Tag: کرپشن

  • سندھ پولیس میں مبینہ کروڑوں روپے کی کرپشن کا انکشاف

    سندھ پولیس میں مبینہ کروڑوں روپے کی کرپشن کا انکشاف

    کراچی: سندھ پولیس کے اسپیشل پروٹیکشن یونٹ میں مبینہ کروڑوں کی کرپشن کا انکشاف ہوا جس کے بعد 10 افسران و اہلکار کو معطل کردیا گیا۔

    تفصیلات کے مطابق سندھ پولیس کے اسپیشل پروٹیکشن یونٹ میں مبینہ کروڑوں روپے کی کرپشن سامنے آئی ہے، اے آئی جی خادم حسین نے اسپیشل پروٹیکشن یونٹ کے 10 افسران و اہلکاروں کو معطل کرکے انہیں بی کمپنی میں رپورٹ کرنے کی ہدایت کی ہے۔

    ذرائع نے بتایا کہ کارروائی خفیہ تحقیقات کے بعد مبینہ کرپشن کے الزامات پر کی گئی ہے، بی کمپنی بھیجے گئے افسر اور اہلکاروں کو اختیارات کے غلط استعمال اور کرپشن کے الزامات پر ہٹایا گیا۔

    معطل افسر اور اہلکاروں پر سی پیک پروجیکٹ کیلئے دی گئی سرکاری گاڑیوں کے غلط استعمال کا بھی الزام ہے، افسران و اہلکاروں میں اسپیشل پروٹیکشن یونٹ سکھر کے انسپکٹر محمد فہیم  اور ہیڈ کانسٹبل شامل ہیں۔

    ذرائع نے بتایاکہ ڈی آئی جی اسپیشل پروٹیکشن یونٹ آفس میں تعینات صدام حسین بلو پر بھی کرپشن کا الزام ہے، سی پیک تھرپارکر کے 3 اہلکاروں کو بھی اختیارات کے غلط استعمال پر بی کمپنی بھیجا گیا ہے۔

  • کرپشن کے مقدمے میں نیب کو مطلوب اشتہاری ملزم ابوظہبی سے گرفتار

    کرپشن کے مقدمے میں نیب کو مطلوب اشتہاری ملزم ابوظہبی سے گرفتار

    کراچی: ایف آئی اے انٹرپول نے کرپشن کے مقدمے میں نیب کو مطلوب اشتہاری ملزم کو ابوظہبی سے گرفتار کرلیا۔

    تفصیلات کے مطابق ایف آئی اے انٹرپول نے بڑی کارروائی کرتے ہوئے کرپشن کے مقدمے میں نیب کو مطلوب اشتہاری ملزم کو ابوظہبی سے گرفتار کرلیا، ایف آئی اے نیب انٹرپول پاکستان نے ملزم کی گرفتاری کے لئے ریڈ نوٹس جاری کیا تھا۔

      ایف آئی اے کے مطابق ملزم ذیشان حسین بدعنوانی اور کرپشن میں نیب کراچی کو مطلوب تھا ملزم کے خلاف سال 2019 میں ریفرنس درج ہوا تھا ملزم نے کرپشن کرتے ہوئے قومی خزانے کو بھاری نقصان پہنچایا۔

    ایف آئی اے نے کہا کہ ملزم کو ابو ظہبی سے گرفتار کر کے اسلام آباد ائرپورٹ منتقل کیا گیا ملزم کو بعد ازاں امیگریشن حکام نے نیب کے حوالے کر دیا ملزم کی حوالگی انٹرپول اسلام آباد کی انٹرپول ابوظہبی کے ساتھ قریبی رابطہ کاری کی وجہ سے ممکن ہوئی۔

  • محکمہ تعلیم کے افسر کو کرپشن کی نشاندہی کرنے پر عہدے سے ہٹا دیا گیا

    محکمہ تعلیم کے افسر کو کرپشن کی نشاندہی کرنے پر عہدے سے ہٹا دیا گیا

    کراچی: محکمہ تعلیم کے پروجیکٹ ’’سلیکٹ‘‘میں  کرپشن کا انکشاف سامنے لانے والے منیجر کو کرپشن کی نشاندہی کرنے پر عہدے سے ہٹادیا گیا۔

    تفصیلات کے مطابق محکمہ تعلیم کے پروجیکٹ ’سلیکٹ‘ میں کرپشن کا انکشاف ہوا ہے، عبدالحمید علوانی، منیجر پی ایم آئی یو سلیکٹ نے سیکریٹری تعلیم کو خط لکھ کر آگاہ کیا تھا، خط لکھنے کے کچھ دن بعد پروجیکٹ منیجر عبدالحمید علوانی کو ہٹادیا گیا۔

    ذرائع کے مطابق عبدالحمید علوانی نے پروجیکٹ میں بڑے پیمانے پر کرپشن کی نشاندہی کی تھی، خط میں انہون نے سیکریٹری تعلیم کو مالی بدعنوانیوں اور اختیارات کے غلط استعمال سے آگاہ کیا تھا۔

    عبدالحمید علوانی خط میں انکشاف کیا کہ پروجیکٹ کیلئے 2022 میں 12 لیپ ٹاپ خریدے گئے تھے، 2 لیپ ٹاپس کی اسٹاک رجسٹر میں انٹری ہی موجود نہیں ہے جبکہ سندھ ہائیکورٹ کے حکم کے مطابق ہیڈ ماسٹر کو انتظامی پوسٹ پر تعینات بھی نہیں کیا جاسکتا۔

    عبدالحمید علوانی نے خط میں لکھا تھا کہ سلیکٹ پروجیکٹ میں خلاف قانون عہدے دئیے گئے، لیاقت علی سولنگی کو بجٹ اینڈ فنانس آفس کا اضافی چارج دیا گیا ساتھ ہی انہیں ایک عدد لیپ ٹاپ اور ایک گاڑی بھی دی گئی تھی لیکن آرڈر منسوخ ہونے کے بعد گاڑی اور لیپ ٹاپ واپس جمع نہیں کرایا گیا۔

    عبدالحمید علوانی نے انکشاف کیا کہ 46 لاکھ کے 2 کمپیوٹر سرور کا کچھ پتہ ہی نہیں، چیف پروگرام منیجر نے 2 نئی گاڑیاں خریدی اور انہوں نے گاڑیاں بنا کسی اطلاع یا رسید کے اپنے ساتھ لے گئے۔

    انہوں نے خط میں لکھا تھا کہ پراجیکٹ کمیٹیوں کی شمولیت کے بغیر تمام اسٹاف اور کنسلٹنٹس کی تقرریوں میں بے ضابطگیاں کی گئی، 19ویں گریڈ کے ایک افسر 7 سے 8 پراجیکٹس کے چارج سنبھالے ہوئے ہیں۔

  • پنجاب کے محکمہ مال میں ڈیڑھ ارب کی کرپشن کا انکشاف

    پنجاب کے محکمہ مال میں ڈیڑھ ارب کی کرپشن کا انکشاف

    لاہور: پنجاب کے پانچ اضلاع کے محکمہ مال میں ڈیڑھ ارب کی کرپشن کا انکشاف ہو اہے۔

    تفصیلات کے مطابق ایف بی آر کے آڈٹ میں محکمہ مال کے ریکارڈ کی الیکٹرانک اور فزیکل اسکروٹنی کی گئی، محکمہ مال میں رجسٹری ٹیکس کی مد میں ڈیڑھ ارب روپے سے زائد کے گھپلے سامنے آئے۔

    ایف بی آر ترجمان کا کہنا ہے کہ دفاتر سے بڑی تعداد میں جعلی چالان برآمد ہوئے، آڈٹ کے بعد سرگودھا، میانوالی، خوشاب، بھکر اور منڈی بہاؤالدین کے 17 سب رجسٹراروں اور دیگر ریونیو عملے کے خلاف ایکشن شروع کر دیا گیا۔ْ

    ایف بی آر کا کہنا ہے کرپشن میں ملوث افراد کو جرمانے کے ساتھ دس سال تک سزا ہوسکتی ہے۔

  • سعودی حکام کا کرپشن پر بڑا قدم

    سعودی حکام کا کرپشن پر بڑا قدم

    ریاض: سعودی حکام نے کرپشن پر بڑا قدم اٹھاتے ہوئے کئی سرکاری افسران سمیت متعدد غیر ملکیوں کو گرفتار کر لیا۔

    کنٹرول اینڈ اینٹی کرپشن کمیشن (نزاھۃ) کے ترجمان کے مطابق بد عنوانی کے الزامات میں 23 افراد کو حراست میں لیا گیا ہے، ترجمان نزاھۃ نے کرپشن کے 13 کیسز کی تفصیلات سے میڈیا کو آگاہ کیا۔

    عاجل ویب کے مطابق غیر قانونی طریقے سے پلاٹس کی رجسٹری کے سرکاری کاغذات جاری کرنے پر ایک وثیقہ نویس کو گرفتار کیا گیا ہے، اور اس کے سگے بھائی کو بھی 65 ملین ریال میں پلاٹ فروخت کرنے پر حراست میں لیا گیا۔

    نزاھۃٖ کے مطابق ایک ملین ایک لاکھ 85 ہزار ریال سے زیادہ کی بدعنوانی کے الزام میں وزارت دفاع کے ایک ریٹائرڈ افسر کو بھی گرفتار کیا گیا ہے، بلدیاتی کونسل سے ٹھیکہ لینے والے ادارے سے منسلک 2 مقیم غیر ملکیوں کو بھی تقریباً ایک لاکھ ریال کی بدعنوانی کے الزام میں گرفتار کیا گیا۔

    کرپشن کے کیسز میں ایک کاروباری ادارے سے منسلک سعودی شہری، وزارت صحت کے ماتحت میڈیکل سٹی کے مقامی ملازم، موھبہ پروگرام کے ایک ادارے کے سربراہ، ایک کمشنری کی میونسپلٹی کےعہدے دار کو بھی حراست میں لیا گیا۔ ترجمان نے بتایا کہ بدعنوانی میں وزارت تعلیم، وزارت داخلہ، وزارت ماحولیات و پانی و زراعت کے اہلکار بھی شامل ہیں۔

    کنٹرول اینڈ اینٹی کرپشن کمیشن (نزاھۃ) نے خبردار کیا ہے کہ سرکاری خزانے میں خورد برد کرنے والے کسی بھی شخص کے ساتھ کوئی رعایت نہیں برتی جائے گی۔

  • مودی کابینہ کے مرکزی وزیر کے بیٹے کی کرپشن کی ویڈیو وائرل

    مودی کابینہ کے مرکزی وزیر کے بیٹے کی کرپشن کی ویڈیو وائرل

    بھوپال: بھارتی ریاست مدھیہ پردیش کے مرکزی وزیر نریندر تومر کے بیٹے دیوندر تومر کی ایک ویڈیو وائرل ہوئی ہے، جس میں وہ مائننگ سے تعلق رکھنے والے تاجروں سے کروڑوں روپے لینے کے لیے کئی بینک اکاؤنٹس کے بندوبست کی بات کر رہا ہے۔

    بھارتی میڈیا رپورٹس کے مطابق مودی کابینہ کے مرکزی وزیر نریندر تومر کے بیٹے کی کروڑوں روپے لین دین کی ویڈیو سوشل میڈیا پر وائرل ہوئی ہے، جس پر کانگریس پارٹی کی قومی ترجمان سپریا شرینیت نے بھوپال میں پریس کانفرنس کرتے ہوئے سپریم کورٹ کے ریٹائر جج سے اس معاملے کی جوڈیشل انکوائری کا مطالبہ کیا ہے۔

    نریندر سنگھ تومر بی جے پی امیدوار ہیں، اور وہ 2014 سے 2019 کے درمیان مرکزی وزیر برائے کانکنی رہ چکے ہیں، کانگریس کی خاتون رہنما نے مودی سرکار پر سخت تنقید کرتے ہوئے کہا کہ مودی جی کو ای ڈی، ای ڈی کھیلنے کا بڑا شوق ہے لیکن اس معاملے میں سی بی آئی، ای ڈی اور انکم ٹیکس کو جیسے سانپ سونگھ گیا ہے۔

    ترجمان سپریا شرینیت نے کہا انتخابات کے دوران ایسی ویڈیو سے یہ اندیشہ بھی پیدا ہوا ہے کہ یہ بلیک منی کہاں لگائی گئی ہے، انتخابی کمیشن کو اس ویڈیو کا نوٹس لے کر اس کی سچائی کا پتا لگانا چاہیے، اس بدعنوانی کے تار کہاں تک جڑے ہیں؟ ایک تنہا لڑکا مدھیہ پردیش میں اتنا بڑا گورکھ دھندا نہیں چلا سکتا۔

    سپریا شرینیت کے مطابق وائرل ویڈیو میں آر بی آئی ریٹائرڈ کمشنر کے ذریعہ کسی پارٹی کے 100 کروڑ روپے دینے کی بات کی گئی، کچھ کاروباری لوگوں سے بھی پیسے لینے کی بات کی گئی، اور راجھستان کے کوئلے کی کانوں کے ایک فرم سے 39 کروڑ کے معاہدے کی بات بھی کی گئی، دہلی ایئرپورٹ پر دیوندر تومر کی بیوی کے نام کسی پارسل کے پہنچنے کا بھی ذکر ہوا۔

    کانگریس ترجمان سپریا شرینیت نے کہا کہ یہ کھیل اپریل سے کھلے طور پر چل رہا ہے اور ریاستی حکومت اور وزیر اعظم نریندر مودی آنکھوں پر پٹی باندھ کر انجان بنے ہوئے ہیں۔

  • محکمہ لیبر کے ماتحت ادارے سیسی میں کروڑوں روپے کی مبینہ کرپشن

    محکمہ لیبر کے ماتحت ادارے سیسی میں کروڑوں روپے کی مبینہ کرپشن

    کراچی: محکمہ لیبر کے ماتحت ادارے سیسی (SESSI) میں کروڑوں روپے کی مبینہ کرپشن پر چیف سیکریٹری سندھ نے اوپن انکوائری کرنے کی منظوری دے دی۔

    تفصیلات کے مطابق سندھ ایمپلائز سوشل سیکیورٹی انسٹی ٹیوشن میں مبینہ کرپشن کی کھلی انکوائری کی جائے گی، سندھ کے چیف سیکریٹری نے اس کی منظوری دے دی، اس کیس میں محمد خان ابڑو سمیت 13 افراد کے خلاف انکوائری ہوگی۔

    انکوائری کرنے والے افسر کو با اثر افسران نے رپورٹ کرا دیا ہے، رپورٹ کے مطابق جعلی آڈٹ رپورٹس کے ذریعے سیسی کو 13 کروڑ کا نقصان پہنچایا گیا، ادویات اور مشینری کی مد میں ہیرا پھیری کی گئی۔

    اینٹی کرپشن حکام کا کہنا ہے کہ ڈائریکٹر کورنگی زاہد بٹ، سابق ڈائریکٹر سعادت میمن، میڈیکل افسر شاہ محمد کے خلاف تحقیقات ہوں گی، سیسی حکام نے مزدوروں کے کارڈ پر مبینہ طور پر رشوت وصول کی۔

  • پنجاب یونیورسٹی میں 6 ارب کرپشن اسکینڈل، اساتذہ کے خلاف ایف آئی آر درج

    پنجاب یونیورسٹی میں 6 ارب کرپشن اسکینڈل، اساتذہ کے خلاف ایف آئی آر درج

    لاہور: پنجاب یونیورسٹی میں 6 ارب کی کرپشن کے اسکینڈل میں اساتذہ کے خلاف ایف آئی آر درج ہو گئی، اینٹی کرپشن نے 2 افراد کو گرفتار کر لیا۔

    تفصیلات کے مطابق پنجاب یونیورسٹی ٹاؤن 3 ہاؤسنگ اسکیم میں اربوں روپے کی مبینہ کرپشن کے کیس میں اینٹی کرپشن نے 9 ملزمان کے خلاف مقدمہ درج کرتے ہوئے 2 کو گرفتار کر لیا ہے، ترجمان اینٹی کرپشن کا کہنا ہے کہ ٹاؤن تھری میں کرپشن کے واضح شواہد پر ملزمان کے خلاف مقدمہ درج کیا گیا ہے۔

    یونیورسٹی انتظامیہ اور سینڈیکیٹ کی اجازت کے بغیر ہاؤسنگ سوسائٹی بنائی گئی تھی، ہاؤسنگ کالونی کے لیے محکمہ ایل ڈی اے و دیگر اداروں سے این او سی نہیں لیا گیا۔

    ایف آئی آر میں کمالیہ یونیورسٹی کے قائمقام وی سی ڈاکٹر ساجد رشید، پنجاب یونیورسٹی اکیڈمک اسٹاف ایسوسی ایشن کے صدر اظہر نعیم، پنجاب یونیورسٹی شعبہ تاریخ کے چیئرمین ڈاکٹر محبوب حسین، ڈاکٹر فخرالحق نوری، سابق ایڈیشنل کنٹرولر محمد جمیل، وقار نعیم، اور فرنٹ مین میاں جاوید نامزد کیے گئے ہیں۔

    محکمہ اینٹی کرپشن کا کہنا ہے کہ ٹاؤن تھری کے آغاز کے بعد ملزمان اساتذہ کے اثاثہ جات میں اضافہ ہوا، ملزمان نے سینڈیکیٹ اور ایل ڈی اے کی منظوری کے بغیر اسکیم شروع کی، اور ڈاکٹر اظہر نعیم نے بغیر شفاف طریقہ اپنائے بھائی کی کمپنی کو اربوں کا ٹھیکہ دیا۔

  • میونسپل کارپوریشن اسلام آباد: صفائی کے ٹھیکے میں 20 کروڑ روپے کی کرپشن کا انکشاف

    میونسپل کارپوریشن اسلام آباد: صفائی کے ٹھیکے میں 20 کروڑ روپے کی کرپشن کا انکشاف

    اسلام آباد: وفاقی دارالحکومت اسلام آباد کی میونسپل کارپوریشن میں، صفائی کے ٹھیکے میں 20 کروڑ روپے سے زائد کی کرپشن کا انکشاف ہوا جس کے بعد ایف آئی نے مقدمہ درج کرلیا۔

    تفصیلات کے مطابق میونسپل کارپوریشن اسلام آباد کے سینی ٹیشن ڈیپارٹمنٹ میں صفائی کے ٹھیکے میں 20 کروڑ روپے سے زائد کی کرپشن کا انکشاف ہوا ہے۔

    وفاقی تحقیقاتی ادارے (ایف آئی اے) نے 7 افسران اور ٹھیکیدار کے خلاف مقدمہ درج کرلیا۔

    ایف آئی اے کا کہنا ہے کہ ٹھیکے کے ایوارڈ سے قبل سب کمیٹیوں کو تمام مشینری اور رجسٹریشن کی تصدیق کا کام سونپا گیا، سب کمیٹی کی رپورٹس منفی ہونے کے باوجود متعلقہ ٹھیکہ ایوارڈ کیا گیا۔

    ایف اے آئی کے مطابق سب کمیٹی کی رپورٹس کو ریکارڈ سے غائب کردیا گیا۔

    ایف آئی آر میں کئی افسران نامزد کر دیے گئے ہیں، مقدمے کی مزید تحقیقات کے لیے کسی بھی افسر کو بلایا جا سکتا ہے۔

  • سندھ میں مزارات کی مرمت کے نام پر کروڑوں روپے کی خرد برد

    سندھ میں مزارات کی مرمت کے نام پر کروڑوں روپے کی خرد برد

    کراچی: سندھ کے محکمہ اوقاف نے بزرگان دین کے مزارات کی مرمت کے نام پر کروڑوں روپے کی ہیرا پھیری کرلی، وزیر اعلیٰ سندھ سید مراد علی شاہ کی انسپکشن ٹیم نے سیکریٹری محکمہ اوقاف سے تفصیلات طلب کرلیں۔

    تفصیلات کے مطابق محکمہ اوقاف سندھ کےافسران کی کرپشن منظر عام پر آگئی، مزارات کی مرمت کے نام پر کروڑوں روپے کی ہیرا پھیری کی گئی۔

    وزیر اعلیٰ سندھ سید مراد علی شاہ کی انسپکشن ٹیم کا کہنا ہے کہ محکمہ اوقاف کی جانب سے دفاتر کے لیے 10 کروڑ فنڈز خرد برد کیے گئے، محکمے نے ٹھیکیداروں کو ایڈوانس ادائیگیاں کیں۔

    محکمہ اوقاف صوفی بزرگ سچل سرمست اور نور ولی شاہ سمیت دیگر مزارات کی مرمت کے لیے دیے جانے والے پیسے ہڑپ کر گیا۔

    انسپکشن ٹیم نے سیکریٹری محکمہ اوقاف سے تفصیلات طلب کرلی ہیں۔