Tag: کرکٹ

کراچی: قومی کرکٹ ٹیم راولپنڈی سے کراچی پہنچ گئی ہے، ٹیم کو سخت حفاظت میں ایئر پورٹ سے ہوٹل پہنچا دیا گیا۔

تفصیلات کے مطابق قومی کرکٹ ٹیم اور سری لنکا کے درمیان 2 ٹیسٹ میچز کی سیریز کا دوسرا میچ 19 تاریخ سے کراچی کے نیشنل اسٹیڈیم میں کھیلا جائے گا، قومی ٹیم کو کراچی کے جناح انٹرنیشنل ایئر پورٹ سے سخت سیکورٹی حصار میں ہوٹل پہنچایا گیا۔

سری لنکا کی مہمان ٹیم کل دوپہر کو کراچی پہنچے گی، دونوں ٹیمیں 17 اور 18 دسمبر کو نیشنل اسٹیڈیم میں ٹریننگ سیشنز میں حصہ لیں گی۔

یہ بھی پڑھیں:  پاک سری لنکا ٹیسٹ ڈرا، عابد علی اور بابر اعظم کی سنچریاں

خیال رہے کہ راولپنڈی اسٹیڈیم میں پاکستان اور سری لنکا کے مابین کھیلا جانا والا پہلا ٹیسٹ میچ ڈرا ہوا، پہلے ٹیسٹ میچ کے پانچویں روز مہمان ٹیم نے 6 وکٹوں پر 308 رنز بنا کر اپنی پہلی اننگز ڈیکلئر کر دی تھی جب کہ پاکستان نے پہلی اننگز میں 2 وکٹوں‌ کے نقصان پر 252 رنز بنائے اور میچ ڈرا ہوگیا۔

یادگار پنڈی ٹیسٹ بارش کی نذر ہو کر ڈرا ہوا، پاکستانی اوپنر عابد علی نے منفرد عالمی ریکارڈ بنایا، ٹیسٹ اور ون ڈے میں ڈیبیو پر سنچری کرنے والے وہ دنیا کے پہلے کرکٹر بن گئے، عابد علی کو مین آف دی میچ بھی قرار دیا گیا۔ بابر اعظم نے بھی ٹیسٹ کیریئر کی تیسری سنچری بنائی، دونوں ٹیموں کو ٹیسٹ چیمپئن شپ کے لیے بیس بیس پوائنٹس مل گئے ہیں۔

میرٹھ: گزشتہ سال انٹرنیشنل کرکٹ کو خیرباد کہنے والے بھارتی کرکٹر پروین کمار مشکل میں پڑ گئے، شہری نے ان کے خلاف پولیس کو درخواست دے دی۔

بھارتی میڈیا رپورٹس کے مطابق دیپک شرما نامی شخص نے پولیس کو پروین کمار کے خلاف شکایت درج کراتے ہوئے کہا ہے کہ وہ اپنے بیٹے کے ہمراہ جارہے تھے کہ اس دوران نشے میں دھت پروین کمار گاڑی سے باہر نکلے اور انہیں تشدد کا نشانہ بنانا شروع کردیا۔

دیپک شرما نے کہا کہ پروین کمار کے تشدد سے اس کا بازو ٹوٹ گیا جب کہ بیٹا بھی زخمی ہوا اور سابق کرکٹر تضحیک آمیز سلوک کرنے کے ساتھ ساتھ انہیں دھمکیاں بھی دیتا رہا۔

شہری نے بتایا کہ پولیس کو تحریری شکایت درج کرائی مگر مقدمہ درج نہیں کیا گیا، پولیس ہائی پروفائل کرکٹر کے خلاف ایف آئی آر درج کرنے سے انکار کررہی ہے۔

دوسری جانب متعلقہ ایس پی کا کہنا ہے کہ وہ واقعے کی تفتیش کررہے ہیں ، دونوں پڑوسی ہیں اور ان کی جانب سے ایک دوسرے کے خلاف شکایات آئی ہیں، ان کے موقف کی روشنی میں تفتیش آگے بڑھ رہی ہے اور معاملے کو سنجیدگی سے لیا جارہا ہے۔

احمد آباد: بھارتی ریاست گجرات کے سب سے بڑے شہر احمد آباد میں دنیا کا سب سے بڑا کرکٹ اسٹیڈیم زیر تعمیر ہے اور اس میں افتتاحی میچ ایشیا الیون اور ورلڈ الیون کے مابین آئندہ سال مارچ میں متوقع ہے۔

ایک سو ملین ڈالرز کی لاگت سے تعمیر ہونے والے اس میگا گراؤنڈ میں 1 لاکھ سے زائد شائقین کے بیٹھنے کی گنجائش ہے اس اعتبار سے یہ اسٹیڈیم آسٹریلیا کے میلبرن سے بھی بڑا ہے جہاں بیک وقت ایک لاکھ کے لگ بھگ شائقین بیٹھ کر میچ سے لطف اندوز ہوتے ہیں۔

اسٹیڈیم کا تعمیراتی کام آخری مراحل میں ہے اور امکان یہی ہے کہ مارچ 2020 میں اسے مکمل کرلیا جائے گا، یہاں افتتاحی میچ ایشیا الیون اور ورلڈ الیون کے مابین ہوگا جسے دیکھنے کے لیے شائقین بے تاب ہیں۔

اس وقت کولکتہ کا ایڈن گارڈن کا میدان بھارت کا سب سے بڑا اسٹیڈیم ہے جہاں مجموعی طور پر 66 ہزار افراد کے بیٹھنے کی گنجائش ہے۔

احمد آباد کے میگا اسٹیڈیم کو جدت اور فن تعمیر کا شاہکار قرار دیا جارہا ہے، جدید سہولیات سے آراستہ اس میدان کو خوب پذیرائی حاصل ہورہی ہے۔

راولپنڈی: پاکستان میں 10 سال بعد انٹرنیشنل ٹیسٹ کرکٹ کی رونقیں بحال ہو گئی ہیں، سری لنکن ٹیم پریکٹس سیشن کے لیے راولپنڈی کرکٹ اسٹیڈیم میں موجود ہے، تاہم گراؤنڈ پر اس وقت گہرے بادلوں کے ڈیرے ہیں، اور بارش کا امکان ہے۔

دوسری طرف پاکستان کرکٹ بورڈ کے چیئرمین احسانی مانی نے بنگلا دیشی ٹیم کے پاکستان کے دورے کے لیے امید کا بھرپور اظہار کرتے ہوئے کہا ہے کہ اعلیٰ سطح رابطوں کے بعد بنگلا دیشی ٹیم پاکستان ضرور آئے گی۔

اس وقت کرکٹ اسٹیڈیم راولپنڈی میں سری لنکن ٹیسٹ ٹیم پریکٹس کے لیے موجود ہے، آئی سی سی میچ آفیشلز بھی اسٹیڈیم میں موجود ہیں، پاکستان، سری لنکن ٹیمیں کل پہلا ٹیسٹ اسی اسٹیڈیم میں کھیلیں گی، قبل ازیں پی سی بی کے چیف ایگزیکٹیو وسیم خان نے اسٹیڈیم میں پچ کا معائنہ کیا، ہیڈ کوچ مصباح الحق اور سری لنکن ٹیم ہیڈ کوچ مکی آرتھر بھی معائنے کے وقت ان کے ہم راہ تھے۔

دریں اثنا، چیئرمین پی سی بی احسان مانی نے کہا ہے کہ بنگلا دیش کے دورے سے متعلق مثبت جواب کا امکان ہے، وزیر اعظم عمران خان نے بنگلا دیشی وزیر اعظم کو فون کیا تھا، وزیر خارجہ شاہ محمود قریشی بھی بنگلا دیشی وزیر خارجہ سے مل چکے ہیں، بنگلا دیش نے دورے سے منع کیا تو وجہ بتانا ہوگی، بنگلا دیشی سیکورٹی وفد کی رپورٹ بھی مثبت ہے۔

احسان مانی کا کہنا تھا کہ وہ پُر امید ہیں کہ بنگلا دیش کی ٹیم ضرور پاکستان آئے گی، 2021 میں انگلینڈ، 2022 میں آسٹریلیا کے دورۂ پاکستان کے لیے بھی پُر امید ہوں، پاکستان آئی سی سی کے اضافی ٹورنامنٹس کے حق میں ہے، بھارت، آسٹریلیا اور انگلینڈ نے آئی سی سی کے 2 ٹورنامنٹس کی مخالفت کی، تاہم آئی سی سی کے اضافی ٹورنامنٹس سے ممبر ممالک کو 700 ملین ڈالرز کا فائدہ ہو سکتا ہے۔