اسلام آباد: کرونا ٹاسک فورس کے سربراہ ڈاکٹر عطا الرحمان کا کہنا ہے کہ کرونا ویکسین کی 12 لاکھ خوراک کا آرڈر دے دیا گیا ہے۔
تفصیلات کے مطابق ڈاکٹر عطا الرحمان نے اے آر وائی نیوز سے گفتگو کرتے ہوئے کہا کہ کرونا ویکسین کی 12 لاکھ خوراک کا آرڈر دے دیا ہے، جیسے جیسے ڈریپ منظوری دےگا ویکسین کی اجازت دی جائے گی۔
ڈاکٹر عطاالرحمان کا کہنا تھا کرونا ویکسین کی ڈیمانڈ بہت زیادہ ہے اس لیے وقت لگ رہا ہے، مارچ سے لے کر دسمبر تک کرونا ویکسین کی زیادہ تر مقدار آ جائے گی۔
انھوں نے کہا وقت کے ساتھ نجی شعبے کے لیے بھی کرونا ویکسین کی منظوری دے دی جائے گی۔
یاد رہے کہ گزشتہ ہفتے کرونا ٹاسک فورس کے سربراہ نے اے آر وائی نیوز سے گفتگو میں کہا تھا کہ اب تک جو بھی ویکسین بنائی گئی ہے وہ کرونا وائرس کی پرانی قسم کے خلاف ہے، ویکسین کا نئی کرونا قسم پر کیا اثر ہوتا ہے، ابھی کچھ نہیں کہا جا سکتا۔
واشنگٹن: امریکا میں کو وِڈ نائنٹین کی وبا تو ختم نہ ہوئی تاہم ڈونلڈ ٹرمپ نے اس کے لیے قائم ٹاسک فورس ختم کرنے کا فیصلہ کر لیا۔
امریکی میڈیا کے مطابق امریکا کے صدر ڈونلڈ ٹرمپ نے تصدیق کی ہے کہ وائٹ ہاؤس کی کرونا وائرس ٹاسک فورس ختم کی جا رہی ہے۔
غیر ملکی ذرایع ابلاغ کے مطابق امریکی صدر نے کہا کہ اس ٹاسک فورس نے اپنا کام بخوبی نبھایا، مگر اب اس میں تبدیلی کی جائے گی، مشن مکمل نہیں ہوا وائرس کے خلاف جنگ ابھی جاری ہے۔
امریکی نائب صدر مائیک پنس نے کہا کہ یہ ٹاسک فورس اگلے چند ہفتوں میں ختم کر دی جائے گی، صدر ٹرمپ نے ٹاسک فورس کے خاتمے کے اعلان پر کہا کہ اسے ختم کرنے کا یہ مطلب نہیں ہے کہ وائرس کے خلاف جنگ ختم ہو گئی ہے۔
میڈیا کے مطابق صدر ٹرمپ کے داماد جیریڈ کشنر نئی کرونا وائرس ٹاسک فورس کی سربراہی کریں گے جو کہ کاروبار کی بحالی پر توجہ دے گا۔ خیال رہے کہ امریکا میں گزشتہ چوبیس گھنٹوں میں 2 ہزار 350 افراد کرونا وائرس سے ہلاک ہو چکے ہیں، ہلاکتوں کی مجموعی تعداد 72 ہزار سے تجاوز کر گئی، جب کہ امریکا میں وائرس کے ساڑھے 9 لاکھ سے زائد مریض سامنے آ چکے ہیں۔
کراچی: کرونا وائرس سے بچاؤ کے لیے حفاظتی اقدامات کے تحت ضلع کورنگی اور ضلع وسطی میں خصوصی کرونا ٹاسک فورس کا قیام عمل میں لایا گیا ہے۔
تفصیلات کے مطابق کورنگی میں ہرے کپڑوں میں ملبوس کرونا ٹاسک فورس کے رضا کار تیار کیے گئے ہیں جو مختلف علاقوں میں پارکس میں کلورین اور جراثیم کش ادویات پر مشتمل اسپرے کا چھڑکاؤ کریں گے۔
ضلع وسطی میں بھی کرونا سے بچاؤ کے لیے اسپرے مہم کی اسپیشل ٹیم تیار کی گئی ہے، ان رضا کاروں کو اسپرے مہم کے حوالے سے خصوصی ٹریننگ بھی دی گئی۔ چئیرمین ضلع وسطی کا کہنا تھا کہ یہ ٹیم گھروں کے باہر، گھروں کے مرکزی دروازوں، باہر کھڑی گاڑیوں اور ضلع کی اندرونی گلیوں میں اسپرے کرے گی۔
ضلع وسطی کی کرونا ٹاسک فورس جو مختلف علاقوں میں اسپرے کرے گی
ڈسٹرکٹ کورنگی کی کرونا وائرس اینٹی ٹاسک فورس نے مختلف علاقوں میں میڈیکیٹڈ اسپرے کیا، جناح اسکوائر، لیاقت مارکیٹ، کورنگی بارہ ہزار روڈ پر کلورین اور جراثیم کش کیمیکل کا چھڑکاؤ کیا گیا، اندرونی گلیوں میں بھی خصوصی ٹیم اور سڑکوں پر واٹر ٹینکرز میں براؤزر لگا کر اسپرے کیا گیا، پارکوں اور کے ایم سی اسپتالوں کے باہر بھی اسپرے کیا گیا۔ چیئرمین ضلع وسطی ریحان ہاشمی نے بتایا کہ نارتھ کراچی 7 ڈی میں کرونا کے کچھ مخصوص کیس آئے جس کے بعد علاقے میں اسپرے کیا گیا۔
ضلع کورنگی میں سڑکوں اور گھروں کے باہر اسپرے کیا جا رہا ہے
دوسری طرف کرونا وائرس سے بچاؤ کے لیے حفاظتی اقدامات کے تحت کراچی کی مختلف شاہراہوں پر واش بیسن نصب کر دیے گئے ہیں، جس کے لیے واٹر بورڈ کے ٹینکرز استعمال کیے گئے ہیں، ٹینکرز میں کلورین ملا پانی مہیا کیا گیا ہے، واش بیسن کے ساتھ سینیٹائزرز، صابن اور ٹشو پیپرز بھی فراہم کیے گئے ہیں، جن پر سڑکوں پر موجود قانون نافذ کرنے والے اہل کار اور شہری ہاتھ دھو سکتے ہیں۔
کراچی شہر کے مختلف علاقوں میں واٹر بورڈ کے تعاون سے واش بیسن نصب کیے گئے ہیں
ادھر ایکسپو سینٹر میں قائم 200 بستروں پر مشتمل بڑے آئسولیشن سینٹر اور اس کے اطراف میں بھی جراثیم کش ادویات کا چھڑکاؤ کیا گیا ہے، یہ اسپرے ضلع شرقی کی بنائی گئی کرونا ٹاسک فورس کی جانب سے کیا گیا، چیئرمین ضلع شرقی کا کہنا تھا کہ اسپرے کا مقصد قرنطینہ سینٹر میں صفائی کے انتظامات کو مزید بہتر کرنا ہے۔ الاعظم، الآصف اسکوائر اور نیو سبزی منڈی پر بھی کلورین اسپرے کا چھڑکاؤ کیا گیا،لوگوں میں سینیٹائزر اور راشن بھی تقسیم کیا گیا۔
خیال رہے کہ شہر میں لاک ڈاؤن کے دوران محنت کشوں اور مستحقین کے لیے راشن کی فراہمی کے لیے جگہ جگہ انتظامات کیے گئے ہیں، مخیر حضرات کی جانب سے راشن کی تقسیم کا سلسلہ جاری ہے، چئیرمین بلدیہ کورنگی کا کہنا ہے یوسیز کی سطح پر بنائی گئی فہرستوں کے مطابق بلدیاتی نمائندے گھروں تک راشن پہنچا رہے ہیں۔
واشنگٹن: وائٹ ہاؤس کرونا ٹاسک فورس کے اہم رکن ڈاکٹر اینتھنی فاؤچی کو قتل کی دھمکیاں دی گئی ہیں۔
امریکی میڈیا کے مطابق 79 سالہ ڈاکٹر اینتھنی فاؤچی جن کا تعلق وائٹ ہاؤس کرونا ٹاسک فورس سے ہے، کو قتل کی دھمکیاں دی گئی ہیں، جس پر ان کے گھر کے باہر سیکورٹی بڑھا دی گئی ہے۔
امریکی مارشلز کو ڈاکٹر فاؤچی کو سیکورٹی فراہم کرنے کا حکم نامہ بھی جاری کر دیا گیا ہے، واشنگٹن ڈی سی پولیس نے بھی فاؤچی کے گھر کے باہر سیکورٹی بڑھا دی۔
ڈاکٹر فاؤچی امیونولاجسٹ اور انفیکشس ڈیزیز ایکسپرٹ ہیں، کرونا وائرس کے سلسلے میں وہ بڑی شہرت حاصل کر چکے ہیں، جس پر انھیں سپورٹرز اور تنقید کرنے والوں دونوں کی طرف سے ناپسندیدہ پیغامات موصول ہو چکے ہیں۔
ڈاکٹر فاؤچی پر ٹی وی ٹاک شوز میں بھی اس حوالے سے تنقید کی گئی ہے کہ وہ امریکی صدر ٹرمپ کی اشتعال انگیز مبالغہ آرائیوں کی موقع ہی پر تصحیح کرنے کی کوشش کرتے رہتے ہیں، جس پر انھیں متعدد مرتبہ دھمکیاں ملی ہیں۔
امریکی صدر نے ایک سوال کے جواب میں کہا تھا کہ فاؤچی کو کسی سیکورٹی کی ضرورت نہیں ہے، ہر کوئی ان سے پیار کرتا ہے، اگر ان پر کوئی حملہ آور ہوتا ہے تو یاد رکھے کہ وہ بہت بڑی مصیبت میں گرفتار ہوگا۔ ٹرمپ نے کہا کہ فاؤچی ہائی اسکول میں ایتھلیٹ بھی رہ چکے ہیں۔
