Tag: کروناوائرس

اسلام آباد: ملکی دارالحکومت کے ڈپٹی کمشنر نے کہا ہے کہ اسلام آباد میں تمام عوامی مقامات پر ماسک پہننا لازمی قرار دیا گیا ہے، مختلف مقاملات پر چیکنگ بھی ہوگی۔

تفصیلات کے مطابق ڈی سی اسلام آباد کا کہنا ہے کہ مارکیٹس، عوامی مقامات، مساجد اور پبلک ٹرانسپورٹ میں چیکنگ ہوگی ماسک نہ پہنے ہوئے شہریوں کے خلاف کارروائی بھی ہوسکتی ہے۔

ان کا کہنا تھا کہ لاری اڈہ، گلیوں، سڑکوں، دفاتر میں بھی چیکنگ ہوگی، ماسک پہننے کے حکم کی خلاف ورزی پر 3ہزار جرمانہ اور دفعہ 188تعزیرات کے تحت جیل بھیجا جاسکتا ہے۔

کورونا کیسز میں اضافہ، فیس ماسک لازمی قرار

خیال رہے کہ حکومت نے کورونا وائرس کے بڑھتے کیسز کے پیش نظر فیس ماسک لازمی قرار دیتے ہوئے عوام سے اپیل کی ہے کہ پبلک ٹرانسپورٹ اور مارکیٹوں سمیت پرہجوم مقامات پر ماسک لازمی پہنیں۔

ماسک پہننے سے متعلق پالیسی کو تمام صوبوں میں یقینی بنایا جارہا ہے جبکہ اسلام آباد میں حکمت عملی سخت کردی گئی، ڈپٹی کمشنر نے شہریوں کو ہر صورت ماسک پہننے پر زور دیا ہے۔

پشاور: عوامی نیشنل پارٹی(اے این پی) کے مرکزی رہنما غلام احمد بلور کروناوائرس سے صحت یاب ہوگئے۔

تفصیلات کے مطابق خاندانی ذرائع کا کہنا ہے کہ اے این پی کے اہم رہنما غلام بلور کا کرونا ٹیسٹ منفی آگیا ہے، رمضان میں غلام احمد بلور میں مہلک وائرس کی تشخیص ہوئی تھی۔

خاندان ذرائع نے تصدیق کی ہے کہ غلام احمد بلور کا دوبارہ ٹیسٹ کیا گیا جو منفی آگیا ہے۔

اس سے قبل متحدہ قومی موومنٹ پاکستان کی خاتون رکن سندھ اسمبلی منگلا شرما بھی کرونا وائرس سے متاثر ہوگئیں تھیں، ان کے شوہر کا ٹیسٹ بھی پازیٹو آیا اور دونوں نے خود کو گھر میں قرنطینہ کرلیا۔

اے این پی رہنما غلام احمد بلور بھی کورونا وائرس میں مبتلا

اس کے علاوہ سینیٹ کے دو ارکان سینیٹر مولانا عطا الرحمان، سینیٹر فدا محمد میں بھی کورونا وائرس کی تصدیق ہو گئی ہے، ذرائع کے مطابق سینیٹ سیکریٹریٹ نے دونوں سینیٹرز کو اجلاس میں شرکت سے روک دیا ہے۔

خیال رہے کہ ملک میں کئی دیگر اہم شخصیات بھی وبائی مرض کا شکار ہوچکی ہیں۔

لاہور: عالمگیر وبا کروناوائرس کے باعث پہلی بار پنجاب اسمبلی کا اجلاس ہوٹل میں ہونے کا امکان ہے، اراکین نے ایس او پیز کے تحت اسمبلی میں بیٹھنا نہ ممکن قرار دے دیا۔

تفصیلات کے مطابق پنجاب اسمبلی کے ہال میں اراکین کا ایس اوپیز کے تحت بیٹھنا نہ ممکن ہے اسی کے پیش نظر اجلاس کا انعقاد مقامی ہوٹل میں یقینی بنایا جائے گا۔

مقامی ہوٹل میں پنجاب اسمبلی کے اجلاس کے انعقاد کے انتظامات شروع کردیے گئے۔ ایجرٹن روڈ پر ہوٹل میں اراکین اسمبلی کو ضروری سہولتیں فراہم کی جائیں گی، تیاریوں پر کام جاری ہے۔

پنجاب اسمبلی کے ڈپٹی اسپیکر بھی کرونا وائرس کا شکار

معیاری سہولتوں نہ ہونے پر ایوان اقبال میں اجلاس کا فیصلہ بھی واپس لے لیا گیا۔

خیال رہے کہ حالیہ دنوں پنجاب اسمبلی کے ڈپٹی اسپیکر دوست محمد مزاری سمیت دیگر صوبائی اسمبلی کے اراکین کروناوائرس کا شکار ہوئے جس کے بعد حفاظتی انتظامات سخت کرنے کی ہدایت کی گئی ہے۔

پی ٹی آئی رکن پنجاب اسمبلی شاہین رضا کرونا وائرس سے جاں بحق

ممبران نے پنجاب اسمبلی ہال میں اجلاس نہ کرنے پر اتفاق کیا جس کے بعد متبادل کے طور پر اجلاس کا انعقاد مقامی ہوٹل میں ہوگا۔ وفاقی حکومت نے بھی تمام صوبائی اسمبلیوں کو ایس او پیز کے تحت چلانے کی ہدایت کی ہے۔

اسلام آباد: نیشنل کمانڈ اینڈ آپریشنل سینٹر نے کہا ہے کہ پاکستان میں کروناوائرس سے ہلاکتوں کی تعداد ایک ہزار 167 ہوگئی، جبکہ 24 گھنٹوں کے دوران مزید کیسز رپورٹ ہوئے۔

تفصیلات کے مطابق این سی او سی کا کہنا ہے کہ ملک میں 24گھنٹے کے دوران کروناوائرس کے ایک ہزار748 نئے کیسز رپورٹ ہوئے، پاکستان میں وبا کے تصدیق شدہ کیسز کی تعداد 56ہزار349 ہوگئی ہے۔

ملک میں اب تک 4لاکھ83ہزار656ٹیسٹ کیے جاچکے ہیں، جبکہ دیگر مریضوں کا علاج جاری ہے۔

خیال رہے کہ پاکستان سمیت دیگر بھر میں کرونا کے جان لیوا وار جاری ہیں۔ انسانیت کے لیے انتہائی مہلک ثابت ہونے والی کرونا وبا سے ہلاکتوں کا سلسلہ بدستور برقرار ہے، کووِیڈ نائنٹین کی عالمی وبا نے 212 ممالک کو لپیٹ میں لے کر 3 لاکھ 46 ہزار 721 افراد کو نگل لیا ہے۔

دنیا بھر میں کورونا وائرس 3 لاکھ 46 ہزار افراد کی جان لے گیا

وائرس سے 55 لاکھ سے زائد افراد متاثر ہوچکے ہیں جبکہ وائرس سے اب تک 23 لاکھ 2 ہزار سے زائد مریض صحت یاب ہوئے، وبا سے امریکا سب سے زیادہ متاثرہ ملک ہے جہاں اموات کی تعداد سب سے زیادہ ہے۔ امریکا میں کرونا سے99ہزار سے زائد اموات اور 16لاکھ 86سے زائد متاثر ہیں۔

امریکا میں گزشتہ چوبیس گھنٹوں کے دوران مزید 25 ہزار نئے کیسز سامنے آئے۔ تاہم اب بھی 16 ہزار سے زائد مریضوں کی حالت تشویش ناک ہے۔ امریکا میں نیویارک شہر سب سے زیادہ متاثر ہوا۔