Tag: کرکٹ

لاہور: قائداعظم ٹرافی میں خیبر پختونخوا کرکٹ ٹیم کے فاسٹ باؤلر جنید خان پر جرمانہ عائد کردیا گیا، میچ کے دوران نامناسب زبان کا استعمال کرنے پر جنید خان پر میچ فیس کا 40 فیصد جرمانہ عائد کیا گیا۔

تفصیلات کے مطابق جنید خان کو پی سی بی ضابطہ اخلاق کے لیول 1 جرم کا مرتکب پایا گیا جس پر آن فیلڈ امپائرز شمیم انصاری اور غفار کاظمی نے جنید خان کو آرٹیکل 2.6 کی خلاف ورزی کرنے پر چارج کیا۔

جنید خان کی جانب سے اعتراف جرم کرنے پر میچ ریفری محمد اسلم نے جرمانے کی سزا سنائی، خیبر پختونخوا اور بلوچستان کے درمیان میچ بگٹی اسٹیڈیم کوئٹہ میں کھیلا گیا تھا۔

یہ بھی پڑھیں:‌ احمد شہزاد پر بال ٹیمپرنگ کرنے پر جرمانہ عائد کردیا گیا

دوسری جانب سلو اوور ریٹ کے باعث سنٹرل پنجاب کرکٹ ٹیم پر جرمانہ عائد کردیا گیا۔

قوانین کے مطابق سنٹرل پنجاب کرکٹ ٹیم پر 40 ہزار روپے جرمانہ عائد کیا گیا، سنٹرل پنجاب کرکٹ ٹیم نے قائداعظم ٹرافی کے پانچویں راؤنڈ میں سندھ کے خلاف میچ میں مقررہ وقت سے 4 اوورز کم کیے تھے۔

میچ ریفری ندیم ارشد نے سنٹرل پنجاب کرکٹ ٹیم پر جرمانہ عائد کیا۔

سڈنی: قومی کرکٹ ٹیم کے جارح مزاج بیٹسمین فخر زمان نے آسٹریلیا کے خلاف سیریز جیتنے کے عزم کا اظہار کرتے ہوئے کہا ہے کہ آسٹریلیا سےاچھے مقابلے ہوں گےاورسیریزجیتیں گے۔

تفصیلات کے مطابق سڈنی میں آسٹریلیا الیون کے خلاف وارم اپ میچ میں فتح کے بعد میڈیا سے بات کرتے ہوئے فخر زمان نے ٹیم کی کارکردگی کو متاثر کُن قرار دیا۔

فخر زمان نے کہا کہ پاکستانی بولرزنےشروع سے ہی اچھی بولنگ کی جب کہ کپتان بابر اعظم نے بھی اچھا پرفارم کیا۔

ہدف کے تعاقب میں اوپننگ اسٹینڈ کا ذکر کرتے ہوئے فخر زمان کا کہنا تھا کہ ٹارگٹ زیادہ نہ ہونےکےباعث کریز پر زیادہ ٹائم گزارنا چاہتے تھے۔

یہ بھی پڑھیں: پاکستان نے آسٹریلیا الیون کو شکست دے کر خطرے کی گھنٹی بجادی

فخرزمان نے کہا کہ آسٹریلیاسے سیریز کی تیاری بہت اچھی ہے تاہم آسٹریلیا کی وکٹوں پرایڈ جسٹ ہونےمیں وقت لگتاہے لیکن امید ہے جو ٹریننگ کی وہ ضرور کام آئے گی۔

واضح رہے کہ قومی کرکٹ ٹیم نے ٹی ٹوئنٹی وارم اپ میچ میں آسٹریلیا الیون کو با آسانی شکست دے کر دورے کا پرُاعتماد آغاز کیا ہے۔

ہدف کے تعاقب میں اوپنرز فخرزمان اور بابر اعظم نے شاندار بیٹنگ کا مظاہرہ کیا اور ٹیم کی جیت کو آسان بنا دیا، پاکستان نے مقررہ ہدف 18 ویں اوور میں حاصل کرلیا۔

سڈنی: قومی کرکٹ ٹیم نے ٹی ٹوئنٹی وارم اپ میچ میں آسٹریلیا الیون کو با آسانی شکست دے کر دورے کا پرُاعتماد آغاز کیا ہے۔ پاکستان اور آسٹریلیا کے درمیان پہلا ٹی ٹوئنٹی 3 نومبر کو کھیلا جائے گا۔

تفصیلات کے مطابق سڈنی کے بینکس ٹاؤن کے میدان پر کھیلے گئے پریکٹس میچ میں شاہینوں نے کینگروز کو دبوچ لیا، قومی کھلاڑیوں نے عمدہ پرفارمنس کی بدولت نہ صرف حریف کھلاڑیوں پر اپنی دھاک بٹھا دی بلکہ آسٹریلیا کے لیے خطرے کی گھنٹی بھی بجا دی۔

میزبان ٹیم کے کپتان نے ٹاس جیت کر پہلے بیٹنگ کا فیصلہ کیا تو گرین شرٹس کے بولرز نے ابتدا سے ہی بلے بازوں کو دباؤ میں رکھا جس کی وجہ سے انہیں کھل کر اسٹروکس کھیلنے کا موقع نہ مل سکا۔

قومی بولرز کی نپی تلی بولنگ کی بدولت میزبان ٹیم مقررہ اوورز میں 6 وکٹوں پر 135 رنز ہی بنا سکی، لیگ اسپنر شاداب خان نے 3، محمد عرفان، عماد وسیم اور وہاب ریاض نے ایک ایک وکٹ حاصل کی۔

ہدف کے تعاقب میں اوپنرز فخرزمان اور بابر اعظم نے شاندار بیٹنگ کا مظاہرہ کیا اور ٹیم کی جیت کو آسان بنا دیا، پاکستان نے مقررہ ہدف 18 ویں اوور میں حاصل کرلیا۔

فخر زمان 43 رنز بنا کر ٹاپ اسکورر رہےجب کہ بابر اعظم نے 34 اور مڈل آرڈر بیٹسمین حارث سہیل نے 32 رنز بنائے۔

پاکستان اور آسٹریلیا کے درمیان پہلا ٹی ٹوئنٹی 3 نومبر کو کھیلا جائے گا جبکہ دوسرا 5 نومبرکو کنبیرا اور تیسرا 8 نومبر کو پرتھ میں کھیلا جائے گا۔

قومی کرکٹ ٹیم ٹی ٹوئنٹی سیریز کے بعد 2 میچز پر مشتمل ٹیسٹ سیریز بھی کھیلی گی جس کی قیادت اظہر علی کریں گے۔

سیالکوٹ: قائد اعظم ٹرافی راؤنڈ فائیو فرسٹ کلاس میچ کے دوران کے سدرن پنجاب کے کپتان شان مسعود کو امپائر کے فیصلے پر اعتراض کرنا مہنگا پڑگیا۔

تفصیلات کے مطابق امپائر کے فیصلے پر اعتراض کرنے پر سدرن پنجاب کے کپتان شان مسعود پر جرمانہ عائد کردیا گیا، شان مسعود پر میچ فیس کا 25 فیصد جرمانہ عائد کیا گیا ہے۔

کپتان سدرن پنجاب کو لیول 1 جرم کا مرتکب پایا گیا۔

امپائرز عبدالمقیت اور فاروق علی خان نے شان مسعود کو پی سی بی کوڈ آف کنڈکٹ کے آرٹیکل 2.8 کی خلاف ورزی کرنے پر چارج کیا۔

شان مسعود کی جانب سے اعتراف جرم نہ کرنے پر میچ ریفری نے بدھ کو فیصلے پر سماعت کی اور بعدازاں میچ ریفری کامران چوہدری نے شان مسعود کے خلاف فیصلے کو برقرار رکھتے ہوئے جرمانہ عائد کردیا۔

سدرن پنجاب اور ناردرن کے درمیان قائد اعظم ٹرافی فرسٹ الیون ٹورنامنٹ کے پانچویں راؤنڈ کا میچ جناح اسٹیڈیم سیالکوٹ میں جاری ہے۔

لاہور: ون ڈے انٹرنیشنل کے بعد پاکستان میں ٹیسٹ کرکٹ کی بحالی کے امکانات روشن ہوگئے۔ پاکستان کرکٹ بورڈ نے سری لنکا کو ٹیسٹ میچوں کے لیے مجوزہ شیڈول بھجوا دیا۔

تفصیلات کے مطابق پی سی بی نے دسمبر میں شیڈول آئی سی سی ٹیسٹ چیمپئن شپ کے سلسلے میں سری لنکن بورڈ کو مجوزہ پروگرام بھجوادیا ہے۔

پی سی بی نے سری لنکن بورڈ کو 9 اور 10 دسمبر کی تاریخ دی ہے جب کہ کراچی اور راولپنڈی کے وینیو بتائے ہیں۔ مجوزہ شیڈول کا جائزہ لینے کے بعد سری لنکن بورڈ میچ کی تاریخ اور مقام کو فائنل کرے گا۔

یہ بھی پڑھیں: ٹیسٹ سیریز: سری لنکن کرکٹ بورڈ کا وفد کراچی پہنچ گیا

پاکستان کرکٹ بورڈ کی جانب سے سری لنکن بورڈ کو میچز کے لیے سیکورٹی پلان اور تمام ترانتظامات کی تفصیل سے بھی آگاہ کیا گیا ہے۔ مجوزہ پروگرام سے اتفاق کے بعد تمام معاملات کو حتمی شکل دی جائے گی۔

پی سی بی کو یقین ہے کہ ٹی ٹوئنٹی اور ون ڈے سیریز کے کامیاب انعقاد کے بعد سری لنکن بورڈ اپنی ٹیسٹ ٹیم بھی پاکستان بھیجنے پر رضامند ہوجائے گا۔

پاکستان اور سری لنکا کے درمیان دو ٹیسٹ میچز آئی سی سی ورلڈ ٹیسٹ چیمپئن شپ کے درمیان ہوں‌ گے، ورلڈ ٹیسٹ چیمپئن شپ میں 9 ممالک کی ٹیمیں مد مقابل ہوں گی، حکام کی کوشش ہے کہ سری لنکا کے بعد بنگلا دیش بھی پاکستان کا دورے کرے۔