ARYNews.tv | Urdu – Har Lamha Bakhabar

Tag: کرکٹ کی خبریں

  • آرمی چیف جنرل قمر جاوید باجوہ سے کرکٹر شعیب ملک کی ملاقات

    آرمی چیف جنرل قمر جاوید باجوہ سے کرکٹر شعیب ملک کی ملاقات

    کیپ ٹاؤن: جنوبی افریقا کے شہر کیپ ٹاؤن میں کھیلی جانے والی ون ڈے سیریز کے آخری میچ سے قبل قومی ٹیم کے قائم مقام کپتان شعیب ملک نے آرمی چیف جنرل قمر جاوید باجوہ سے ملاقات کی۔

    تفصیلات کے مطابق کیپ ٹاؤن میں آرمی چیف جنرل قمر جاوید باجوہ سے پاکستان ٹیم کے کپتان اور آل راؤنڈر شعیب ملک نے ملاقات کی۔

    [bs-quote quote=”ملاقات میں قومی ٹیم کے مینجر طلعت علی بھی موجود تھے۔” style=”style-7″ align=”left” color=”#dd3333″][/bs-quote]

    کیپ ٹاؤن میں ہونے والی ملاقات میں قومی ٹیم کے مینجر طلعت علی بھی موجود تھے۔

    خیال رہے کہ پاکستان کرکٹ ٹیم اس وقت جنوبی افریقا کے دورے پر ہے، جہاں وہ اب تک تین ٹیسٹ اور پانچ ون ڈے میچز پر مشتمل سیریز کھیل چکی ہے۔

    کیپ ٹاؤن میں آج ون ڈے سیریز کا آخری میچ کھیلا گیا، جس میں پاکستان کو شکست ہوئی، یہ سیریز پاکستان ٹیم تین دو سے ہار گئی، اس سے قبل ٹیسٹ سیریز میں پاکستان کو وائٹ واش ہوا تھا۔

    یہ بھی پڑھیں:  کیپ ٹاؤن: جنوبی افریقا نے ون ڈے سیریز بھی جیت لی

    کل سے پاکستان اور جنوبی افریقا کے درمیان تین ٹی ٹوینٹی میچز پر مشتمل سیریز بھی شروع ہو رہی ہے، دوسرا ٹی ٹوینٹی میچ تین اور آخری ٹی ٹوینٹی میچ چھ فروری کو کھیلا جائے گا۔

    یاد رہے کہ آئی سی سی نے نسل پرستانہ جملے کسنے پر قومی کرکٹ ٹیم کے کپتان سرفراز احمد پر 4 میچوں کی پابندی عائد کر دی ہے جس کے بعد شعیب ملک کو قائم مقام کپتان مقرر کر دیا گیا ہے۔

  • ڈک ورتھ لوئس قانون: پاکستان کو جنوبی افریقا کے ہاتھوں شکست

    ڈک ورتھ لوئس قانون: پاکستان کو جنوبی افریقا کے ہاتھوں شکست

    سنچورین: پاکستان اور جنوبی افریقا کے درمیان کھیلے جانے والے تیسرے ون ڈے میچ میں ڈک ورتھ لوئس قانون کے تحت میزبان ٹیم کو 13 رنز سے فتحیاب قرار دے دیا گیا۔

    تفصیلات کے مطابق جنوبی افریقا نے 318 رنز کے ہدف کے تعاقب میں بیٹنگ کا آغاز کیا تو پروٹیز کی پہلی وکٹ 53 رنز پر گری جب ہاشم آملہ کو 25 رنز پر حسن علی نے بابر اعظم کے ہاتھوں کیچ آؤٹ کرایا۔

    وکٹ کیپر بلے باز کوئن ٹن ڈی کاک کو 33 رنز پر شاداب خان نے رن آؤٹ کیا۔

    جنوبی افریقا نے مجموعی طور پر 187 رنز 2 وکٹوں کے نقصان پر بنائے جس کے بعد بارش کا آغاز ہوا تو کھیل روکنا پڑا، روکا  ہینڈرکس 83 اور کپتان فاف ڈوپلیسی نے 40 رنز  کی شاندار ناقابلِ شکست اننگز کھیلی۔

    ڈک ورتھ لوئس قانون کے تحت امپائرز نے جنوبی افریقا کی ٹیم کو فاتح قرار دیا یوں پانچ ون ڈے میچز کی سیریز میں ڈوپلیسی الیون نے دو میچز جیت لیے جبکہ پاکستان نے ابھی تک ایک ہی جیتا۔

    بارش کے وقت جب کھیل روکا گیا تو  جنوبی افریقا کو میچ جیتنے کے لیے 17اوورز میں 131 رنز درکار تھے۔

    قبل ازیں سنچورین میں کھیلے جانے والے تیسرے ون ڈے میچ میں پاکستان نے مقررہ اوورز 317 میں رنز بنائے اور جنوبی افریقا کو جیت کے لیے 318 رنز کا ہدف دے دیا، امام الحق نے شاندار سنچری اسکور کی وہ 101 رنز بنا کر کیچ آؤٹ ہوئے۔

    قبل ازیں سرفراز احمد نے ٹاس جیت کر پہلے بیٹنگ کا فیصلہ کیا جو درست ثابت ہوا، فخر زمان صرف 2 رنز بنا کر ہینڈرکس کی گیند پر ربادا کو کیچ دے بیٹھے۔

    فخر زمان کے آؤٹ ہونے کے بعد بابر اعظم اور امام الحق نے شاندار پارٹنر شپ بنائی اور ٹیم کا اسکور 136 رنز تک پہنچادیا، بابر اعظم 69 رنز کی جارحانہ اننگز کھیل کر اسٹین کی گیند پر ایل بی ڈبلیو آؤٹ ہوئے۔

    محمد حفیظ نے 45 گیندوں پر 52 رنز کی برق رفتار اننگز کھیلی، وہ ربادا کی گیند پر فلک کوائیو کے ہاتھوں کیچ آؤٹ ہوئے، شعیب ملک 31 رنز بنا کر پویلین روانہ ہوئے، حسن علی ایک رنز بنا کر اسٹین گن کا نشانہ بنے۔

    عماد وسیم نے ناقابل شکست 23 گیندوں پر 43 رنز کی ناقابل شکست اننگز کھیلی جبکہ کپتان سرفراز احمد 6 رنز بنا کر ناٹ آؤٹ رہے۔

    جنوبی افریقا کی جانب سے فاسٹ بولر ربادا اور ڈیل اسٹین نے دو وکٹیں حاصل کیں جبکہ ہینڈرکس اور تبریز شمسی کے حصے میں ایک، ایک وکٹ آسکی۔

    امام الحق کے ون ڈے کرکٹ میں ایک ہزار رنز مکمل

    اوپنر امام الحق نے ون ڈے کرکٹ میں ایک ہزار رنز مکمل کرلیے ہیں، امام الحق نے 19 ویں اننگز میں ایک ہزار رنز مکمل کیے۔

    تیز ترین ایک ہزار رنز مکمل کرنے کا اعزاز اوپنر بلے باز فخر زمان کے پاس ہے، فخر زمان نے 18ویں اننگز میں ایک ہزار رنز مکمل کیے تھے۔

    تیسرے ون ڈے کے لیے پاکستانی ٹیم میں 2 تبدیلیاں کی گئی ہیں اور عماد وسیم اور محمد عامر کو اسکواڈ میں واپس لایا گیا ہے۔ جنوبی افریقہ کی ٹیم میں بھی 3 تبدیلیاں کی گئی ہیں۔

    قومی ٹیم محمد حفیظ، بابر اعظم، امام الحق، کپتان سرفراز احمد، شعیب ملک، شاداب خان، حسن علی، حسین طلعت، فہیم اشرف اور شاہین آفریدی پر مشتمل ہے۔

    دوسری جانب جنوبی افریقہ کی ٹیم میں کوئنٹن ڈی کوک، کپتان فاف ڈوپلیسی، ہاشم آملہ، ریزا ہینڈرک، ریسی وین دیر ڈیسن، اینڈلے فلکوایو، ڈیوڈ ملر، ڈیل اسٹین، کگیسورا بادا، بیرون ہینڈرکس، اور تبریز شمسی پرمشتمل ہے۔

    اس سے قبل دوسرے ون ڈے میں جنوبی افریقہ نے پاکستان کو 5 وکٹوں سے شکست دی تھی۔ 5 ون ڈے میچز کی سیریز میں دونوں ٹیمیں ایک ایک میچ جیت چکی ہیں۔

  • دوسرا ون ڈے، جنوبی افریقا نے پاکستان کو 5 وکٹوں سے شکست دے دی

    دوسرا ون ڈے، جنوبی افریقا نے پاکستان کو 5 وکٹوں سے شکست دے دی

    ڈربن: پاکستان اور جنوبی افریقا کے درمیان کھیلے جانے والے دوسرے ون ڈے میچ میں جنوبی افریقا نے پاکستان کو 5 وکٹوں سے شکست دے دی، پانچ میچوں کی سیریز 1-1 سے برابر ہوگئی، پھلوکوایو کو آل راؤنڈ پرفارمنس پر میچ کا بہترین کھلاڑی قرار دیا گیا۔

    تفصیلات کے مطابق جنوبی افریقا نے دوسرے ون ڈے میچ میں پاکستان کی جانب سے دیا جانے والا 204 رنز کا ہدف 5 وکٹوں کے نقصان پر حاصل کرلیا، پانچ میچوں کی سیریز 1-1 سے برابر ہوگئی، پہلے میچ میں پاکستان نے جنوبی افریقا کو 4 وکٹوں سے شکست دی تھی۔

    جنوبی افریقا نے 204 رنز ہدف کے تعاقب میں بیٹنگ کا آغاز کیا تو ابتدائی 5 وکٹیں جلد گرنے کے بعد جنوبی افریقا کے ڈوسن اور پھلوکوایو نے شاندار پارٹنر شپ بنائی اور ٹیم کی جیت میں کردار ادا کیا۔

    کیریئر کا دوسرا میچ کھیلنے والے وین ڈر ڈوسن نے 80 رنز کی ناقابل شکست اننگز کھیلی جبکہ پھلوکوایو نے ناقابل شکست 69 رنز بنائے۔

    اس سے قبل جنوبی افریقا کے ہینڈرکس 5 رنز بنا کر پویلین لوٹ گئے، ہاشم آملہ کو بھی شاہین شاہ آفریدی نے 8 رنز پر آؤٹ کیا، کپتان فاف ڈوپلیسی بھی 8 رنز بنا کر شاہین شاہ آفریدی کا نشانہ بنے۔

    جنوبی افریقا کے وکٹ کیپر بلے باز کلاسین بغیر کوئی رن بنائے شاداب خان کی گگلی پر کلین بولڈ ہوئے، پاکستان کی جانب سے شاہین شاہ آفریدی نے تین جبکہ شاداب خان نے 2 وکٹیں حاصل کیں۔

    قبل ازیں دوسرے ون ڈے میچ میں پاکستان کی ٹیم 45.5 اوورز میں 203 رنز پر ڈھیر ہوگئی اور جنوبی افریقا کو جیت کے لیے 204 رنز کا ہدف دے دیا، حسن علی نے شاندار 59 رنز کی اننگز کھیلی۔

    جنوبی افریقا نے ٹاس جیت کر پہلے فیلڈنگ کرنے کا فیصلہ کیا جو درست ثابت ہوا، اوپنر امام الحق صرف 5 رنز بنا کر ربادا کی گیند پر کیچ آؤٹ ہوئے، بابراعظم صرف 12 رنز بنا کر پویلین لوٹ گئے۔

    فخر زمان 26 رنز بنا کر اولیویئر کی گیند پر ڈیوڈ ملر کو کیچ دے بیٹھے، پہلے میچ کے مین آف دی میچ محمد حفیظ صرف 9 رنز بنا کر پویلین لوٹ گئے، شعیب ملک 21 رنز بنا سکے۔

    قومی ٹیم کی 8 وکٹیں 112 رنز پر گرنے کے بعد کپتان سرفراز احمد اور حسن علی نے شاندار کارکردگی کا مظاہرہ کرتے ہوئے ٹیم کا اسکور 202 رنز تک پہنچایا، 202 رنز پر سرفراز احمد حسن علی کا ساتھ چھوڑ گئے اور 41 رنز بنا کر بولڈ ہوگئے۔

    آخری آؤٹ ہونے والے کھلاڑی حسن علی نے انہوں نے شاندار 59 رنز کی اننگز کھیلی اور باؤنڈری پر ڈوپلیسی کے ہاتھوں کیچ آؤٹ ہوئے۔

    جنوبی افریقا کی جانب سے پھیلک وایو نے چار جبکہ عمران طاہر کی جگہ شامل ہونے والے اسپنر تبریز شمسی نے تین وکٹیں حاصل کیں، فاسٹ بولر ربادا کے حصے میں دو وکٹیں آئیں۔

    پہلے ون ڈے میں جنوبی افریقہ نے 267 رنز کا ہدف دیا تھا۔ ہاشم آملہ نے ناقابل شکست شاندار سنچری اسکور کی جبکہ اوپنرز نے 82 رنز کا شاندار آغاز فراہم کیا۔

    ہینڈرکس نے 45 رنز کی شاندار اننگز کھیلی۔

    ہدف کے تعاقب میں پاکستان نے بیٹنگ کا آغاز کیا تو اوپنرز فخر زمان اور امام الحق نے 45 رنز کا عمدہ آغاز فراہم کیا۔

    بابر اعظم نے 49 رنز بنائے، شعیب ملک 12 رنز بنا کر بولڈ ہوئے جبکہ کپتان سرفراز احمد کی کھوئی فارم بحال نہ ہوسکی۔

    اس سے قبل جنوبی افریقہ نے پاکستان کو ٹیسٹ سیریز میں کلین سوئپ کیا تھا، 3 میچز کی ٹیسٹ سیریز میں گرین شرٹس کوئی بھی میچ نہیں جیت سکے تھے۔

    ٹیسٹ سیریز میں شکست کے بعد قومی ٹیم کی سلیکشن پر کئی سوالات اٹھائے گئے تھے، چیف سلیکٹر انضمام الحق کے بھتیجے امام الحق کی سلیکشن کے حوالے سے بھی شدید تنقید کی گئی تھی۔

  • جنوبی افریقہ کے خلاف اچھی سیریز کی توقع ہے: کرکٹر شعیب ملک

    جنوبی افریقہ کے خلاف اچھی سیریز کی توقع ہے: کرکٹر شعیب ملک

    لاہور: پاکستان کرکٹ ٹیم کے سابق کپتان شعیب ملک نے کہا ہے کہ انھیں جنوبی افریقہ کے خلاف اچھی سیریز کی توقع ہے۔

    تفصیلات کے مطابق قومی ٹیم کے مایہ ناز آل راؤنڈر شعیب ملک نے کہا ہے کہ جنوبی افریقہ کی ٹیم دنیا کی بہترین ٹیموں میں سے ایک ہے، جنوبی افریقہ کے خلاف اچھی سیریز کی توقع ہے۔

    [bs-quote quote=”جنوبی افریقہ کے خلاف سیریز ورلڈ کپ کی تیاریوں کا حصہ ہے۔” style=”style-7″ align=”left” color=”#dd3333″ author_name=”شعیب ملک”][/bs-quote]

    جنوبی افریقہ کے خلاف ون ڈے سیریز کے حوالے سے شعیب ملک نے پریس کانفرنس کرتے ہوئے کہا کہ سلیکشن کمیٹی کھلاڑیوں کو مستقل موقع دے رہی ہے۔

    اسٹار کھلاڑی شعیب ملک کا کہنا تھا کہ جنوبی افریقہ کے خلاف سیریز ورلڈ کپ کی تیاریوں کا حصہ ہے۔ کہا نوجوان کھلاڑیوں کو گائیڈ اور کرکٹ انجوائے کر رہا ہوں۔

    خیال رہے کہ پاکستان اور جنوبی افریقہ کے درمیان 5 ایک روزہ میچوں کی سیریز کا پہلا میچ 19 جنوری کو پورٹ الزبتھ میں کھیلا جائے گا۔

    یہ بھی پڑھیں:  تیسرا ٹیسٹ: جنوبی افریقہ کا پاکستان کے خلاف کلین سوئپ

    جنوبی افریقہ کے خلاف ون ڈے سیریز کے لیے 16 رکنی قومی ٹیم کا اعلان بھی کیا جا چکا ہے، جنید خان اور حارث سہیل کو ون ڈے ٹیم سے ڈراپ کر دیا گیا ہے، جب کہ محمد عامر، شان مسعود، حسین طلعت، محمد رضوان کی ٹیم میں واپسی ہوئی ہے۔

    پاکستان اور جنوبی افریقہ کے درمیان 3 ٹیسٹ میچز پر مبنی سیریز بھی کھیلی گئی جس میں جنوبی افریقہ نے کلین سوئپ کیا۔

  • تیسرا ٹیسٹ: جنوبی افریقہ کا پاکستان کے خلاف کلین سوئپ

    تیسرا ٹیسٹ: جنوبی افریقہ کا پاکستان کے خلاف کلین سوئپ

    جوہانسبرگ: پاکستان اور جنوبی افریقہ کے درمیان تیسرے ٹیسٹ میچ میں جنوبی افریقہ نے فتح حاصل کر کے سیریز میں کلین سوئپ کرلیا۔ پاکستانی بیٹنگ لائن سیریز میں بری طرح ناکام ہوگئی۔

    تفصیلات کے مطابق پاکستان اور جنوبی افریقہ کے درمیان 3 ٹیسٹ میچز کی سیریز میں جنوبی افریقہ نے کلین سوئپ مکمل کرلیا۔

    پوری سیریز میں پاکستانی بیٹسمینوں نے بدترین کارکردگی دکھائی، اظہر علی نے 3 میچوں میں صرف 59 رنز بنائے، کپتان سرفراز احمد نے 3 میچز میں 112 رنز جبکہ امام الحق نے سیریز میں 149 رنز بنائے۔

    میچ کے تیسرے روز (گزشتہ روز) قومی ٹیم نے 3 وکٹوں کے نقصان پر 153 رنز بنائے تھے، قومی ٹیم کو جیت کے لیے مزید 228 رنز درکار تھے تاہم بیٹنگ لائن بری طرح لڑکھڑا رہی تھی۔

    دوسری اننگز میں اوپنرز نے 67 رنز کا عمدہ آغاز فراہم کیا تھا۔ امام الحق 35 اور شان مسعود 37 رنز بنا کر آؤٹ ہوئے۔ اظہر علی ایک بار پھر ناکام ثابت ہوئے اور صرف 15 رنز پر پویلین لوٹ گئے تھے۔

    قبل ازیں جوہانسبرگ ٹیسٹ کی دوسری اننگز میں جنوبی افریقہ نے وکٹ کیپر کوئن ٹن ڈی کاک کی شاندار سنچری کی بدولت 303 رنز بنائے تھے اور پاکستان کو جیت کے لیے 381 رنز کا ہدف دیا تھا۔

    کوئن ٹن ڈی کاک نے 129 رنز کی شاندار اننگز کھیلی تھی، انہیں شاداب خان نے حسن علی کے ہاتھوں کیچ آؤٹ کرایا۔ فلینڈر 17 اور ربادا 21 رنز بنا کر نمایاں رہے تھے۔

    پاکستان کی جانب سے فہیم اشرف اور شاداب خان نے 3، 3 کھلاڑیوں کو پویلین کی راہ دکھائی۔ محمد عامر نے 2، عباس اور حسن علی نے ایک، ایک وکٹ حاصل کی۔

    پہلی اننگز

    پاکستانی ٹیم اپنی پہلی اننگز میں صرف 185 رنز پر ڈھیر ہوگئی تھی، کپتان سرفراز احمد نے 50 جبکہ بابر اعظم 49 رنز بنا کر نمایاں رہے تھے۔

    دوسری جانب جنوبی افریقہ نے اپنی پہلی اننگز میں 262 رنزبنائے تھے۔ قومی ٹیم کی جانب سے فہیم اشرف نے 3، حسن علی، محمد عباس اور محمد عامر نے 2،2 وکٹیں حاصل کیں تھیں۔

    یاد رہے کہ ابتدائی دونوں ٹیسٹ میچوں میں قومی ٹیم کو شکست کا سامنا کرنا پڑا تھا اور یوں جنوبی افریقہ کو 3 ٹیسٹ میچوں کی سیریز میں 0-2 کی فیصلہ کن برتری حاصل تھی جسے آج جنوبی افریقہ نے کلین سوئپ میں بدل لیا۔

  • جوہانسبرگ ٹیسٹ: مکھیوں کا حملہ، میچ روکنا پڑا

    جوہانسبرگ ٹیسٹ: مکھیوں کا حملہ، میچ روکنا پڑا

    جوہانسبرگ: پاکستان اور جنوبی افریقہ کے درمیان تیسرے ٹیسٹ میچ کے دوسرے روز اچانک کھلاڑیوں پر مکھیوں نے حملہ کر دیا جس کے باعث میچ روکنا پڑ گیا۔

    تفصیلات کے مطابق جوہانسبرگ ٹیسٹ میں وکٹیں اڑنے کے بعد مکھیاں اڑنے لگیں، مکھیوں نے سب کو پریشان کر دیا، امپائرز کو مکھیوں کی مداخلت سے میچ کئی بار روکنا پڑا۔

    پاکستانی فاسٹ بولر حسن علی گیند کرتے کرتے بھنبناہٹ سے رک گئے، اور خود پر سے مکھیاں بھگانے لگے جس پر ہاشم آملہ ہنسنے لگے۔

    پاکستان کے کپتان سرفراز احمد بھی مکھیاں بھگاتے نظر آئے، یہ صورتِ حال دیکھ کر امپائرز کو کھیل روکنا پڑا، مکھیوں سے نجات کے لیے اسپرے بھی کرنا پڑا۔

    یہ بھی پڑھیں:  جوہانسبرگ ٹیسٹ : دوسرا روز، پاکستان185رنز پرڈھیر، جنوبی افریقہ کے 5 کھلاڑی آؤٹ

    خیال رہے کہ پاکستان اور جنوبی افریقہ کے درمیان تیسرے جوہانسبرگ ٹیسٹ میچ کے دوسرے روز پاکستان کی ٹیم 185 رنز پر ڈھیر ہوگئی، کھیل پاکستان کے ہاتھوں سے نکلنے لگا، جنوبی افریقہ کی بھی 5 وکٹیں گر گئیں۔

    جنوبی افریقی بولنگ لائن کے آگے پاکستانی کرکٹرز کی وکٹیں خزاں رسیدہ پتوں کی طرح گرتی چلی گئیں، آخری پانچ وکٹیں صرف 16 رنز پر گریں۔

  • ثنا میر کے لیے ایک اور اعزاز

    ثنا میر کے لیے ایک اور اعزاز

    کراچی: پاکستان ویمن ٹیم کی سابق کپتان ثنا میر نے ایک اور اعزاز حاصل کرلیا۔ ثنا میر انٹرنیشل کرکٹ کاؤنسل ویمن ون ڈے ٹیم آف دی ایئر کا حصہ بن گئیں۔

    تفصیلات کے مطابق انٹرنیشل کرکٹ کاؤنسل (آئی سی سی) نے سال کی بہترین ٹی 20 اور ون ڈے ٹیم کا اعلان کردیا۔

    ٹی 20 ٹیم میں کوئی پاکستانی کھلاڑی شامل نہیں البتہ ون ڈے ٹیم میں پاکستان کی سابق کپتان ثنا میر جگہ بنانے میں کامیاب ہوگئیں۔

    ثنا میر کو سال 2018 میں ورلڈ ٹی 20 کی بہترین گیند کروانے کا بھی اعزاز حاصل ہے۔

    گزشتہ برس انہیں آئی سی سی کی جانب سے جاری کردہ خواتین کی ون ڈے رینکنگ میں باؤلنگ میں صف اول پر رکھا گیا۔

    سنہ 2005 میں سری لنکا کے خلاف اپنے کرکٹ کیریئر کا آغاز کرنے والی ثنا اب تک 108 ون ڈے میچز کھیل چکی ہیں۔ 108 ون ڈے میچز میں ثنا 1 ہزار 4 سو 91 رنز بنا چکی ہیں جبکہ انہوں نے 127 وکٹیں حاصل کی ہیں۔

    ثنا میر ون ڈے میچز میں 100 وکٹیں حاصل کرنے والی پہلی پاکستانی خاتون کرکٹر بھی ہیں۔

  • میری نظر میں سرفراز احمد بہترین کپتانی کر رہے ہیں: وسیم اکرم

    میری نظر میں سرفراز احمد بہترین کپتانی کر رہے ہیں: وسیم اکرم

    لاہور: قومی کرکٹ ٹیم کے سابق کپتان وسیم اکرم نے موجودہ کپتان سرفراز احمد کی کپتانی سے متعلق منفی خبروں پر ردِ عمل ظاہر کرتے ہوئے انھیں بہترین کپتان قرار دے دیا۔

    تفصیلات کے مطابق لیجنڈ فاسٹ بولر وسیم اکرم نے میڈیا سے گفتگو کرتے ہوئے کہا کہ گزشتہ 2 ماہ سے سن رہا ہوں کہ نیا کپتان بنا دو، کپتان کے لیے کوئی اور موزوں ہے تو لوگ ہی نام بتا دیں۔

    [bs-quote quote=”جنوبی افریقا کا دورہ مشکل ہے، قومی ٹیم کے لیے یہ دورہ امتحان ثابت ہوگا۔” style=”style-7″ align=”left” color=”#dd3333″ author_name=”وسیم اکرم” author_job=”سابق فاسٹ بولر”][/bs-quote]

    سابق کرکٹر وسیم اکرم کا کہنا تھا کہ پیچھے کوئی عمران خان یا جاوید میاں داد بیٹھے ہیں تو ان کو کپتان بنا دیں، جب بھی کوئی اَپ سیٹ ہوتا ہے فوری کپتان کو ہٹانے کی باتیں ہونے لگتی ہیں۔

    سوئنگ کے سلطان نے کہا ’ٹیم کو اسپورٹس میں ہارنا بھی آنا چاہیے اور کم بیک بھی آنا چاہیے، میری نظر میں سرفراز احمد بہترین کپتانی کر رہے ہیں۔‘

    وسیم اکرم کا کہنا تھا کہ جنوبی افریقا کا دورہ مشکل ہے، قومی ٹیم کے لیے یہ دورہ امتحان ثابت ہوگا۔

    انھوں نے کہا ’نوجوانوں کو کرکٹ کی طرف لانے کے لیے ایونٹ شروع ہو رہا ہے، ایونٹ کا نام ٹالرنس رکھاگیا ہے، جس میں یونی ورسٹی اور مدرسے کے بچے کھیلیں گے، اس ایونٹ سے یہ سکھایا جائے گا کہ جیت ہار ہوتی ہے تو ہار کے بعد کیسے ٹالرنس کا مظاہرہ کرنا ہے۔‘

    یہ بھی پڑھیں:  سرفراز احمد کی قیادت میں قومی کرکٹ ٹیم دورہ جنوبی افریقہ کیلئے روانہ

    خیال رہے کہ قومی ٹیم کے چیف سلیکٹر انضمام الحق نے نیوزی لینڈ کے خلاف ہوم سیریز میں پاکستان ٹیم کی انتہائی ناقص کارکردگی پر برہمی کا اظہار کرتے ہوئے کہا تھا کہ کھلاڑیوں کو کارکردگی بہتر بنانی ہوگی، کوئی کپتان تا حیات نہیں ہوتا، جنوبی افریقا کی سیریز ہمیشہ سے سخت رہی ہے، ہمیں بہت محنت کرنا ہوگی۔

    یاد رہے کہ قومی کرکٹ ٹیم سرفراز احمد کی قیادت میں پانچ روز قبل جنوبی افریقا کے لیے جا چکی ہے، سیریز میں 3 ٹیسٹ، 5 ون ڈے اور 3 ٹی ٹوئنٹی شامل ہیں۔

  • پی ایس ایل 4 کا شیڈول جاری، کراچی کنگز پہلا میچ 17 فروری کو کھیلے گی

    پی ایس ایل 4 کا شیڈول جاری، کراچی کنگز پہلا میچ 17 فروری کو کھیلے گی

    لاہور: پاکستان کرکٹ بورڈ نے پاکستان سپر لیگ سیزن 4 کے شیڈول کا اعلان کردیا۔ فائنل میچ صوبہ سندھ کے دارالحکومت کراچی میں 17 مارچ کو ہوگا۔

    تفصیلات کے مطابق پاکستان سپر لیگ سیزن 4 کے میچز کے شیڈول کا اعلان کردیا گیا، پی ایس ایل کا چوتھا ایڈیشن 14 فروری سے 17 مارچ تک ہوگا۔

    پی ایس ایل فور کے 4 میچز پہلی مرتبہ ابو ظہبی میں ہوں گے جبکہ شارجہ اور دبئی میں بھی میچز ہوں گے۔ آخری 8 میچز پاکستان میں ہوں گے جن میں 3 میچ لاہور اور 5 میچ کراچی میں ہوں گے۔

    لاہور میں ہونے والے میچز 9، 10 اور 12 مارچ کو ہوں گے جبکہ 7، 10، 13 اور 15مارچ کو میچز کراچی میں ہوں گے۔ پی ایس ایل فور کا فائنل 17 مارچ کو کراچی کے نیشنل اسٹیڈیم میں کھیلا جائے گا۔

    شیڈول کے مطابق پی ایس ایل 4 کا افتتاحی میچ اسلام آباد اور لاہور قلندرز کے درمیان ہوگا۔

    کراچی کنگز اپنا پہلا میچ 15فروری کو چھٹی ٹیم سےکھیلے گی، دوسرا میچ 16 فروری کو لاہور قلندرز، تیسرا 21 فروری کو پشاور زلمی، چوتھا 23 فروری کو اسلام آباد یونائیٹڈ، پانچواں 24 فروری کو کوئٹہ گلیڈی ایٹرزسے ہوگا۔

    کراچی کنگز کا اگلا مقابلہ 27 فروری کو اسلام آباد یونائیٹڈ، 28 فروری کو لاہور قلندرز، 4 مارچ کو چھٹی ٹیم، 7 مارچ کو پشاور زلمی اور 10 مارچ کو کوئٹہ گلیڈی ایٹرز سے ہوگا۔

    پاکستان سپرلیگ 4 کا ایلی منیٹر ون 12 مارچ کو لاہور میں کھیلا جائے گا۔ اس کے اگلے روز یعنی 13 مارچ کو کوالیفائرز میچ کراچی میں کھیلا جائے گا۔ لیگ کا ایلی منیٹر ٹو 15 مارچ کو کراچی میں ہوگا۔

    پی ایس ایل 4 کا فائنل 17 مارچ کو نیشنل اسٹیڈیم کراچی میں ہوگا۔خیال رہے کہ پاکستان سپر لیگ کا آغاز سنہ 2016 میں کیا گیا تھا۔ لیگ کی پہلی ٹرافی اسلام آباد یونائیٹڈ نے اپنے نام کی تھی۔

    سنہ 2017 میں پشاور زلمی لیگ کی فاتح رہی جبکہ رواں برس 2018 میں اسلام آباد یونائیٹڈ ایک بار پھر فاتح ٹھہری۔

  • ابو ظہبی ٹیسٹ: نیوزی لینڈ نے پاکستان کو 4 رنز سے شکست دے دی

    ابو ظہبی ٹیسٹ: نیوزی لینڈ نے پاکستان کو 4 رنز سے شکست دے دی

    ابو ظہبی: پاکستان اور نیوزی لینڈ کے درمیان جاری پہلے ٹیسٹ میچ میں پاکستان کو 4 رنز سے شکست ہوگئی۔ قومی ٹیم آسان ہدف کے تعاقب میں 171 رنز پر آؤٹ ہوگئی۔

    تفصیلات کے مطابق ابو ظہبی ٹیسٹ میچ کے چوتھے روز پاکستانی بولرز نے آسان ہدف کو مشکل ترین بنا لیا۔ چوتھے روز پاکستان کی ایک کے بعد ایک وکٹ تیزی سے گرتی چلی گئی۔ پہلی وکٹ 40، دوسری 44، تیسری 48 اور چوتھی وکٹ 130 رنز پر گری۔

    پانچویں وکٹ 147 پر گری، بابر اعظم 13 رنز بنا کر رن آٹ ہوئے، چھٹی اور ساتویں وکٹ 154رنز پر گری، سرفراز احمد نے 3 رنز بنائے جبکہ بلال آصف صفر پر آؤٹ ہوئے۔

    اگلی وکٹ بھی 155 رنز پر گری، یاسر شاہ بھی صفر پر پویلین لوٹ گئے۔ نویں وکٹ 164 رنز پر حسن علی کی گری۔

    گزشتہ روز تیسرے روز کے اختتام تک پاکستان نے بغیر کسی نقصان کے 37 رنز بنائے تھے۔

    نیوزی لینڈ کی ٹیم اپنی دوسری اننگز میں 249 رنز پر آؤٹ ہوگئی تھی اور سرفراز الیون کو جیت کے لیے 176 رنز کا ہدف دیا تھا۔ بی جے واٹلنگ 59 اور ہنری نکولز نے 55 رنز کی اننگز کھیلی۔

    دوسری اننگز میں قومی بولرز نے شاندار بولنگ کی تھی اور نیوزی لینڈ کی 6 وکٹیں حاصل کیں۔ گرینڈ ہوم 3 رنز بنا کر پویلین روانہ ہوئے، سودھی 18 رنز بنا کر آؤٹ ہوئے، ویگنر اور ٹرینٹ بولٹ بغیر کوئی رن بنائے پویلین لوٹ گئے۔

    پاکستان کی جانب سے حسن علی اور یاسر شاہ نے شاندار بولنگ کرتے ہوئے 5، 5 وکٹیں حاصل کیں۔

    نیوزی لینڈ نے پاکستان کے خلاف اپنی دوسری اننگز کا آغاز 56 رنز پر ایک کھلاڑی آؤٹ سے کیا تھا۔

    کپتان کین ولیمسن اور جیت راول نے ٹیم کے اسکور میں اضافہ کیا تاہم 86 رنز کے مجموعی اسکور پر کین ولیمسن 37 رنز بنا کر یاسر شاہ کا شکار بنے۔

    اس سے قبل نیوزی لینڈ کی ٹیم پہلی اننگز میں 153 رنز پر ڈھیر ہوگئی تھی، پہلی اننگز میں قومی ٹیم نے نیوزی لینڈ کو 153 رنز پر آؤٹ کرکے نیا ریکارڈ قائم کیا تھا۔

    پاکستانی ٹیم اپنی پہلی اننگز میں 227 رنز ہی بنا سکی تھی۔

    خیال رہے کہ نیوزی لینڈ کا 153 رنز کا اسکور ابو ظہبی میں اب تک کھیلے گئے ٹیسٹ میچ میں کسی بھی ٹیم کا پہلی اننگز میں سب سے کم اسکور تھا، اس سے قبل یہ ریکارڈ سری لنکا کے پاس تھا جو پاکستان ہی کے خلاف 197 رنز پر آؤٹ ہوگئی تھی۔