ARYNews.tv | Urdu – Har Lamha Bakhabar

Tag: کراچی کی خبریں

  • را کے تربیت یافتہ 2 مجرموں کو انسدادِ دہشت گردی کی عدالت نے سزا سنا دی

    را کے تربیت یافتہ 2 مجرموں کو انسدادِ دہشت گردی کی عدالت نے سزا سنا دی

    کراچی: انسدادِ دہشت گردی کی عدالت نے دہشت گردی کی کارروائیوں میں ملوث 2 مجرموں کو سزا سنا دی، دونوں مجرم پڑوسی ملک بھارت کی خفیہ ایجنسی را کے تربیت یافتہ ہیں۔

    تفصیلات کے مطابق کراچی میں دہشت گردی کی عدالت نے دو ایسے مجرموں کو سزا سنا دی جنھوں نے انڈین سیکرٹ ایجنسی را (ریسرچ اینڈ اینالسز وِنگ) سے تربیت حاصل کی تھی۔

    [bs-quote quote=”فہیم عرف مرچی اور ناصر عرف کھجی کا تعلق ایم کیو ایم لندن سے ہے” style=”style-7″ align=”left” color=”#dd3333″][/bs-quote]

    رینجرز کے ترجمان نے بتایا کہ مجرموں کو سزا رینجرز پراسیکیوشن کے ثبوتوں اور دلائل کی روشنی میں سنائی گئی۔ ترجمان نے کہا ’دونوں مجرم بھارت کی خفیہ ایجنسی را سے تربیت یافتہ ہیں۔‘

    ترجمان رینجرز کے مطابق مجرموں کو بارودی مواد رکھنے کے جرم میں 14 سال قید سنائی گئی، جب کہ غیر قانونی اسلحے کے جرم میں 7 سال قید اور ایک لاکھ 50 ہزار روپے جرمانہ بھی عائد کیا گیا۔

    رینجرز کے ترجمان کا کہنا ہے کہ دونوں مجرم فہیم عرف مرچی اور ناصر عرف کھجی کا تعلق ایم کیو ایم لندن سے ہے، فہیم مرچی اور ناصر کھجی نے پڑوسی ملک کی ایجنسی سے تربیت حاصل کی۔

    یہ بھی پڑھیں:  کراچی میں رینجرز موجود رہے گی، گورنر سندھ

    ترجمان کے مطابق فہیم عرف مرچی متحدہ قومی موومنٹ لندن یونٹ 30 رنچھوڑ لائن کا کارکن تھا، دونوں مجرم 1995 میں سندھ اسمبلی گیٹ پر بم دھماکے میں بھی ملوث ہیں۔

    رینجرز کے ترجمان نے بتایا کہ فہیم مرچی نے پڑوسی ملک بھارت سے واپسی پر پاکستان میں شر پسندوں کی بھی تربیت کی۔

  • ٹریٹمنٹ پلانٹس کی تعمیر میں عالمی بینک کی سرمایہ کاری کا خیرِ مقدم کیا جائے گا: گورنر سندھ

    ٹریٹمنٹ پلانٹس کی تعمیر میں عالمی بینک کی سرمایہ کاری کا خیرِ مقدم کیا جائے گا: گورنر سندھ

    کراچی: گورنر سندھ عمران اسماعیل سے عالمی بینک کے وفد نے ملاقات کی، ملاقات میں کراچی شہر کی ترقیاتی ضروریات اور مختلف شعبوں میں سرمایہ کاری پر تبادلۂ خیال کیا گیا۔

    تفصیلات کے مطابق عالمی بینک کے جنوبی ایشیا ریجن کے کنٹری ڈائریکٹر کی قیادت میں ایک وفد نے گورنر سندھ عمران اسماعیل سے ملاقات کی، جس میں کراچی کی ترقیاتی ضروریات کے حوالے سے گفتگو کی گئی۔

    [bs-quote quote=”کراچی ترقیاتی لحاظ سے بہت پیچھے رہ گیا: عمران اسماعیل” style=”style-7″ align=”left” color=”#dd3333″][/bs-quote]

    گورنر سندھ اور عالمی بینک کے وفد کی ملاقات میں شہرِ قائد میں کاروبار کے لیے آسانی کے اقدامات پر غور کیا گیا، گورنر سندھ نے کراچی کے اہم مسائل فراہمی و نکاسی آب، سالڈ ویسٹ مینجمنٹ کے مسائل کو خصوصی طور پر مذکور کیا۔

    ملاقات میں باہمی دل چسپی کے دیگر امور پر بھی تبادلۂ خیال کیا گیا، اس موقع پر گورنر سندھ عمران اسماعیل نے کہا کہ سندھ بشمول کراچی ترقیاتی لحاظ سے بہت پیچھے رہ گیا ہے۔

    انھوں نے کہا کہ فراہمی و نکاسی آب اور سالڈ ویسٹ مینجمنٹ شہر کے بڑے مسائل ہیں۔ انھوں نے عالمی بینک کے وفد کے سامنے اس سلسلے میں پرائیویٹ پارٹنر شپ کی خواہش کا اظہار کیا۔

    کراچی والوں کو پانی سے متعلق 25 دسمبر کو خوش خبری ملے گی، چیف جسٹس ثاقب نثار

    عمران اسماعیل نے کہا کہ ہم ٹریٹمنٹ پلانٹس کو پرائیوٹ پارٹنر شپ کے تحت بنانا چاہتے ہیں، پلانٹس میں عالمی بینک کے ذریعے کی جانے والی سرمایہ کاری کا خیرِ مقدم کیا جائے گا۔

    خیال رہے کہ تحریکِ انصاف کی حکومت نے ملکی مالیاتی مسائل اور تعمیر و ترقی کے معاملات کے سلسلے میں فنڈز کی فراہمی کے لیے آؤٹ آف باکس آئیڈیاز اپنانے کا فیصلہ کیا ہے۔

  • پولیس اور رینجرز نے مل کر کراچی کو محفوظ بنایا، سہیل انور سیال

    پولیس اور رینجرز نے مل کر کراچی کو محفوظ بنایا، سہیل انور سیال

    کراچی: پاکستان پیپلز پارٹی کے رکن اسمبلی سہیل انور سیال نے کہا ہے کہ پولیس اور رینجرز نے مل کر کراچی کو محفوظ بنایا، کراچی کی صورتِ حال دیگر شہروں کی نسبت مختلف تھی اور ہے۔

    سابق وزیرِ داخلہ سندھ انور سیال نے کا کہنا تھا کہ 18 ویں ترمیم کے بعد امن و امان صوبائی حکومت کی ذمہ داری ہے، لیکن صوبائی حکومت جو اچھے کام کرتی ہے اس پر سراہا نہیں جاتا۔

    [bs-quote quote=”آج وزیرِ اعلیٰ ایک کانسٹیبل کا تبادلہ بھی نہیں کر سکتا: انور سیال” style=”style-7″ align=”left” color=”#dd3333″][/bs-quote]

    ان کا کہنا تھا کہ آج وزیرِ اعلیٰ کسی ایک کانسٹیبل کا تبادلہ بھی نہیں کر سکتا، سندھ حکومت نے امن کے لیے رینجرز کے ساتھ مل کر کام کیا ہے۔

    سہیل انور سیال نے اقرار کیا ’کراچی میں موبائل چھیننے کے واقعات میں اضافہ ہوا ہے، تاہم شہر کی صورتِ حال پر سندھ حکومت اپنا کام کر رہی ہے۔‘

    انھوں نے کہا کہ 2012 سے پہلے کراچی نے بہت سی لاشیں دیکھی ہیں، لسانی فساد، دہشت گردی، ٹارگٹ کلنگ کے واقعات بہت زیادہ تھے، پھر اسٹیک ہولڈرز کی مشاورت سے آپریشن کیا گیا۔

    یہ بھی پڑھیں:  غیر ذمہ دارانہ بیان، بلاول بھٹو کی سہیل انور سیال کو سخت وارننگ

    سب کی کاوشوں سے کراچی میں امن و امان کی صورتِ حال بہت بہتر ہوئی، سانحہ اے پی ایس کے بعد آل پارٹیز کانفرنس نے آپریشن کا فیصلہ کیاتھا۔ موبائل فون چھیننے کے واقعات کے تدارک کے لیے وفاق کے ماتحت پی ٹی اے نے ایک سافٹ ویئر بنانے کا وعدہ کیا ہے۔

    خیال رہے کہ چند روز قبل سہیل انور سیال نے سندھ اسمبلی میں خطاب کرتے ہوئے کہا تھا کہ ہندوستان سے آنے والوں کو ہم پال رہے ہیں، ان لوگوں کو ہم نے پناہ دی، ان کو گھر، زمینیں اور اناج دیا، جس پر نہ صرف ایم کیو ایم کی جانب سے سخت ردِ عمل سامنے آیا بلکہ پی پی چیئرمین نے بھی ان کی سخت سرزنش کی۔

  • پیپلز پارٹی نے اقوامِ متحدہ میں وزیرِ خارجہ کے اردو میں خطاب کو مسترد کر دیا

    پیپلز پارٹی نے اقوامِ متحدہ میں وزیرِ خارجہ کے اردو میں خطاب کو مسترد کر دیا

    کراچی: بلاول بھٹو زرداری کی زیرِ صدارت پاکستان پیپلز پارٹی کی پارلیمانی پارٹی کا اجلاس منعقد ہوا، اجلاس میں اقوامِ متحدہ میں وزیرِ خارجہ کے اردو میں خطاب کو مسترد کر دیا گیا۔

    تفصیلات کے مطابق پیپلز پارٹی نے اقوامِ متحدہ کی جنرل اسمبلی کے اجلاس میں شاہ محمود قریشی کے خطاب کو اس لیے مسترد کر دیا ہے کیوں کہ وہ اردو میں کیا گیا۔

    [bs-quote quote=”اپوزیشن کو پی اے سی کی چیئرمین شپ نہ ملنے پر ایوان میں احتجاج کیا جائے گا: پیپلز پارٹی” style=”style-7″ align=”left” color=”#dd3333″][/bs-quote]

    پیپلز پارٹی نے پارلیمانی پارٹی اجلاس میں خطاب پر اعتراض اٹھا دیا ہے کہ خطاب اردو میں کیوں کیا گیا، عالمی فورم پر انگریزی میں خطاب سے پاکستان کے مؤقف کا دنیا کو پتا چلتا۔

    پی پی پارلیمانی پارٹی نے مؤقف اختیار کیا ہے کہ وزیرِ خارجہ شاہ محمود قریشی کا خطاب پاکستانی قوم سے نہیں بلکہ اقوامِ عالم سے خطاب تھا، وہ دنیا سے مخاطب ہو رہے تھے۔

    بلاول بھٹو زرداری کی زیرِ صدارت منعقد ہونے والی پارلیمانی پارٹی کے اجلاس میں یہ بھی مطالبہ کیا گیا کہ پبلک اکاؤنٹس کمیٹی کی چیئرمین شپ اپوزیشن کو دی جائے۔

    پاکستان پیپلز پارٹی نے فیصلہ کیا ہے کہ اپوزیشن کو پی اے سی کی چیئرمین شپ نہ ملنے پر ایوان میں احتجاج کیا جائے گا۔

    یہ بھی پڑھیں:  وزیرِ خارجہ شاہ محمود قریشی کا اقوام متحدہ کی جنرل اسمبلی اجلاس سے اردو میں تاریخی خطاب

    پی پی کی پارلیمانی پارٹی کے اجلاس میں متعدد دیگر ملکی معاملات پر بھی غور کیا گیا، پی پی نے فیصلہ کیا کہ حکومتی بجٹ، گیس اور بجلی کی قیمتوں میں اضافے کا معاملہ اسمبلی میں اٹھایا جائے گا۔

    خیال رہے کہ 29 ستمبر کو وزیرِ خارجہ شاہ محمود قریشی نے اقوامِ متحدہ کی جنرل اسمبلی کے اکہتر ویں اجلاس میں خطاب کرتے ہوئے اپنی قومی زبان اردو کو اہمیت دی اور اس تاثر کو ختم کیا کہ پاکستانی رہنما عالمی فورمز پر اپنی زبان میں بات کرنے احساسِ کم تری کی وجہ سے کتراتے ہیں۔

  • جامعہ کراچی میں بھینسوں کے باڑے قائم، 5 باڑے مسمار

    جامعہ کراچی میں بھینسوں کے باڑے قائم، 5 باڑے مسمار

    کراچی: شہرِ قائد کی مادرِ علمی میں بے حسی کی انتہا ہو گئی، سندھ کی بڑی جامعہ میں ملازمین نے بھینسوں کے باڑے قائم کر لیے، انتظامیہ بے بس ہو گئی۔

    تفصیلات کے مطابق جامعہ کراچی کے اندر بھینسوں کے باڑے قائم کر کے جامعہ کے ملازمین نے بے حسی کی ایک نئی مثال قائم کر دی، انتظامیہ باڑے قائم کرنے سے نہ روک سکی۔

    [bs-quote quote=”آپریشن کے باوجود یونیورسٹی میں کئی باڑے اب بھی قائم ہیں۔ باڑے جامعہ کے ملازمین نے قائم کیے۔” style=”style-7″ align=”left” color=”#dd3333″][/bs-quote]

    بھینسوں کے باڑوں کے خلاف جامعہ کراچی میں آپریشن کرنا پڑ گیا، مادرِ علمی میں تجاوزات کے خلاف آپریشن کے دوران پانچ باڑے مسمار کر دیے گئے۔

    بھینسوں کے باڑے جامعہ کراچی کی حدود میں جامعہ ہی کے ملازمین نے قائم کیے تھے، ملازمین نے جامعہ کی نرسری کی زمین پر بھی قبضہ جما لیا تھا، تجاوزات کے خلاف آپریشن میں نرسری کی زمین بھی واگزار کرا لی گئی۔

    یہ بھی پڑھیں:  کراچی : شاہراہ قائدین پر تجاوزات کیخلاف گرینڈ آپریشن، کیبن اور پتھارے ضبط

    جامعہ کراچی میں قائم بھینسوں کے باڑوں کے خلاف آپریشن کے باوجود تا حال جامعہ میں بھینسوں کے کئی باڑے قائم ہیں، آپریشن میں صرف پانچ باڑے مسمار کیے گئے ہیں۔ کراچی یونی ورسٹی میں پہلے بھی عجیب واقعات ہوتے رہے ہیں۔

    خیال رہے کہ کراچی میں مختلف علاقوں میں تجاوزات کے خلاف آپریشن کیا جا رہا ہے، دو ہفتے قبل محکمہ انسدادِ تجاوزات کی ٹیم نے شاہراہِ قائدین پر بھی گرینڈ آپریشن کرکے فٹ پاتھ پر موجود کیبن اور پتھارے ضبط کرلیے تھے اور کئی فٹ باہر نکلے شیڈز کو گرا دیا گیا تھا۔

  • کراچی: اسٹریٹ کرائمز کا عفریت بے قابو ہوگیا، شہری غیرمحفوظ، پولیس بے بس

    کراچی: اسٹریٹ کرائمز کا عفریت بے قابو ہوگیا، شہری غیرمحفوظ، پولیس بے بس

    کراچی: شہرِ قائد میں گزشتہ 9 ماہ میں شہری ایک ہزار 59 گاڑیوں اور 20 ہزار5 سو موٹر سائیکلوں سے محروم ہوئے، جرائم کے پریشان کن اعداد و شمار نے کراچی آپریشن پر سوالیہ نشان لگا دیا۔

    تفصیلات کے مطابق کراچی میں لٹیروں کا راج عروج پر ہے، لٹیرے رات ہی نہیں، دن دہاڑے بھی وارداتیں کر کے نکل جاتے ہیں، جرائم کے اعداد و شمار نے کراچی آپریشن کی قلعی اُتار دی۔

    [bs-quote quote=”جرائم کی نان اسٹاپ وارداتیں کراچی آپریشن پر سوالیہ نشان!” style=”style-7″ align=”left” color=”#dd3333″][/bs-quote]

    شہرِ قائد میں ڈاکو راج کے باعث آئے دن دکانیں لٹتی ہیں تو کہیں کسی کے گھر میں ڈکیتی کی واردات ہو جاتی ہے، کہیں راہ چلتے شہری موبائل فون سے محروم ہو جاتا ہے، تو کہیں کسی کی گاڑی چِھن جاتی ہے۔

    جرائم کے اعداد و شمار کے مطابق گزشتہ 9 ماہ میں شہری ایک ہزار 59 گاڑیوں، 20 ہزار5 سو موٹر سائیکلوں سے محروم ہوئے، جب کہ 24 ہزار 660 موبائل فونز چوری یا چھین لیے گئے۔

    [bs-quote quote=”اغوا برائے تاوان، بینک لوٹنے والوں اور قاتلوں کی سرگرمی جاری” style=”style-7″ align=”right” color=”#dd3333″][/bs-quote]

    گزشتہ نو ماہ میں اغوا برائے تاوان، بینک لوٹنے والے اور قاتل بھی سرگرم رہے، اس دوران اغوا کی 7 وارداتیں رپورٹ ہوئیں، جب کہ 3 بینک لوٹے گئے، مختلف وارداتوں میں 229 شہری بھی قتل ہوئے۔

    یہ بھی ملاحظہ کریں:  کراچی کے مختلف علاقوں میں پولیس مقابلے، 5 ملزمان گرفتار، اسلحہ برآمد

    روک سکو تو روک لو!!!

    اسٹریٹ کرمنلز  اپنی مسلسل وارداتوں کے ذریعے کراچی پولیس اور رینجرز کے لیے چیلنج بن گئے ہیں، جرائم کے خاتمے کے لیے اجلاس پر اجلاس، چھاپے، گرفتاریاں اور دعوے سب بے سود ثابت ہوئے۔

    اس صورتِ حال میں عوام خود کو غیر محفوظ سمجھنے لگے ہیں، شہریوں نے اپنی مدد آپ کا فیصلہ کر لیا، اپنی حفاظت خود کرتے ہوئے ایک اور واردات ناکام بنا دی۔

    شارع نور جہاں کے علاقے میں ڈکیتی کی کوشش پر اہلِ خانہ نے جرأت کا مظاہرہ کرتے ہوئے مزاحمت کی جس پر ڈاکوؤں کو فرار ہونا پڑ گیا، دوسری طرف بلدیہ ٹاؤن سعید آباد میں شہریوں نے مبینہ اغوا کار پکڑ لیا، پولیس نے ملزم کو حراست میں لے لیا۔

  • لاپتا ہونے والے 19 بچوں کے علاوہ تمام مل چکے ہیں، ڈی آئی جی سی آئی اے

    لاپتا ہونے والے 19 بچوں کے علاوہ تمام مل چکے ہیں، ڈی آئی جی سی آئی اے

    کراچی: ڈی آئی جی سی آئی اے امین یوسف کا کہنا ہے کہ لاپتا ہونے والے 19 بچوں کے علاوہ تمام مل چکے ہیں، کراچی سمیت سندھ بھر سے 58 بچے لاپتا ہوئے تھے۔

    تفصیلات کے مطابق اے آر وائی کے پروگرام سوال یہ ہے میں گفتگو کرتے ہوئے امین یوسف نے کہا کہ شہریوں سے اپیل ہے کہ وہ بچوں کے اغوا کے سلسلے میں کسی بھی خبر پر کان نہ دھریں۔

    سی آئی اے کے ڈی آئی جی کا کہنا تھا کہ ان کے پاس ایک بچہ کل فیصل آباد سے آیا ہے، وہ سات ماہ سے مسنگ تھا، وہ کلفٹن میں اپنے والد سے ناراض ہو کر چلا گیا تھا، تو اغوا اور گم شدگی کے واقعات میں فرق ہے۔

    ڈی آئی جی سی آئی اے نے مزید کہا کہ اندرون سندھ بچوں کے اغوا کی 11 ایف آئی آر درج ہوئیں ہیں، عوام سوشل میڈیا پر چلنے والی افواہوں پر یقین نہ کریں۔

    خیال رہے کہ کراچی میں بچوں کے اغوا کی وارداتوں میں تشویش ناک حد تک اضافہ ہوچکا ہے، چار دن قبل نجی اسکولوں کو بھی ڈائریکٹوریٹ آف پرائیویٹ انسٹی ٹیوشن کی جانب سے بچوں کی سیکورٹی کے لیے ہدایات جاری کی گئیں۔

    مزید پڑھیں:  بچوں کو اغوا کیے جانے کا معاملہ، نجی اسکولز کو ہدایات جاری

    دو ہفتے قبل وزیرِ اعظم کی زیرِ صدارت کراچی کے امن و امان پر اہم اجلاس میں عمران خان کو کراچی سمیت سندھ کی صورتِ حال پر بریفنگ دی گئی، جس میں وزیرِ اعظم نے شہر میں اسٹریٹ کرائمز اور بچوں کے اغوا پر تشویش کا اظہار کیا۔

    ڈی آئی جی سی آئی اے نے پروگرام میں گفتگو کرتے ہوئے یہ بھی کہا کہ کراچی میں گاڑیوں کی تعداد 20 سے 25 لاکھ ہو چکی ہے، اسٹریٹ کرائم کا طریقۂ واردات وہی پرانا ہے۔

    انھوں نے کہا کہ اب شہری لوٹ مار کی رپورٹ زیادہ کر رہے ہیں، پولیس بھی متحرک ہے، ملزمان پکڑے جا رہے ہیں، 6 ہفتے میں بڑی تعداد میں اشتہاری ملزمان گرفتار کیے جا چکے ہیں، جرائم پیشہ عناصر کے خلاف سخت اقدامات کیے جا رہے ہیں۔

  • سندھ حکومت نے کراچی میں سندھیوں کے خلاف وال چاکنگ کا نوٹس لے لیا

    سندھ حکومت نے کراچی میں سندھیوں کے خلاف وال چاکنگ کا نوٹس لے لیا

    کراچی: سندھ حکومت نے کراچی میں سندھیوں کے خلاف وال چاکنگ کا نوٹس لے لیا، وزیرِ زراعت اسماعیل راہو نے کہا کہ ہم سندھیوں کے خلاف وال چاکنگ کی پُر زور مذمت کرتے ہیں۔

    تفصیلات کے مطابق سندھ اسمبلی میں سہیل انور سیال کے اشتعال انگیز تقریر کے بعد شہر کی دیواروں پر سندھیوں کے خلاف چاکنگ کی گئی، جس پر سندھ حکومت نے فوری نوٹس لے لیا ہے۔

    [bs-quote quote=”سندھی مہاجر آپس میں بھائی ہیں: اسماعیل راہو” style=”style-7″ align=”left” color=”#dd3333″][/bs-quote]

    محکمہ زراعت کے وزیر اسماعیل راہو نے وال چاکنگ کی مذمت کرتے ہوئے کہا کہ سندھی اور مہاجر آپس میں بھائی ہیں، کچھ لوگوں سے کراچی کا امن برداشت نہیں ہوتا۔

    اسماعیل راہو کا کہنا تھا کہ کچھ لوگ ہمیں آپس میں لڑانا چاہتے ہیں، ہم ایسا نہیں ہونے دیں گے، قانون نافذ کرنے والے ادارے ایسی گھٹیا حرکت کے خلاف کارروائی کریں۔

    خیال رہے کہ دو روز قبل سندھ اسمبلی سے خطاب کرتے ہوئے سہیل انور سیال کا کہنا تھا کہ ہندوستان سے آنے والوں کو ہم پال رہے ہیں، ان لوگوں کو ہم نے پناہ دی، ان کو گھر، زمینیں اور اناج دیا۔

    غیر ذمہ دارانہ بیان، بلاول بھٹو کی سہیل انور سیال کو سخت وارننگ

    انور سیال کے خطاب کو پی پی چیئرمین بلاول بھٹو زرداری نے غیر ذمہ دارانہ قرار دیتے ہوئے انھیں سخت وارننگ جاری کی، پی پی چیئرمین نے سخت ناراضی کا بھی اظہار کیا۔

    دوسری طرف ایم کیو ایم کے رہنما فاروق ستار نے ردِ عمل دیتے ہوئے کہا تھا کہ سہیل انور سیال نے معافی نہیں مانگی تو پیر کو احتجاج کریں گے، ان کے بیان کی سخت الفاظ میں مذمت کرتاہوں، پی پی واضح کرے یہ سہیل انور سیال کا بیان ہے یا پارٹی پالیسی؟

  • پاکستان اٹامک انرجی کمیشن کی نیو کلیئر پاور پلانٹ میں ایک اور کامیابی

    پاکستان اٹامک انرجی کمیشن کی نیو کلیئر پاور پلانٹ میں ایک اور کامیابی

    کراچی: پاکستان اٹامک انرجی کمیشن نے نیو کلیئر پاور پلانٹ میں ایک اور کام یابی حاصل کرلی، کراچی پاور پلانٹ تھری کا ڈوم نصب کر دیا گیا۔

    تفصیلات کے مطابق پاکستان اٹامک انرجی کمیشن نے نیو کلیئر پاور پلانٹ تھری میں ڈوم نصب کر دیا، یہ انرجی کمیشن کی جانب سے ایک اور بڑی کام یابی ہے۔

    ترجمان اٹامک انرجی کمیشن شاہد ریاض نے بتایا کہ ڈوم پاور پلانٹ کا سب سے مضبوط حصہ ہوتا ہے، جو نیو کلیئر پاور پلانٹ کے تابکاری اثرات کی روک تھام کرتا ہے۔

    چیئرمین اٹامک انرجی کمیشن محمد نعیم کا کہنا تھا کہ گنبد کی تنصیب سے کراچی تھری نیو کلیئر پاور پلانٹ کا سول ورک مکمل ہو گیا ہے۔ یہ بجلی کی پیداوار کا ایک بڑا منصوبہ ہے۔

    محمد نعیم نے کہا کہ کراچی ٹو اور تھری پاور پلانٹ شیڈول کے مطابق پیداوار شروع کردیں گے، کراچی ٹو، تھری پاور پلانٹ کی تکمیل سے 2200 میگا واٹ بجلی پیدا ہوگی۔

    ترقیاتی فنڈ کی مد میں 30 ارب سے زائد روپے جاری

    خیال رہے کہ گزشتہ ماہ منصوبہ بندی کمیشن نے اٹامک انرجی کمیشن کو منصوبوں کی تکمیل کے لیے 4 ارب 67 کروڑ روپے جاری کیے تھے۔

    پاکستان نے 1972 میں کراچی میں 137 میگا واٹ کا پلانٹ لگا کر سول نیوکلئیر پاور پروگرام کا آغاز کیا تھا اور یہ سفر اب بھی کام یابی سے جاری ہے۔

  • فالودہ فروش بیٹھے بیٹھے ارب پتی بن گئے

    فالودہ فروش بیٹھے بیٹھے ارب پتی بن گئے

    کراچی: شہرِ قائد کے علاقے اورنگی ٹاؤن سے تعلق رکھنے والے ایک فالودہ فروش پر قسمت مہربان ہوئی تو چھپر پھاڑ کر دولت برسی، بیٹھے بیٹھے ارب پتی بن گئے۔

    تفصیلات کے مطابق اورنگی ٹاؤن کے رہائشی ایک فالودے والے کو ایک غیر قانونی ٹرانزیکشن نے ارب پتی بنا دیا، ان کے بینک اکاؤنٹ میں 2 ارب روپے سے زائد کی رقم موجود ہونے کا انکشاف ہوا ہے۔

    شہری عبد القادر کے اکاؤنٹ میں خطیر رقم کی موجودگی پر ایف آئی اے نے تحقیقات شروع کر دی ، فالودہ فروش نے بتایا کہ انھیں ایف آئی نے پوچھ گچھ کے لیے طلب کیا ہے۔

    فالودہ فروش عبد القادر کا کہنا ہے کہ انھیں پتا نہیں کہ ان کے اکاؤنٹ میں سوا 2 ارب روپے کیسے آئے۔ فالودہ فروش نے اپنے اکاؤنٹ کی موجودگی سے بھی لاتعلقی کا اظہار کر دیا۔

    عبد القادر نے بتایا ’مجھے نہیں پتا میرا اکاؤنٹ کس نے اور کیسے کھولا، مجھے پتا ہی نہیں تھا کہ میرا بینک اکاؤنٹ ہے، میں 40 گز کے گھر میں رہتا ہوں، پتا نہیں میرے اکاؤنٹ میں اتنے پیسے کیسے آئے۔‘

    یہ بھی پڑھیں:  امریکی شہری نے لاٹری ٹکٹ سے 24 کروڑ 56 لاکھ ڈالر جیت لیے

    فالودہ بیچنے والے شہری نے مزید کہا ’مجھے جو دستخط دکھائے گئے وہ انگریزی میں ہیں، جب کہ میں انگوٹھا چھاپ ہوں، انگریزی میں دستخط نہیں کر سکتا۔‘

    فالودہ فروش نے کہا کہ انھیں محرم میں پتا چلا کہ ان کے اکاؤنٹ میں اتنے سارے پیسے ہیں، ایف آئی اے نے انھیں صرف ایک بار طلب کیا، وہاں پہنچنے پر انھیں بتایا گیا کہ اکاؤنٹ میں سوا دو ارب روپے ہیں۔

    عبد القادر کے بیان کے مطابق وہ 15 سال قبل گلستانِ جوہر میں پی سی او پر کام کیا کرتے تھے، اس وقت ان سے شناختی کارڈ کی فوٹو کاپی مانگی گئی تھی۔ فالودہ فروش نے کہا ’میرے دل میں چور نہیں ہے تو میں کیوں ڈروں۔‘

    اورنگی ٹاؤن میں چالیس گز کے مکان میں رہائش پذیر محنت کش فالودہ فروش عبد القادر کے گھر کے بار پولیس تعینات کر دی گئی ہے۔