Tag: کروناوائرس

کویت سٹی: خلیجی ملک کویت میں کروناوائرس سے پہلا مریض ہلاک ہوگیا۔

غیرملکی خبررساں ادارے کی رپورٹ کے مطابق کویتی وزارت صحت کے ترجمان نے ملک میں کروناوائرس سے پہلی موت کی تصدیق کردی۔ البتہ مرنے والے مریض کی شناخت تاحال ظاہر نہیں کی گئی۔

رپورٹ میں کہا گیا ہے کہ ملک میں حالیہ دنوں کروناوائرس کے مزید 62 نئے کیسز سامنے آنے کے بعد مریضوں کی مجموعی تعداد 479 ہوگئی ہے۔ جبکہ آج کویت میں مہلک وائرس سے پہلا مریض ہلاک ہوگیا۔

وزیرصحت باصل الصباح کا کہنا ہے کہ ملک میں کرونا کے 11 مریض صحت یاب ہوئے جبکہ صحتیاب مریضوں کی مجموعی تعداد 93 ہوگئی۔ خیال رہے کہ مہلک وائرس سے بچاؤ کے لیے کویت میں بھی سخت اقدامات اٹھائے جارہے ہیں۔

کروناوائرس بحران: کویتی عوام کےلیے حکومت کا بڑا اعلان

13 مارچ سے تاحکم ثانی سفری پابندیاں بھی عائد کی جاچکی ہیں۔ حکومت نے احتیاطی تدابیر اختیار کرتے ہوئے شہریوں کو گھروں میں رہنے کی ہدایت کی اور تفریحی مقامات پر بھی پابندی عائد کردی ہے۔

واضح رہے کہ کویت نے جان لیوا کرونا وائرس کے نقصانات کم کرنے کے لیے ریلیف پروگرام جاری کردیا گیا جس کے تحت سرکاری پابندیوں سے متاثر ہونے والے کمپنیوں کو سبسڈی فراہم کی جارہی ہے۔

لندن: برطانوی وزیراعظم بورس جانسن نے کہا ہے کہ ڈاکٹرز کی ہدایت کے مطابق بخار ختم ہونے تک آئسولیشن میں رہوں گا اور وہیں سے ہی حکومتی امور کی نگرانی جاری رہے گی۔

تفصیلات کے مطابق برطانوی وزیراعظم بورس جانسن نے قوم کے نام پیغام میں کہا کہ خدارا گھر سے باہرمت نکلیں، ویک اینڈ پر موسم اچھا ہوگا، مگر کروناوائرس کے باعث باہر نکلنے کی کوشش ہرگز نہ کریں۔

ان کا کہنا تھا کرونا کی ایک علامت بخار اب بھی مجھ میں موجود ہے، ڈاکٹرز کی ہدایت کے مطابق بخار ختم ہونے تک آئسولیشن میں رہوں گے، شہری احتیاطی تدابیر پر سختی سے عمل کریں۔

خیال رہے کہ گزشتہ روز ٹویٹر پر بورس جانسن نے اپنا ویڈیو پیغام جاری کیا جس میں انہوں نے کہا کہ کرونا وائرس سے ہونے والی ہلاکتوں اور بڑی تعداد میں کیسز رپورٹ ہونے پر میں افسردہ ہوں، دکھ کی اس گھڑی میں متاثرہ افراد اور اُن کے اہل خانہ کے ساتھ یکجہتی کا اظہار کرتا ہوں۔

برطانوی وزیراعظم:‌ ’طبی عملے کے لیے 39 کروڑ 70 لاکھ پاؤنڈز مالیت کی کٹس برآمد کرلیں‘

اُن کا کہنا تھا کہ ہم اپنے اتحاد سے کرونا وائرس کو روک سکتے ہیں، اس کے لیے بس تھوڑی سی احتیاط کرنا ہوگی، عوام حکومتی احتیاطی تدابیر پر عمل کریں اور خود کو گھروں تک محدود کریں جبکہ وقفے وقفے سے ہاتھ بھی دھوتے رہیں۔

واضح رہے کہ مہلک وائرس سے برطانیہ میں بھی ہلاکتوں میں اضافہ دیکھنے میں آیا ہے۔

لندن: برطانیہ میں جان بوجھ کر نرس پر کھانسنے والے مریض پر فرد جرم عائد کردیا گیا۔

تفصیلات کے مطابق یہ واقعہ برطانیہ کے علاقے ٹاٹنگھم میں قائم ایک اسپتال میں پیش آیا۔ اسپتال میں داخل 45 سالہ ’مارک پائن‘ نامی مریض نے دانستہ طور پر نرس پر کھانسا اور دعویٰ بھی کیا کہ وہ کروناوائرس کا مریض ہے۔

رپورٹ میں کہا گیا ہے کہ ملزم نے منع کرنے پر دوبارہ کھانسا تاہم پولیس نے کروناوائرس کے تناظر میں نافذ العمل نئی پابندیوں کی خلاف ورزی پر ملزم کے خلاف قانونی کارروائی کا آغاز کردیا ہے۔

ملزم کو ایمرجنسی ورکرز ایکٹ کے تحت عدالت میں پیش کیا جائے گا۔ پولیس حکام کا کہنا ہے کہ ایسے واقعات پر سخت کارروائی کر رہے ہیں۔ خیال رہے کہ اس سے قبل بھی کچھ ملزمان ایسی حرکتیں کرتے ہوئے پکڑے گئے۔

پولیس اہلکار پر کھانسنا شہری کو مہنگا پڑ گیا

خیال رہے کہ ملزم مذکورہ اسپتال میں زیرعلاج تھا تاہم وہ کس مرض میں مبتلا ہے اس سے متعلق تفصیل سامنے نہیں آئی۔ واضح رہے کہ برطانوی حکومت نے کرونا وائرس کی روک تھام کے پیش نظر عوام کے لیے انتباہی پیغام جاری کیا تھا جس میں کہا گیا تھا کہ عوامی مقامات پر جان بوجھ کر کھانسنے والے شخص کو دو سال قید کی سزا دی جائے گی۔

حکومت نے وضاحت کی تھی کہ پولیس افسران، طبی عملے اور اسپتال میں مریضوں کے منہ پر کھانسنے والے شخص کے خلاف سخت کارروائی عمل میں لائی جائے گی، اسی طرح میل جول سے دوری کے احکامات کی خلاف ورزی پر پہلی بار 60 جبکہ دوسری بار 120 پاؤنڈ جرمانہ ہوگا۔

پیانگ یانگ: شمالی کوریا کی حکومت نے دعویٰ کیا ہے کہ ان کے ملک میں کروناوائرس کا ایک بھی مریض نہیں ہے۔

غیرملکی خبررساں ادارے کی پورٹ کے مطابق شمالی کوریا کے محکمہ انسدادِ وبائی مرض کا کہنا ہے ہمارے ملک میں کروناوائرس کا کوئی متاثرہ مریض نہیں ہے، چین میں وائرس کی خبر آتے ہی سرحدیں بند کردی تھیں۔

محکمہ کے سربراہ پاک میانگ سو نے بتایا کہ ملک میں آنے والے تمام مسافروں کو پہلے قرنطینہ میں رکھا گیا، جہاں ان کی اسکریننگ کے ذریعے اس بات کی تصدیق کی گئی کہ کوئی بھی شہری کرونا کا مریض تو نہیں ہے۔

ان کا کہنا تھا کہ ہم نے ہوائی اور سمندری راستے فوری بند کیے تاکہ کسی بھی طرح وبائی مرض ہمارے ملک میں داخل نہ ہوسکے، اور ہم اپنے مقصد میں کامیاب بھی ہوئے۔ خیال رہے کہ شمالی کوریا عالمی سطح پر پابندیاں ہونے کی وجہ سے پہلے ہی آئسولیشن کا شکار تھا۔

شمالی کوریا میں کروناوائرس سے 180 فوجی اہلکار ہلاک

خیال رہے کہ ان پابندیوں نے شمالی کوریا کو وائرس پر کنٹرول رکھنے میں مدد فراہم کی۔ جبکہ حالیہ دنوں غیرملکی میڈیا نے اپنی رپورٹ میں دعویٰ کیا تھا کہ کئی شمالی کورین فوجی اہلکار کروناوائرس سے ہلاک ہوچکے ہیں۔

تاہم حکومت نے خبر کو من گھڑت قرار دیتے ہوئے مسترد کردیا تھا۔

ریاض: سعودی عرب میں کروناوائرس پر قابو پانے کے لیے ہرممکن اقدامات کیے جارہے ہیں، محکمہ صحت نے آگاہی پیغام موبائل ایس ایم ایس کے ذریعے 2 بلین شہریوں تک پہنچا دیا۔

عرب میڈیا کی رپورٹ کے مطابق محکمہ صحت کی جانب سے بھیجے گئے ایس ایم ایس میں شہریوں کو کروناوائرس سے متعلق آگاہی فراہم کی گئی، پیغام سے 2 بلین صارفین مستفید ہوئے۔

محکمہ کا کہنا ہے کہ ایس ایم ایس 24 زبانوں میں بھیجے گئے تاکہ مملکت میں رہنے والے مختلف زبانیں بولنے والے افراد پیغام کو آسانی سے سمجھ سکیں۔ ایس ایم ایس میں شہریوں کو ہدایت کی گئی کہ وہ کروناوائرس سے متعلق افواہوں پر کان نہ دھریں، اور مہلک وائرس سے بچنے کے لیے احتیاطی تدابیر اختیار کریں۔

محکمہ صحت تمام وسائل کو بروئے کار لاتے ہوئے شہریوں کو سہولتیں فراہم کررہا ہے۔

سعودی عرب، پاکستانی کمیونٹی کی سہولت کیلئے واٹس ایپ سروس متعارف

دوسری جانب سعودی عرب نے پاکستانی کمیونٹی کی اپنے پیاروں کی مقامی تدفین کے لیے سفری پابندیوں کے دوران این او سی جاری کرنے کے لیے واٹس ایپ سروس متعارف کرا دی ہے۔

خیال رہے کہ پاکستانی قونصلیٹ نے کمیونٹی سے کہا کہ کرفیو کے اوقات کے دوران کسی عزیز کی تدفین کے لیے اجازت نامہ لے سکتے ہیں، اس کے لیے 0533585184، 0542556778، 0592068461 پر اپنی متعلقہ دستاویز فراہم کرکے این او سی حاصل کرسکتے ہیں۔