ARYNews.tv | Urdu – Har Lamha Bakhabar

Tag: کراچی کنگز

  • کراچی کنگز کا حصہ بننے کا فخریہ اعلان کرتا ہوں، وسیم اکرم

    کراچی کنگز کا حصہ بننے کا فخریہ اعلان کرتا ہوں، وسیم اکرم

    کراچی: لیجنڈ فاسٹ بولر وسیم اکرم نے کہا ہے کہ کراچی کنگز کا حصہ بننے کا فخریہ اعلان کرتا ہوں۔

    تفصیلات کے مطابق سابق فاسٹ بولر وسیم اکرم نے کراچی کنگز کا حصہ بننے کا اعلان کرتے ہوئے کہا ہے کہ پاکستان سپر لیگ کا چوتھا ایڈیشن چند ماہ دور ہے، کیا آپ پرجوش ہیں، پی ایس ایل کا نیا سیزن پاکستان کرکٹ کو الگ مقام پر لے جائے گا۔

    وسیم اکرم نے کہا کہ نئے انٹرنیشنل اسٹارز کو خوش آمدید کہتے ہیں، 8 میچز پاکستان میں ہوں گے، پی ایس ایل 2019 میں ابھرتا ہوا ٹیلنٹ اور مزید عالمی اسٹارز شرکت کریں گے۔

    قبل ازیں وسیم اکرم نے پی ایس ایل کی سب سے پسندیدہ ٹیم کراچی کنگز میں ٹیم کے صدر کی حیثیت سے شمولیت اختیار کی تھی۔

    کراچی کنگز کے مالک اور اے آروائی ڈیجیٹل نیٹ ورک کے سربراہ سلمان اقبال نے اپنے ٹویٹ میں لیجنڈ کرکٹر وسیم اکرم کو خوش آمدید کہتے ہوئے اعلان کیا تھا کہ وسیم اکرم اب کراچی کنگز کا حصہ ہوں گے۔

    یہ پڑھیں: سوئنگ کے سلطان کو کراچی کنگزمیں بطورصدرخوش آمدید، سلمان اقبال

    انہوں نے اپنے ٹویٹ میں یہ بھی کہا تھا کہ سلطان آف سوئنگ ہی اب نئے کنگ ہوں گے ۔ وسیم اکرم نے کراچی کنگز میں بطور ٹیم صدر شمولیت اختیار کی ہے۔

    واضح‌ رہے کہ پی ایس ایل کے سیزن 4 کی تیاریاں عروج پر ہیں ۔ سابقہ تینوں سیزن میں کراچی کنگز کرکٹ کے مداحوں کی فیورٹ ٹیم رہی ہے۔

    یاد رہے کہ وسیم اکرم ون ڈے کرکٹ میچز میں سب سے زیادہ وکٹیں حاصل کرنے والے کھلاڑی ہیں، انہوں نے 356 ون ڈے میچز میں 502 وکٹیں حاصل کیں جبکہ وہ 1984 سے 2003 تک 104 ٹیسٹ میچ سمیت 356 بین الاقوامی ون ڈے میچ کھیل چکے ہیں۔

  • سوئنگ کے سلطان کو کراچی کنگزمیں بطورصدرخوش آمدید، سلمان اقبال

    سوئنگ کے سلطان کو کراچی کنگزمیں بطورصدرخوش آمدید، سلمان اقبال

    سوئنگ کے سلطان کے نام سے شہرت کے حامل لیجنڈ کرکٹر وسیم اکرم نے پی ایس ایل کی سب سے پسندیدہ ٹیم کراچی کنگز میں ٹیم کے صدر کی حیثیت سے شمولیت اختیار کرلی۔

    کراچی کنگز کے مالک اور اے آروائی ڈیجیٹل نیٹ ورک کے سربراہ سلمان اقبال نے اپنے ٹویٹ میں لیجنڈ کرکٹر وسیم اکرم کو خوش آمدید کہتے ہوئے اعلان کیا کہ وسیم اکرم اب کراچی کنگز کا حصہ ہوں گے۔

    انہوں نے اپنے ٹویٹ میں یہ بھی کہا ہے کہ سلطان آف سوئنگ ہی اب نئے کنگ ہوں گے ۔ وسیم اکرم نے کراچی کنگز میں بطور ٹیم صدر شمولیت اختیار کی ہے۔ یا درہے کہ پی ایس ایل کے سیزن۴ کی تیاریاں عروج پر ہیں ۔ سابقہ تینوں سیزن میں کراچی کنگز کرکٹ کے مداحوں کی فیورٹ ٹیم رہی ہے۔

    پاکستان کے مایہ ناز باؤلر وسیم اکرم 3 جون 1966ء کو لاہور میں پیدا ہوئے وہ بائیں ہاتھ سے باؤلنگ کرنیوالے دنیا کے بہترین باؤلر مانے جاتے ہیں، انہوں نے اپنے ٹیسٹ کیرئیرکا آغاز25جنوری1985ء میں نیوزی لینڈ کیخلاف آکلینڈ میں کیا۔

    وسیم اکرم ون ڈے کرکٹ میچز میں سب سے زیادہ وکٹیں حاصل کرنیوالے کھلاڑی ہیں، انہوں نے 356 ون ڈے میچز میں 502 وکٹیں حاصل کیں جبکہ وہ 1984 سے 2003 تک 104 ٹیسٹ میچ سمیت 356 بین الاقوامی ون ڈے میچ کھیل چکے ہیں۔

    وسیم اکرم کا شمار پاکستان کے بہترین فاسٹ باولرز میں بھی کیا جاتا ہے،وہ 1992 میں کرکٹ کا ورلڈ کپ جیتنے والی ٹیم میں شامل رہے اور 1999 میں پاکستان کرکٹ ٹیم کے کپتان بھی رہے۔

    وسیم اکرم 19برس تک شاندار کارکردگی کا مظاہرہ کرنے کے بعد مئی 2003ء میں ریٹائرڈ ہوگئے تھے، وسیم اکرم ان دنوں ملکی و غیر ملکی سپورٹس چینلز پر کمنٹیٹر کے فرائض سر انجام دے رہے ہیں۔

    وسیم اکرم نے شنیرا تھامسن سے 2013میں دوسری شادی کی تھی ، اس سے قبل سال 2009 میں وسیم اکرم کی پہلی اہلیہ بیماری کے باعث انتقال کرگئی تھیں جو کہ ان کے لیے ایک صدمہ تھا۔

  • پی ایس ایل چوتھا ایڈیشن: کراچی کنگز میں اس بار کون سے کھلاڑی شامل ہیں، فہرست جاری

    پی ایس ایل چوتھا ایڈیشن: کراچی کنگز میں اس بار کون سے کھلاڑی شامل ہیں، فہرست جاری

    لاہور : پاکستان کرکٹ بورڈ نے پی ایس ایل سیزن فور کے لئے تمام فرنچائز کے برقرار رکھے گئے کھلاڑیوں کی فہرست جاری کردی، کراچی کنگز نے محمد عامر، بابر اعظم اور کولن منرو کو ٹیم میں برقرار رکھا ہے۔

    تفصیلات کے مطابق پاکستان سپر لیگ کی سب سے مقبول ٹیم کراچی کنگز نے سیزن فور کے لئےاپنے  آٹھ سپر اسٹارز کھلاڑیوں کو اس سال بھی برقرار رکھا ہے۔

    جاری ہونے والی فہرست میں پلاٹینئیم کٹیگری سے نیوزی لینڈ کے کولن منرو، فاسٹ بولر محمد عامر، ٹی ٹوئنٹی اسپیشلسٹ بابر اعظم سیزن فور کے لئے بھی کراچی کنگز کا ہی حصہ رہیں گے۔

    ڈائمنڈ کٹیگری سے جنوبی افریقہ کے کولن انگرم، عماد وسیم اور عثمان شنواری کراچی کنگز کے شیر ہوں گے جبکہ گولڈ کٹیگری میں وکٹ کیپر محمد رضوان اور انگلینڈ کے روی بوپارہ کراچی کنگز کا حصہ ہوں گے۔

    واضح رہے کہ کراچی کنگز نے سلور کٹیگری سے کسی کھلاڑی کو برقرار نہیں رکھا۔ اس کے علاوہ دیگر پانچ فرنچائز نے بھی برقرار رکھے گئے کھلاڑیوں کی فہرست جاری کردی ہے۔

    مزید پڑھیں: پی ایس ایل 4 ، تمام کیٹگریز کے کھلاڑیوں کی فہرست جاری، انٹرنیشنل کرکٹر بھی شامل

    پی سی بی کی جانب سے جاری فہرست کے مطابق ڈرافٹنگ میں ہر فرنچائز کو دس کھلاڑی برقرار رکھنے کی اجازت تھی، ہر ٹیم 3 پلاٹینیم، 3 ڈائمنڈ، 3 گولڈ، 5 سلور اور 2 ایمرجنگ کھلاڑیوں پر مشتمل ہوگی۔

    ہر ٹیم کو ڈرافٹنگ میں چار چار کھلاڑیوں کو لینے کی اجازت تھی ڈرافٹنگ کی تقریب 20 نومبر کو اسلام آباد میں منعقد کی جائے گی۔

  • ٹیلنٹ کی تلاش میں کراچی کنگز کا قافلہ بورے والہ پہنچ گیا

    ٹیلنٹ کی تلاش میں کراچی کنگز کا قافلہ بورے والہ پہنچ گیا

    لاہور: ٹیلنٹ کی تلاش میں کراچی کنگز کا قافلہ بورے والہ پہنچ گیا، کراچی کنگز ٹیلنٹ ہنٹ پروگرام میں کھلاڑی کی کھوج ہوگی۔

    تفصیلات کے مطابق کراچی کنگز ٹیلنٹ ہنٹ میں ملک کے مختلف شہروں سے بچے اور نوجوان کرکٹرز اپنی صلاحیتوں کے جوہر دکھا رہے ہیں۔

    کراچی کنگز ٹیلنٹ ہنٹ پروگرام میں آج بُورے والہ میں کھلاڑی کی کھوج کی جائے گی۔

    قبل ازیں خانیوال کے شبیر اسٹیڈیم میں بہترین بالرز، فیلڈرز اوربیٹسمین کا امتحان بھی لیا گیا۔

    ٹیلنٹ کی تلاش میں کراچی کنگز کا قافلہ ہری پور پہنچ گیا

    خیال رہے کہ گذشتہ دنوں ٹیلنٹ ہنٹ پروگرام کے ذریعے ہری پور میں باصلاحیت کھلاڑی کی کھوج لگائی گئی تھی۔

    ہری پور میں ٹیلنٹ کی تلاش میں بچوں اور نوجوان کرکٹرز کے ٹرائلز کراچی کنگز کے ڈائریکٹر راشد لطیف اور سابق کرکٹر ارشد خان نے لیے تھے۔

    کراچی کنگز کا اگلا اسٹاپ ڈیرہ اسماعیل خان ہوگا، جہاں ٹیلنٹ ہنٹ کے سلسلے میں ٹرائلز 21 اکتوبر تک جاری رہیں گے۔

    واضح رہے کہ پی ایس ایل کی ٹیم کراچی کنگز نے ٹیلنٹ کو اجاگر کرنے کے لیے پُر عزم ہو کر ’کھلاڑی کی کھوج‘ کا ٹیلنٹ ہنٹ پروگرام کا سوات سے آغاز کیا، دو روز قبل اس کھوج میں کھلاڑیوں کی بڑی تعداد ٹرائلز دینے پہنچ گئی تھی۔

  • ڈی آئی خان میں ’کھلاڑی کی کھوج‘ مکمل، 25 کرکٹرمنتخب

    ڈی آئی خان میں ’کھلاڑی کی کھوج‘ مکمل، 25 کرکٹرمنتخب

    ڈی آئی خان:کراچی کنگز کی جانب سے پی ایس ایل کے لئے ڈیرہ اسماعیل خان کے رتہ کلاچی سپورٹس کملپکس میں منعقد کئے گئےٹرائلز کامیابی کے ساتھ اختتام پذیر ہو گئے، سخت ٹرائلز کے بعد 25 کھلاڑیوں کو منتخب کرلیا۔

    تفصیلات کے مطابق ڈیرہ اسماعیل خان میں ہونے والے سخت ٹرائلز میں سینکڑوں کھلاڑیوں نے شرکت کی جن میں سے 25کھلاڑیوں کو سخت ٹرائلز کے بعد منتخب کر لیا گیا۔ اس موقع پر علاقے کے سیاسی و سرکاری زعما اور معززین اور سینئرز کھلاڑیوں نے بھر پور شرکت کی اور کراچی کنگز کی انتظامیہ اور اونر سلمان اقبال کو خراج تحسین پیش کیا۔

    کراچی کنگز کی جانب سے خیبر پختونخواہ اور پنجاب کے مختلف علاقوں میں جاری ٹرائلز کے سلسلہ میں کراچی کنگز کے ایکسپرٹ کی ٹیم نے منگل کے روزڈیرہ اسماعیل خان کے رتہ کلاچی سپورٹس کمپیکس میں کھلاڑیوں سے ٹرائلز لئے ۔اس موقع پر نوجوان کھلاڑیوں کی بڑی تعداد موجود تھی ۔سینکڑوں کھلاڑیوں سے ٹرائلز لئے گئے جن میں 25کھلاڑیوں کوبہتر پرفامنس پر منتخب کیا گیا ۔اس موقع پر منتخب ہونے والے نوجوان کھلاڑیوں کو کراچی کنگز کی شرٹ دی گئیں ۔

    سابق کرکٹرز راشد لطیف اور کبیر خان کی نگرانی ساتھ رکنی کوچز کمیٹی نے نوجوان کھلاڑیوں سے ٹرائلز لئے ۔ٹرائلز میں ریجنل سپورٹس آفیسر انو رکمال برکی نے مہمانوں سے بھر پور تعاون کیا ۔ٹرائلز کے اختتام پر کراچی کنگز کے سینئر کوچ اور کھلاڑی راشد لطیف نے گفتگو کرتے ہوئے کہا کہ ڈیرہ اسماعیل خان کے ٹرائلز میں کھلاڑیوں کی ایک بڑی تعداد شریک ہو ئی ہے ،دور دراز علاقوں میں کرکٹ کا بڑا ٹیلنٹ موجود ہے۔

    راشد لطیف کا کہنا تھا کہ اس خطے میں فاسٹ باؤلرز زیادہ ملے ہیں ، نئے ٹیلنٹ سے مطمئن ہیں۔ کراچی کنگز نے اس علاقوں کو منتخب کرکے کھلاڑیوں کے ولولہ کو بڑھایا ہے۔راشد لطیف نے کہا کہ کراچی کنگز کے اونر سلمان اقبال نے یہاں کے کھلاڑیوں کو بڑا پلیٹ فارم مہیا کیا ہے۔

    راشد لطیف نے کہا کہ کراچی کنگز نے پہلے سندھ سے منتخب ہونیوالے کھلاڑیوں کے درمیان سندھ کے شہزادے اور بعد میں کراچی کے شہزادے کے نام سے کرکٹ ٹورنامنٹ کا انعقاد کر کے نئے کھلاڑیوں کو قومی سطح کے مقابلوں میں کھیلنے کا موقع فراہم کیا اور اب کی بار سلمان اقبال اور ان کی کراچی کنگز کی ٹیم نے خیبر پختونخوا ہ اور جنوبی پنجاب سے منتخب ہونیوالے کھلاڑیوں کے درمیان پاکستان کے شہزادے کے نام سے مقابلوں کے انعقاد پر غور کیا جا رہا ہے ۔انہوں نے کہا کہ کراچی کنگز نے ان دور دراز کے کھلاڑیوں کے جذبے اور ولولہ کو ایک بار پھر زندہ کیا ہے ۔

  • کراچی کنگز کے مالک سلمان اقبال کی غیرملکی کرکٹرز سے اہم ملاقات

    کراچی کنگز کے مالک سلمان اقبال کی غیرملکی کرکٹرز سے اہم ملاقات

    دبئی: اے آر وائی کے چیف ایگزیکٹو آفیسر اور کراچی کنگز کے مالک سلمان اقبال نے متحدہ عرب امارات میں غیر ملکی کرکٹرز سے ملاقات کی ہے۔

    سماجی رابطے کی ویب سائٹ پر سلمان اقبال نے ٹائمل ملز، روی بھوپارا اور کولن انگرام کے ساتھ ایک تصویر شیئر کرتے ہوئے لکھا کہ ’میں کراچی کنگز کے بوائز کے ساتھ دبئی میں ہوں، تینوں غیر ملکی کرکٹرز سے مل کر خوشی ہوئی‘۔

    واضح رہے کہ پاکستان سپرلیگ کی سب سے بڑی اور مہنگی ترین ٹیم کراچی کنگز کی سیزن تھری میں کپتان عماد وسیم نے کی تھی جس کے بعد وہ زخمی ہوگئے تھے تو فاسٹ باؤلر محمد عامر نے بھی ٹیم کی قیادت کی تھی۔

    پی ایس ایل کے سابق چیئرمین نجم سیٹھی اس بات کا اعتراف بھی کرچکے ہیں کہ جب پاکستان سپرلیگ کے انعقاد کے حوالے سے بات چیت جاری تھی تو سب سے پہلے سلمان اقبال نے کراچی کنگز کے نام سے ٹیم لینے کا اعلان کیا تھا۔

    مزید پڑھیں: ٹیلنٹ کی تلاش میں کراچی کنگز کا قافلہ ہری پور پہنچ گیا

    انسانیت کے جذبے سے سرشار اور کھیلوں سے محبت رکھنے والے اے آر وائی کے سی ای او سلمان اقبال پاکستان میں‌ کھیلوں‌ کے فروغ کے لیے سرگرم رہتے ہیں اور وہ نئے ٹیلنٹ کو سامنے لانے کے لیے ہر میدان میں ہی پیش پیش بھی نظر آتے ہیں۔

    یاد رہے کہ کراچی کنگز پی ایس ایل کے چوتھے سیزن میں بھی حصہ لے رہی ہے، جس کے لیے مینیجمنٹ نے باصلاحیت کھلاڑیوں کو سامنے لانے کے لیے پہلے ’سندھ کے شہزادے‘ نامی ٹورنامنٹ کا افتتاح کیا جس میں 75 کھلاڑیوں اور سندھ کے مختلف شہروں سے تعلق رکھنی والی پانچ ٹیموں نے حصہ لیا۔

    کراچی کنگز کی ٹیم ملک بھر سے باصلاحیت کھلاڑیوں کی کھوج میں پاکستان کے تمام ہی صوبوں میں نوجوان کھلاڑیوں کا ٹرائل لے رہی ہے تاکہ ایسی کرکٹرز کو سامنے لایا جائے جو عالمی سطح پر پاکستان کا نام روشن کرسکیں۔

    یہ بھی پڑھیں: پی ایس ایل 4، کھلاڑیوں کی ڈرافٹنگ 20 نومبر کو ہوگی

    یہ بھی یاد رہے کہ پی ایس ایل انتظامیہ نے 12 اکتوبر کو پاکستان سپر لیگ 4 میں حصہ لینے والے کھلاڑیوں کی ڈرافٹنگ کا اعلان کیا تھا جو 20 اکتوبر بروز منگل اسلام آباد میں منعقد کی جائے گی، اس میں تمام فرنچائز مالکان شرکت کریں گے۔

    رواں سیزن حصہ لینے والے 6 فرنچائز مالکان 13 اکتوبر تک اپنے ساتھ برقرار رکھنے والے کھلاڑیوں کے ناموں کا اعلان کردیں گے، قانون کے مطابق ہر ٹیم 10 پرانے کھلاڑیوں کو ساتھ رکھ سکتی ہے۔

    رواں برس لیگ میں نامور انٹرنیشنل کھلاڑی اے بی ڈویلیرز، اسٹیو اسمتھ، کیورن پولارڈ، کولن مونرو، شین واٹسن، سنیل نارائن، کرس لائن اور ڈیرن سیمی بھی ایکشن دکھائیں گے۔

    اسے بھی پڑھیں: کراچی کنگز سندھ کے شہزادے ٹورنامنٹ کا کامیاب انعقاد، کراچی کی ٹیم فاتح

    قومی ٹیم کے نامور کھلاڑی سرفراز احمد، شاہد خان آفریدی، شعیب ملک، محمد حفیظ، فہیم اشرف، شاداب خان، حسن علی اور فخر زمان سمیت دیگر بھی ایکشن دکھائیں گے۔

    واضح رہے کہ پاکستان سپر لیگ کے چوتھے ایڈیشن کا آغاز آئندہ برس 14 فروری سے دبئی میں جبکہ فائنل 17 مارچ کو کراچی میں منعقد کیا جائے گا، پی ایس ایل کے آخری 8 میچز بھی پاکستان میں کھیلے جائیں گے۔

  • افغانستان پریمیئر لیگ، کراچی کنگز کے مالک سلمان اقبال میچ دیکھنے شارجہ پہنچ گئے

    افغانستان پریمیئر لیگ، کراچی کنگز کے مالک سلمان اقبال میچ دیکھنے شارجہ پہنچ گئے

    شارجہ: افغانستان پریمیئر لیگ کے میچز شارجہ میں جاری ہیں، کراچی کنگز کے مالک سلمان اقبال بھی افغانستان پریمیئر لیگ کا میچ دیکھنے شارجہ اسٹیڈیم پہنچے۔

    تفصیلات کے مطابق شارجہ میں افغان پریمیئر لیگ کا دسواں میچ پکتیا پینتھرز اور قندھار نائٹس کے درمیان کھیلا گیا، کراچی کنگز کے مالک سلمان اقبال نے بھی شارجہ میں میچ دیکھا۔

    کراچی کنگز کے مالک سلمان اقبال نے شارجہ اسٹیڈیم کے ایم ڈی مظہر خان اور بزنس مین عمران چوہدری کے ساتھ میچ دیکھا، دونوں شخصیات ان کے دائیں بائیں بیٹھے تھے۔

    شارجہ کے کرکٹ اسٹیڈیم میں افغان کرکٹ بورڈ کے سی ای او شفیق اسٹینک زئی بھی موجود تھے، میچ کے دوران شارجہ کرکٹ اسٹیڈیم کے وائس چیئرمین والید بُخاطر بھی سلمان اقبال کے ساتھ نظر آئے۔

    خیال رہے کہ اسٹار آل راؤنڈر بوم بوم شاہد آفریدی بھی پکتیا پینتھرز کا حصہ ہیں۔ افغان پریمئیر لیگ 05 اکتوبر سے شروع ہوئی ہے جو 21 اکتوبر تک جاری رہے گی۔

    یہ بھی پڑھیں:  کراچی کنگز : سوات سے ٹیلنٹ ہنٹ پروگرام کا آغاز، نوجوانوں کا زبردست جوش وخروش

    افغان پریمئیر لیگ میں قندہار نائٹس، بلخ لیجینڈز، کابل زوان، پکتیا پینتھرز اور ننگر ہار لیوپرڈز شامل ہیں، شاہد آفریدی پکتیا پینتھرز کی جانب سے کھیل رہے ہیں۔

    شارجہ اسٹیڈیم میں کھیلے جانے والا میچ آفریدی کی ٹیم پکتیا پینتھرز نے سنسنی خیز مقابلے کے بعد 9 رنز سے جیتا، شاہد آفریدی نے چار اوورز میں صرف تیرہ رنز دے کر ایک وکٹ حاصل کی۔

  • کراچی کنگز : سوات سے ٹیلنٹ ہنٹ پروگرام کا آغاز، نوجوانوں کا زبردست جوش وخروش

    کراچی کنگز : سوات سے ٹیلنٹ ہنٹ پروگرام کا آغاز، نوجوانوں کا زبردست جوش وخروش

    کراچی : پی ایس ایل کی ٹیم کراچی کنگز ٹیلنٹ کو اجاگر کرنے کیلئے ثابت قدم ہے، کھلاڑی کی کھوج کا ٹیلنٹ ہنٹ پروگرام کا سوات سے آغاز کردیا گیا، کھلاڑیوں کی بڑی تعداد ٹرائلز دینے پہنچ گئی۔

    تفصیلات کے مطابق کراچی کنگز نے جو وعدہ کیا وہ پورا کردیا، کراچی کنگز کھلاڑی کی کھوج ٹیلنٹ ہنٹ پروگرام آج سے سوات میں شروع ہوگیا، نوجوان کرکٹرز کی بڑی تعداد منگورہ گراؤنڈ میں ٹرائلز دینے پہنچ گئی۔

    اس موقع پر نوجوان کرکٹرز نے موقع دینے پر کراچی کنگز کا شکریہ ادا کیا، مینگورہ کے گراسی گراؤنڈ میں ہونے والے ٹرائلز میں بہترین بالر، بیٹسمین اور وکٹ کیپر کا انتخاب کیا جائے گا۔

    پروگرام میں نوجوان کرکٹرز صلاحیتوں کے جوہر دکھائیں گے اور کامیاب ہونے پر کراچی کنگز میں شامل ہونے کا موقع پائیں گے۔ سوات کے بعد خیبرپختونخواہ کے شہر صوابی اور پھر ڈیرہ اسماعیل خان میں کراچی کنگز کے ٹرائلز شروع کیے جائیں گے۔

    صوابی کے گوہاٹی کرکٹ اسٹیڈیم میں تیاریاں کو حتمی شکل دی جارہی ہے اور پچ کو رولر لگادیا گیا ہے۔اس کے علاوہ سیالکوٹ، خانیوال، بورے والا اور صادق آباد میں نئے باصلاحیت کھلاڑی سامنے لانے کے لیے ٹرائلز صبح 9 بجے سے شام 5 بجے تک کیے جائیں گے۔

  • کراچی کنگز کا ٹیلنٹ ہنٹ پروگرام کل سے سوات میں شروع ہوگا

    کراچی کنگز کا ٹیلنٹ ہنٹ پروگرام کل سے سوات میں شروع ہوگا

    کراچی: پاکستان سپر لیگ کی ٹیم کراچی کنگز کا ٹیلنٹ ہنٹ پروگرام کل سے سوات میں شروع ہوگا، مینگورہ کے گراسی گراؤنڈ میں کھلاڑی اپنی صلاحیتوں کے جوہر دکھائیں گے۔

    تفصیلات کے مطابق پی ایس ایل کی سب سے بڑی ٹیم کراچی کنگز نے کرکٹ ٹیلنٹ ڈھونڈے کی تیاری شروع کردی جس کے تحت ملک کے کئی شہروں میں ٹرائل کا آغاز کیا جائے گا جو 12 اکتوبر سے شروع ہوں گے اور یہ سلسلہ 21 اکتوبر تک جاری رہے گا۔

    کراچی کنگز کے ٹرائلز خیبرپختونخوا میں لینے پر عوام میں جوش و خروش پایا جاتا ہے اور نوجوان کھلاڑیوں نے کراچی کنگز کے مالک سلمان اقبال سے اظہار تشکر کیا ہے۔

    سوات، صوابی، ہری پور، ڈی آئی خان، سیالکوٹ، خانیوال، بورے والا اور صادق آباد میں نئے باصلاحیت کھلاڑی سامنے لانے کے لیے ٹرائلز صبح 9 بجے سے شام 5 بجے تک کیے جائیں گے۔

    ٹیلنٹ کی کھوج کا آغاز سوات کے گریسی کرکٹ اسٹیڈیم سے ہوگا جہاں کھلاڑیوں کو اپنی کارکردگی دکھانے کا موقع ملے گا جبکہ مینیجمنٹ کا اگلا پڑاؤ 13 اکتوبر کو صوابی میں ہوگا۔

    شیڈول کے مطابق 14 اکتوبر کو ہری پور کی راشد لطیف اکیڈمی میں ٹرائلز ہوں گے، پھر ایک دن وقفے کے بعد پھر 16 اکتوبر کو ڈی آئی خان کے رتا کولاچی اسپورٹس کمپلیکس میں نئے چہرے اپنی کارکردگی کے جوہر دکھا سکیں گے۔

    ٹیلنٹ ہنٹ ٹیم 18 اکتوبر کو سیالکوٹ پہنچے گی پھر 19 اکتوبر کو خانیوال، 20 اکتوبر کو بورے والا اور 21 اکتوبر کو صادق آباد کے آرمی اسٹیڈیم میں ٹرائلز لیے جائیں گے۔

    کراچی کنگز کی مینیجمنٹ نے ٹرائلز میں حصہ لینے کے لیے عمر کی حد 16 سے 23 سال تک رکھی ہے۔

  • کراچی کنگز سندھ کے شہزادے ٹورنامنٹ کا کامیاب انعقاد، کراچی کی ٹیم فاتح

    کراچی کنگز سندھ کے شہزادے ٹورنامنٹ کا کامیاب انعقاد، کراچی کی ٹیم فاتح

    کراچی: شہر قائد میں جاری سندھ کے شہزادے ٹورنامنٹ کے فائنل میچ میں کراچی کی ٹیم نے حیدرآباد کو شکست دے کر ٹرافی اپنے نام کرلی۔

    تفصیلات کے مطابق کراچی کے علاقے نیا ناظم آباد میں واقع اسٹیڈیم میں کراچی کنگز کے بینرز تلے ’سندھ کے شہزادے کرکٹ ٹورنامنٹ‘ کا فائنل میچ کراچی اور حیدرآباد کی ٹیموں کے مابین کھیلا گیا۔

    حیدرآباد کی ٹیم نے پہلے بیٹنگ کرتے ہوئے مقررہ 20 اوورز میں 140 رنز بنائے اور کراچی کو جیت کے لیے 141 رنز کا ہدف دیا۔

    کراچی کی ٹیم نے مقررہ ہدف 18.5 اوورز میں پانچ وکٹوں پر حاصل کر کے فتح اپنے نام کی۔ گورنر سندھ عمران اسماعیل، میئر کراچی وسیم اختر مہمان خصوصی تھے۔

    تقسیم انعامات کی تقریب میں بہترین فیلڈر کا ایوارڈ حارث علی خان کو دیا گیا، کراچی کی ٹیم کے محمد سلمان مین آف دی میچ قرار پائے جبکہ بہترین بلے باز کا ایوارڈ عماد عالم کے نام رہا۔

    بعد ازاں ٹورنامنٹ کی اختتامی تقریب کا انعقاد بھی کیا گیا جس میں کراچی کنگز کے آفیشلز اور  سی ای او محبوب عبدالرؤف نے بھی شرکت کی۔

    سابق کپتان قومی کرکٹ ٹیم یونس خان نے کہا کہ سندھ کے نوجوانوں کو اچھا موقع ملا ہے، کراچی کے لوگ ایسے ایونٹ میں آئیں اور اسے سپورٹ کریں۔

    سابق کپتان قومی کرکٹ ٹیم شاہد آفریدی نے کہا کہ کراچی اور حیدرآباد کی ٹیموں کو مبارکباد دیتا ہوں، اندرون سندھ کے بچوں میں کافی ٹیلنٹ ہے، پورے سندھ میں کرکٹ اکیڈمی ہونی چاہے، کراچی میں اس جیسا خوبصورت گراؤنڈ نہیں دیکھا۔

    معروف کاروباری شخصیت عقیل کریم ڈھیڈھی نے کہا کہ کھیلوں کو فروغ ملتا رہا تو بچوں کو سہولتیں میسر ہوں گی، کراچی کنگز کے مالک سلمان اقبال کی کاوش کو سراہتے ہیں۔

    میئر کراچی وسیم اختر نے ٹورنامنٹ کے انعقاد پر سلمان اقبال کو خصوصی مبارک باد دی۔ اُن کا کہنا تھا کہ کھیلوں کے فروغ کا سلسلہ جاری رہنا چاہیے، بلدیاتی حکومت اور ادارے اس طرز کے ٹورنامنٹ کے انعقاد میں اپنا کردار ادا کرنے کو تیار ہیں۔

    گورنر سندھ عمران اسماعیل کا کہنا تھا کہ ایسے ایونٹس دیکھ کر بہت خوشی ہوتی ہے، اُن تمام لوگوں کا شکریہ جنہوں نے ٹورنامنٹ کا انعقاد کیا، اس ایونٹ کی بدولت کراچی کے شہزادوں کا سفر سندھ تک پہنچ گیا۔

    اُن کا کہنا تھا کہ سندھ کے نوجوانوں کو کھیلوں کیلئے سہولتیں میسر نہیں ، نوجوان کھلاڑی ہار نہ مانیں ہم اپنی پوری کوشش کریں گے، کم وسائل کے باوجود نوجوانوں نے بہت اچھا کھیل پیش کیا۔

    ٹورنامنٹ کے انعقاد کا مقصد سندھ بھر سے باصلاحیت کھلاڑیوں کو سامنے لانا تھا۔ ایونٹ میں کراچی، حیدرآباد، سکھر، نوابشاہ، میرپورخاص کی ٹیمیں شامل تھیں جبکہ 75 کھلاڑیوں نے اپنی صلاحیتوں کے جوہر دکھائے۔