Tag: کرنسی

  • کرنسی اسمگلروں کے خلاف گھیرا تنگ، کراس بارڈر کرنسی موومنٹ کا ادارہ قائم

    کرنسی اسمگلروں کے خلاف گھیرا تنگ، کراس بارڈر کرنسی موومنٹ کا ادارہ قائم

    اسلام آباد: پاکستان کسٹمز  نے کراس بارڈر کرنسی موومنٹ کا ادارہ قائم کر دیا.

    تفصیلات کے مطابق کرنسی اسمگلروں کے خلاف گھیرا  مزید  تنگ کر دیا گیا، کراس بارڈر کرنسی موومنٹ کا ادارہ قائم ہوگیا.

    ادارے کے پاس ضبط شدہ کرنسی کے جائزے، مشتبہ بینکنگ لین دین کے ریکارڈ کا اختیار ہوگا، ادارے کو ضبط شدہ کرنسی کا ریکارڈ رکھنے کا بھی اختیار دیا جائے گا.

    ساتھ ہی ادارےکو دیگر قانون نافذ کرنے والے اداروں سے معلومات کے تبادلے، منی لانڈرنگ قانون کے تحت تحقیقات اور مقدمہ چلانے کا اختیار ہوگا.

    مزید پڑھیں: جعلی نوٹ چھاپنے والا ایشیائی گروہ گرفتار، لاکھوں درہم مالیت کی جعلی کرنسی ضبط

    تحقیقات کرنےوالے آفیسر کے لئے گائیڈ لائنز بھی جاری کردی گئیں، انوسٹی گیٹو آفیسرز کوملزم کے خلاف جامع تحقیقات کرنے کا اختیار ہوگا، کرنسی اسمگلنگ کیس کی تحقیقات کرتے وقت اصل ملزمان تک پہنچا جائے گا.

    کرنسی اسمگلنگ کیس کی تحقیقات دہشت گردی کی مالی معاونت کےطور پرکی جائے، اسمگلنگ کی روک تھام کے لئے 20ممالک کےساتھ معاہدے بھی کر رکھے ہیں. کرنسی اسمگلنگ کیس میں ان ممالک سے تحت ضابطہ مدد بھی حاصل کی جا سکتی ہے.

  • ڈیجیٹل کرنسی بٹ کوائن 12 ہزار ڈالرز سے بھی تجاوز کر گئی

    ڈیجیٹل کرنسی بٹ کوائن 12 ہزار ڈالرز سے بھی تجاوز کر گئی

    ٹوکیو : ڈیجیٹل کرنسی بٹ کوائن کی قیمت 12 ہزار ڈالرز سے بھی تجاوز کرگئی ہے اور دس ہزار ڈالرز کی تاریخی حد عبور کرنے کا اپنا ہی ریکارڈ توڑ دیا ہے.

    تفصیلات کے مطابق تیزی سے ابھرتی ہوئی ورچوئل کرنسی نے دوسری کرنسیوں کو پیچھے چھوڑ دیا ہے اور محض چند روز قبل دس ہزار ڈالرز کی تاریخی حد کو عبور کرنے والی بٹ کوائن نے اب 12 ہزار ڈالرز کو پیچھے چھوڑ دیا ہے چنانچہ اب ایک بٹ کوائن کی قیمت پاکستانی 12 لاکھ روپے کے برابر ہو گئی ہے.

    غیر ملکی میڈیا کے مطابق بٹ کوائن کرنسی کی دنیا میں اپنا مقام منفرد سے منفرد کرتی جارہی ہے اور ایسے ہی بٹ کوائین کی قیمتوں میں اضافہ ہوتا گیا تو مستقبل قریب میں دنیا بھر بٹ کوائن کی حاکمیت قائم ہو جائے گی جس کا ایک ثبوت ایک بٹ کوائن کا 12 ہزار ڈالرز سے بھی تجاوز کر جانا ہے جس کا تصور بھی نہیں کیا جاسکتا تھا.

    خیال رہے محض سات سال قبل مئی 2010 کو ایک کمپیوٹر ڈویلپر نے پہلی مرتبہ ڈیجیٹل کرنسی کے 10 ہزار یونٹ سے 2 پیزا خریدے تھے اور اس وقت انہیں اندازہ بھی نہیں تھا کہ یہ گمنام کرنسی اتنی ترقی کر جائے گی کہ ایک بٹ کوائن کی قیمت 12 ہزار ڈالرز کو بھی پیچھے چھوڑ جائے گی.

    کرنسی کے تبادلے سے تعلق رکھنے والے افراد کا کہنا ہے کہ پیزا کی خریداری بٹ کوائن سے کسی چیز کی پہلی خریداری بھی تھی تاہم اُس وقت دس ہزار بٹ کوائن کی قدر 40 ڈالرز کے برابر تھی اور اب بھی بٹ کوائن رکھنے والے ہر سال بائیس مئی کو بٹ کوائن پیزا ڈے مناتے ہیں.

    بین الاقوامی میڈیا کے مطابق اپنے آغاز کے وقت کسی کو اندازہ نہیں تھا کہ بٹ کوائن کی قدر میں اتنا اضافہ ہوگا کہ یہ دنیا کی مضبوط ترین کرنسی ڈالرز کو بھی بہت پیچھے چھوڑ جائے گی اور بقیہ کرنسی غیر اہمیت ہوتی جائیں گی اور مقابلے کا رجحان اتنا زیادہ بڑھ جائے گا.

    یاد رہے کہ نومبر کے مہینے میں یہ کرنسی پہلے سات ہزار ڈالر پھر آٹھ پزار ڈالر سے ہوتے ہوئے مہینے کے آخر تک دس ہزار ڈالرز تک پہنچ گئی اور دسمبر کے پہلے ہفتے ہی میں 12 ہزار ڈالرز کا سنگ میل عبور کرلیا جس سے محسوس ہوتا ہے کہ یہ ڈالرز، یورو، ین اور پاؤنڈز پر حاوی ہوجائے گی.

  • وزارت خزانہ کی 5 ہزار کا نوٹ بند کرنے کی تردید

    وزارت خزانہ کی 5 ہزار کا نوٹ بند کرنے کی تردید

    اسلام آباد: وزارت خزانہ کا کہنا ہے کہ 5 ہزار کے نوٹ بند نہیں کیے جا رہے۔ نوٹ بند کرنے کا کو ئی جواز نہیں ہے، تمام خبریں بے بنیاد ہیں۔

    تفصیلات کے مطابق پانچ ہزار کے نوٹوں کی بندش کے حوالے سے جو خبریں اخباروں، میڈیا اور کاروباری حلقوں میں زیر گردش ہیں، وزارت خزانہ نے ان کو غلط قرار دیا ہے۔

    وزارت خزانہ کے مطابق حکومت نے 5 ہزار کا نوٹ بند کرنے کا کوئی فیصلہ نہیں کیا۔

    وزارت کی جانب سے جاری کردہ اعلامیہ کے مطابق سب سے بڑا نوٹ ہونے کے باعث نوٹ کی سرکولیشن کم ہے۔ رواں سال پرنٹ کی گئی کرنسی میں سے صرف 17 فیصد 5 ہزار کے نوٹوں کی تھی۔

    وزارت خزانہ کے مطابق 5 ہزار کا نوٹ بند کرنے کے مثبت نہیں بلکہ منفی اثرات مرتب ہوں گے۔ عوام ایسی بے بنیاد خبروں پر کان نہ دھریں۔

    واضح رہے کہ 5 ہزار کا نوٹ بند کرنے کے لیے سینیٹ میں قرارداد پیش کی گئی تھی جس کے بعد یہ خبریں گردش کرنا شروع ہوئی تھیں۔

  • بھارت میں انکم ٹیکس کا چھاپہ،کروڑوں مالیت کی نئی کرنسی برآمد

    بھارت میں انکم ٹیکس کا چھاپہ،کروڑوں مالیت کی نئی کرنسی برآمد

    نئی دہلی: بھارت میں انکم ٹیکس نے کاروبای شخصیت کےگھر پرچھاپے کےدوران غیرقانونی طریقے سےحاصل کی گئی کروڑوں روپے مالیت کی کرنسی برآمد کرلی۔

    تفصیلات کےمطابق ایک طرف پورا بھارت نئے نوٹوں کےلیے لائن میں لگا ہوا ہے تو دوسری جانب صرف ایک کاروباری شخص کے گھر سےایک کروڑ پچاس لاکھ مالیت کے نئے نوٹ برآمد کیے گئے۔

    آسام پولیس نے پیرکوگوہاٹی میں ایک کاروباری شخصیت کے گھر پر چھاپہ مار کر ایک کروڑ پچاس لاکھ روپے کی نقد رقم ضبط کی جو نئے 2000 اور 500 کے نوٹوں میں ہے۔

    مزید پڑھیں:کرنسی نوٹوں پر پابندی، بھارتی عوام اذیت میں مبتلا

    خیال رہےکہ جے پور میں گزشتہ روز پولیس نے93 لاکھ روپے نئی کرنسی میں ضبط کیے۔ یہ پیسے سات لوگوں کے پاس سے 2000 کے نوٹوں میں ملے تھے۔

    یاد رہے کہ بنگلور میں انکم ٹیکس کے اہلکاروں نےرواں ماہ کے آغاز میں دوافراد سے چار کروڑ سترلاکھ برآمد کیےتھے۔

    مزید پڑھیں:کرنسی نوٹوں کی بندش بھارت کی تاریخ کا بڑا گھپلا ہے، راہول گاندھی

    واضح رہےکہ گزشتہ ہفتے کانگریس کے نائب صدر راہول گاندھی نے پانچ سو اور ہزار روپے کے نوٹوں کی بندش کو بھارت کی تاریخ کا سب سے بڑا گھپلا قرار دیاتھا۔

  • بین الاقوامی تجارتی سودے اپنی کرنسی میں کریں گے، ترک صدر

    بین الاقوامی تجارتی سودے اپنی کرنسی میں کریں گے، ترک صدر

    انقرہ : ترک صدر رجب طیب اردگان نے کہا ہے کہ ترکی آئندہ چین، روس اور ایران کے ساتھ تجارتی سودے مقامی کرنسیوں میں کرے گا جس کے لیے ضروری اور اہم اقدامات اٹھا رہے ہیں۔

    ترک اخبار ڈیلی صباح کی رپورٹ کے مطابق ترک صدر طیب اردگان گزشتہ روز قیصری شہر میں ایک بڑے تجارتی منصوبے کی افتتاحی تقریب سے خطاب کررہے تھے،انہوں نے اعلان کیا کہ ترک آئندہ چین، روس، اور ایران کے ساتھ تجارتی سودے ترک کرنسی میں کریں گے جس کے لیے مطلوبہ اقدامات کر لیے ہیں۔

    ترک صدر نے کہا کہ گرتی ہوئی ترک کرنسی لیرا کی بحالی اولین ترجیح ہے اس سلسلے میں وزیراعظم بینالی یلدرم اپنے آئندہ دورہ روس کے دوران روسی حکومت کے ساتھ اس معاملے پر تبادلہ خیال کریں گے اور تجارتی سودے مقامی کرنسی میں کریں گے۔

    اس حوالے سے معیشت پلان کا ذکر کرتے ہوئے ترک صدر کا کہنا تھا اگر ہم روس، چین اور ایران سے کوئی چیز خریدیں گے تو یہ سودا اُس ملک کی کرنسی میں ہوگا اور اگر وہ ترکی سے کوئی چیز خریدیں گے تو یہ سودا ہماری کرنسی لیرا میں طے ہو گا۔

    رجب طیب اردگان نے ترک عوام کو ہدایت کی کہ وہ اپنے پاس موجود غیرملکی کرنسیوں کو اپنی قومی کرنسی لیرا اور سونے میں تبدیل کریں تاکہ لیرا کی گرتی ہوئی قیمت کو بحال کرکے اسے استحکام دیا جا سکے۔

    دوسری جانب ترک کے صدر نے ہدایت جاری کی ہے کہ ترک اسٹاک ایکسچینج بروسا نے فوری طور پر اپنے تمام اثاثے امریکی ڈالر سے لیرا میں تبدیل کرنے کا فیصلہ کر لیا ہے۔

    صدر ترک کی جانب سے ہدایت وصول ہونے کے بعداسٹاک ایکسچینج بورسا استنبول کی طرف سے جاری ایک بیان میں کہا گیا ہے کہ آئندہ اسٹاک ایکسچینج بورسا اپنے تمام کیش اثاثے قومی کرنسی لیرا میں رکھیں گے۔

    واضح رہے کہ ترکی میں ناکام فوجی بغاوت کے بعد معاشی عدم استحکام آنے پر لیرا کی قیمت میں مسلسل کمی واقع ہو رہی ہے جس سے نبرد آزما ہونے کے لیے ہنگامی بنیادوں پر اقدامات کیے جا رہے ہیں۔