ریاض: سعودی عرب میں عوامی مقامات پر اختیار کی جانے والی کرونا وائرس پابندیوں کی فہرست جاری کردی گئی، حکام کی جانب سے عوامی مقامات کی بھی وضاحت کی گئی ہے۔
سعودی ویب سائٹ کے مطابق سعودی ادارہ صحت عامہ وقایہ نے مالز، بازاروں، تجارتی مراکز، ریستورانوں اور قہوہ خانوں کے لیے کرونا ایس او پیز اپ ڈیٹ کردی ہیں۔
ادارہ صحت عامہ نے نئی ہدایات جاری کرتے ہوئے کہا ہے کہ مالز، بازاروں، تجارتی مراکز، ریستورانوں اور قہوہ خانوں میں صرف وہی افراد داخل ہوسکیں گے جن کے توکلنا ایپ پر محصن یعنی امیون تحریر ہوگا۔
ادارہ صحت عامہ نے مذکورہ پابندی سے ان زمروں کو استثنیٰ دیا ہے جن کا صحت ریکارڈ توکلنا ایپ میں نظر نہیں آتا، ادارہ صحت عامہ نے تاکید کی ہے کہ توکلنا ایپ میں صحت حالت کا پتہ خود کار سسٹم سے لگایا جائے گا۔
اس کے لیے گاہکوں پر یہ پابندی لازمی ہوگی کہ وہ مذکورہ اداروں میں سے کسی بھی جگہ داخل ہونے سے قبل صحت حالت کے حوالے سے متعلقہ ادارے کا بار کوڈ اسکین کریں۔
ادارہ صحت عامہ نے تاکید کی ہے کہ بھیڑ بھاڑ سے بچنے اور سماجی فاصلے کی پابندی کو یقینی بنانے کے لیے متعلقہ اداروں کے صدر دروازوں پر بار کوڈ چسپاں کردیا جائے تاکہ آنے والے اسے آسانی سے اسکین کر سکیں۔
اس پابندی سے ریٹیل کا کاروبار کرنے والی چھوٹی دکانیں مستثنیٰ ہوں گی۔
ادارہ صحت عامہ نے پبلک مقامات کے حوالے سے وضاحت جاری کرتے ہوئے کہا ہے کہ اس سے مراد عوامی پارک، فٹ پاتھ، واکنگ ٹریک جیسے کھلے مقامات ہیں۔
پبلک مقامات میں اسپورٹس فیلڈز، بڑی تقریب گاہیں، بڑے بڑے پروگراموں کی جگہیں، پانچ سو اور اس سے زیادہ افراد کی میزبانی کے لیے مختص مقامات شامل نہیں ہوں گے۔
ادارہ صحت عامہ نے ریستورانوں اور قہوہ خانوں کے حوالے سے بھی سماجی فاصلے کی پابندی کی تاکید کردی ہے۔
یاد رہے کہ وزارت داخلہ کی جانب سے بدھ کو جاری بیان میں یاد دہانی کروائی گئی تھی کہ ایک بار پھر مملکت بھر میں ماسک اور تمام مقامات پر خواہ وہ بند ہوں یا کھلے، سماجی فاصلے کی پابندی جمعرات سے بحال کی جارہی ہے۔
