دنیا بھر میں خواتین کے خلاف ہونے ہونے والے جرائم کو مدنظر رکھتے ہوئے خواتین کو مارشل آرٹس سیکھنے کی ترغیب دی جارہی ہے، اور حال ہی میں وائرل ہونے والی ایک ویڈیو نے اس کی تصدیق کردی۔
سوشل میڈیا پر وائرل اس ویڈیو میں ایک لڑکی نے خود پر حملہ کرنے والے دو افراد کے دانت کھٹے کردیے۔
ویڈیو سے یہ معلوم نہیں ہورہا کہ یہ ویڈیو کس شہر یا ملک کی ہے، البتہ ویڈیو میں ریستوران کا منظر دکھائی دے رہا ہے۔
سی سی ٹی وی کیمرے کی ریکارڈڈ اس ویڈیو میں دیکھا جاسکتا ہے کہ ایک ویٹرس دو کسٹمرز کو سرو کر رہی ہے لیکن ایک کسٹمر اٹھ کر اس کا ہاتھ کھینچتا ہے۔
ویٹرس فوری طور پر اپنا ہاتھ چھڑاتی ہے اور مارشل آرٹس کے داؤ پیچ سے لمحے بھر میں اسے ڈھیر کردیتی ہے۔
اس دوران دوسرا شخص اٹھ کر کچھ کرنے کی کوشش کرتا ہے لیکن ویٹرس کی لات کھا کر کرسی پر گر جاتا ہے، اس کے بعد وہ کرسی اٹھا کر ویٹرس پر حملہ کرتا ہے، ویٹرس نہ صرف کرسی روک لیتی ہے بلکہ اسی سے دوسرے شخص کو بھی سبق سکھاتی ہے۔
یہ ساری کارروائی بمشکل ایک منٹ کے اندر ہوئی۔
سوشل میڈیا پر وائرل اس ویڈیو پہ صارفین نے ویٹرس کی مارشل آرٹس کی مہارت پر حیرانی کا اظہار کیا۔
لوگوں نے کہا کہ بدتمیز کسٹمرز کو ویٹرس نے بالکل صحیح سبق سکھایا۔
