لندن: لندن سکول آف اکنامکس کی ریسرچ میں انکشاف کیا گیا ہے کہ برطانیہ اور یورپ میں کرونا وائرس سے ہونے والی ہلاکتوں میں سے نصف اولڈ ہوم کے مکین تھے۔
تفصیلات کے مطابق لندن کی تاریخی درسگاہ لندن سکول آف اکنامکس نے تحقیق کی ہے کہ برطانیہ اور یورپ کے اندر کرونا وائرس سے ہونے والی اموات میں سے پچاس فیصد سے زائد اولڈ ہوم کے رہائشی معمر افراد ہیں۔
تحقیقی رپورٹ کے مطابق اولڈ ہومز کے رہائشی معمر افراد کو ہسپتالوں میں داخل کرنے سے انکار کیا جا رہا ہے اور انہیں بھیڑ بکریوں کی طرح کرونا وائرس کے رحم و کرم پر چھوڑ دیا گیا ہے، جس کے بعد برطانیہ کے 92 مختلف اولڈ ہومز نے ایک ہی دن میں کرونا سے سینکڑوں اموات رپورٹ کی ہیں۔
رپورٹ میں خدشہ ظاہر کیا گیا ہے کہ اولڈ ہومز میں ہونے والی ایک ہزار سے زیادہ اموات کو ریکارڈ نہیں کیا گیا اور اعداد و شمار کو چھپایا جا رہا ہے جبکہ گلاسکو کے ایک اولڈ ہوم میں سولہ افراد کرونا سے جاں بحق ہو چکے ہیں۔
یاد رہے برطانیہ کی سرکاری ویب سائٹ نے اعداد و شمار جاری کرتے ہوئے اس قوی خدشے کا اظہار کیا تھا کہ ہر سات میں سے ایک مریض کی موت ہو سکتی ہے، جب کہ اس وقت اسپتالوں میں ہونے والی اموات کی شرح 14 فی صد ہے۔
ویب سائٹ کے مطابق انتہائی نگہداشت وارڈ میں زیرعلاج مریضوں کی شرح اموات اس سے کہیں زیادہ ہے، انتہائی نگہداشت وارڈ کے مریضوں میں یہ شرح بڑھ کر 51.6 فی صد تک پہنچ چکی ہے، برطانیہ میں کرونا وائرس کے پھیلاؤ کے بعد ہزاروں افراد کو اسپتالوں میں علاج کی ضرورت پیش آئی۔
واضح رہے کہ برطانیہ میں اب تک کرونا وائرس سے 11,329 افراد ہلاک ہو چکے ہیں جب کہ مجموعی مریضوں کی تعداد 88 ہزار 600 سے بڑھ گئی ہے۔
