ARYNews.tv | Urdu – Har Lamha Bakhabar

Tag: کرکٹ کی خبریں

  • سہ ملکی ٹی ٹوینٹی سیریز جیتنے پر سیاست دانوں کی مبارک بادیں اور ٹویٹس

    سہ ملکی ٹی ٹوینٹی سیریز جیتنے پر سیاست دانوں کی مبارک بادیں اور ٹویٹس

    کراچی: پاکستان ٹیم نے آسٹریلیا کو چھ وکٹوں سے شکست دے کر سہ ملکی ٹی 20 سیریز جیت لی، سیاست دانوں نے ٹیم کو مبارک بادیں دیں۔

    تفصیلات کے مطابق چیئرمین پی ٹی آئی عمران خان نے قومی ٹیم کوجیت پر مبارک باد دیتے ہوئے کہا کہ قومی ٹیم نے عمدہ کھیل کا مظاہرہ کیا۔

    عمران خان نے کہا ’میری دعائیں اور نیک تمنائیں قومی ٹیم کے ساتھ ہیں، جیت پر کپتان سرفراز کو خصوصی مبارک باد دیتا ہوں، سرفراز احمد نے ٹیم کی بہترین انداز میں قیادت کی۔‘

    چیئرمین پی پی بلاول بھٹو زرداری کی جانب سے بھی قومی کرکٹ ٹیم کو مبارک باد دی گئی، انھوں نے بیان جاری کرتے ہوئے کہا ’قومی ٹیم نے سہ فریقی سیریز جیت کر عوام کو خوش کر دیا ہے۔‘

    عوامی مسلم لیگ کے صدر شیخ رشید نے ٹویٹ کرتے ہوئے پاکستان زندہ باد کا نعرہ لگایا اور کہا ”لڑکے اچھا کھیلے.“ انھوں نے گراؤنڈ ریالٹی نامی یوزر کی ٹویٹ کو بھی ری ٹویٹ کیا جس میں لکھا تھا کہ ”فخر آسٹریلیا کے خلاف اس طرح کھیلا جس طرح خلائی مخلوق مسلم لیگ ن کے خلاف کھیلی۔“

    پاکستان نے سہ ملکی ٹی ٹوینٹی سیریز جیت لی،آرمی چیف کی مبارکباد

    تحریک انصاف کی خاتون رہنما شیریں مزاری نے ٹویٹ کرتے ہوئے کہا کہ پاکستان ٹیم نے زبردست کارکردگی سے سہ ملکی سیریز میں فتح حاصل کی، بالخصوص آسٹریلیا کے خلاف شان دار جیت دیکھ کر بہت خوشی ہوئی۔

    واضح رہے کہ آج ہرارے میں کھیلے جانے والی سہ ملکی ٹی ٹوینٹی سیریز میں آسٹریلیا کو ہرا کر ٹرافی اپنے نام کرلی، آسٹریلیا نے پاکستان کو جیت کے لیے 184 رنز کا ہدف دیا تھا، جواب میں پاکستان کا آغاز مایوس کن رہا تاہم فخر زمان کی شان دار 91 رنز کی بلے بازی کی مدد سے پاکستان نے آسٹریلیا کو چھ وکٹوں سے شکست دے دی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • نجی بینک کی ٹیم بچانے کے لیے یونس خان کی گورنر سندھ سے اپیل

    نجی بینک کی ٹیم بچانے کے لیے یونس خان کی گورنر سندھ سے اپیل

    کراچی: قومی کرکٹ ٹیم کے سابق کپتان یونس خان نے نجی بینک کی ٹیم کو بچانے کے لیے گورنر سندھ محمد زبیر سے مدد کی اپیل کردی ہے۔

    تفصیلات کے مطابق قومی ٹیم کو اسٹارز کھلاڑی دینے والی نجی بینک کی ٹیم کو ختم کرنے کا فیصلہ گیا ہے، یہ اس سلسلے کی دوسری بری خبر ہے جب ایک اور نجی بینک اپنی کرکٹ ٹیم کو ختم کرنے جا رہا ہے۔

    پاکستانی تاریخ کے کامیاب ترین بلے باز یونس خان نے گورنر سندھ سے مداخلت کی درخواست کرتے ہوئے کہا ہے کہ اس ٹیم کو ختم نہیں ہونا چاہیے۔

    اسٹائلش بلے باز کا کہنا تھا کہ نجی بینک کی ٹیم ختم ہونے سے ڈومیسٹک کرکٹ کو نقصان پہنچے گا جب کہ ٹیم ختم ہونے سے کرکٹرز بھی بے روزگار ہوجائیں گے۔

    یونس خان نے ٹیم کو بچانے کی جدوجہد شروع کردی ہے، انھوں نے کہا کہ گزشتہ سیزن کی فاتح ٹیم کو ختم کرنا سمجھ سے باہر ہے، ایسی ٹیم کو ختم نہیں ہونا چاہیے۔

    خیال رہے کہ مذکورہ ٹیم کے ختم ہونے کے بعد یونس خان بے روزگار ہوجائیں گے، ان کے علاوہ عمر اکمل، سہیل خان اور صہیب مقصود کی نوکری بھی چلی جائے گی۔

    نجی بینک کی کرکٹ ٹیم کے دیگر کھلاڑیوں میں حماد اعظم، شان مسعود، محمد نواز، رومان رئیس، محمد اصغر اور احسان عادل شامل ہیں، یونس خان کا کہنا تھا کہ اس ٹیم نے پاکستان کو اسٹار کھلاڑی دیے ہیں۔

    یونس خان نے اپنے بارہ سالہ غیر ملکی مداح کا دل جیت لیا

    یونس خان نے کہا کہ ملک میں ہاکی اور فٹ بال تو ہے نہیں، پاکستان کے پاس تو کرکٹ ہی ہے، نجی بینک کی ٹیم ختم ہونے سے کھلاڑیوں پر منفی اثر پڑے گا۔

    خیال رہے کہ ان تمام کھلاڑیوں کے معاہدے آئندہ ماہ ختم ہو رہے ہیں، عید سے قبل نوکری ختم ہونے کے ممکنہ فیصلے سے کھلاڑی پریشان ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • لارڈ ٹیسٹ : پاکستان کی نو وکٹوں سے شاندار فتح، انگلینڈ کو شرمناک شکست

    لارڈ ٹیسٹ : پاکستان کی نو وکٹوں سے شاندار فتح، انگلینڈ کو شرمناک شکست

    لندن : قومی کرکٹ ٹیم نے لارڈز ٹیسٹ میں انگلینڈ کو نو وکٹوں سے شکست دے کر شاندار فتح اپنے نام کرلی،   پاکستان نے64 رنز کا ہدف ایک وکٹ پرپورا کیا ، پاکستان کی یہ مسلسل دوسری فتح ہے۔

    تفصیلات کے مطابق پاکستان اور انگلینڈ کی ٹیموں کے درمیان کھیلے جارہے پہلے ٹیسٹ میچ میں لارڈز کا میدان پاکستان کے نام رہا، انگلینڈ کی ٹیم کو ہوم گراؤنڈ پر بدترین شکست کا سامنا کرنا پڑا۔

    چوتھے روز جب کھیل کا آغاز ہوا تو انگلش بلے باز چند منٹ کے مہمان ثابت ہوئے، دوسرے ہی اوور میں محمد عباس نے بٹلر کو ٹھکانے لگادیا، نئی گیند ملتے ہی محمد عامر کی سوئنگ بھی واپس آگئی جس کے بعد اسٹورٹ براڈ اور ڈومینک بیس بھی جلد رخصت ہوگئے۔

    اس طرح انگلینڈ کی پوری ٹیم 242 رنز آؤٹ ہوگئی، چوتھے روز صرف7 رنز کے اضافے سے انگلینڈ کے چار کھلاڑی پویلین واپس لوٹے۔ پاکستان کو جیت کیلئے معمولی 64 رنز کا ہدف ملا تو اظہرعلی چار رنز پر بولڈ ہوگئے، اس کے بعد حارث سہیل اور امام الحق نے اور کسی اور کھلاڑی کو وکٹ پر آنے کی زحمت نہ دی۔

    حارث سہیل نے وننگ شاٹ لگا کر کرکٹ کے گھر لارڈز میں پاکستان کو پانچویں فتح دلوائی، محمد عباس نے میچ میں آٹھ وکٹیں حاصل کیںاور مین آف دی میچ قرار پائے۔ محمد عامرنے 5 وکٹیں جبکہ حسن علی نے کل 4 اور شاداب خان دو وکٹیں حاصل کرنے میں کامیاب ہوئے۔

    یاد رہے کہ قومی کرکٹ ٹیم کی لارڈز میں یہ مجموعی طور پر پانچویں جبکہ مسلسل دوسری فتح ہے، اس سے قبل مصباح الحق کی قیادت میں پاکستان نے لارڈز کے میدان میں ٹیسٹ میچ جیتا تھا اور یادگار پش اپس بھی لگائے تھے۔

    انگلش ٹیم بیٹنگ بالنگ اور فیلڈنگ تینوں شعبوں میں آؤٹ کلاس ہوگئی، میچ میں پاکستان کے بالرز اور بلے باز چھائے رہے۔ پاکستان کی جانب سے پہلی اننگز میں ہی چار ففٹیز بنائی گئیں، اظہر علی، بابر اعظم، اسد شفیق اور شاداب خان نے انگلینڈ کو بیک فٹ پر دھکیل دیا۔

    مزید پڑھیں: لارڈز ٹیسٹ، تیسرا روز، انگلینڈ کے6وکٹوں کے نقصان پر235رنز

    ایک موقع پر انگلینڈ اننگز کی شکست سے بال بال بچا، میچ میں پاکستانی کھلاڑیوں کی فیلڈنگ بھی بہت بہترین رہی، عمدہ کیچز پکڑ کر میچ کو اپنی گرفت میں کیے رکھا۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔