اسلام آباد: کسان اتحاد کا احتجاج پانچویں روز میں داخل ہو گیا ہے، کسانوں نے مطالبات کی منظوری کے لیے پیر تک کی ڈیڈ لائن دے دی۔
تفصیلات کے مطابق اسلام آباد میں کسان اتحاد کا دھرنا پانچویں روز میں داخل ہو گیا، حکومت اور کسانوں کے درمیان ڈیڈ لاک برقرار ہے، گزشتہ روز مذاکرات میں بات چیت کسی نتیجے پر نہیں پہنچ سکی تھی۔
کسان اتحاد کا کہنا ہے کہ مطالبات منظور نہ ہوئے تو پارلیمنٹ کے سامنے دھرنا دیں گے، وفاقی حکومت کو کل تک کا الٹی میٹم دیتے ہوئے کسان اتحاد نے پنجاب اور خیبر پختون خوا کے حوالے سے مطالبات نہ ماننے پر بنی گالہ کے باہر دھرنے کی بھی دھمکی دے دی۔
چیئرمین کسان اتحاد خالد حسین کے مطابق رانا ثنا اللہ کا رویہ پہلے جیسا نہیں تھا، وزیر اعظم نے پیر کو مسئلہ حل کرنے کی یقین دہانی کرائی ہے، پیر تک مطالبات نہ مانے گئے تو ریڈ زون کا رخ کریں گے۔
خالد حسین نے کہا رانا ثنا کے لہجے میں تلخی تھی، رانا ثنا نے ملاقات میں کہا ریڈ زون میں آئے تو کہیں ایسا نہ ہو عمران خان کے لیے کی جانے والی تیاری آپ پر پریکٹس کرلوں، میں نے انھیں بتایا کہ کسان ڈرنے والے نہیں، رانا ثنا یاد رکھیں حکومت آنی جانی چیز ہے، اور پھر آپ کو بھی فرق پتا چل جائے گا، مطالبات نہ مانے تو آپ تیاری کریں ہم آ رہے ہیں۔
