لاہور: پنجاب میں کسانوں کی گرفتاریوں پر کسان رہنماؤں کا شدید رد عمل سامنے آیا ہے۔
تفصیلات کے مطابق گندم کی خریداری میں تاخیر اور سرکاری نرخ پر نہ خریدے جانے کے خلاف پنجاب بھر کے کسان سراپا احتجاج ہو گئے ہیں۔
کسان رہنماؤں نے آج پنجاب اسمبلی کے باہر احتجاج کی کال دی تھی جس کے بعد پنجاب پولیس نے روایتی طریقہ کار اختیار کرتے ہوئے کسانوں کو گرفتارکرنا شروع کر دیا ہے۔
کسانوں کی گرفتاریوں پر کسان رہنماؤں کا ویڈیو بیان سامنے آیا ہے، صدر پاک کسان اتحاد چوہدری حسیب انور کا کہنا ہے کہ حکومت کسانوں کو اُن کا جائز حق نہیں دے رہی، پنجاب اسمبلی کے باہر مظاہرہ کرنا ہمارا جمہوری حق ہے، پنجاب پولیس کسانوں کو گرفتار کر کے حالات بگاڑ رہی ہے، صورت حال خراب ہوئی تو ذمے دار حکومت ہوگی۔
مانیٹری پالیسی کا اعلان، اسٹیٹ بینک آئی ایم ایف اور مقامی بزنس مین کے دباؤ میں
چوہدری حسیب انور کا کہنا تھا کہ مارکیٹ میں کسان سے 3 ہزار روپے من گندم لُوٹی جا رہی ہے، اور پولیس کسانوں کے گھروں پر چھاپے مار رہی ہے، وزرا نے ہمیں معاملات کے حل کی یقین دہانی کرائی تھی لیکن پنجاب پولیس حالات بگاڑنے پر تلی ہوئی ہے۔
مرکزی صدر چیمبر آف ایگریکلچر پاکستان شوکت چدھڑ نے بھی کسانوں کی گرفتاریوں کی مذمت کرتے ہوئے کہا کہ پنجاب حکومت اوچھے ہتھکنڈوں پر اُتر آئی ہے، گرفتاریاں بند نہ کی گئیں تو تمام کسان تنظیمیں ملک گیر احتجاج کریں گی۔