Tag: کسان تحریک

چندی گڑھ: بھارت میں کسان سڑکوں سے اٹھنے کے بعد پٹریوں پر بیٹھ گئے ہیں، جس سے ملک نئی پریشانی کا شکار ہو گیا۔

تفصیلات کے مطابق سال بھر سے جاری احتجاج کے ختم ہونے اور کسانوں کے دہلی کی سرحدیں خالی کرنے کے چند دنوں بعد، پنجاب میں ایک نئی ہلچل شروع ہو گئی ہے کیوں کہ کسانوں نے ریاست کے مختلف مقامات پر ریل سروسز کو روک دیا ہے۔

کسانوں کے مطالبات وہی ہیں، وہ مکمل قرض معافی اور سال بھر کے احتجاج کے دوران مرنے والوں کے لواحقین کے لیے معاوضے کا مطالبہ کر رہے ہیں۔

بھارتی ریاست پنجاب میں دوسرے روز بھی مختلف مقامات پر ریلوے لائن پر کسانوں کے دھرنے کے باعث ٹرینوں کا شیڈول شدید متاثر ہوا ہے۔، ان کا مطالبہ ہے کہ ان کو دیے جانے والے قرضے مکمل طور پر معاف اور احتجاج کے دوران ہلاک ہونے والے کسانوں کے لواحقین کو معاوضہ ادا کیا جائے۔

بدھ کو انڈیا ٹو ڈے کے مطابق ریلوے لائنز کی بندش کے باعث 156 ٹرینوں کی آمد و رفت متاثر ہوئی ہے، ریلوے حکام کا کہنا ہے کہ احتجاج کے باعث 84 ٹرینوں کو معطل جب کہ 69 کے سفر کو محدود کیا گیا۔

بھارت: ایک سال سے جاری کسانوں کا احتجاج ختم

کسان مزدور سنگھرش کمیٹی نے پیر کے روز احتجاج کا آغاز کیا تھا، ان کے مطالبات میں احتجاج میں شامل افراد کے خلاف درج کیسز کی واپسی بھی شامل ہے۔ اسی طرح فصلوں کو پہنچنے والے نقصان کے ضمن میں فی ایکڑ 50 ہزار روپے، گنے کی فصل کے واجبات کی ادائیگی اور ٹھیکے داری نظام کا خاتمہ بھی ان کے مطالبات میں شامل ہے۔

کسان رہنما ستنام سنگھ پنو نے ایک بیان میں کہا کہ مطالبات مانے جانے تک کسی صورت دھرنا ختم نہیں کریں گے، 28 ستمبر کو ہونے والی ملاقات میں وزیر اعلیٰ چرنجیت سنگھ چنی کی جانب سے ان باتوں کا ہمیں یقین دلایا گیا تھا مگر بعد ازاں ریاستی حکومت نے ان پر عمل درآمد بند کر دیا۔

انھوں نے خبردار کیا کہ اس وقت جاری چار مقامات پر دھرنے کے بعد بدھ سے پنجاب کے مزید تین مقامات پر دھرنا دیا جائے گا۔ واضح رہے کہ

اس وقت کسان فیروز پور، ترن تاران، امرتسر اور ہوشیار پور میں پٹریوں پر بیٹھے ہوئے ہیں۔

نئی دہلی: بھارت میں کسان تحریک کے دوران ایک اور کسان نے جان دے دی۔

تفصیلات کے مطابق کسان تحریک کے دوران دہلی بارڈر پر ایک اور خود کشی کا واقعہ سامنے آ گیا، حصار کے کسان نے مودی سرکار کے ظالمانہ زرعی قوانین کے خلاف احتجاج کرتے ہوئے جان دے دی۔

خود کشی کرنے والا کسان راج بیر زرعی قوانین کے خلاف دہلی کی سرحد پر جاری کسانوں کے احتجاج کا حصہ تھا، جہاں پنجاب، ہریانہ اور اتر پردیش کے ہزاروں کسان 100 سے زائد دنوں سے احتجاج کر رہے ہیں۔

رپورٹس کے مطابق ہریانہ کے 55 سالہ کسان نے اتوار کے روز ٹیکری بہادر گڑھ بارڈر پر خود کشی کی، پولیس کا کہنا ہے کہ متوفی شخص کی شناخت ضلع حصار کے راج بیر کے طور پر ہوئی ہے، جس نے ایک درخت پر پھانسی لگا کر جان دی۔

بھارت کسان تحریک، 100 دن میں کتنے کسان ہلاک ہوئے؟

دہلی بارڈر پر کسانوں کی خود کشی کے واقعات میں مسلسل اضافہ ہو رہا ہے، اس سے قبل بھی درجنوں کسان خود کشی کر چکے ہیں، لیکن مودی سرکار کسانوں کے مطالبات قبول کرنے کو تیار نہیں۔

کسان مودی حکومت سے تینوں زرعی قوانین واپس لینے کا مطالبہ کر رہے ہیں، ان کا یہ بھی مطالبہ ہے کہ حکومت ایم ایس پی پر قانونی ضمانت دے، لیکن حکومت کسانوں کے مطالبات کو سننے کے لیے تیار نہیں۔

حکومت کا کہنا ہے کہ وہ تینوں زرعی قوانین واپس نہیں لے گی، کاشت کاروں کا کہنا ہے کہ جب تک مطالبات نہیں مانے جاتے تب تک احتجاج جاری رہے گا۔

نئی دہلی: بھارت میں ظالمانہ زرعی قوانین کے خلاف کسانوں کی جاری تحریک کو آج 100 دن مکمل ہو گئے ہیں، ان سو دنوں میں اب تک 255 کسان جانوں سے ہاتھ دھو چکے ہیں۔

تفصیلات کے مطابق آج کسان تحریک کے سو دن مکمل ہونے پر کانگریس نے حکومت پر تنقید کرتے ہوئے کہا ہے کہ زرعی قوانین کے خلاف کسان سو دنوں سے دہلی کی سرحدوں پر احتجاج کر رہے ہیں لیکن حکومت کے کانوں پر جوں تک نہیں رینگ رہی۔

کانگریس کا کہنا ہے کہ زرعی قوانین ملک میں ایک بڑی تحریک کا سبب بن گئے ہیں، کسان ان قوانین کو واپس لینے کے لیے دہلی کی سرحدوں پر سراپا احتجاج ہیں، لیکن مودی سرکار بے حس بنی ہوئی ہے۔

کانگریس کے ترجمان پون کھیڑا نے ہفتے کے روز پریس کانفرنس میں کہا کہ 100 دن تک جاری رہنے والے کسانوں کے مظاہرے کے دوران 255 کسان ہلاک ہو چکے ہیں۔

کسان تحریک کا 100 واں روز، کسان تنظیموں کا یوم سیاہ

انھوں نے کہا حکومت نے کسانوں کے مطالبات پر آنکھیں بند کر رکھی ہیں، مودی نے وعدہ کیا تھا کہ کسانوں کی پریشانی کا حل صرف ایک فون کی دوری پر ہے، لیکن کسان مودی کے فون کال کا انتظار کر کے تھک چکے ہیں۔

واضح رہے کہ آج بھارت میں مودی سرکار کے لائے گئے ظالمانہ زرعی قوانین کے خلاف کسان تحریک کو 100 روز مکمل ہو گئے ہیں، جس پر کسان تنظیموں نے یوم سیاہ منایا، کسانوں کی یہ تحریک 26 نومبر کو شروع ہوئی تھی، ہزاروں کی تعداد میں پنجاب اور ہریانہ کے کسان دہلی سے متصل سرحدوں کے آس پاس دھرنا دے کر تحریک چلا رہے ہیں۔

نئی دہلی: بھارتیہ کسان یونین کے رہنما راکیش ٹکیت نے اعلان کیا ہے کہ حکومت کے ظالمانہ زرعی قوانین کے خلاف اب 4 لاکھ نہیں بلکہ 40 لاکھ ٹریکٹرز کی ریلی نکلے گی۔

بھارتی میڈیا کے مطابق ریاست ہریانہ کے شہر کروکشیتر میں منگل کے روز بلائی گئی کسان مہا پنچایت میں کسانوں سے خطاب کرتے ہوئے بھارتیہ کسان یونین کے لیڈر راکیش ٹکیت نے کہا کہ کسان تحریک اب آگے بڑھتی رہے گی اور یہ پورے ملک میں پھیلے گی۔

انھوں نے ساتھ ہی یہ اعلان کیا کہ اب چار لاکھ نہیں بلکہ چالیس لاکھ ٹریکٹرز کی ریلی نکلے گی، ہم مظاہرہ کرتے ہیں، جملے باز نہیں ہیں۔یاد رہے کہ بھارت میں کئی ماہ سے احتجاج کرنے والے کسانوں نے یوم جمہوریہ پر ٹریکٹر ریلی نکالی تھی اور تمام رکاوٹیں توڑ کر دارالحکومت نئی دہلی میں داخل ہوگئے تھے، بعد ازاں لال قلعے پر سکھ مظاہرین نے اپنا جھنڈا بھی لہرا دیا تھا۔

واضح رہے کہ راکیش ٹکیٹ کا اشارہ وزیر اعظم نریندر مودی کے بیان کی طرف تھا، انھوں نے کسان تحریک سے متعلق اپنے ایک بیان میں ’آندولن جیوی‘ لفظ کا استعمال کیا تھا جس پر کئی لوگوں کا اعتراض سامنے آ چکا ہے۔

ٹریکٹر ریلی : ’’مودی سرکار نے ایک اور کسان کی جان لے لی‘‘

کسان لیڈر نے اپنے بیان میں کہا کہ وزیر اعظم نے جو آندولن جیوی کہا ہے، ہم مظاہرہ کرتے ہیں، جملے باز نہیں ہیں، ایم ایس پی پر قانون بننا چاہیے وہ نہیں بن رہا، اور تینوں سیاہ قوانین ختم نہیں ہو رہے ہیں۔

انھوں نے مزید کہا وزیر اعظم نے 2011 میں کہا تھا کہ ملک میں ایم ایس پی پر قانون بنے گا، یہ جملے بازی تھی۔

واضح رہے کہ مودی نے گزشتہ روز کسانوں کی تحریک کے بارے میں طنز کرتے ہوئے مظاہرین کو آندولن جیوی قرار دیا تھا یعنی ایسے شر پسند جو کہیں بھی تحریک دیکھ کر شور شرابا کرنے نکل پڑتے ہیں۔

نئی دہلی: بھارتیہ کسان یونین نے مودی حکومت کو الٹی میٹم دیا ہے کہ 2 اکتوبر تک ظالمانہ زرعی قوانین واپس لیے جائیں۔

تفصیلات کے مطابق زرعی قوانین کی واپسی کے لیے مودی حکومت کو 2 اکتوبر تک کا وقت دے دیا گیا، بھارتیہ کسان یونین کے ترجمان نے مودی حکومت سے کہا ہے کہ اگر اس تاریخ تک تینوں قوانین واپس نہیں لیے جاتے تو آگے کا لائحہ عمل تیار کیا جائے گا۔

ترجمان نے واضح کیا کہ ہم دباؤ میں حکومت کے ساتھ بات چیت نہیں کریں گے، ہمارا احتجاج تب تک جاری رہے گا جب تک سبھی قوانین واپس نہیں لے لیے جاتے اور ایم ایس پی کو قانونی درجہ نہیں مل جاتا۔

واضح رہے کہ آج بھارت بھر میں متنازعہ زرعی قوانین کے خلاف کسانوں نے پہیہ جام ہڑتال (چکا جام) کرتے ہوئے ملک کی اہم اور مرکزی شاہراہوں کو ٹریکٹرز کھڑے کر کے آمد و رفت کے لیے بند کر دیا تھا جس کے باعث بدترین ٹریفک جام ہوگیا اور حکومتی افسران مظاہرین سے مذاکرات کے لیے پہنچ گئے۔

دہلی پولیس کا کسانوں کی مٹی پر قبضہ، وجہ جان کر آپ حیران رہ جائیں گے

رپورٹ میں بتایا گیا ہے کہ چکا جام انتہائی کامیاب رہا، دوپہر 12 بجے سے 3 بجے تک کیے گئے چکا جام میں کوئی ناخوش گوار واقعہ بھی پیش نہیں آیا۔

بھارتیہ کسان یونین کے ترجمان راکیش ٹکیت نے میڈیا سے بات چیت کرتے ہوئے کہا حکومت کے ساتھ اب مشروط بات چیت ہوگی، مطالبات پورے ہونے کے بعد ہی کسان گھر واپس جائیں گے، ورنہ دھرنے پر بیٹھے رہیں گے۔

انھوں نے مطالبہ کیا کہ حکومت جلد سبھی قانون واپس لے اور ٹریکٹر والوں کو نوٹس بھیجنے کی حرکت بند کی جائے۔