Tag: کرکٹ کی خبریں

لاہور: پاکستان کرکٹ ٹیم کے فاسٹ بولر عثمان شنواری نے کہا ہے کہ انھیں مصباح الحق کے ساتھ کھیل کر ان سے بہت کچھ سیکھنےکو ملا۔

تفصیلات کے مطابق میڈیا سے گفتگو کرتے ہوئے فاسٹ بولر عثمان شنواری نے کہا ہے کہ مصباح الحق نے ہمیشہ انھیں اعتماد دیا ہے، مصباح کے ساتھ کھیل کر بہت کچھ سیکھا۔

ان کا کہنا تھا کہ سری لنکا کے خلاف سیریز کی تیاریوں کے لیے کیمپ جاری ہے، سیریز میں اچھی کارکردگی دکھانا ہمارا ہدف ہے۔

شنواری نے کہا کہ جب آپ محنت کر رہے ہوں اور اچانک ٹیم سے باہر ہو جائیں تو دکھ ہوتا ہے، مجھے ورلڈ کپ سے باہر ہونے کا دکھ تھا مگر یہ کھیل کا حصہ ہے۔

یہ بھی پڑھیں:  سری لنکا کے خلاف سیریز کے لیے قومی ٹیم کے تربیتی کیمپ کا آغاز

کرکٹر عثمان شنواری نے کہا کہ کھلاڑی کے کیرئیر میں ہمیشہ اتار چڑھاؤ آتا ہے، میں جتنا کھیلا ہوں، اب تک اپنی کارکردگی سے مطمئن ہوں۔

اپنی بولنگ اور کوچنگ سے متعلق فاسٹ بولر نے کہا کہ وقار یونس کے بالنگ کوچ بننے سے میری پرفارمنس بہتر ہوگی۔

واضح رہے کہ لاہور کے قذافی اسٹیڈیم میں مہمان ٹیم سری لنکا کے خلاف سیریز کے لیے قومی ٹیم کے 4 روزہ تربیتی کیمپ کا ہیڈ کوچ مصباح الحق اور بولنگ کوچ وقار یونس کی نگرانی میں آغاز ہو چکا ہے۔

سری لنکا کے خلاف ایک روزہ اور ٹی ٹوینٹی سیریز 27 ستمبر سے 9 اکتوبر تک جاری رہے گی، سرفراز احمد 2017 سے تینوں فارمیٹ میں قومی ٹیم کی قیادت کر رہے ہیں، دو روز قبل سری لنکا کے خلاف سیریز کے لیے 20 ممکنہ کھلاڑیوں کا اعلان کیا گیا تھا۔

کراچی: قائد اعظم ٹرافی میں ڈبل سنچری بنانے پر کرکٹر عابد علی نے اظہار تشکر کیا ہے، انھوں نے کہا اپنا انفرادی ہائی اسکور کرنے پر خدا کا شکر ادا کرتا ہوں۔

تفصیلات کے مطابق قائد اعظم ٹرافی میں سندھ ٹیم کے بیٹسمین عابد علی نے ڈبل سنچری کے بعد میڈیا سے گفتگو کرتے ہوئے کہا کنڈیشن جیسی بھی ہو ہمیں اچھا کھیلنا ہے، فٹنس پر کام کر رہا ہوں۔

عابد علی نے کہا کہ خواہش ہے کہ ہر فارمیٹ کی کرکٹ میں پاکستان کی نمائندگی کروں۔

ان کا کہنا تھا کہ میچ میں ہم نے ٹیم پلان پر عمل کیا، میری کارکردگی بھی بہتر رہی، اب ڈومیسٹک کرکٹ اچھی ہو رہی ہے، پروفیشنل کھلاڑی سامنے آ رہے ہیں۔

تفصیل یہاں پڑھیں:  تاریخ میں پہلی بار قائداعظم ٹرافی کے میچز لائیو اسٹریم ہوں گے

2007 میں فرسٹ کلاس ڈیبو کرنے والے عابد علی نے کہا کہ مجھے اچھا آغاز ملا، کارکردگی برقرار رکھنے کی کوشش کروں گا، فٹنس پر بھرپور توجہ دے رہا ہوں۔

واضح رہے کہ نئے ڈومیسٹک اسٹرکچر کے تحت قائد اعظم ٹرافی کے ابتدائی راؤنڈ کا گزشتہ روزسے آغاز ہو گیا ہے، یو بی ایل اسپورٹس کمپلیکس کراچی میں نو ٹاس قانون کا استعمال کرتے ہوئے مہمان بلوچستان کے کپتان حارث سہیل نے پہلے فیلڈنگ کا فیصلہ کیا تھا۔

میچ میں بلوچستان کے خلاف ڈبل سنچری جڑتے ہوئے سندھ ٹیم کےعابد علی نے 249 رنز ناٹ آؤٹ کا بہترین انفرادی اسکور کیا، اکتیس سالہ کھلاڑی نے یہ سنگ میل 512 گیندوں پر 26 چوکوں کی مدد سے عبور کیا، وہ 712 منٹ کریز پر کھڑے رہے، ٹیم نے پانچ وکٹوں پر 473 رنز اسکور کر کے اننگ ڈیکلیئر کر دی۔

عابد علی

16 اکتوبر 1987 کو لاہور میں پیدا ہوئے، انھوں نے لسٹ اے ڈیبو 2005 میں کیا اور فرسٹ کلاس ڈیبو 2007 میں کیا، جب کہ پاکستان کرکٹ ٹیم کے لیے انٹرنیشنل ڈیبو انھوں نے مارچ 2019 میں کیا۔ انٹرنیشنل ڈیبو کرنے سے قبل وہ 100 فرسٹ کلاس میچز میں 6700 رنز اسکور کر چکے تھے۔

مارچ 2019 میں انھیں آسٹریلیا کے خلاف ون ڈے میچ کے لیے منتخب کیا گیا، انھوں نے اپنا پہلا انٹرنیشنل ون ڈے میچ 29 مارچ کو آسٹریلیا کے خلاف کھیلا۔ یہ ایک یادگار میچ تھا جب عابد علی نے پہلے ہی میچ میں آسٹریلیا جیسی ٹیم کے خلاف سینچری اسکور کر لی۔

عابد علی نے آؤٹ ہونے سے قبل 9 چوکوں کی مدد سے 112 رنز کی شان دار اننگز کھیلی، یہ پاکستان کی جانب سے ڈیبو کرنے والے ون ڈے بیٹسمین کا سب سے زیادہ اسکور تھا، یہ کارنامہ انجام دینے والے وہ تیسرے پاکستانی کھلاڑی بنے۔

اپریل 2019 میں عابد علی کو کرکٹ ورلڈ کپ کے پاکستان اسکواڈ میں ابتدائی طور پر شامل کیا گیا لیکن 20 مئی کو پی سی بی کی جانب سے فائنل اسکواڈ کا اعلان کیا گیا تو انھیں ڈراپ کر دیا گیا۔

لاہور: پاکستان کرکٹ ٹیم کے دو کھلاڑی اسپتال پہنچ گئے ہیں، فاسٹ بالر شاہین آفریدی ڈینگی مچھر کا شکار ہو کر پری سیزن کیمپ سے باہر ہو گئے۔

تفصیلات کے مطابق کرکٹر شاہین شاہ آفریدی پری سیزن کیمپ سے باہر ہو گئے ہیں، انھیں ڈینگی بخار لا حق ہو گیا ہے، وہ گزشتہ روز سے مقامی اسپتال میں زیر علاج ہیں۔

اطلاعات کے مطابق فاسٹ بالر شاہین آفرید کا علاج جاری ہے، مکمل صحت یابی کے بعد کیمپ میں دوبارہ شمولیت کر سکیں گے۔

ادھر اوپنر بلے باز فخر زمان گھٹنے کی انجری کا شکار ہو گئے ہیں، وہ پریکٹس کے دوران گھٹنے کی انجری کا شکار ہوئے، اطلاعات کے مطابق وہ تا حال نیٹ پریکٹس کا آغاز نہیں کر سکے ہیں۔

مزید تفصیل پڑھیں:  قومی کرکٹ ٹیم کا پری سیزن کیمپ شروع

انجری کے بعد گزشتہ روز فخر زمان کے دائیں گھٹنے کا ایم آر آئی اسکین کیا گیا، ایم آر آئی رپورٹ پی سی بی میڈیکل ایڈوائزری پینل کو موصول ہو چکی ہے، اب پینل کی سفارشات پر فخر زمان کی کیمپ میں شرکت کا فیصلہ ہوگا۔

واضح رہے کہ قومی کرکٹرز کے پری سیزن کیمپ کا آغاز دو روز قبل قذافی اسٹیڈیم لاہور میں ہو چکا ہے، جس میں کھلاڑیوں کی بیٹنگ، بولنگ اور فیلڈنگ میں مہارت بہتر بنانے کے لیے مشقیں جاری ہیں۔

مصباح الحق کی نگرانی میں ٹریننگ کے لیے پری سیزن کیمپ میں 20 کرکٹرز کو طلب کیا گیا، سابق کپتان خاص طور پر بیٹنگ تکنیک میں بہتری اور مستقل مزاجی سے کارکردگی دکھانے کے نسخے بتائیں گے۔

لاہور: پاکستان کرکٹ بورڈ کے نئے آئین کی کاپی اے آر وائی نیوز نے حاصل کر لی ہے، آئین کے مطابق قومی ٹیم کے کپتان، کوچ اور چیف سلیکٹر کی تعیناتی چئیرمین کی صوابدید ہوگی۔

تفصیلات کے مطابق پاکستان کرکٹ بورڈ کا نیا آئین 31 صفحات پر مشتمل ہے، آئین میں ڈسٹرکٹ کرکٹ ایسوسی ایشن کی جگہ سٹی کرکٹ ایسوسی ایشنز شامل کی گئی ہیں، جو ایکٹو کرکٹ کلبز پر مشتمل ہوں گی۔

نئے آئین کے تحت پی سی بی کا گورننگ بورڈ 11 اراکین پر مشتمل ہوگا، یہ بورڈ چئیرمین پی سی بی کا انتخاب کرے گا، بورڈ میں 3 صوبائی ایسوسی ایشنز کے نمائندے شامل ہوں گے، 4 آزاد ڈائریکٹرز، 2 پیٹرن نمائندے، چیف ایگزیکٹو یا سی ای او، سیکریٹری آئی پی سی شامل ہوں گے۔

تازہ خبریں پڑھیں:  پری سیزن کیمپ، پی سی بی نے 20 کھلاڑیوں کو این سی اے طلب کرلیا

آئین کے مطابق ایکٹو کلبز کے صدور سٹی کرکٹ ایسوسی ایشن کے نمائندوں کا انتخاب کریں گے، کلب کی سطح پر تمام سرگرمیوں کو صوبائی ایسوسی ایشنز مانیٹر کریں گی، سٹی کرکٹ ایسوسی ایشن الیکشن سے ایک برس قبل فہرست فراہم کرنے کی پابند ہوگی، جب کہ ایسوسی ایشنز کے علاقوں کا تعین بعد میں کیا جائے گا۔

نئے آئین میں پہلی مرتبہ سٹی ایسوسی ایشنز کو فنڈز خود بنانے کی بھی اجازت دی گئی ہے، یہ صوبائی بورڈ یا ایسوسی ایشن کے نمائندوں کا انتخاب کریں گی، تمام ایسوسی ایشنز سوسائٹی ایکٹ کے تحت خود کو رجسٹرڈ کرانے کی پابند ہوں گی۔

آئین کے مطابق چئیرمین، چیف آپریٹنگ آفیسر، چیف ایگزیکٹو آفیسر، صوبائی ایسوسی ایشنز کے صدور، بلائنڈ کونسل کے چئیرمین، ڈیف اینڈ ڈم اور ویٹرنز کرکٹ کے صدور جنرل باڈی کا حصہ ہوں گے۔