج ہوگا

    پی ایس ایل4: کراچی کنگز اور پشاور زلمی کا ٹاکرا آج ہوگا

    کراچی: پاکستان سپرلیگ کے سیزن فورمیں آج دو میچز کھیلے جائیں گے، لاہور قلندرز کا مقابلہ ملتان سلطانزجبکہ کراچی کنگز پشاور زلمی سے ٹکرائے گی۔

    تفصیلات کے مطابق پی ایس ایل 4 کے پہلے میچ میں لاہور قلندرز اورملتان سلطانز پنجہ آزمائی کریں گے، دوسرے میچ میں کراچی کنگز اور پشاور زلمی آمنے سامنے ہوں گے۔

    نیشنل اسٹیڈیم کراچی میں پہلا میچ دوپہر دو بجے ہوگا جبکہ دوسرا میچ شام 7 بجے کھیلا جائے گا۔

    پوائنٹس ٹیبل پر پشاور زلمی اس وقت 12 پوائنٹس کے ساتھ دوسرے اور کراچی کنگز 10 پوائنٹس کے ساتھ چوتھے نمبر پرموجود ہے۔

    کراچی کنگز اگر آج پشاور زلمی کے خلاف میچ جیت جاتی ہے تو دوسری پوزیشن کے لیے کراچی کنگز اور پشاور زلمی کا رن ریٹ دیکھا جائے گا۔

    دوسری جانب لاہور قلندرز اور ملتان سلطانز کی ٹیمیں پہلے ہی ایونٹ سے باہرہوچکی ہیں، اس لیے میچ کے نتیجے سے پوائنٹس ٹیبل پرکوالیفائرٹیموں کو کوئی فرق نہیں پڑے گا۔

    عثمان شنواری کی شاندار باؤلنگ، گلیڈی ایٹرزکو ایک رن سے شکست

    یاد رہے کہ گزشتہ روز پاکستان سپرلیگ سیزن فور کے 28ویں میچ میں کراچی کنگز نے کوئٹہ گلیڈی ایٹرز کو ایک رن سے شکست دی تھی ،191 رنز کے جواب میں کوئٹہ کی ٹیم سات وکٹوں کے نقصان پر189رنز بنا سکی تھی۔

  • پی ایس ایل4: کراچی کنگز اورکوئٹہ گلیڈی ایٹرزکا ٹاکرا آج ہوگا

    پی ایس ایل4: کراچی کنگز اورکوئٹہ گلیڈی ایٹرزکا ٹاکرا آج ہوگا

    کراچی : پاکستان سپرلیگ کے چوتھے ایڈیشن میں آج کراچی کنگز اورکوئٹہ گلیڈی ایٹرز کے درمیان ٹاکرا ہوگا۔

    تفصیلات کے مطابق پی ایس ایل کے چوتھے ایڈیشن میں آج کراچی کنگز اورکوئٹہ گلیڈی ایٹرز پنجہ آزمائی کریں گے۔

    کراچی کنگز اورکوئٹہ گلیڈی ایٹرز میں میچ شام 7 بجے ہوگا جبکہ شائقین کو وقت پر اسٹیڈیم پہنچنا ہوگا، نیشنل اسٹیڈیم کے دروازے دوپہر12 بجے کھول دیے جائیں گے اور شام 5 بجے بند کردیے جائیں گے۔

    ایونٹ کو کامیاب بنانے کے لیے سیکیورٹی کے انتہائی سخت انتظامات کیے گئے ہیں، 13 ہزار سیکیورٹی اہلکار نیشنل اسٹیڈیم اور اس کے اطراف فرائض انجام دے رہے ہیں۔

    انتطامیہ نے آج نیشنل اسٹیڈیم میں میچ دیکھنے کے لیے آنے والوں کے لیے کئی مقامات پرپارکنگ پوائنٹس بنائے ہیں، شائقین کو شٹل سروس کے ذریعے اسٹیڈیم تک پہنچایا جائے گا۔

    شائقین کو ٹکٹ اور اصل شناختی کارڈ ساتھ لانا ہوگا جبکہ کھانے پینے اور خواتین کے ہینڈ بیگ لانے پر پابندی عائد کی گئی ہے۔

    یاد رہے کہ گزشتہ سال پی ایس ایل کے ایلمنیٹر میں اسلام آباد یونائیٹڈ نے کراچی کنگز کو شکست دے کر ٹائٹل کی دوڑ سے باہر کردیا تھا۔

    کراچی کنگز کے کپتان عماد وسیم اپنے 8 پوائنٹس میں مزید 2 کا اضافہ کرکے پلے آف مرحلے میں رسائی حاصل کرسکتے ہیں اس کے لیے انہیں آج کوئٹہ گلیڈی ایٹرز کو شکست دینا ہوگی۔

  • چار سال سے کراچی کنگز کی نمائندگی کررہا ہوں، پہلی بار فینز کے سامنے پرفارم کروں گا، روی بوپارا

    چار سال سے کراچی کنگز کی نمائندگی کررہا ہوں، پہلی بار فینز کے سامنے پرفارم کروں گا، روی بوپارا

    کراچی: غیر ملکی کھلاڑی روی بوپارا نے کہا ہے کہ چار سال سے کراچی کنگز کی نمائندگی کررہا ہوں، پہلی بار فینز کے سامنے پرفارم کروں گا جو میرے لیے فخر کی بات ہے۔

    تفصیلات کے مطابق کراچی کنگز اوراسلام آبادیونائیٹڈ نے نیشنل اسٹیڈیم میں پریکٹس کی جس میں دونوں ٹیموں کے تمام ملکی و غیر ملکی کھلاڑیوں نے حصہ لیا۔

    پریکٹس سیشن کے بعد گفتگو کرتے ہوئے روی بوپارا کا کہنا تھا کہ 4سال سے کراچی کنگز کی نمائندگی کررہا ہوں، پہلی بارکراچی میں فینز کےسامنےکھیلنا میرے لیے بہت فخرکی بات ہے۔

    اُن کا کہنا تھا کہ ہم پروفیشنل کرکٹر ضرور ہیں مگر مجھ سمیت تمام کھلاڑیوں کے لیے  یہ لمحات یادگارہوں گے، ٹیم نے حکمت عملی تیار کرلی اب ہم کوئٹہ گلیڈی ایٹرز اور پشاور زلمی کا سامناکرنےکے لیے تیار ہیں۔

    مزید پڑھیں: آئی سی سی کا کراچی میں پی ایس ایل کے سیکیورٹی انتظامات پر اظہار اطمینان

    دوسری جانب ڈی جی رینجرز میجرجنرل محمد سعید نے نیشنل اسٹیڈیم کا دورہ کیا جہاں انہیں سیکیورٹی انتظامات سے متعلق بریفنگ دی گئی۔

    یاد رہے کہ کراچی میں پی ایس ایل کے کا انعقاد کیا جارہا ہے جس کے لیے تمام انتظامات مکمل ہیں جبکہ تمام فرنچائزز کے ملکی و غیرملکی کھلاڑی بھی کراچی پہنچ گئے۔

    مزید پڑھیں: پی ایس ایل 4 میچز، کراچی کا متبادل ٹریفک پلان جاری

    نیشنل اسٹیڈیم میں ہونے والے میچز کے حوالے سے ٹریفک پولیس نے متبادل ٹریفک روٹ پلان جاری کردیا جبکہ اسٹیڈیم جانے والے شائقین کو تنبیہ کی ہے کہ وہ ٹکٹ کے ساتھ اصل شناختی کارڈ رکھیں۔

    پارکنگ کے مقامات

    پارکنگ مقامات پر 4 مقامات یونیورسٹی روڈ پر ہیں جن میں وفاقی اردو یونیورسٹی گراؤنڈ، حکیم سعید پارک سے متصل گراؤنڈ، بیت المکرم مسجد کے سامنے اتوار بازار والا گراؤنڈ اور ایکسپو سینٹر کا میدان شامل ہے جبکہ پانچواں مقام ڈالمیا پیٹرول پمپ کے نزدیک غریب نواز فٹبال گراؤنڈ ہے۔

    شائقین کس طرح اسٹیڈیم پہنچیں گے؟

    پولیس کی جانب سے پارکنگ کے لیے پانچ مقامات مختص کیے گئے، اسٹیڈیم جانے والے شائقین کو مرحلہ وار تلاشی کروا کے بذریعہ شٹل سروس اسٹیڈیم پہنچایا جائے گا، گراؤنڈ کے دروازے صبح 12 بجے سے کھولے جائیں گے جبکہ میچ شروع ہونے سے دو گھنٹے قبل اسٹیڈیم انہیں بند کردیا جائے گا۔

    یہ بھی پڑھیں: پی ایس ایل 4، کراچی میچز کا سیکیورٹی پلان مرتب، شائقین کے لیے ہدایت نامہ جاری

    شائقین کو اپنے ہمراہ موبائل فون لے جانے کی اجازت ہوگی اس کے علاوہ وہ پانی کی بوتل بھی اپنے ساتھ نہیں رکھ سکتے جبکہ خواتین بھی اپنے ہینڈ بیگس ساتھ نہیں لے جا سکیں گی۔

    یہ بھی یاد رہے کہ  نیشنل اسٹیڈیم میں پی ایس ایل سیزن فور کے شیڈول میچز 9، 10، 11، 13 اور 15 جبکہ فائنل 17 مارچ کو کھیلا جائے گا جس کے تحت مختلف شاہراؤں پر امن و امان کی صورتحال کے پیش نظر ٹریفک کی روانی مکمل بند ہوگی۔

     

  • کراچی کنگز کے تمام غیر ملکی کھلاڑی پاکستان میں کھیلنے کے لئے پرجوش

    کراچی کنگز کے تمام غیر ملکی کھلاڑی پاکستان میں کھیلنے کے لئے پرجوش

    کراچی: کراچی کنگز کے مالک سلمان اقبال نے کہا ہے کہ پاکستان سپرلیگ کے آٹھ میچز کراچی میں ہونا خوش آئند ہے، ہوم کراوڈ کے سامنے ٹیم کھیلے گی تو جوش عروج پرہوگا۔

    تفصیلات کے مطابق کراچی کنگز سمیت دیگر پی ایس ایل فرنچائزز سے کھیلنے والے کے تمام غیر ملکی کھلاڑی پاکستان میں کھیلنے کے لیے بے تاب ہیں اور انہوں نے کہا ہے کہ ہم اپنی ٹیم کے ساتھ پاکستان آرہے ہیں۔

    کراچی روانگی سے قبل اے آر وائی کے نمائندے سے گفتگو کرتے ہوئے  کہا کہ سوشل میڈیا پر ہم نے شائقین کا جوش دیکھا اس لیے اب ہم بھی پرجوش ہیں۔

    لیونگ اسٹون اور ایرن سمرز کہتے ہیں پاکستانی شائقین کرکٹ کے دیوانے ہیں انکے سامنے کھیلنا اچھا تجربہ ہوگا۔

    مزید پڑھیں: پی ایس ایل 4 میچز، کراچی کا متبادل ٹریفک پلان جاری

    کراچی کنگز کے اسکواڈ میں شامل غیرملکی کھلاڑیوں میں روی بوپارہ، بین ڈنک، کولن انگرام، لیام لیونگ اسٹون، کولن منرو، سکندر رضا اور ایرون سمرز شامل ہیں جو نیشنل اسٹیڈیم میں ہونے والے میچز میں اپنا کھیل پیش کریں گے۔

    سماجی رابطے کی ویب سائٹ پر غیر ملکی کھلاڑیوں نے شائقین کرکٹ کے لیے خصوصی پیغامات بھی ارسال کیے۔

    روی بوپارا نے بتایا کہ میں چار سال پاکستان آرہا ہوں اور کراچی کنگز کے ہوم گراؤنڈ پر شائقین کے سامنے ہوں گا۔

    کولن انگرام نے سماجی رابطے کی ویب سائٹ پر ابوظہبی سے کراچی روانگی کی تصویر شیئر کی۔

    یہ بھی پڑھیں: پی ایس ایل فائنل راؤنڈ کے لیے ٹیموں کی کراچی آمد کا سلسلہ شروع

    یاد رہے کہ کراچی کنگز پلے آف مرحلے کا پہلا میچ 10 مارچ کو کوئٹہ گلیڈی ایٹرز کے خلاف نیشنل اسٹیڈیم میں کھیلے گی، شائقین کرکٹ اپنی ٹیم کو ہوم گراؤنڈ پر دیکھنے کے لیے بے تاب ہیں۔

  • پی ایس ایل فائنل راؤنڈ کے لیے ٹیموں کی کراچی آمد کا سلسلہ شروع

    پی ایس ایل فائنل راؤنڈ کے لیے ٹیموں کی کراچی آمد کا سلسلہ شروع

    کراچی: پاکستان سپر لیگ کے سیزن فور میں فائنل راؤنڈ کھیلنے کے لیے ٹیموں کی کراچی آمد کا سلسلہ شروع ہوگیا ہے۔

    تفصیلات کے مطابق پی ایس ایل کے لیے اسٹارز کی کہکشاں پاکستان میں سجنے کو تیار ہیں، آسٹریلیا کے شین واٹسن چودہ سال بعد ایکشن میں دکھائی دیں گے۔

    کوئٹہ گلیڈی ایٹرز کے کپتان سرفراز احمد کہتے ہیں شائقین گراؤنڈ میں آئیں اور کرکٹ کو سپورٹ کریں، سرفراز احمد ایئرپورٹ پہنچے تو فینز نے گھیرلیا اور سیلفیاں بنائیں۔

    آسٹریلیا کے شین واٹسن کا چودہ سال بعد پاکستان آنے کے لیے تیار ہیں، کراچی کنگز کے غیرملکی کھلاڑی کولن منرو، انگرم اور لیونگ اسٹن بھی پاکستان آرہے ہیں۔

    پشاور زلمی کے کپتان ڈیرن سیمی اور پولارڈ بھی نیشنل اسٹیڈیم میں شائقین کا لہو گرمائیں گے۔

    پی ایس ایل 4 : چوتھا مرحلہ مکمل، غیر ملکی کھلاڑی پاکستان اڑان بھرنے کو تیار

    پاکستان سپرلیگ کا چوتھا مرحلہ دو روز قبل ابوظہبی میں مکمل ہوگیا جس کے بعد اب بقیہ تمام میچز کراچی کے نیشنل اسٹیڈیم میں کھیلے جائیں گے۔

    ملتان سلطانز کی ٹیم پلے آف مرحلے سے باہر ہوگئی جبکہ کراچی کنگز، پشاور زلمی، کوئٹہ گلیڈی ایٹرز، لاہور قلندرز، اسلام آباد یونائیٹڈ کی ٹیمیں ٹرافی حاصل کرنے کے لیے مقابلے کریں گی۔

    نیشنل اسٹیڈیم کراچی میں ہونے والے پی ایس ایل میچز کے لیے بھرپور انتظامات کیے جارہے ہیں، گراؤنڈ میں کمانڈ اینڈ کنٹرول روم بھی فعال کردیا گیا ہے۔

  • پی ایس ایل 4: نیشنل اسٹیڈیم کراچی میں تیاریاں عروج پر، کمانڈ اینڈ کنٹرول روم فعال

    پی ایس ایل 4: نیشنل اسٹیڈیم کراچی میں تیاریاں عروج پر، کمانڈ اینڈ کنٹرول روم فعال

    کراچی: نیشنل اسٹیڈیم کراچی میں پی ایس ایل فور کے میچوں کی تیاریاں تیزی سے جاری ہیں، کمانڈ اینڈ کنٹرول روم فعال کر دیا گیا۔

    تفصیلات کے مطابق کراچی میں شیڈول پی ایس ایل فور کے میچز کے لیے شاندار انتظامات کیے جارہے ہیں، نیشنل اسٹیڈیم میں کیمرے لگا دیے گئے، کمانڈ اینڈ کنٹرول روم سے سب کچھ مانیٹر ہوگا۔

    اسٹیڈیم کے داخلی اور خارجی راستوں کے علاوہ پارکنگ اور اسٹینڈ میں بھی کیمرے نصب کردیے گئے، آئی سی سی کے سیکیورٹی ماہرای این ڈیوڈ نے بھی انتظامات پر اطمینان کا اظہار کیا، ایونٹ کے لیے پرجوش براڈ کاسٹرز بھی کراچی پہنچ گئے۔

    پی ایس ایل کے پاکستان میں ہونے والے تمام میچز لاہور سے کراچی منتقل کردئیے گئے ہیں، 9 ماچ کو کراچی میں لاہور قلندرز اور اسلام آباد یونائیٹڈ کا میچ ہوگا۔

    خیال رہے کہ کراچی پولیس بھی میچز کے سلسلے میں سیکورٹی پلان بنا چکی ہے، اے آئی جی امیر شیخ نے کہا کہ کراچی پولیس کرکٹ میچوں کی میزبانی کے لیے پوری طرح تیار ہے۔

    پاکستان سپر لیگ کی ٹیموں کی کراچی آمد سے متعلق شیڈول جاری

    دوسری جانب وزیراعلیٰ سندھ مراد علی شاہ کا کہنا تھا کہ پاکستان بھرسے آنے والےعوام کے لئے مناسب انتظامات کریں گے۔

    دس مارچ کو کراچی کنگز اور کوئٹہ گلیڈی ایٹرز کی ٹیمیں مدمقابل آئیں گی، 11 مارچ کو نیشنل اسٹیڈیم کراچی میں 2 میچز کھیلے جائیں گے، لاہور قلندرز اور ملتان سلطانز کا میچ دوپہر 2 بجے شروع ہوگا جبکہ کراچی کنگز اور پشاور زلمی شام 7 بجے مدمقابل ہوں گی۔

    پی ایس ایل سیزن فور کا کوالیفائر 13 مارچ کو کراچی میں ہوگا، 14 مارچ کو پہلا ایلیمنیٹر، 15 مارچ کو دوسرا ایلیمنیٹر کھیلا جائے گا، فائنل میچ 17 مارچ کو نیشنل اسٹیڈیم کراچی میں کھیلا جائے گا۔

  • پی ایس ایل 4 :‌ کراچی کنگز کی فتح، پلے آف تک رسائی

    پی ایس ایل 4 :‌ کراچی کنگز کی فتح، پلے آف تک رسائی

    ابوظہبی: پاکستان سپرلیگ کے 24ویں میچ اور انتہائی اہم میچ میں کراچی کنگز نے ملتان سلطانز کو شکست دے کر پلے آف مرحلے تک رسائی حاصل کرلی۔

    تفصیلات کے مطابق پی ایس ایل چوتھے مرحلے میں داخل ہوگیا جس کے تحت آج کا دوسرا میچ کراچی کنگز اور ملتان سلطانز کی ٹیموں کے مابین ابوظہبی کے انٹرنیشنل اسٹیڈیم میں کھیلا گیا۔

    کراچی کنگز کے کپتان کی دعوت پر ملتان سلطانز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 118 رنز بنائے، حماد اعظم 29 اور شعیب ملک 26 کے ساتھ نمایاں بلے باز رہے جبکہ کراچی کنگز کے باؤلرز عثمان شنواری نے 4 اور عمر خان نے تین وکٹیں حاصل کیں۔

    ہدف کے تعاقب میں کراچی کنگز کی جانب سے بیٹنگ کا آغاز بابر اعظم اور کولن منرو نے کیا، عماد الیون کی پہلی وکٹ 21 کے مجموعی اسکور پر گری، آؤٹ ہونے والے کھلاڑی منرو تھے جنہوں نے 11 رنز بنائے۔

    چھٹے اوور میں بابر اعظم 36 کے مجموعی اسکور پر آؤٹ ہوئے، بعد ازاں انگرام اور لیونگ اسٹون نے محتاط انداز میں بیٹنگ کرتے ہوئے اسکور کو آگے بڑھایا، 82 کے مجموعی اسکور پر انگرام اور افتخار احمد آؤٹ ہوئے جبکہ 112 پر محمد رضوان آؤٹ ہوئے۔

    کراچی کنگز نے آخری اوور کی دوسری بال پر 5 وکٹوں سے فتح اپنے نام کی، لیونگ اسٹون نے چھکا مار کر نہ صرف ٹیم کو فتح دلوائی بلکہ اپنی نصف سنچری بھی مکمل کی۔

    کراچی کنگز کےلیونگ اسٹون نےناقابل شکست53رنز کی اننگز کھیلی جبکہ انگرام 31 کے ساتھ دوسرے نمایاں بلے باز رہے، ملتان سلطانز کے محمد الیاس نے تین کھلاڑیوں کو آؤٹ کیا۔

    قبل ازیں  ملتان سلطانز نے پہلے بیٹنگ کی تو انہیں اچھا آغاز نہ مل سکا اور عثمان شنواری نے عمر صدیق کو 5 کے مجموعی اسکور پر پویلین کی راہ دکھائی، اگلے ہی اوور میں جے چارلیس بھی شنواری کا شکار بنے۔

    ملک الیون کے تیسرے کھلاڑی جیمز ونس کو عمر خان نے چوالیس کے مجموعی اسکور پر کلین بولڈ کر کے پویلین کی راہ دکھائی، کپتان شعیب ملک 26 کے انفرادی اور 75 کے مجموعی اسکور پر آؤٹ ہوئے 6 رنز اضافے کے بعد کرسچن بھی عمر خان کا شکار بنے۔

    حماد اعظم اور عرفان کو عثمان شنواری نے اپنے چوتھے اوور کی آخری دو گیندوں پر پویلین کی راہ دکھائی، 18 اوورز کے اختتام تک ملتان سلطانز نے 7 وکٹوں کے نقصان پر 104 رنز اسکور کیے۔

    عثمان شنواری کو شاندار باؤلنگ کرانے پر مین آف دی میچ کا اعزاز دیا گیا۔

    ملتان سلطانز کا کوئی بھی کھلاڑی زیادہ دیر تک وکٹ پر نہ رک سکا، حماد اعظم 29 اور کپتان شعیب ملک 26 کے ساتھ نمایاں بلے باز رہے جبکہ ملک الیون کے چار کھلاڑی ڈبل فیگرز میں بھی داخل نہ ہوسکے۔

    وکٹیں گرنے کی ترتیب

    سلطانز کی وکٹیں بالترتیب 5، 17، 44، 75، 81، 102، 102 پر گریں

    کرکٹ کی دنیا میں ابھرتے ہوئے کراچی کنگز کے کھلاڑی عمر خان نے چار اوورز میں بائیس رنز دے کر تین کھلاڑیوں کو آؤٹ کیا جبکہ عثمان شنواری نے چار اوورز میں 15 رنز دے کر چار وکٹیں حاصل کیں۔

    اسکواڈ

    کراچی کنگز

    بابر اعظم، کولن منرو، کولن انگرام، لیام لیونگ اسٹون، افتخار احمد، محمد رضوان، عماد وسیم (کپتان)، آرون سمرز، عامر یامین، عمرخان، عثمان شنواری

    ملتان سلطانز

    جیمز ونس، عمر صدیق (وکٹ کیپر)، جانسن چارلس، شعیب ملک (کپتان)، حماد اعظم، ڈینئل کرسچن، محمد الیاس، محمد عباس، کرس گرین ، عرفان خان

    محمد عامر کی وطن واپسی

    فاسٹ باؤلر محمد عامر کی والدہ شدید علیل اور انتہائی نگہداشت وارڈ میں داخل ہیں جس کے باعث وہ دبئی سے وطن واپس آرہے ہیں، کراچی کنگز کی انتظامیہ نے انہیں پاکستان جانے کی اجازت دے دی۔

  • پاکستان سپرلیگ کا چوتھا مرحلہ آج سے ابوظہبی میں شروع ہوگا

    پاکستان سپرلیگ کا چوتھا مرحلہ آج سے ابوظہبی میں شروع ہوگا

    ابوظہبی: پاکستان سپرلیگ کا چوتھا مرحلہ آج سے ابوظہبی میں شروع ہوگا۔ کوئٹہ گلیڈی ایٹرز اور پشاورزلمی جبکہ کراچی کنگز اور ملتان سلطانز مدمقابل ہوں گے۔

    تفصیلات کے مطابق پاکستان سپر لیگ کے سیزن فور کا چوتھا مرحلہ آج سے اماراتی دارالحکومت ابوظہبی میں شروع ہوگا، کوئٹہ گلیڈی ایٹرز کا ٹاکرا پشاور زلمی سے ہوگا جبکہ کراچی کنگز اور ملتان سلطان مدمقابل آئیں گے۔

    پی ایس ایل کے پہلے سے تیسرے مرحلے تک کھلاڑیوں نے دبئی میں دکھایا جوش اب سجے گا میدان ابوظہبی کا جہاں چھکے اور چوکوں کی برسات ہوگی۔

    کھلاڑیوں نے میچ جیتنے کے لیے خوب محنت کی، بالرز  وکٹیں اڑانے کو تیار کھڑے ہیں، ٹیم کے کپتان بھی میچ میں فتح یابی کے لیے پرعزم ہیں۔

    کل کھیلے جانے والے مقابلوں میں پہلا ٹاکرا کوئٹہ گلیڈی ایٹرز اور پشاور زلمی کے درمیان ہوگا جبکہ دوسرے میچ میں کراچی کنگز اور ملتان سلطانز پنجا آزمائی کریں گے۔

    خیال رہے کہ کراچی کنگز کے کولن انگرام نے سیزن فور کی پہلی سنچری بنائی اور ساتھ ہی 127 رنز بنا کر سب سے بڑی انفرادی اننگز کھیل کر میچ کے بہترین کھلاڑی قرار پائے۔

    کراچی کنگز کے بابر اعظم اور لیونگسٹن نے 157 رنز بنا کر پی ایس ایل کی سب سے بڑی شراکت قائم کررکھی ہے۔

    پی ایس ایل سیزن فور کا تیسرا مرحلہ مکمل، کھلاڑیوں کی شاندار پرفارمنس

    اسلام آباد یونائیٹڈ کے کپتان محمد سمیع نے پی ایس ایل سیزن فور کی پہلی ہیٹ ٹرک کی اور ٹیم کی جیت میں اہم کردار ادا کیا۔

    پشاور زلمی کے کیرون پولارڈ نے بلند و بالا چھکے لگا کر نصف سنچری اسکور کی، زلمی کے فاسٹ بولر حسن علی 18 وکٹیں حاصل کرکے سب سے آگے ہیں۔

    ملتان سلطانز کی ٹیم ایونٹ میں صرف 2 دومیچز ہی جیت سکی ہے تاہم کپتان شعیب ملک 240 رنز بنا کر سرفہرست ہیں۔

  • پی ایس ایل کے لاہورمیں شیڈول تمام میچزکراچی منتقل

    پی ایس ایل کے لاہورمیں شیڈول تمام میچزکراچی منتقل

    کراچی: پاکستان سپرلیگ کے لاہور میں شیڈول تمام میچز کراچی منتقل کردیے گئے، سیزن فورکے فائنل سمیت آٹھ میچزکراچی میں ہوں گے۔

    تفصیلات کے مطابق پی ایس ایل فور کے لاہور میں شیڈول میچز کراچی میں ہوں گے، ایونٹ کے شیڈول میں بھی تبدیلی کی گئی ہے جس کے بعد 7 مارچ سے شروع ہونے والے میچز اب 9 سے 17مارچ تک ہوں گے۔

    کراچی کنگزکا پشاورزلمی کے ساتھ نیشنل اسٹیڈیم میں پہلا میچ 7مارچ کی بجائے 10مارچ کوہوگا، 11مارچ کو کراچی کنگزاورکوئٹہ گلیڈی ایٹرزکا میچ ہوگا۔

    پاکستان سپرلیگ فور کے نیشنل اسٹیڈیم میں ہونے والے تمام میچزشام میں کھیلے جائیں گے۔

    پاکستان میں پی ایس ایل کے میچز شیڈول کے مطابق ہوں گے، چیئرمین پی سی بی

    یاد رہے کہ 28 فروری کو چیئرمین پاکستان کرکٹ بورڈ احسان مانی کا کہنا تھا کہ پی ایس ایل کے میچز شیڈول کے مطابق پاکستان میں ہوں گے اور کسی بھی کھلاڑی نے پاکستان آنے سے انکار نہیں کیا۔

    چیئرمین پی سی بی احسان مانی کا کہنا تھا کہ تمام ٹیمیں پاکستان میں میچز کھیلنے کی حمایت کررہی ہیں، پی ایس ایل کے تمام کھلاڑی پاکستان میں کھیلنے کو تیار ہیں۔

    واضح رہے کہ پی ایس ایل فور کے فائنل سمیت 8 میچز پاکستان میں کھیلیں جائیں گے جن میں سے 3 لاہور اور فائنل سمیت 5 میچز کی میزبانی کراچی کے نیشنل اسٹیڈیم کو دی گئی تھی۔