ARYNews.tv | Urdu – Har Lamha Bakhabar

Tag: کرم ایجنسی

  • کرم کے لیے ہیلی کاپٹر سروس شروع، 14 مریضوں سمیت 53 افراد پشاور منتقل

    کرم کے لیے ہیلی کاپٹر سروس شروع، 14 مریضوں سمیت 53 افراد پشاور منتقل

    پشاور: وزیر اعلیٰ کے پی علی امین گنڈاپور کی ہدایت پر کرم کے لیے ہیلی کاپٹر سروس شروع کر دی گئی۔

    گزشتہ روز صوبائی حکومت کے ہیلی کاپٹر نے پشاور سے کرم کے لیے 2 پروازیں کیں، ہیلی کاپٹر کے ذریعے پارا چنار سے 14 مریضوں سمیت 53 افراد کو پشاور منتقل کیا گیا۔

    آج ہیلی کاپٹر کی پہلی پرواز سے جرگہ ممبران اور سرکاری عملے پر مشتمل 16 افراد کو پارا چنار لایا گیا، آج دوسری پرواز کے ذریعے پاراچنار سے 27 لوگوں کو ٹل منتقل کیا گیا، ہیلی کاپٹر کے ذریعے تیسری پرواز سے ٹل میں پھنسے افراد کو پارا چنار لایا جائے گا۔

    آج ہیلی کاپٹر کے ذریعے مجموعی طور پر 100 سے زائد افراد کو منتقل کیا جائے گا، دواؤں کی فراہمی کے لیے ہیلی کاپٹر کی کل 7 پروازیں کرم گئیں، 6 کروڑ روپے مالیت سے زائد کی دوائیں ہیلی کاپٹر کے ذریعے کرم پہنچائی گئیں۔

    مریم نواز کی ہدایت پر بیمار خاتون کو علاج کیلیے پاراچنار سے راولپنڈی منتقل کر دیا گیا

    خیبر پختونخوا کے وزیر اعلیٰ نے کہا موجودہ صورت حال میں کرم کے عوام کی مشکلات کا بخوبی احساس ہے، صوبائی حکومت کرم کے عوام کے لیے تمام دستیاب وسائل بروئے کار لا رہی ہے، علی امین گنڈاپور نے کہا امن اور کرم کے معاملے کے مستقل حل کے لیے سنجیدہ اقدامات کیے جا رہے ہیں۔

  • عام انتخابات میں حصہ لینے والی کرم ایجنسی کی پہلی خاتون امیدوار

    عام انتخابات میں حصہ لینے والی کرم ایجنسی کی پہلی خاتون امیدوار

    کرم ایجنسی : پاکستان کے قبائلی علاقے سے تعلق رکھنے والی علی بیگم پہلی خاتون ہیں جنہوں نے انتخابات میں حصہ لینے کا اعلان کرتے ہوئے انتخابی مہم کا آغاز کر دیا۔

    تفصیلات کے مطابق 63 سالہ علی بیگم پاکستانی قبائلی علاقے فاٹا سے پہلی بار انتخابات میں حصہ لینے والی خاتون امیداوار بن گئیں، علی بیگم نے پاراچنارسے انتخابی مہم کا آغاز کیا۔

    علی بیگم کا کہنا ہے کہ پوری زندگی عوامی خدمت میں گزار دی اور منتخب ہوکر کرم ایجنسی میں امن اور خوشحالی کے لیے ترقیاتی منصوبوں پر کام اور مظلوم طبقے کو ان کا جائز حق دلاؤں گی۔

    انتخابی مہم کے آغاز پر جلسے سے خطاب کرتے ہوئے علی بیگم نے کہا کہ اس سے پہلے انتخابات میں ہر طبقے کے لوگوں نے الیکشن لڑنے کے لیے مجھ سے رابطہ کیا لیکن میں نے دوسروں کو موقع دیا لیکن اب میں خود محسوس کرتی ہوں کہ عوام کے مسائل کے حل کرنے کے لئے میدان میں اترنے کی ضرورت ہے۔

    ان کا کہنا تھا کہ انتخابات میں منتخب ہوں یا نہیں لیکن اپنا مشن جاری رکھوں گی اور اپنے علاقے کے لوگوں کے تمام مسائل کیلئے اقداما ت اٹھاؤں گی۔

    خیال رہے علی بیگم وفاق کے زیر انتظام قبائلی علاقے فاٹا سے بیوروکریسی سے ریٹائر ہیں اور خیبر پختونخوا اور فاٹا کے متعدد اہم عہدوں پر خدمات انجام دے چکی ہے۔

    اس سے قبل فاٹا سے ہی تعلق رکھنے والی بادام زری پہلی قبائلی خاتون تھیں، جہنوں نے باجوڑ سے قومی اسمبلی کے حلقے 44 پر 2013 کے انتخابات میں حصہ لیا تھا۔

    قبائلی علاقے کی بیشتر خواتین کم پڑھی لکھی ہیں، شاذ و نادر ہی گھر سے باہر جاکر ملازمت کرتی ہیں جبکہ عوامی مقامات پر برقعہ زیب تن کیے رکھتی ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • کرم ایجنسی : پاک افغان سرحد پر امریکی ڈرون حملہ، 3 جاں بحق

    کرم ایجنسی : پاک افغان سرحد پر امریکی ڈرون حملہ، 3 جاں بحق

    کرم ایجنسی : پاک افغان سرحد پر واقع مکان پر امریکی ڈرون حملے سے 3 افراد جاں بحق ایک زخمی ہوگیا، حملہ میں مکان مکمل طور پر تباہ ہوگیا۔

    تفصیلات کے مطابق پاک افغان سرحد پر واقع کرم ایجنسی میں دہشت گردوں کی موجودگی کی اطلاع پر امریکی ڈرون حملہ کیا گیا۔

    سرکاری ذرائع کا کہنا ہے کہ کرم ایجنسی میں امریکی ڈرون طیارے نے ایک مکان پر دو میزائل فائر کیے، جس کے نتیجے میں مکان میں موجود تین افراد موقع پر ہی ہلاک ہوگئے، حملے میں مکان مکمل طور پر تباہ ہوگیا۔

    ویڈیو دیکھیں:

    تازہ ترین اطلاعات کے مطابق ڈرون حملہ پاکستانی حدود غوزگڑھی اپر کرم ایجنسی میں کیا گیا، یہ علاقہ افغان صوبے پکتیا اپرکرم ایجنسی کا سرحدی علاقہ ہے۔

    طالبان دور میں افغان سفیر کا داماد مارے جانے کی اطلاع

    ڈرون حملہ طالبان رہنما مولانا محب کے گھر پرہوا ہے،  حملے میں طالبان دور حکومت میں افغان سفیر مولانا عبدالسلام کے داماد کے مارے جانے کی اطلاعات ہیں۔

  • افغانستان سےپاکستان میں داخل ہونےوالی باروسےبھری گاڑی تباہ

    افغانستان سےپاکستان میں داخل ہونےوالی باروسےبھری گاڑی تباہ

    کرم ایجنسی : سیکورٹی فورسز نے کرم ایجنسی میں افغان بارڈر سے پاکستان میں داخل ہونے والی بارود سے بھری گاڑی کو تباہ کردیا۔

    تفصیلات کےمطابق وفاق کے زیرانتظام قبائلی علاقے کرم ایجنسی میں افغان صوبے پکتیا سے بارود سےبھری گاڑی نے پاکستان میں داخل ہونے کی کوشش کی جس پرسیکورٹی فورسز نے کارروائی کرتے ہوئے گاڑی کوتباہ کردیا۔

    اسسٹنٹ پولیتیکل ایجنٹ شاہد علی خان کےمطابق بارود سے بھری گاڑی کو پاراچنار پہنچانے کی کوشش کی جارہی تھی۔

    کرم ایجنسی دھماکا: 13 افراد جاں بحق، جماعت الاحرار نے ذمہ داری قبول کرلی

    خیال رہےکہ گزشتہ ماہ خیبر ایجنسی کے علاقے وسطی کرم میں سڑک کنارے ہونے والے دھماکے کے نتیجے میں13افراد جان کی بازی ہارگئے تھے۔دھماکے کی ذمہ داری جماعت الاحرار نے قبول کی تھی۔

    چمن : افغان فورسز کی گولہ باری و فائرنگ،10 شہری شہید، 45زخمی

    یاد رہےکہ گزشتہ ماہ صوبہ بلوچستان کےسرحدی شہر چمن میں افغان سرزمین سے گھروں پر گولہ باری اور فائرنگ سے 10 شہری شہید جبکہ خواتین اور بچوں سمیت 45افراد زخمی ہوگئے تھے۔

    پارہ چنار دھماکا‘ 24 افراد شہید‘ متعدد زخمی

    واضح رہےکہ رواں سال مارچ میں کرم ایجنسی کے صدر مقام، پارہ چنار میں ہونے والے بم دھماکے میں 24افراد جاں بحق جبکہ درجنوں افراد زخمی ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • کرم ایجنسی دھماکا: 13 افراد جاں بحق، جماعت الاحرار نے ذمہ داری قبول کرلی

    کرم ایجنسی دھماکا: 13 افراد جاں بحق، جماعت الاحرار نے ذمہ داری قبول کرلی

    کرم ایجنسی : خیبر ایجنسی کے علاقے وسطی کرم میں سڑک کنارے ہونے والے دھماکے کے نتیجے میں جاں بحق افراد کی تعداد 13 ہوگئی، دھماکے کی ذمہ داری جماعت الاحرار نے قبول کرلی۔

    تفصیلات کے مطابق وسطی کرم کے علاقے گاؤدر میں صبح سویرے سڑک کنارے نصب بارودی سرنگ کے دھماکے میں مسافر پک اپ گاڑی نشانہ بنی۔ دھماکے میں 10 افراد جان کی بازی ہارگئے۔

    اطلاعات ہیں کہ زخمیوں کی تعداد دس ہے جس میں ایک عورت اور بچہ بھی شامل ہیں جب کہ دھماکے کی نوعیت سے متعلق ابھی تک متضاد اطلاعات ہیں کہ دھماکا ریموٹ کنٹرول ڈیوائس سے کیا گیا یا پھر بارودی سرنگ کا تھا۔

    خیبر ایجنسی کے علاقے وسطی کرم میں دھماکے میں زخمی ہونے والے افراد کو تحصیل ہیڈکوارٹر اسپتال منتقل کردیا گیا۔

    وزیراعلیٰ پنجاب شہباز شریف اور وزیرداخلہ چوہدری نثارعلی خان نےوسطی کرم میں بارودی سرنگ کے دھماکے میں قیمتی جانوں کے ضیاع پر گہرے رنج و غم کا اظہارکیاہے۔

    شوال میں بارودی سرنگ کا دھماکہ‘ 2اہلکار زخمی

    خیال رہےکہ رواں ماہ 2اپریل کو وفاق کے زیرانتظام جنوبی وزیرستان کے علاقے شوال میں سڑک کنارے بارودی سرنگ کے دھماکے میں 2 سیکورٹی اہلکار زخمی ہوگئے تھے۔

    پارہ چنار دھماکا‘ 24 افراد شہید‘ متعدد زخمی

    یاد رہےکہ گزشتہ ماہ کرم ایجنسی کے صدر مقام، پارہ چنار میں ہونے والے بم دھماکے میں 24افراد جاں بحق جبکہ درجنوں افراد زخمی ہوگئے تھے۔

    مزید پڑھیں:جنوبی وزیرستان میں بارودی سرنگ کا دھماکہ‘3اہلکارشہید

    واضح رہےکہ رواں سال فروری میں جنوبی وزیرستان کےضلع وانا میں بارودی سرنگ کےدھماکے کےنتیجے میں سیکیورٹی فورسز کے 3اہلکار شہید ہوگئےتھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں

  • عمران خان کی امریکی ڈرون حملے کی مذمت

    عمران خان کی امریکی ڈرون حملے کی مذمت

    تحریک انصاف کے چیئرمین عمران خان نے گزشتہ روز کرم ایجنسی ہونے والے ڈرون حملے کی مذمت کرتے ہوئے اسے انسانی حقوق اور ملکی خود مختاری کی خلاف ورزی قرار دیا۔

    سماجی رابطوں کی ویب سائٹ ٹوئٹر پر اپنے ٹوئٹ میں عمران خان کا کہنا تھا کہ ڈرون حملہ انسانی حقوق اور ہماری خود مختاری کی خلاف ورزی ہے۔ اس کے منفی اثرات سامنے آئیں گے۔

    انہوں نے ڈرون حملے کی سخت مذمت بھی کی۔

    یاد رہے کہ گزشتہ روز پاک افغان سرحدی علاقے کرم ایجنسی میں ڈرون کے ذریعے میزائل داغا گیا جس میں دو مشتبہ افراد ہلاک ہوئے تھے۔

    ڈرون حملے میں ایک موٹر سائیکل مکمل طور پر تباہ ہوگئی تھی جبکہ اطلاعات کے مطابق ہلاک ہونے والے افراد غیر قانونی طور پر پاکستانی حدود میں داخل ہونے کی کوشش کر رہے تھے۔

    اسی وقت امریکی ڈرونز نے افغانستان کے علاقے لال پور میں بھی ڈرون حملہ کیا جس کے نتیجے میں تحریک طالبان کے 4 کارندے ہلاک ہوئے۔

    مقامی پولیٹکل انتظامیہ کے مطابق حملے میں مارے جانے والے افراد کی شناخت شاکر اور قاری عبد اللہ کے نام سے ہوئی۔

    یاد رہے کہ یہ امریکا میں صدر ڈونلڈ ٹرمپ کے بر سر اقتدار آنے کے بعد پاکستان اور افغانستان میں پہلا ڈرون حملہ ہے۔

  • کرم ایجنسی میں ڈرون حملہ 2 مشتبہ افراد جاں بحق

    کرم ایجنسی میں ڈرون حملہ 2 مشتبہ افراد جاں بحق

    کرم ایجنسی: پاک افغان سرحدی علاقے میں ڈرون کے ذریعے میزائل داغا گیا جس میں دو مشتبہ افراد ہونے کی اطلاعات ہیں۔

    اطلاعات کے مطابق امریکی ڈرونز نے پاک افغان سرحد سے متصل کرم ایجنسی میں میزائل داغے جس کے ذریعے ایک موٹر سائیکل کو نشانہ بنایا گیا۔

    ڈرون حملے کے نتیجے میں موٹرسائیکل مکمل تباہ ہوگئی جبکہ پاکستانی حدود میں غیرقانونی طور پر داخل ہونے والے دو مشتبہ شہری جاں بحق ہوگئے۔ دوسری جانب امریکی ڈرونز نے افغانستان کے علاقے لال پور میں بھی ڈرون حملہ کیا جس کے نتیجے میں تحریک طالبان کے 4 کارندوں کی ہلاکت ہوئی۔

    مقامی پولیٹکل انتظامیہ نے بی بی سی کو بتایا کہ لوئر کرم ایجنسی میں جعمرات کی دوپہر کو پاک افغان سرحد کے قریب سرہ غوڑگا اور احمدی شمع کے علاقے کے درمیان موٹر سائیکل سوار دو افراد کو ڈرون حملے میں نشانہ بنایا گیا۔

    حکام کا کہنا ہے کہ حملے میں دونوں افراد مارے گئے جبکہ ان کی شناخت شاکر اور قاری عبداللہ کے نام سے ہوئی ہے۔

    پڑھیں: ’’ افغانستان میں‌ ڈرون حملہ: تحریک طالبان کا اہم کمانڈر ہلاک ‘‘

    یاد رہے گزشتہ برس امریکی ڈرونز نے افغانستان کے علاقے نوشکی میں ایک کار پر میزائل داغے تھے جس کے نتیجے میں تحریک طالبان کا امیر ملا اختر منصور  جاں بحق ہوا تھا ، لاش کو شناخت کے بعد لواحقین کے حوالے کیا گیا تھا جبکہ اسی حملے میں ایک ٹیکسی ڈرائیور بھی جاں بحق ہوا تھا۔

  • پاراچناردھماکا، جاں‌ بحق افراد کی تعداد 24 ہوگئی

    پاراچناردھماکا، جاں‌ بحق افراد کی تعداد 24 ہوگئی

    کرم ایجنسی: پاراچنار سبزی منڈی میں دھماکے کے نتیجے میں ہلاک افراد کی تعداد 24 ہوگئی، 40 افراد زخمی ہیں۔

    تفصیلات کے مطابق وفاق کے زیر انتظام قبائلی علاقے فاٹا کی کرم ایجنسی کے علاقے پارا چنار میں دھماکے کے نتیجے میں 20 افراد جاں بحق جبکہ 40 سے زائد زخمی ہوئے تاہم کچھ گھنٹوں بعد مزید زخمی دم توڑ گئے اور ہلاکتیں 24 ہوگئیں۔

    مقامی افراد اور امدادی ٹیموں کے اہلکاروں نے زخمیوں کو فوری طور پر ایجنسی ہیڈ کوارٹر اسپتال منتقل کیا جہاں زخمیوں کو طبی امداد دی جا رہی ہے۔

    پولیٹیکل انتظامیہ کا کہنا ہے کہ دھماکے کے وقت مارکیٹ میں عوام کا رش تھا جبکہ اسپتال میں ڈاکٹرز کی کمی کے باعث مریضوں کو مشکلات کا سامنا ہے۔ پولیٹیکل انتظامیہ کےمطابق سیکیورٹی فورسز نے علاقےکو گھیرے میں لےلیا ہے۔

    پاک فوج کے شعبہ تعلقات عامہ (آئی ایس پی آر) کے مطابق دھماکے کے بعد فوج اور ایف سی کی کوئیک ریسپانس فورس بھی جائے وقوع پر پہنچی۔

    ڈی جی آئی ایس پی آر میجرجنرل آصف غفور کا کہنا ہے کہ پارا چنارسبزی منڈی دھماکےمیں 20 افراد شہید،30 زخمی ہوئے ہیں۔ انہوں نے کہا کہ دیسی ساختہ بارودی سرنگ 8بج کر50 منٹ پر پھٹی۔

    ڈی جی آئی ایس پی آر میجر جنرل آصف غفور کا کہنا ہے کہ آرمی ہیلی کاپٹرز کے ذریعے زخمیوں کو سی ایم ایچ اسپتال پشاور منتقل کیا جارہا ہے۔

    وزیر داخلہ چوہدری نثار نے پارا چنار دھماکے کا نوٹس لیتے ہوئے دھماکے میں ہونے والے جانی و مالی نقصان پر افسوس کا اظہار کیا ہے اور متعلقہ حکام سے رپورٹ طلب کر لی۔

    وزیراعلیٰ پنجاب شہبازشریف نے پارا چنار کے دھماکے کی شدید مذمت کرتے ہوئے کہا کہ ہےکہ دہشت گرد کارروائیاں قوم کا عزم کمزور نہیں کرسکتیں۔

    وزیراعلیٰ بلوچستان ثنااللہ زہری نے پارا چنار سبزی منڈی میں دھماکے کی مذمت کرتے ہوئے کہا کہ بزدل دہشت گرد معصوم لوگوں کو نشانہ بنارہے ہیں۔

    واضح رہے کہ قبل ازیں دسمبر 2015 میں بھی پارا چنار کے عید گاہ لنڈا بازار میں ہونے والے دھماکے کے نتیجے میں 22 افراد جاں بحق ہوئے تھے،جس کی ذمہ داری کالعدم تنظیم لشکر جھنگوی العالمی نے قبول کی تھی۔

  • کرم ایجنسی : چوکی کے قریب خود کش حملہ، تین اہلکار زخمی

    کرم ایجنسی : چوکی کے قریب خود کش حملہ، تین اہلکار زخمی

    پشاور / کرم ایجنسی : پاکستانی قبائلی علاقے کرم ایجنسی میں پاک افغان سرحد پر چوکی کے قریب خودکش حملے میں فرنٹیئر کور کے تین اہلکار زخمی ہو گئے ہیں جبکہ ادھر پشاور میں نامعلوم افراد نے فائرنگ کر کے ایک پولیس اہلکار کو ہلاک کر دیا ہے۔

    سرکاری ذرائع کے مطابق اپر کرم ایجنسی کے علاقے خرلاچی میں آج صبح ایک نامعلوم نوجوان نے افغانستان سے پاکستان کی حدود میں داخل ہو کر ایک زوردار دھماکہ کیا۔

    سرکاری ذرائع کا کہنا ہے کہ اس دھماکے میں ایف سی کے تین اہلکار زخمی ہو گئے۔ اس حملے کی ذمہ داری کالعدم تنظیم تحریک طالبان پاکستان جماعت الاحرار کے ترجمان نے قبول کی ہے جبکہ ذرائع ابلاغ کو خود کش حملہ آور کی تصویر بھی جاری کی گئی ہے۔

    دوسری جانب  خیبر پختونخوا کے صدر مقام پشاور میں آج صبح سویرے تھانہ فقیر آباد کی حدود میں نامعلوم افراد نے فائرنگ کر کے پولیس اہلکار کو ہلاک کر دیا ہے۔

    فقیر آباد تھانے کے اہلکار نے بتایا کہ آج صبح سپاہی رحمان علی ڈیوٹی سرانجام دینے تھانے کی جانب آ رہا تھا کہ راستے میں نامعلوم افراد نے ان پر فائرنگ کی۔

    رحمان علی کو زخمی حالت میں ہسپتال لایا گیا لیکن انہوں نے راستے ہی میں دم توڑ دیا۔ پشاور اور صوبے کے دیگر اضلاع میں ٹارگٹ کلنگ کے واقعات معمول سے پیش آ رہے ہیں۔

    گزشتہ روز خیبر پختونخوا کے جنوبی ضلع بنوں میں نا معلوم افراد نے فائرنگ کرکے ایک وکیل کو ہلاک کر دیا تھا۔ خیبر پختونخوا میں آج وکلاء نے عدالتوں کا بائکاٹ کیا تھا۔

     

  • کرم ایجنسی : اسکول گراؤنڈ میں خودکش حملہ،دوشہری جاں بحق

    کرم ایجنسی : علی زئی ہائی اسکول گراؤنڈ میں ہونے والےدو دھماکوں میں دو افراد جاں بحق اور نو زخمی ہوگئے، سیکیورٹی فورسز نے دو مبینہ حملہ آوروں کو گولی مارکر ہلاک کردیا۔

    تفصیلات کے مطابق کرم ایجنسی کے علاقے علی زئی کےاسکول گراؤنڈ میں فٹبال میچ جاری تھا کہ یکے بعد دیگرے دو دھماکے ہوئے،جس کے بعد گراؤنڈ میں بھگدڑ مچ گئی۔

    دھماکے اور بھگدڑسے دو افراد جان سے گئے۔ زخمیوں کو پارہ چنار اسپتال منتقل کردیا گیا ہے۔ واقعے کی اطلاع ملتے ہی پولیٹیکل انتظامیہ اور سیکیورٹی اہلکار جائے وقوعہ پر پہنچ گئے۔

    ابتدائی اطلاعات کے مطابق سیکیورٹی فورسز سے فائرنگ کے تبادلے میں دومبینہ حملہ آور مارے گئے۔ سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے۔