ARYNews.tv | Urdu – Har Lamha Bakhabar

Tag: کرکٹ

  • بہت زیادہ غلطیاں کیں جس کی وجہ سے میچ ہارے: سرفراز احمد کا اعتراف

    بہت زیادہ غلطیاں کیں جس کی وجہ سے میچ ہارے: سرفراز احمد کا اعتراف

    ٹاؤنٹن: ورلڈ کپ 2019 کے 17 ویں میچ میں آسٹریلیا کے ہاتھوں پاکستان کو 41 رنز سے شکست کے بعد کپتان سرفراز نے اعتراف کیا کہ پاکستان ٹیم نے میچ بہت زیادہ غلطیوں کی وجہ سے ہارا۔

    تفصیلات کے مطابق آسٹریلیا سے میچ ہارنے کے بعد میڈیا سے گفتگو کرتے ہوئے کپتان سرفراز احمد نے کہا کہ بہت زیادہ غلطیاں کیں جس کی وجہ سے میچ ہارے، تاہم پارٹنر شپ طویل ہو جاتی تو میچ کی صورت حال مختلف ہوتی۔

    سرفراز احمد کا کہنا تھا کہ شروع اور درمیان کے اوورز میں ہم نے بولنگ اچھی نہیں کی، آخری 20 اوورز بہت اچھے تھے، جن میں ہم نے کم بیک کیا۔

    کپتان نے کہا کہ ہم اچھا کھیل رہے ہیں، بس تھوڑی غلطیاں ہیں جن پہ قابو پانا ہے، تاہم شاداب خان کو ڈراپ کرنے کا افسوس نہیں ہے۔

    یہ بھی پڑھیں:  ورلڈ کپ2019: آسٹریلیا کے ہاتھوں پاکستان کو 41 رنز سے شکست

    سرفراز کا یہ بھی کہنا تھا کہ شعیب ملک اچھا کھیل سکتے ہیں، مجھے اُمید ہے کہ شعیب ملک وننگ اننگز کھیلنے کی صلاحیت رکھتے ہیں۔

    دریں اثنا، کپتان قومی کرکٹ ٹیم سرفراز احمد نے عزم کا اظہار کیا کہ روایتی حریف بھارت سے میچ جیتنے کے لیے اچھا کھیلیں گے۔

    واضح رہے کہ پاکستانی ٹیم کو میگا ایونٹ میں دوسری بار شکست کا سامنا کرنا پڑا ہے، ٹاؤنٹن کے میدان میں آج پاکستانی ٹیم 308 رنز کے ہدف کے تعاقب میں 266 رنز پر آؤٹ ہو گئی، فاسٹ بولر محمد عامر کی پانچ وکٹیں بھی ضایع گئیں۔

  • ورلڈ کپ2019: آسٹریلیا کے ہاتھوں پاکستان کو 41 رنز سے شکست

    ورلڈ کپ2019: آسٹریلیا کے ہاتھوں پاکستان کو 41 رنز سے شکست

    ٹاؤنٹن: ورلڈ کپ2019 کے اہم میچ میں آسٹریلیا کے ہاتھوں پاکستان کو  41 رنز سے شکست کا سامنا کرنا پڑا۔

    تفصیلات کے مطابق  308 رنز کا تعاقب کرنے والی پاکستانی ٹیم کو میگا ایونٹ میں دوسری بار شکست کی ہزیمت اٹھانے پڑی۔فاسٹ بولر محمد عامر کی پانچ وکٹیں ضایع گئیں۔

    ٹاؤنٹن کے میدان میں پاکستانی ٹیم308رنز کےہدف کےتعاقب میں 266رنز پر آؤٹ ہوگئی۔ صرف امام الحق نے نصف سنچری اسکور کی۔ فخر  زمان  اور شعیب ملک صفر پر آؤٹ ہوگئے۔ آصف علی  بھی بری طرح ناکام ہوئے۔ محمد حفیظ، سرفراز احمد، حسن علی اور وہاب ریاض کی مختصر، مگر ذمے داری اننگز  رائیگاں گئیں۔

    قبل ازیں محمد عامر کی شان دار بولنگ کے طفیل پاکستان نے دفاعی چیمپین آسٹریلیا کو  307  تک محدود کر  دیا تھا۔

    پاکستان نے ٹاس جیت کر  بولنگ کا فیصلہ کیا۔ آسٹریلیا نے اپنی اننگز کا اغاز اعتماد کے ساتھ کیا، سوائے عامر کے دیگر بولرز رنگ نہیں جما سکے۔

    محمد آصف نے تین کیچز ڈراپ کیے اور یوں لگانے لگا کہ آسٹریلیا بہ آسانی 350 کا سنگ میل عبور کر جائے گا۔ البتہ پھر پاکستان نے کم بیک کیا۔

    ڈیوڈ وارنر 107 اور ارون فنچ 82ر نز بناکر نمایاں رہے، محمدعامر نے10 اوورز میں 30رنز دے کر 5کھلاڑیوں کوآؤٹ کی۔

    میچ کے آغاز سے قبل سرفراز احمد نے کہا تھا کہ پچ گرین لگ رہی ہے، فائدہ اٹھانے کی کوشش کریں گے، پریکٹس میں کافی محنت کی ہے۔

    انہوں نے کہا کہ پاکستانی ٹیم میچ میں سیاہ پٹی پہن کر اترے گی، پاکستانی ٹیم امپائر ریاض الدین کو خراج عقیدت پیش کرے گی۔

    آسٹریلوی کپتان ایرون فنچ کا کہنا ہے کہ پاکستانی ٹیم اچھی ہے، امید ہے اچھا مقابلہ ہوگا۔ کوشش کریں گے پاکستان ٹیم کو بڑا ہدف دیں۔ ’ہم بھی ٹاس جیت جاتے تو پہلے بولنگ کرتے‘۔

    خیال رہے کہ رواں برس ہونے والے ورلڈ کپ کو بارش نے شدید متاثر کیا ہے، یکے بعد دیگرے میچز بارش کی زد میں آرہے ہیں۔ اس سے قبل پاکستان اور سری لنکا کا میچ بھی بارش کے باعث منسوخ ہوچکا ہے جبکہ بارش کے باعث میچز میں تاخیر اور مختصر اوورز کا کھیل بھی معمول کی بات بن گیا ہے۔

    اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جبکہ مزید میچز کی منسوخی کا بھی خدشہ ہے۔

    آج کے میچ کے لیے قومی اسکواڈ میں سرفراز احمد (کپتان)، امام الحق، فخر زمان، بابر اعظم، محمد حفیظ، شعیب ملک، آصف علی، وہاب ریاض، حسن علی، شاہین آفریدی اور محمد عامر شمال تھے۔

    آسٹریلیا کی ٹیم میں ایرون فنچ (کپتان)، ڈیوڈ وارنر، عثمان خواجہ، اسٹیون اسمتھ، شان مارش، گلن میکس ویل، ایلکس کرے، پیٹ کمنز، مچل اسٹارک اور کین اینڈرسن شامل تھے۔

  • ورلڈ کپ 2019: بیلزکے پراسرار رویے کا کیا سبب ہے؟

    ورلڈ کپ 2019: بیلزکے پراسرار رویے کا کیا سبب ہے؟

    اگر گیند اسٹمپس سے ٹکرا جائے، تو کیا بیٹسمین آؤٹ تصور کیا جائے؟

    جی نہیں، بیٹسمین کے آؤٹ ہونے کے لیے گیند کا اسٹمپس سے ٹکرانا کافی نہیں، بیلز کا گرنا بھی ضروری ہے.

    عام طور پر گیند ہلکی سے بھی اسٹمپس سے ٹکرا جائے، تو بیلز گر جاتی ہیں، البتہ حالیہ ورلڈ کپ میں‌ عجیب و غریب واقعات رونما ہورہے ہیں.

    ورلڈ کپ 2019 میں‌ کم از کم پانچ مرتبہ ایسا ہوا کہ اسٹمپس سے گیند لگنے کے باوجود بیلز نہیں گریں اور بالر کا جشن ادھورا رہ گیا.

    ایسا ہی واقعہ انڈیا اور آسٹریلیا کے میچ میں بھی پیش آیا، جب انڈین بولر جسپریت بمرا بولنگ کر رہے تھے اور میچ کا دوسرا اوور تھا.

    گیند پہلے آسٹریلوی بلے باز ڈیوڈ وارنر کے بیٹ سے گیند سے ٹکرائی، پھر اسٹمپس سے لگی۔

    بولر خوشی منانا چاہتا تھا، مگر اس کے ارمانوں پر یہ دیکھ کر اوس پڑ گئی کہ بیلز جوں‌ کی توں ہیں.

    ایسا ہی واقعہ نیوزی لینڈ اور سری لنکا کے میچ میں پیش آیا تھا. آسٹریلیا اور ویسٹ انڈیز کے میچ میں‌ بھی ایسا ہی منظر دیکھنے میں آیا.

    بیلز کے عجیب و غریب رویے کی وجہ

    ماہرین اس ضمن میں‌ مختلف وجوہات بیان کر رہے ہیں، جن میں‌ سب سے مقبول یہ نظریہ ہے کہ بیلز میں‌ فلیش لائٹس نصب ہونے کی وجہ سے یہ کچھ بھاری ہوگئی ہیں.

    آسٹریلوی کپتان ایرون فنچ نے بھی اپنے ایک بیان میں یہی نظریہ پیش کیا ہے.

    کچھ افراد کا کا کہنا ہے کہ بیلز کو  رکھنے کے لیے جو گڑھے بنائے گئے ہیں، وہ  ذرا زیادہ گہرے ہیں، جھٹکے کے باوجود بیلز  اپنی جگہ رہتی ہیں.

    گو آئی سی سی نے اس طرح کے تمام نظریات کو رد کر دیا ہے، البتہ چودہ میچز میں یہ واقعہ پانچ بار رونما ہوچکا ہے اور کئی اہم سوالات اٹھا رہا ہے.

  • ورلڈ کپ 2019: بنگلہ دیش اور سری لنکا کا میچ بھی بارش کی نذر

    ورلڈ کپ 2019: بنگلہ دیش اور سری لنکا کا میچ بھی بارش کی نذر

    برسٹل: ورلڈ کپ 2019 میں آج کھیلا جانے والا بنگلہ دیش اور سری لنکا کا میچ بھی بارش کی باعث منسوخ کردیا گیا۔

    تفصیلات کے مطابق برسٹل میں بادل پھر برس پڑے، بنگلہ دیش اور سری لنکا کا میچ بھی منسوخ ہوگیا، بارش کے باعث ٹاس بھی نہ ہوسکا، دونوں ٹیموں کو ایک، ایک پوائنٹ دے دیا گیا۔

    ورلڈ کپ 2019 سب سے زیادہ میچز منسوخ ہونے والا ورلڈ کپ بن گیا۔

    بارش سے متاثر ہونے والا یہ پہلا میچ نہیں، رواں برس ہونے والے ورلڈ کپ کو بارش شدید متاثر کر رہی ہے۔ یکے بعد دیگرے میچز بارش کی زد میں آرہے ہیں۔

    اس سے قبل پاکستان، سری لنکا اور جنوبی افریقہ، ویسٹ انڈیز کا میچ بھی بارش کے باعث منسوخ ہوچکا ہے جبکہ بارش کے باعث میچز میں تاخیر اور مختصر اوورز کا کھیل بھی معمول کی بات بن گیا ہے۔

    اندیشہ ظاہر کیا جا رہا ہے کہ آنے والے کئی میچز بارش سے متاثر ہوسکتے ہیں، جب کہ مزید میچز کی منسوخی کا بھی خدشہ ہے.

    سوشل میڈیا پر بارش کو آئی سی سی ورلڈکپ کی گیارہویں ٹیم قرار دیا جارہا ہے، شائقین کو تشویش ہے کہ کہیں یہی ٹیم ورلڈ ٹرافی اپنے نام نہ کر لے.

    بارش سے ٹیموں کو نقصان ہورہا ہے، ڈک ورتھ لوئس قانون سے کمزورٹیم بھی فائدہ اٹھا رہی ہے۔

  • ورلڈ کپ 2019، جنوبی افریقہ اور ویسٹ انڈیز کا میچ بارش کے باعث منسوخ‌ کردیا گیا

    ورلڈ کپ 2019، جنوبی افریقہ اور ویسٹ انڈیز کا میچ بارش کے باعث منسوخ‌ کردیا گیا

    ساؤتھ ہیمپٹن: ورلڈ کپ میں جنوبی افریقہ اور ویسٹ انڈیز کا میچ بارش کے باعث منسوخ کردیا گیا، دونوں ٹیموں کو ایک، ایک پوائنٹ دے دیا گیا۔

    تفصیلات کے مطابق ورلڈ کپ میں ایک اور میچ بارش کے باعث منسوخ کردیا گیا، جنوبی افریقہ اور ویسٹ انڈیز کے درمیان صرف 7.3 اوورز کا کھیل ہوا جس کے بعد بارش ہوگئی، امپائرز نے کافی دیر انتظار کے بعد میچ ختم کردیا۔

     ساؤتھ ہیمپٹن میں کھیلے جانے والے میچ میں بارش سے قبل جنوبی افریقہ نے 7.3 اوورز میں 2 وکٹوں کے نقصان پر 29 رنز بنائے تھے، کولٹرنیل نے دو وکٹیں حاصل کیں۔

    ہاشم آملہ 6 رنز بنا کر پویلین لوٹ گئے، مرکرام 5 رنز بنا کر کولٹرنیل کی گیند پر شائے ہوپ کو کیچ دے بیٹھے، جنوبی افریقہ کی ابتدائی دونوں وکٹیں کولٹرنیل نے حاصل کیں۔

    واضح رہے کہ بارش کی وجہ سے ورلڈ کپ میں منسوخ ہونے والا یہ دوسرا میچ ہے، اس سے قبل پاکستان اور سری لنکا کے درمیان ہونے والا میچ بھی بارش کی وجہ سے منسوخ کردیا گیا تھا۔

    اس سے قبل ورلڈ کپ 2019 میں آج ویسٹ انڈیز نے جنوبی افریقہ کے خلاف ٹاس جیت کر فیلڈنگ کا فیصلہ کیا ہے۔

    تفصیلات کے مطابق ساؤتھ ہمپٹن کے میدان میں آج ویسٹ انڈیز اور جنوبی افریقہ مدمقابل ہیں۔ ویسٹ انڈیز اب تک ٹورنامنٹ میں2 میچز کھیل چکا ہے جن میں سے 1 میں فتح حاصل کی۔

    دوسری جانب جنوبی افریقہ نے 3 میچز کھیلے اور تینوں میں شکست کھائی۔

    آج کے میچ کے لیے جنوبی افریقہ کی ٹیم میں فاف ڈوپلیسی (کپتان)، کوانٹن ڈی کوک، ہاشم آملہ، ایڈن مارک، ڈیوڈ ملر، کرس مورس، عمران طاہر اور بیرن ہیڈرکس شامل ہیں۔

    ویسٹ انڈیز کی ٹیم میں جیسن ہولڈر (کپتان) کرس گیل، ڈیرن براوو، نکولس پورن، کارلوس بریتھ وائٹ، ایشلے نرس، کیمر روچ اور اوشن تھامس شامل ہیں۔

    واضح رہے کہ آئی سی سی ورلڈکپ کے لیے 10 ٹیمیں ایونٹ میں حصہ لے رہی ہیں جنہیں 2 گروپس میں تقسیم کرنے کے بجائے تمام ٹیمیں ایک دوسرے کے خلاف میچ کھیلیں گی۔

    ایونٹ میں دفاعی چیمپیئن آسٹریلیا، بھارت، پاکستان، انگلینڈ، نیوزی لینڈ، جنوبی افریقہ، ویسٹ انڈیز، بنگلہ دیش، سری لنکا اور افغانستان شامل ہیں۔

    آئی سی سی ورلڈکپ کے ایونٹ میں 48 میچز کھیلے جائیں گے، فائنل اور سیمی فائنل سے قبل تمام ٹیمیں 9،9 میچز کھیلیں گی جن میں سے 4 ٹیمیں سیمی فائنل میں جگہ بنائیں گی، 14 جولائی کو فائنل کھیلا جائے گا۔

  • ورلڈ کپ 2019: نیوزی لینڈ کا فاتحانہ آغاز،سری لنکا کو باآسانی شکست

    ورلڈ کپ 2019: نیوزی لینڈ کا فاتحانہ آغاز،سری لنکا کو باآسانی شکست

    کارڈف: ورلڈ کپ 2019 کے تیسرے میچ میں نیوزی لینڈ نے سری لنکا کو باآسانی شکست دے کر فاتحانہ آغاز کردیا۔

    تفصیلات کے مطابق کارڈف میں ہونے والے میچ میں  نیوزی لینڈ اور سری لنکا کی ٹیمیں مدمقابل تھیں، نیوزی لینڈ کے کپتان نے ٹاس جیت کر پہلے فیلڈنگ کا فیصلہ کیا اور سری لنکا کو بیٹنگ کی دعوت دی۔

    کیویز باؤلر میچ کے پہلے ہی اوور سے مخالف ٹیم پر بھاری نظر آئے، سری لنکا کا پہلا کھلاڑی چار کے مجموعی اسکور پر پویلین لوٹے تو اُس کے بعد کوئی بھی زیادہ دیر تک وکٹ پر نہ ٹک سکا، دوسری اور تیسری وکٹ بھی 46 پر گری، 53 پر چوتھی، 59 پر پانچویں، 60 پر چھٹی، 112 پر ساتویں، 114 پر آٹھویں، 130 پر نویں اور 136 پر دسویں وکٹ گری۔

    سری لنکن ٹیم نیوزی لینڈ کے خلاف 136 رنز پر ڈھیر ہوگئی جبکہ کپتان کرو نارتنے ناقابل شکست 52 رنز بنا کر نمایاں بلے باز رہے جبکہ نیوزی لینڈ کے ہینری اور ایل ایچ فرگوسن نے تین تین کھلاڑیوں کو پویلین کی راہ دکھائی جبکہ بولٹ، گرانڈ ہوم، نیشہم اور سانٹنر نے ایک ایک کھلاڑی کو آؤٹ کیا۔

    سری لنکا نے نیوزی لینڈ کو جیت کے لیے 137 رنز کا ہدف دیا جس کا تعاقب کرنے کے لیے کیویز کی جانب سے بیٹنگ کا آغاز گپتل اور منرو نے کیا۔ دونوں ہی بلے بازوں نے خوب جم کر اسٹروکس کھیلے اور ناقبل شکست رہے۔

    نیوزی لینڈ کی ٹیم نے 8.47 کی اوسط سے 137 رنز کا ہدف 16.1 اوورز میں ہی حاصل کرلیا۔ گپتل نے 51 گیندوں پر 2 چھکوں اور 8 چوکوں کی مدد سے 73 رنز بنائے جبکہ منرو نے 47 گیندوں کا سامنا کرتے ہوئے 1 چھکے اور 6 چوکوں کی مدد سے 58 کی ناقابلِ شکست اننگز کھیلی۔

    ورلڈ کپ 2019 کے تیسرے روز آج 4 ٹیمیں مدمقابل ہیں، نیوزی لینڈ اور سری لنکا کے درمیان میچ کے بعد دوسرا مقابلہ آسٹریلیا اور افغانستان کے درمیان کاؤنٹی گراؤنڈ برسٹول میں ہورہا ہے۔

    خیال رہے کہ آئی سی سی ورلڈ کپ کے لیے 10 ٹیمیں ایونٹ میں حصہ لے رہی ہیں۔ ٹیموں کو 2 گروپس میں تقسیم کیے جانے کے بجائے تمام ٹیمیں ایک دوسرے کے خلاف میچ کھیلیں گی۔

    ایونٹ میں دفاعی چیمپیئن آسٹریلیا، بھارت، پاکستان، انگلینڈ، نیوزی لینڈ، جنوبی افریقہ، ویسٹ انڈیز، بنگلہ دیش، سری لنکا اور افغانستان شامل ہیں۔

    آئی سی سی ورلڈ کپ کے ایونٹ میں 48 میچز کھیلے جائیں گے، فائنل اور سیمی فائنل سے قبل تمام ٹیمیں 9، 9 میچز کھیلیں گی جن میں سے 4 ٹیمیں سیمی فائنل میں جگہ بنائیں گی۔ فائنل 14 جولائی کو کھیلا جائے گا۔

  • ورلڈ کپ 2019: ویسٹ انڈیز نے پاکستان کو 7 وکٹوں سے شکست دے دی

    ورلڈ کپ 2019: ویسٹ انڈیز نے پاکستان کو 7 وکٹوں سے شکست دے دی

    ناٹنگھم: ورلڈ کپ 2019 کے دوسرے میچ میں ویسٹ انڈیز نے پاکستان کو 7 وکٹوں سے شکست دے دی۔ پاکستان کی جانب سے دیا جانے والا 106 رنز کا ہدف، پاکستان کا ورلڈ کپ میں دوسرا کم ترین اسکور ہے۔

    تفصیلات کے مطابق ورلڈ کپ 2019 کے دوسرے میچ میں پاکستانی ٹیم نے ویسٹ انڈیز کو جیت کے لیے 106 رنز کا ہدف دیا جو ویسٹ انڈین ٹیم نے 13.4 اوورز میں 3 وکٹوں کے نقصان پر پورا کرلیا، کرس گیل نے 50 رنز کی اننگز کھیلی۔

    ویسٹ انڈیز کی پہلی وکٹ 36 رنز پر گری جب شائے ہوپ 11 رنز بنا کر محمد عامر کا شکار بنے، ڈیرن براؤو بغیر کوئی رن بنائے پویلین لوٹ گئے، کرس گیل نے 34 گیندوں پر 50 رنز کی برق رفتار اننگز کھیلی۔

    پورن 34 رنز بنا کر ناٹ آؤٹ رہے، جبکہ ہیٹ میئر نے 7 رنز بنائے، پاکستان کی جانب سے محمد عامر نے تینوں وکٹیں حاصل کی۔

    قبل ازیں پاکستان اور ویسٹ انڈیز کے درمیان میچ میں ویسٹ انڈیز نے ٹاس جیت کر پہلے فیلڈنگ کا فیصلہ کیا۔ پہلے ہی میچ میں پاکستان کی بیٹنگ بری طرح ناکام ہوگئی اور پوری ٹیم 105 رنز پر ڈھیر ہوگئی۔ پاکستان کی پوری بیٹنگ لائن صرف 21.4 اوورز میں پویلین لوٹ گئی۔ فخر زمان اور بابر اعظم 22، 22 رنز بنا کر آؤٹ ہوئے، پاکستان کے بقیہ 7 کھلاڑی ڈبل فگر بھی نہ بنا سکے۔

    ویسٹ انڈین بولرز نے پاکستانی بیٹنگ لائن کے پرخچے اڑا دیے، کپتان جیسن ہولڈر نے 3، تھامس نے 4 اور آندرے رسل نے 2 وکٹیں حاصل کیں۔ اننگز کے اختتام پر پاکستان نے ویسٹ انڈیز کو جیت کے لیے 106 رنز کا ہدف دیا، یہ پاکستان کا ورلڈ کپ میں دوسرا کم ترین اسکور ہے۔

    میچ سے قبل ناٹنگھم میں مقیم پاکستانیوں کی بڑی تعداد اسٹیڈیم میچ دیکھنے پہنچی۔ میچ کے آغاز سے قبل پاکستانی شائقین کا جوش و خروش دیدنی تھا، پاکستانیوں نے ڈبل ڈیکر بس پر جشن منایا جبکہ پاکستان زندہ باد کے نعرے بھی لگائے۔

    میچ سے قبل قومی ٹیم نے ٹرینٹ برج کے گراؤنڈ میں جم کر پریکٹس بھی کی۔ میچ کے لیے بارہ رکنی ٹیم میں فخر زمان، امام الحق، بابر اعظم، محمد حفیظ، سرفراز احمد، حارث سہیل، آصف علی، شاداب خان، عماد وسیم، محمد عامر، وہاب ریاض اور حسن علی شامل ہیں۔

    ٹاس جیتنے کے بعد ویسٹ انڈیز کے کپتان جیسن ہولڈر کا کہنا تھا کہ جلد وکٹیں لینے کی کوشش کریں گے، پہلے سے انگلینڈ آ کر تیاری کا اچھا موقع ملا۔

    قومی ٹیم کے کپتان سرفراز احمد کا کہنا تھا کہ ناٹنگھم کی پچ کا اندازہ ہے، ٹاس جیت جاتے تو ہم بھی بولنگ کا ہی فیصلہ کرتے۔ ورلڈ کپ سے پہلے بلے بازوں کا فارم میں آنا خوش آئند ہے۔

    اس سے قبل گزشتہ روز ورلڈ کپ کی میزبان ٹیم انگلینڈ نے ایونٹ کا فاتحانہ آغاز کیا تھا، پہلے میچ میں انگلینڈ نے جنوبی افریقہ کو 104 رنز سے شکست دے کر مخالفین کے لیے خطرے کی گھنٹی بجا دی ہے۔

    ماہرین کے مطابق ہوم گراؤنڈ پر انگلش ٹیم بڑا خطرہ ثابت ہوسکتی ہے، میزبان کے سیمی فائنل میں‌ پہنچنے کے امکانات پر بھی بات ہو رہی ہے۔

  • ورلڈ کپ 2019 کی رنگا رنگ افتتاحی تقریب، میگا ایونٹ آج شروع ہوگا

    ورلڈ کپ 2019 کی رنگا رنگ افتتاحی تقریب، میگا ایونٹ آج شروع ہوگا

    لندن: انتظار کی گھڑیاں ختم ہوئیں، ورلڈ کپ 2019 کی رنگا رنگ افتتاحی تقریب نے شائقین کے دل جیت لیے، کرکٹ کا سب سےبڑا میلہ آج  شروع ہوگا.

    تفصیلات کے مطابق ورلڈ کپ 2019 کی رنگارنگ افتتاحی تقریب لندن میں منعقد ہوئی، انٹرنیشنل کرکٹ اسٹارز اور نامورشخصیات بکنگھم پیلس کے سامنے مال میں اکٹھی ہوئیں، عوام کی بڑی تعداد بھی موجود تھی.

    ورلڈ کپ کا آفیشل اینتھم گانے والا مشہور زمانہ روڈی مینٹل بینڈ تقریب میں چار چاند لگائے۔ تمام ٹیموں کے کپتانوں نے اس موقع پر ملکہ ایلزبتھ سے ملاقات کی،  خصوصی تصویر  بھی بنوائی گئی۔

    تمام ٹیموں کے کپتان اسٹیج پر  آئے اور اپنے خیالات کا اظہار کیا، انگلش کپتان اوئن مورگن نے کہا کہ ہم ایونٹ کےلئےبہت پرجوش ہیں،  ویرات کوہلی ہمارےانگلینڈمیں بےشمارفینز ہیں، جس سے فائدہ اٹھانے کی کوشش کریں گے۔ جنوبی افریقا اور ویسٹ انڈیز کے کپتان نے بھی جیت کی امیدوں کا اظہار کیا۔

    برطانیہ میں کرکٹ کا بخار عروج پر پہنچ گیا، نوٹنگھم میں کرکٹ سٹی قائم ہوگئی، نان اسٹاپ ایکشن آج شروع ہوگا۔ پہلا مقابلہ انگلینڈ اورجنوبی افریقہ کے درمیان ہوگا۔ پاکستان پہلا میچ 31 مئی کو ویسٹ انڈیز کے خلاف کھیلے گا.

  • جنون کا ورلڈ کپ پر نیا گانا ریلیز کرنے کا اعلان

    جنون کا ورلڈ کپ پر نیا گانا ریلیز کرنے کا اعلان

    کراچی: عالمی شہرت یافتہ صوفی بینڈ ’جنون ‘ نے 15برس بعد متحد ہوکر عالمی کرکٹ ورلڈکپ 2019 کے لئے نیا گانا بنانے کے کا اعلان کیا ہے۔

    تفصیلات کے مطابق 90کی دہائی میں پاکستان کا نام عالمی سطح پر روشن کرنے والے جنون بینڈ کی جانب سے یوٹیوب پر ایک ویڈیو پیغام جاری کیا گیا جس میں 30 مئی سے شروع ہونے والے ورلڈ کپ کیلئے گانا ریلیز کرنے کا اعلان کیا گیا۔

    تین پرانے دوست علی عظمت، سلمان احمد اور برائین او کونل پھر سے ملیں گے اور ‘جنون‘ بینڈ ایک بار پھر اسٹیج پر جلوہ افروز ہوگا۔جنون بینڈ کے اہم رکن اور گٹارسٹ سلمان احمد نے سماجی رابطے کی ویب سائٹ یوٹیوب پر جاری کردہ ویڈیوپیغام میں کہا کہ ”پاکستان کو متحد کرنے کےلئے ہم(علی عظمت ،برین اور میں) اکٹھے ہوئے ہیں، ہمارا نیا گانا رواں سال ہونے والے کرکٹ ورلڈ کپ میں پاکستان کرکٹ ٹیم کی بھرپور حمایت اور مورال بلند کرنے کے لیے بنایا جارہا ہے۔

    پاکستان کے معروف گلوکار اور بینڈ کے رکن علی عظمت نے ویڈیو پیغام میں کہا کہ یہ گیت تمام پاکستانیوں کے لیے بنایا جا رہا ہے۔یاد رہے کہ 22 سال قبل 1996کے کرکٹ ورلڈ کپ کےلئے جنون بینڈ کا گانا ’ جذبہ جنون‘ پیش کیا گیا تھا جس کا شمار 90کی دہائی کے مقبول ترین ملی نغموں میں ہوتا ہے جو آج بھی لوگوں کے ذہنوں میں تازہ ہے۔

    واضح رہے کہ90 کی دہائی کے آغاز میں لاہور میں جنم لینے والے اس بینڈ میں سلمان احمد، غیرملکی گٹارسٹ برین اور علی عظمت بہ طور گلوکار شامل ہیں جنہوں نے جدید میوزیکل آلات کے ساتھ موسیقی کی دنیا کے تما م ہی شعبہ جات پر طبع آزمائی کی تاہم صوفیانہ کلام پیش کرنے میں یہ بینڈ اپنا ثانی نہیں رکھتا تھا۔

    کروڑوں دلوں کی دھڑکن بنے اس بینڈ کے گٹارسٹ سلمان احمد اور گلوکار علی عظمت کے درمیان اختلافات کے سبب عوام میں دیوانگی کی حد تک مقبول یہ بینڈ13 سال قبل بکھر گیا تھا ۔ اس کے بعد سے موسیقی کے شائقین صوفی راک میوزک سننے کو ترس ہی گئے تھے ۔ دوسال قبل  بینڈ کے گٹارسٹ سلمان احمد نے اشارے دینا شروع کیے کہ وہ ایک بار پھر بینڈ کو یکجا کرنے کے لیے کوشاں ہیں۔

    اس کے  نتیجے میں یہ تینوں موسیقار اکھٹے ہوئے اور اس کے بعد کراچی مین ایک شاندار فنکشن کا انعقاد کیا گیا تھا جس میں نوجوانوں نے بھرپور تعداد میں شرکت کی تھی۔

     

     

  • ورلڈ کپ اسکواڈ : عامر، آصف علی اور وہاب ریاض ٹیم کا حصہ

    ورلڈ کپ اسکواڈ : عامر، آصف علی اور وہاب ریاض ٹیم کا حصہ

    لاہور: چیف سلیکٹر انضمام الحق نے کرکٹ ورلڈ کپ کے لیے 15 رکنی قومی اسکواڈ کا اعلان کردیا، محمد عامر، آصف علی اور وہاب ریاض ٹیم کا حصہ ہوں گے، چیف سلیکٹر نے کہا کہ آصف علی کوعابد علی پرپاور ہٹنگ کی وجہ سے فوقیت دی گئی۔

    تفصیلات کے مطابق مشن ورلڈ کپ کے لیے پاکستان کی 15 رکنی ٹیم کو حتمی شکل دے دی گئی، پاکستان کرکٹ بورڈ کے چیف سلیکٹر انضمام الحق نے ورلڈ کپ 2019 کے لیے سرفرازاحمد کی قیادت میں 15 رکنی قومی ٹیم کا اعلان کردیا۔

    چیف سلیکٹرنے نیوزکانفرنس میں کہا کہ فخر زمان، امام الحق، محمد حفیظ، بابر اعظم، سرفراز احمد، حارث سہیل، شعیب ملک، عماد وسیم، شاداب خان، حسن علی، شاہین شاہ آفریدی اور محمد حسنین اسکواڈ میں شامل ہیں۔

    انضمام الحق نے کہا کہ انگلینڈ کے ساتھ جو سیریز ہوئی اس کے بعد قومی ٹیم میں بڑی تبدیلی کا فیصلہ کیا، وہاب ریاض، محمد عامر، آصف علی کو واپس لے لیا، شاداب کی ٹیم میں واپسی ہوئی، ڈاکٹروں نے شاداب کو کلیئر کر دیا ہے، تجربہ کار عامر اور وہاب کو ٹیم میں شامل کیا گیا، فاسٹ بالرز کو ون ڈے سیریز میں کارکردگی کے بعد شامل کیا گیا،

    انھوں نے کہا کہ عابد علی کو ٹیم میں شامل نہ کرنا ایک مشکل فیصلہ تھا، پاور ہٹنگ کی وجہ سے ان پر آصف علی کو فوقیت دی، وہاب ریاض کو ہم نے نظر انداز نہیں کیا تھا، انھوں نے ڈومیسٹک ٹورنامنٹ میں اچھی کارکردگی دکھائی، 90 کی اسپیڈ جس کی نہیں ہے وہ بھی میچ میں کھیلتے ہیں، برطانوی کھلاڑی کو بھی ویسی مار پڑی ہے جیسے پاکستانی کو۔

    انضمام الحق کا کہنا تھا کہ فخر زمان اور امام الحق فارم میں ہیں، حسنین کو اتنا تجربہ نہیں لیکن اللہ کرے ورلڈ کپ میں اچھی پرفارمنس دیں، ان کے پاس اسپیڈ ہے، ٹیم کی ضرورت کے مطابق کوچ اور کپتان سے بات کی، بولنگ کے ساتھ فیلڈنگ کو بھی دیکھنا ہے۔

    چیف سلیکٹر نے کہا کہ جنید اور فہیم بھی اچھے بولر ہیں لیکن کنڈیشن میں تجربہ کار کھلاڑی چاہیے، آگے کیا ہوگا میں نہیں بتا سکتا، ٹیم نے انگلینڈ میں فائٹ کی کچھ چیزیں بری تو کچھ اچھی بھی ہیں، ہماری ٹیم ورلڈ کپ میں بہتر پرفارمنس دے گی۔

    انضام کا کہنا تھا کہ ٹیم پر زیادہ تنقید اچھی چیز نہیں، اچھا کھیلنے والوں کو بھی سراہنا چاہیے، شعیب اور حفیظ سینئر کرکٹرز ہیں اور تجربہ کار کھلاڑیوں کی ضرورت ہے، ہم 23 مئی تک ٹیم میں تبدیلی کر سکتے ہیں تو فائدہ کیوں نہ اٹھائیں، پاکستان ٹیم کو جس کی ضرورت ہے ہم نے وہ فیصلہ کیا ہے۔

    انھوں نے مزید کہا کہ ہماری ینگ کھلاڑیوں کی ٹیم ہاری بھی ہے لیکن فتح بھی ملی ہے، رضوان، عابد اور فہیم کو انگلینڈٖ ہی میں روک رہے ہیں، اگر کسی کی ضرورت پڑے گی تو ہمارے پاس بیک اپ ہوگا۔

    چیف سلیکٹر کا کپتان کے متعلق کہنا تھا کہ سرفراز جتنا اوپر آ کر کھیلتے ہیں اتنی اچھی کارکردگی دیتے ہیں، سرفراز احمد کی کارکردگی انگلینڈ سے سیریز میں بہتر ہے۔