کراچی: شہر میں موت کا رقص جاری، مختلف علاقوں میں فائرنگ کے واقعات میں سات افراد جاں بحق جبکہ متعدد زخمی ہو گئے، شہر کے مختلف علاقوں میں رینجرز اور پولیس کی کاروائیاں جاری ہے جن میں گینگ وار اور کلعدم تنظیموں کے اہم ملزمان گرفتار کر لئے گئے۔
تفصیلات کے مطابق شہرِ قائد کوصبح ہوتے ہی فائرنگ کے واقعات نے اپنی گرفت میں لے لیا۔ بلدیہ کے علاقے عبداللہ گوٹھ سے تین افرادکی لاشیں ملیں ہیں۔ پولیس کے مطابق تینوں افراد کو فائرنگ کرکے قتل کیا گیا ہے۔ پولیس نے لاشوں کو ہسپتال منتقل کر کے واقع کی تفتیش شروع کر دی ہے۔
ادھر قائد آباد مرغی خانہ اسٹاپ پر فائرنگ سے ایک شخص لقمہ اجل ہو گیا جبکہ ایک اور فرد زخمی ہوگیا۔ قتل اور زخمی ہو نے والوں کو فوری طور پر ہسپتال منتقل کیا گیا تاکہ مزید پولیس کاروائی کی جاسکے۔
دوسری جانب کورنگی ڈھائی نمبر سے ایک شخص کی لاش ملی جسے فائرنگ کرکے قتل کیا گیا ہے۔ ادھر گلستان جوہر بلاک سات میں فائرنگ سے ایک شخص ہلاک ہوگیا۔
رینجرز نے مدینہ اور اسلامیہ کالونی میں سرچ آپریشن کے بعد چھ ملزمان کوگرفتار کرکے اسلحہ برآمد کرلیا۔ رینجرز ترجمان کے مطابق گرفتار ملزمان کا تعلق کالعدم تنظیم سے ہے۔ ادھر بلدیہ چار نمبر میں رینجرز نے چھاپہ مار کاروائی کے بعد دو ملزمان کو گرفتار کرکے اسلحہ برآمد کرلیا ملزمان کا تعلق لیاری گینگ وار سے ہے۔
