اسلام آباد : وفاقی وزیر ریلوے شیخ رشید نے کہا ہے کہ باباگرونانک کا جنم دن اقبال کے جنم دن سے ملانے والے عقل کے اندھے ہیں ، کم عقل لوگوں کواندازہ نہیں کہ کرتارپور کوریڈور کا کشمیر کو کتنا فائدہ پہنچے گا۔
تفصیلات کے مطابق وفاقی وزیر ریلوے شیخ رشید نے سوشل میڈیا پر جاری اپنے ویڈیو پیغام میں کہا ہے کہ کرتارپور خطے کی تاریخ بدلنے جارہا ہے، خارجہ سطح پر وزیراعظم اور آرمی چیف نے ملک کیلئے بڑی کامیابی حاصل کی، بعض عقل کے اندھے اور کم عقل لوگوں کواندازہ نہیں کہ کرتارپور کوریڈور کا کشمیر کو کتنا فائدہ پہنچے گا۔
شیخ رشید کا کہنا تھا کہ باباگرونانک کا جنم دن اقبال کے جنم دن سے ملانے والے عقل کے اندھے ہیں، عقل کے اندھوں کی سوچ پر ماتم ہی کیا جاسکتا ہے، کرتارپور کی وجہ سے مودی کے سینے پر مونگ دلنے کا کسی کو اندازہ نہیں۔
وفاقی وزیر ریلوے نے کہا کہ یہ عدلیہ کو متنازع بنا کر کس کی خدمت کر رہے ہیں ، ان کے انتشار اور خلفشار سے ملک کو کیا نقصان پہنچے گا، بالآخر یہ اپنے ہی جال میں پھنس کر ناکامی کا منہ دیکھیں گے، کامیابی کشمیریوں کی آزادی کا مقدر بنے گی۔
یاد رہے ننکانہ صاحب میں کرتار پور راہداری کی افتتاحی تقریب 9نومبر کو ہوگی ، وزیراعظم عمران خان اور آرمی چیف جنرل قمر جاوید باجوہ تقریب میں شریک ہوں گے جبکہ وزیراعظم عمران خان نے کابینہ ارکان کو افتتاحی تقریب میں شرکت کی ہدایت کی ہے۔
واضح رہے کہ حکومت پاکستان بابا گرونانک کے 550ویں یوم پیدائش کے موقع پر کرتارپور راہداری کھولنے کے لیے پُرعزم ہے، افتتاح کے بعد یہ پاکستان کا سب سے بڑا گردوارہ بن جائے گا۔
