کراچی: لانڈھی پولیس نے کارروائی کرتے ہوئے بلوچستان کے ڈی آئی جی کے قاتل کو گرفتار کرلیا ہے، ملزم نے دورانِ تفتیش اہم انکشافات کیے۔
تفصیلات کے مطابق بلوچستان کے ڈی آئی جی کے قتل میں ملوث ملزم کو لانڈھی سے گرفتار کر لیا گیا ہے، ملزم کا تعلق کالعدم تنظیم سے ہے۔
ایس ایس پی کورنگی ساجد امیر سدوزئی نے پریس کانفرنس کرتے ہوئے کہا کہ ملزم صلاح الدین عرف حاجی کو لانڈھی سے گرفتار کیا گیا۔
ساجد امیر سدوزئی نے بتایا کہ ملزمان کے حملے میں ڈی آئی جی اپنے گن مین سمیت شہید ہو گئے تھے، گرفتار ملزم کے چار ساتھی مارے جاچکے ہیں۔
گرفتار ملزم نے دورانِ تفتیش اہم انکشافات کیے، ایس ایس پی کے مطابق ملزم صلاح الدین کا تعلق کالعدم تنظیم سے ہے، سرحدی علاقے میں گاڑیاں اور اسلحہ اور دیگر سامان لوٹتے تھے۔
ایس ایس پی کورنگی کے مطابق گروپ کا لیڈر ظفر، نیکو عرف جھوٹ اور دھانی مفرور ہیں، جب کہ ملزم صلاح الدین کے چار ساتھی پہلے ہی پولیس کارروائی میں مارے جاچکے ہیں۔
ملزم نے انکشافات کرتے ہوئے کہا کہ وہ 2003 میں سندھ بلوچستان سرحد پر اپنے ساتھیوں کے ساتھ تھا، سرکاری گاڑی کو آتے دیکھا جس پر پولیس کی لائٹ لگی ہوئی تھی۔
کراچی سے تعلق رکھنے والے جوزف کوٹس کارڈینل بن گئے
ملزم کے بیان کے مطابق انھوں نے گاڑی چھیننے کی نیت سے اسے روکنے کی کوشش کی، گاڑی کے نہ رکنے پر انھوں نے فائرنگ شروع کردی تو سامنے سے بھی فائرنگ ہوئی۔
ملزم نے بتایا کہ دو طرفہ فائرنگ سے ڈی آئی جی بلوچستان اپنے گن مین سمیت جاں بحق ہوئے، مقابلے میں ہمارا ایک ساتھی بھی موقع پر مارا گیا۔
ملزم صلاح الدین کے بیان کے مطابق ان کے پاس راکٹ لانچر اور کلاشن کوف تھیں، فائرنگ کے بعد وہ فرار ہوگئے، اور اپنا علاقہ مسلسل تبدیل کرتے رہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
