بشکک: ایک طرف جہاں دنیا بھر میں کرونا ویکسینز کی طلب شدید ہے، وہاں وسطی ایشیائی ملک کرغزستان میں فریج کو بند کرنے سے ایک ہزار روسی کرونا ویکسینز خراب ہو گئیں۔
تفصیلات کے مطابق میڈیا رپورٹ میں کہا گیا ہے کہ کرغزستان میں روسی اسپوتنک ویکسین کی ایک ہزار ڈوزز اس لیے ضائع ہوگئیں کہ فریج کو بند کر دیا گیا تھا۔
بشکک کی میڈیا رپورٹ کے مطابق اسٹیٹ کلینک میں موبائل فون کو چارج کرنے کے لیے فریج کو بند کیا گیا تھا، تاہم اس وقت اس میں ویکسینز بھی موجود تھیں، جس پر انھیں درکار ٹھنڈک نہ مل سکی اور وہ ضائع ہو گئیں۔
معلوم ہوا ہے کہ عملے کی غفلت کے باعث خراب ہونے والی ہزار ڈوزز روس کی جانب سے عطیہ کردہ ویکسینز میں شامل تھیں۔
یاد رہے کہ مارچ میں ہوائی کے ایک جزیرے ماوی میں ایک اسپتال میں بھی 1400 کرونا ویکسینز ریفریجریٹر صحیح طور سے بند نہ کیے جانے کے سبب خراب ہو گئی تھیں، یہ ویکسینز فائزر والی تھیں، اور ریفریجریٹر بھی کم درجہ حرارت والا تھا۔
رواں برس فروری میں برطانوی کاؤنٹی واروِکشائر میں ایک اسپتال میں بھی ایسا واقعہ پیش آیا تھا، اسٹراٹفورڈ اسپتال میں عملے کی غفلت کے باعث فائزر کی ویکسینز کی ایک کھیپ کو بروقت فریج میں نہیں رکھوایا جا سکا، اور وہ کئی گھنٹے تک کمرے میں پڑی رہی، جس کی وجہ سے وہ خراب ہو گئی۔
