Tag: کروناوائرس

لندن: برطانوی وزیراعظم بورس جونسن نے مسلسل کروناوائرس کے مریضوں سے ہاتھ ملانے کا اعتراف کرلیا۔

غیرملکی خبررساں ادارے کی رپورٹ میں کہا گیا ہے کہ ممکنہ طور پر کروناوائرس کے مریضوں سے ہاتھ ملانے کے باعث وبائی مرض برطانوی وزیراعظم میں منتقل ہوا، بورس جانسن نے مریضوں سے مصافحہ کرنے کا اعتراف کرلیا۔

انہوں نے اعتراف کیا ہے کہ وہ گزشتہ ہفتوں کروناوائرس کے مریضوں سے ملے اور مصافحہ بھی کیا۔ بورس جونسن کا کروناوائرس ٹیسٹ مثبت آنے کے بعد انہوں نے اب سیلف آئسولیشن اختیار کرلی ہے۔

مارچ میں اپنے ایک بیان میں برطانوی وزیراعظم کا کہنا تھا کہ انہیں کروناوائرس کا خوف مریضوں سے ملنے اور مصافحہ کرنے سے نہیں روک سکتا۔ اسپتال کے دورہ کے موقع پر انہوں نے ہر ایک کرونامریض سے ہاتھ ملایا تھا۔

برطانوی وزیراعظم بورس جانسن بھی کورونا وائرس کا شکار

خیال رہے کہ برطانوی وزیراعظم بورس جانسن کرونا وائرس کا شکار ہوچکے ہیں، جس کے بعد وہ قرنطینہ میں چلے گئے، بورس جانسن کا کہنا ہے کہ ویڈیو کانفرنس کےذریعے اپنی حکومتی ذمہ داری نبھاتا رہوں گا۔

یاد رہے برطانیہ میں کرونا کے مریضوں کی تعداد 11,658 ہو گئی جبکہ وائرس سے ہلاکتوں کی تعداد 578 تک جا پہنچی ہے، گزشتہ چوبیس گھنٹوں میں 113 ہلاکتیں ہوئیں۔ این ایچ ایس اب تک 104,866 افراد کے ٹیسٹ کر چکا ہے، جبکہ گزشتہ چوبیس گھنٹوں میں 2129 نئے کیسز سامنے آئے، طبی ماہرین نے خبردار کیا ہے کہ آئندہ دو سے تین ہفتوں میں وائرس کا پھیلاؤ بڑے پیمانے پر بڑھے گا۔

نیویارک: دنیا بھر میں موجود اقوام متحدہ کے 78ملازمین بھی کروناوائرس کا شکار ہوگئے ہیں۔

غیرملکی خبررساں ادارے کی رپورٹ کے مطابق اقوام متحدہ کے سیکریٹری جنرل انتونیو گوتریس نے سماجی رابطے کی ویب سائٹ ٹوئٹر پر ٹوئٹ کے ذریعے تلقین کی کہ کوئی غلطی نہ کریں، کروناوائرس جہاں کہیں بھی ہے خطرہ ہے۔

ان کا کہنا تھا کہ ہرجگہ کروناوائرس سے ممالک اور لوگوں کو خطرات لاحق ہیں، وائرس سے نمٹنے میں ہمارا ردعمل بھی بحران کی شدت سے مطابقت رکھنا چاہیے۔ خیال رہے کہ مہلک وائرس نے عالمی اداروں اور رہنماؤں کو بھی شدید پریشانی میں مبتلا کررکھا ہے اور کرونا کا علاج تاحال دریافت نہ ہوسکا۔

خیال رہے کہ 27 فروری کو آسٹریا کے دارالحکومت ویانا میں یواین دفتر میں کروناوائرس کا پہلا کیس سامنے آیا تھا۔ بعد ازاں کرونا فلپائن کے اقوام متحدہ میں نمائندے میں پایا گیا۔

اسی طرح دنیا بھر میں یو این کے 78 ملازمین کروناوائرس سے متاثر ہیں۔

ریاض: سعودی عرب کی زیرصدارت وبائی مرض ’’کروناوائرس‘‘ سے متعلق جی 20 ممالک کا ویڈیو لنک کے ذریعے اجلاس ہوا جس میں عالمی رہنماؤں نے مل کر بین الاقوامی معیشت میں 5ٹریلین ڈالر حصہ ڈالنے کا فیصلہ کرلیا۔

غیرملکی خبررساں ادارے کی رپورٹ کے مطابق کروناوائرس کے پیش نظر لاک ڈاؤن سے عالمی معیشت اور تجارت بری طرح متاثر ہے جسے سہارا دینے کے لیے جی 20 ممالک نے پانج ٹریلین ڈالر حصہ ڈالنے کے عزم کا اظہار کیا ہے۔

اجلاس میں جی 20 رہنماؤں کا کہنا تھا کہ کرونا سے معاشی ومعاشرتی اثرات سے نمٹنا ترجیحات میں شامل ہے، انسانی جانوں کی حفاظت کی ضروری فنڈنگ یقینی بنانے کی ہرممکن کوشش کریں گے۔

جی 20ممالک کے رہنماؤں نے کرونا سے معاشی ومعاشرتی نقصان کو کم کرنے کا عہد کیا اور عالمی بحران کے دوران ذمہ دار عوامی مواصلات کی اہمیت پر زور دیا۔دریں اثنا مطالبہ کیا گیا کہ کرونا سے متعلق تمام معلومات فراہم کی جائیں۔

جی 20ممالک نے مل کر عالمی سطح پر صحت کے نظام کو مستحکم کرنے کی یقین دہانی کرائی۔ جی 20ممالک کے رہنما انفرادی اور اجتماعی طور پر کروناوائرس سے لڑنے کے لیے ہرممکن کوششیں کررہے ہیں۔

خیال رہے کہ اجلاس میں عالمی ادارہ صحت کے سربراہ ٹیڈروس نے بھی حصہ لیا۔ اس موقع پر انہوں نے جی 20 ممالک کو مخاطب کرتے ہوئے کہا کہ ’’کروناوائرس کے خلاف متحدہ ہوکر لڑنا ہے اور وائرس کو آگ لگا دینا ہے‘‘۔