Tag: کراچی کی خبریں

کراچی: عید الفطر سے قبل ہی کراچی سے روانہ ہونے والی ٹرینوں کی بکنگ فل ہو گئی، مسافروں نے پہلے ہی ایڈوانس بکنگ کرالی۔

تفصیلات کے مطابق ڈی سی او ریلوے کا کہنا ہے کہ کراچی سے روانہ ہونے والی ٹرینوں میں بکنگ فل ہو گئی ہے، مسافروں نے پہلے ہی ایڈوانس بکنگ کرالی۔

ڈی سی او کا خصوصی ٹرینوں سے متعلق کہنا تھا کہ عید اسپیشل ٹرینوں کے اعلان کے بعد خصوصی ٹرینوں کی بکنگ ہوگی۔

واضح رہے کہ لاہور ریلوے اسٹیشن پر قائم سرکاری پناہ گاہ میں مسافروں کو گھر جیسا ماحول فراہم کیا جا رہا ہے، صاف ستھرے ماحول میں مفت قیام و طعام کی سہولت فراہم کر دی گئی ہے۔

یہ بھی پڑھیں:  عید کے دن ریلوے میں سفر کرنے والوں کے لیے آدھے ٹکٹ کا اعلان

ریلوے اسٹیشن پر بنائے گئے پناہ گاہ میں 2 بلاکس اور 60 رہائشی یونٹس میں 164 مرد و خواتین کے ٹھہرنے کا انتظام کیا گیا ہے، جب کہ پردیسیوں، پارکوں اور سٹرکوں پر رات گزارنے والوں کو لانے کے لیے شٹل سروس کا بھی آغاز کر دیا گیا ہے۔

یاد رہے کہ گزشتہ روز وفاقی وزیر ریلوے شیخ رشید نے عوام کو خوش خبری سناتے ہوئے عید کے دن ریلوے میں سفر کرنے والوں کے لیے آدھے ٹکٹ کا اعلان کر دیا تھا۔

کراچی: شہر قائد میں پولیس گردی کا ایک اور مبینہ واقعہ سامنے آ گیا ہے، کورنگی بلال کالونی کے 22 سالہ نوجوان شہباز پر پولیس نے بہیمانہ تشدد کیا۔

تفصیلات کے مطابق کورنگی کراچی کے نوجوان شہباز نے الزام لگایا ہے کہ اسے پولیس نے چوری کا الزم لگا کر اغوا کیا، اور نا معلوم مقام پر لے جا کر ہاتھ پاؤں باندھ کر تشدد کیا گیا۔

نوجوان شہباز نے بتایا کہ پولیس نے اس پر سوا ماہ تک تشدد کیا، ایک وقت کا کھانا دیتے تھے اور تشدد کرتے رہتے تھے۔

نوجوان نے الزام لگایا کہ اغوا کروانے میں خالہ اور خالو ملوث ہیں، خالہ سی ٹی ڈی میں ہیڈ کانسٹیبل جب کہ خالو اے سی ایل سی میں تعینات ہیں۔

نوجوان کا کہنا تھا کہ سوا ماہ بعد ملیر سٹی تھانے کے قریب چھوڑ کر اہل کار فرار ہوئے، اب والدین اور مجھے سنگین نتائج کی دھمکیاں دی جا رہی ہیں۔

یہ بھی پڑھیں:  کراچی میں پولیس اہلکار کی غفلت سے دستی بم مزدور کے ہاتھ میں پھٹ گیا

شہباز نے کہا کہ اس کی زندگی کو خطرہ لاحق ہے، تحفظ فراہم کیا جائے۔ خیال رہے کہ نوجوان شہباز کے اغوا کا مقدمہ کورنگی انڈسڑیل ایریا تھانے میں درج ہے۔

یاد رہے کہ گزشتہ ماہ کراچی کے علاقے گلشن اقبال یونی ورسٹی روڈ پر پولیس اہل کار کی فائرنگ سے رکشے میں سوار ڈیڑھ سالہ بچہ احسن جاں بحق ہو گیا تھا۔

خیال رہے کہ آئے روز ملک کے مختلف شہروں میں پولیس گردی کے واقعات سامنے آ رہے ہیں، پولیس کی جانب سے بے گناہوں پر تشدد اور انھیں جان سے مارنے کے واقعات کی روک تھام کے لیے تا حال سنجیدہ اقدامات نہیں کیے گئے۔

کراچی: اہم عدالتی نمبر پلیٹ اور پاکستانی جھنڈا لگا کر کلفٹن میں گاڑی چلانے والا نوجوان دھر لیا گیا۔

تفصیلات کے مطابق کلفٹن کے علاقے میں پولیس کو بے وقوف بنانا نوجوان کو مہنگا پڑ گیا، پولیس نے اسے گاڑی پر اہم عدالتی نمبر پلیٹ اور پاکستانی جھنڈا لگانے پر پکڑ لیا۔

معلوم ہوا ہے کہ ایم اے جناح روڈ پر جعلی نیم پلیٹ اور جھنڈے چند روپوں میں بکنے لگے ہیں۔

پولیس نے عبداللہ شاہ غازی مزار کے قریب کالے شیشوں والی کار کو روکنے کا اشارہ کیا تو کار چلانے والے نوجوان نے شیشہ اتار کر پولیس کو غصہ دکھایا اور گاڑی دوڑا دی۔

تاہم بن قاسم پارک کے قریب پولیس نے گاڑی کو روک لیا، گاڑی پر اہم عدالتی نمبر پلیٹ اور پاکستانی جھنڈا بھی لگا ہوا تھا۔

نوجوان نے پکڑے جانے پر کہا کہ نہ میں وکیل ہوں نہ میرا تعلق عدالت سے ہے، جعلی نیم پلیٹ اس لیے لگائی کہ اس نیم پلیٹ کو دیکھ کر پولیس نہیں روکتی۔

یہ بھی پڑھیں:  فینسی نمبر پلیٹ : رکن اسمبلی اور سابق آئی جی سندھ کی گاڑیاں روک لی گئیں

نوجوان کا کہنا تھا کہ اس نے پلازہ سے 1200 روپے میں یہ نیم پلیٹ خریدی۔ بعد ازاں پولیس نے نوجوان کی گاڑی کی نیم پلیٹ، کالے شیشے اور جھنڈا اتار لیا۔

یاد رہے کہ فروری میں کلفٹن کے علاقے سے منسٹر کے نام والی ایک لینڈ کروزر پکڑی گئی تھی، جب کہ ایک رکن سندھ اسمبلی کو بھی گاڑی پر ہاتھ سے لکھی سرکاری نمبر پلیٹ، اور سابق آئی جی سندھ غلام حیدر جمالی کو فینسی نمبر پلیٹ پر روکا گیا تھا۔

کراچی: شہر قائد میں موٹر سائیکل چوری کی بڑھتی وارداتوں سے نمٹنے کے لیے کراچی پولیس نے حکمتِ عملی تیار کر لی۔

تفصیلات کے مطابق کراچی میں موٹر سائیکل چوری کی وارداتوں میں اضافہ ہو گیا ہے، کراچی پولیس چیف ڈاکٹر امیر شیخ کا کہنا ہے کہ پولیس نے ان وارداتوں کی روک تھام کے لیے حکمت عملی تیار کر لی۔

کراچی پولیس چیف ڈاکٹر امیر شیخ نے کہا ہے کہ چوری کی گئیں موٹر سائیکلیں کھول کر ان کے اسپیئر پارٹس فروخت کر دیے جاتے ہیں، چوری کے اسپیئر پارٹس خریدنے والوں کے خلاف بھی کریک ڈاؤن کا فیصلہ کر لیا ہے۔

اے آئی جی امیر شیخ کا کہنا ہے کہ بیش تر موٹرسائیکلیں شہر کے اندر ہی فروخت کر دی جاتی ہیں، تاہم چوری اور چھینی گئیں موٹر سائیکلیں دوسرے شہر بھی بھیجی جاتی ہیں۔

خیال ہے کہ دو دن قبل سی پی ایل سی کی جاری کردہ ماہانہ کرائم رپورٹ میں کہا گیا تھا کہ اپریل کے مہینے میں کراچی کے مختلف علاقوں سے 2446 موٹر سائکلیں چوری اور چھینی گئی ہیں۔

یہ بھی پڑھیں:  اپریل کا مہینا شہر قائد کے باسیوں پر بھاری گزر گیا، 40 افراد قتل، ہزاروں موٹر سائیکلیں چوری

دریں اثنا، ملیر سکھن سے کراچی کے مختلف علاقوں میں منشیات کی سپلائی کرنے والے خاتون منشیات فروش سمیت 2 ملزمان کو قاسمانی محلے سے پولیس نے گرفتار کر لیا ہے۔

کراچی پولیس کا کہنا ہے کہ ملزمان پر چھاپا خفیہ اطلاع پر مارا گیا، ملزمان میں زرغونہ اور دولت شاہ شامل ہیں، ملزمان سے آدھا کلو اعلیٰ کوالٹی ہیروئن اور چرس برآمد کیا گیا۔

ایس ایس پی عرفان بہادر نے میڈیا کو بتایا کہ ملزم سکھن سے رکشے کے ذریعے منشیات اسمگل کرتے تھے، منشیات شاہ فیصل، محمود آباد سمیت کئی علاقوں میں سپلائی ہوتی تھی، سپلائی میں استعمال ہونے والا رکشا بھی تحویل میں لے لیا گیا ہے۔

کراچی: ماہ اپریل شہر قائد کے باسیوں پر بھاری گزر گیا، مختلف واقعات میں 40 افراد کو قتل کر دیا گیا جب کہ ہزاروں موٹر سائیکلیں چھینی اور چوری کی گئیں۔

تفصیلات کے مطابق اپریل میں شہر قائد کے باسی جرائم پیشہ عناصر کے ہاتھوں کیسے لٹے، سی پی ایل سی نے ماہانہ کرائم ڈیٹا رپورٹ جاری کر دی۔

رپورٹ میں کہا گیا ہے کہ ایک ماہ کے دوران بھتہ خوری کے 4 واقعات رپورٹ ہوئے، اور مختلف واقعات میں 40 افراد قتل کیے گئے۔

رپورٹ کے مطابق ایک ماہ میں کراچی کے مختلف علاقوں سے 132 گاڑیاں چوری اور چھینی گئیں، جب کہ 2446 موٹر سائکلیں بھی چوری اور چھینی گئیں۔

کراچی کے شہری راہ چلتے موبائل فونز سے محرومی کا سلسلہ بھی عروج پر رہا، اسٹریٹ کرائمز میں کمی کے دعوے ہوا ہو گئے، رپورٹ کے مطابق 30 دن میں 3599 شہری موبائل فونز سے محروم کیے گئے۔

یہ بھی پڑھیں:  کراچی: جرائم کی وارداتوں میں اضافہ، تین ماہ میں 95 افراد قتل

خیال رہے کہ تواتر سے یہ کہا جا رہا ہے کہ کراچی میں جرائم کی صورت حال میں نمایاں بہتری آئی ہے، اپریل ہی میں ڈی جی آئی ایس پی آر نے ٹویٹ پر کہا تھا کہ کراچی میں صورت حال ماضی کے مقابلے میں بہت بہتر ہے۔

14 اپریل کو سی پی ایل سی کی رپورٹ تھی کہ تین ماہ میں کراچی میں 95 افراد قتل کیے گئے اور جرائم کی وارداتوں کی شرح میں اضافہ دیکھنے میں آیا۔

گزشتہ ماہ ہزاروں موٹر سائیکلیں اور گاڑیاں چوری کرنے والے مختلف گروہوں کو بھی گرفتار کیا گیا لیکن وارداتوں میں کوئی کمی نہیں آئی۔

12 اپریل کو آئی جی سندھ نے خبردار کیا کہ شہر کے 77 مقامات کے لیے دہشت گردی کے تھریٹ الرٹس موجود ہیں۔