لاہور: انٹرنیشنل کرکٹ کونسل کی ورلڈ کپ 2019 کے لیے تیار کردہ ٹرافی لاہور پہنچ گئی ہے، لاہورسے یہ اسلام آباد اور پھر کراچی سفر کرے گی، پاکستان میں اس کا قیام کل دس دن ہوگا۔
تفصیلات کے مطابق کرکٹ ورلڈ کپ 2019 کے لیے تیا ر کردہ ٹرافی لاہور پہنچ چکی ہے، آئی سی سی کے نمائندے شیمرون شیٹھی بھی ٹرافی کے ہمراہ سفر کررہے ہیں۔
شیڈول کے مطابق ٹرافی کو دوپہر ڈیڑھ بجے قذافی اسٹیڈیم لاہور لایا جائے گا جہاں سے اسے سیاحوں کے لیے تیارکردہ ڈبل ڈیکر بس سروس کے ذریعے لاہور دورہ کرایا جائے گا، اس کے بعد پونے تین بجے ٹرافی کو اسٹیڈیم کے اندر رکھا جائے گا۔
کل صبح یہ ٹرافی گورنمنٹ کالج یونی ورسٹی کا رخ کرے گی جبکہ اس کے بعد اس کی آفیشل تصویر کے لیے اسے واہگاہ بارڈر لے جایا جائے گا۔ شام میں ٹرافی شوکت خانم اسپتال لےجائی جائے گی جس کے بعد اس ٹرافی کا لاہور میں سفر ختم ہوجائے گا۔
لاہور سے یہ ٹرافی ، آئی سی سی کے نمائندے کے ہمراہ اسلام آباد کا رخ کرے گی جس کے بعد اسے کراچی لایا جائے گا۔ کراچی کے بعد یہ ٹرافی آگے اپنے سفر پر روانہ ہوجائے گی۔
یہ ٹرافی پاکستان میں دس دن قیام کرے گی ۔ تین سے پانچ اکتوبر کو اس کا قیام لاہور میں ہوگا جس کے بعد 6 سے آٹھ اکتوبر تک یہ اسلام آباد میں رہے گی ۔ 9 سے تیرہ اکتوبر تک یہ ٹرافی کراچی میں قیام کرے گی۔ یاد رہے کہ اس کا سفر رواں سال 27 اگست کو دبئی میں قائم آئی سی سی کے ہیڈ کوارٹر سے شروع ہوا تھا۔
اس سفر میں یہ ٹرافی پانچ بر اعظموں کے 21 ممالک اور 60 شہروں کا سفر کرے گی۔ کرکٹ کی دنیا کا سب سے بڑا ایونٹ 30 مئی 2019 سے 14 جولائی 2019 تک انگلینڈ اور ویلز میں جاری رہے گا۔
