ARYNews.tv | Urdu – Har Lamha Bakhabar

Tag: کسٹم حکام

  • کراچی میں کسٹم حکام کی فائرنگ سے شہری شدید زخمی

    کراچی میں کسٹم حکام کی فائرنگ سے شہری شدید زخمی

    کراچی: شہر قائد کے علاقے سرجانی ٹاؤن میں کسٹم حکام کی فائرنگ سے شہری شدید زخمی ہوگیا، پویس نے انچارج سمیت 4 کسٹم اہلکاروں کو حراست میں لے لیا۔

    تفصیلات کے مطابق کراچی کے علاقے سرجانی ٹاؤن میں کسٹم حکام کی فائرنگ سے زخمی ہونے والے شخص کو تشویش ناک حالت میں عباسی شہید اسپتال منتقل کر دیا گیا جہاں اسے طبی امداد دی جا رہی ہے۔ زخمی شہری مراد کو کلاشنکوف کی گولی لگی۔

    پولیس کے مطابق چھالیہ اسمگلنگ کرنے والے دو ملزمان بھی گرفتار کر لیےگئے۔پولیس نے بتایا کہ کسٹم حکام کو لینڈ کروزر میں چھالیہ اسمگلنگ کی اطلاع ملی تھی، کسٹمز عملے نےگاڑی روکنے کی کوشش کی مگر نہ رکی۔کسٹمز اہلکاروں نے گاڑی نہ رکنے پر فائرنگ کی جس کے نتیجے میں کچھ گولیاں گاڑی پر اور ایک گزرتے راہگیر کو لگی۔

    پولیس حکام نے بتایا کہ انچارج سمیت 4 کسٹم اہلکاروں کو حراست میں لیا ہے، کسٹم حکام کے پاس سرکاری کلاشنکوفیں تھی۔

  • لاہور ایئرپورٹ پر بڑی کارروائی، شراب کی اسمگلنگ ناکام

    لاہور ایئرپورٹ پر بڑی کارروائی، شراب کی اسمگلنگ ناکام

    لاہور: علامہ اقبال انٹرنیشنل ایئرپورٹ پر کسٹمز حکام نے کاررائیوں کے دوران شراب اور سگریٹ کی اسمگلنگ ناکام بنا دی۔

    تفصیلات کے مطابق لاہور کے علامہ اقبال انٹرنیشل ایئرپورٹ پر کسٹم حکام نے بنکاک سے آنے والے مسافر کے سامان سے شراب کی 81 بوتلیں برآمد کرلیں۔ مسافر مظہر اقبال دوستوں کے ہمراہ بنکاک سے لاہور آ رہا تھا۔

    کسٹم حکام کی جانب سے دوسری کارروائی لاہور سے مانچسٹر جانے والی پرواز میں کی گئی، مسافر محمد یعقوب کے سامان سے سگریٹ کے 60 بنڈل برآمد کیے گئے۔

    لاہور ایئرپورٹ پر مسافر سے پستول کی گولیاں برآمد

    یاد رہے کہ رواں ماہ 8 فروری کو لاہور ایئرپورٹ پر مسافر سے پستول کا میگزین اور 21 گولیاں برآمد کی گئی تھیں، مسافر حسن محمود بٹ پی کے 263 سے ابوظہبی جا رہا تھا، مسافر نے غلطی سے اسلحہ بیگ میں لانے کا اعتراف کیا تھا۔

    اس سے قبل گزشتہ 13 جنوری کو علامہ اقبال انٹرنیشنل ایئرپورٹ پر تعینات سیکورٹی اہلکاروں نے خاتون مسافر کے سامان سے پستول کی گولیاں برآمد کی تھیں۔

    نجی ایئرلائن کی پرواز سے جدہ جانے والی خاتون کا کہنا تھا کہ وہ بیگ ان کے بھائی کا ہے جس کے پاس نائن ایم ایم پستول کا لائسنس بھی ہے، غلطی سے گولیاں اس بیگ میں رہ گئیں۔

  • پاکستان سے فیس ماسک اسمگلنگ کی بڑی کوشش ناکام

    پاکستان سے فیس ماسک اسمگلنگ کی بڑی کوشش ناکام

    لاہور: کرونا وائرس کے بعد بڑھتی مانگ کے پیش نظر لوگ فیس ماسک بھی اسمگل کرنے لگے، تاہم کسٹم حکام نے علامہ اقبال انٹرنیشنل ایئر پورٹ پر فیس ماسک اسمگلنگ کی بڑی کوشش ناکام بنا دی۔

    اے آر وائی نیوز کے مطابق کسٹم حکام نے لاہور ایئرپورٹ پر ڈیڑھ من فیس ماسک پکڑ لیے، بڑی مقدار میں فیس ماسک لاہور سے بنکاک اسمگل کیے جا رہے تھے، ماسک دو مسافروں کے سامان سے برآمد کیے گئے۔

    ذرایع کا کہنا ہے کہ فیصل آباد کے رہایشی عزیز اکبر اور ریحان اظہر نامی مسافر تھائی ایئر کی پرواز ٹی جی 346 سے بنکاک جا رہے تھے، دونوں مسافر اے ایس ایف اور اے این ایف کے کاؤنٹرز سے بہ آسانی گزر گئے تھے تاہم کسٹم ویجیلنس عملے نے مسافروں کے سامان کی چیکنگ کے دوران بیگ میں سے فیس ماسک برآمد کر لیے۔

    ذرایع کے مطابق کسٹم عملے نے دونوں مسافروں کے سامان سے تقریباً ڈیڑھ من فیس ماسک برآمد کیے، جو پانچ کارٹنوں میں بند تھے، یہ کارٹن دو بڑے بیگز میں رکھ کر لے جائے جا رہے تھے، برآمد شدہ فیس ماسک کسٹم حکام نے قبضے میں لے لیے۔

    خیال رہے کہ کرونا وائرس کے پیش نظر فیس ماسک کی ایئر پورٹ سے بیرون ملک ترسیل پر پابندی عائد ہے۔

  • کسٹم والے سعودی عرب سے بھیجے گئے قرآن پاک کے نسخے نیلام کریں گے

    کسٹم والے سعودی عرب سے بھیجے گئے قرآن پاک کے نسخے نیلام کریں گے

    نئی دہلی: سعودی عرب کی جانب سے بھارتی ریاست کیرالہ کے لیے بھیجے گئے قرآن پاک کے نسخے 21 جنوری 2020 کو نیلام کیے جائیں گے، نسخے کسٹم ڈیوٹی ادا نہ کیے جاسکنے کے سبب محکمہ کسٹم کی تحویل میں ہیں۔

    برطانوی میگزین کی رپورٹ کے مطابق سعودی عرب نے 6 ماہ قبل ریاست کیرالہ کے مسلمانوں کے لیے قرآن پاک کے نسخے تحفے کے طور پر بھیجے تھے۔

    بتایا گیا تھا کہ کیرالہ میں سیلاب سے قرآن پاک کے ہزاروں نسخے ضائع ہوئے تھے، بعد ازاں سعودی عرب کی جانب سے اس کی تلافی کے لیے کیرالہ کے لوگوں کو قرآن پاک کے نسخے مفت بھیجے گئے۔

    سعودی عرب نے کیرالہ کے ملاپورم شہر کے کالج کے نام سے یہ قرآن پاک بھیجے تھے تاہم کالج ان کی کسٹم ڈیوٹی ادا کرنے سے قاصر رہا۔

    جس کے بعد بھارتی محکمہ کسٹم نے 25 ٹن وزن کے قرآن پاک کے یہ نسخے نیلام کرنے کا فیصلہ کرلیا ہے۔ محکمہ کسٹم نے کالج سے 8 لاکھ بھارتی روپے بطور کسٹم ڈیوٹی کے طور پر طلب کیے تھے جس کا کالج انتظام نہیں کرسکا۔

    ملاپورم میں عربک کالج دارالعلوم کے ڈین عبدالسلام آئیبی نے بتایا کہ کسٹم ڈیوٹی بہت زیادہ ہے، لہٰذا ہم نے یہ فیصلہ کیا ہے کہ نیلامی کے ذریعے یہی نسخے بہت معمولی قیمت پر چھڑا لیے جائیں گے۔

  • اسمگلنگ کی روک تھام کے لیے کراچی پولیس اورکسٹم کا مل کام کرنے کا فیصلہ

    اسمگلنگ کی روک تھام کے لیے کراچی پولیس اورکسٹم کا مل کام کرنے کا فیصلہ

    کراچی: شہر قائد میں اسمگلنگ کی روک تھام کے لیے کسٹم حکام اور پولیس مل کر کام کرنےکا فیصلہ کرلیا ہے، کسٹم حکام کی سفارش پر فوری فورس مہیا کی جائے گی۔

    تفصیلات کے مطابق کراچی میں غیرقانونی درآمد سامان کی روک تھام کےلیےنئی حکمت عملی تیار کرلی گئی ہے، شہرکےداخلی وخارجی راستوں پرناکہ بندی کا مزیدبڑھانےکافیصلہ کیا گیا ہے۔

    کسٹم اور پولیس حکام نے فیصلہ کیا ہے کہ کراچی کے داخلی مقامات یعنی گڈاپ،موچکو،ٹول پلازہ اور گھگھرپھاٹک پرمشترکہ کام کیاجائے گا۔ اس حوالے کراچی پولیس چیف نے احکامات جاری کردیے ہیں۔

    پولیس چیف کراچی غلام نبی میمن نے ہدایت کی ہے کہ کسٹم کی سفارش پرپولیس نفری فوری فراہم کی جائےگی،تمام ڈی آئی جیزاسمگل شدہ سامان کےخلاف کریک ڈاؤن کریں اور برآمد شدہ سامان کسٹم کےحوالےکریں گے۔

    انہوں نے اپنے ماتحت افسران کو جاری کردہ ہدایات میں یہ بھی کہا ہے کہ کارروائیوں کےحوالےسے پولیس افسران فوکل پرسن کوتحریری اطلاع دیں گے۔

    یاد رہے کہ پورٹ سٹی اور سب سے بڑے بین الاقوامی ہوائی اڈے کا حامل شہر ہونے کے سبب اسمگلروں کی توجہ خصوصی طورپر کراچی پر رہتی ہے ، اور کراچی از خود ایک بہت بڑی مارکیٹ ہے۔ ایران سے غیر قانونی طور پر آنے والا ڈیزل بھی کراچی میں ہی فروخت ہوتا ہے اور چمن بارڈر سے آنے والی اسمگلنگ کی اشیا فروخت کرنے والے کراچی میں فروخت کو ہی ترجیح دیتے ہیں۔

    یاد رہے کہ ملک بھر میں اسمگلنگ کی روک تھام کے لیے ایف بی آر نے بھی خصوصی ٹیمیں تشکیل دے رکھیں ہیں اور یہ ٹیمیں شاپنگ پلازہ اور مقامی مارکیٹوں میں جا کر درآمدی سامان کی جانچ پڑتال گزشتہ ماہ سے شروع کرچکی ہیں ۔

    ما ہ اگست میں اس حوالے سے ایف بی آر کی جانب سے جاری کردہ نوٹی فکیشن میں کہا گیا کہ دکانوں پر چیکنگ کے دوران دکانداروں سے درآمدی اشیاء کے دستاویزات طلب کئے جائیں گے۔

  • اب بیرون ملک سے لائے گئے ایک موبائل فون پر بھی ٹیکس دینا ہوگا، کسٹم حکام

    اب بیرون ملک سے لائے گئے ایک موبائل فون پر بھی ٹیکس دینا ہوگا، کسٹم حکام

    اسلام آباد: کسٹم حکام کا کہنا ہے کہ فنانس بل کے بعد اب بیرون ملک سے لائے گئے ایک موبائل پر بھی ٹیکس دیناہوگا ، کوئی بھی موبائل اب ڈیوٹی فری ملک میں نہیں آسکتا۔

    تفصیلات کے مطابق سینیٹ قائمہ کمیٹی انفارمیشن ٹیکنالوجی کا اجلاس روبینہ خالدکی زیرصدارت ہوا، قائمہ کمیٹیوں کےاجلاس قومی اسمبلی اجلاس سے مشروط کرنے پر تحفظات کا اظہار کیا گیا۔

    ایف آئی اے حکام نے سائبرکرائمز سےمتعلق کمیٹی کو بریفنگ دیتے ہوئے کہا عوامی مقامات پر فحاشی کا انسداد ہمارا مینڈیٹ نہیں ہے، مسافروں کے ڈیٹا چوری میں ملوث 10 افراد کو گرفتار کیا۔

    حکام نے بتایا کہ پی ٹی اے نے مسافروں کے لئے ڈربز نظام بنایا تھا، پی ٹی اے کی ویب سائٹ پر مسافر 60 روز میں موبائل رجسٹر کرسکتا ہے، جرائم پیشہ افراد نے مختلف طریقوں سے ڈیٹا چوری کیا۔

    ڈائریکٹر ایف آئی اے نے اجلاس کوبتایا کہ ایف ائی اے کے اپنے لوگوں نے اسمگلرز کیساتھ ڈیٹا شئیر کیا، ایف ائی اے کے 3 ملازمین کو حراست میں لیا گیا ایک کی ضمانت ہوگئی ، لاہور میں 5 لوگوں گرفتار کیا جو موبائل رجسٹر کرتے تھے، کئی شکایات آئیں کہ ان کے ڈیٹا پر پہلے ہی موبائل رجسٹر ہوگیا ہے، پی ٹی اے نے اب تک 15 شکایات ہمیں دی ہیں۔

    سینیٹر روبینہ خالد نے کہا فون لانےوالی کی رجسٹریشن سہولت نہیں رکاوٹ ہے، سسٹم نےلوگوں کی زندگی عذاب کی ہوئی ہے جبکہ سینیٹر رحمان ملک کا کہنا تھا موبائل رجسٹریشن کے سسٹم کومعطل کیا جائے، اوورسیزپاکستانی اب ایک خوف کا شکار ہوگئے ہیں۔

    کسٹم حکام نے بتایا فنانس بل کےبعداب ایک موبائل پربھی ٹیکس دیناہوگا ، چاہےآپ چندگھنٹےکےلئے بیرون ملک جائیں واپسی پرٹیکس دینا ہوگا، کوئی بھی موبائل اب ڈیوٹی فری ملک میں نہیں آسکتا،  60دن تک ملک میں موبائل فری چلایا جاسکتا ہے، 60 دن کے بعد موبائل رجسٹر کرانا ہوگا، موبائل رجسٹرنہیں کرایا جاتا تو خود بخود بند ہوجائےگا۔

  • کراچی: شیرشاہ میں گودام پر چھاپا، 1 لاکھ 40 ہزار سے زائد سگریٹ کے ڈبے برآمد

    کراچی: شیرشاہ میں گودام پر چھاپا، 1 لاکھ 40 ہزار سے زائد سگریٹ کے ڈبے برآمد

    کراچی: اینٹی اسمگلنگ آرگنائزیشن نے شہرِ قائد کے علاقے شیر شاہ میں ایک گودام پر چھاپا مار کر 1 لاکھ 40 ہزار سے زائد سگریٹ کے ڈبے برآمد کر لیے۔

    تفصیلات کے مطابق کراچی کے علاقے شیر شاہ میں ایک گودام سے چھاپے کے دوران اسمگل شدہ لاکھوں کی تعداد میں سگریٹ اور 6 ہزار سے زائد کلو چھالیہ برآمد کر لیا گیا۔

    ڈپٹی کلکٹر کسٹم نے بتایا کہ 22 لاکھ روپے مالیت کے ایک لاکھ 40 ہزار سے زائد سگریٹ کے ڈبے برآمد کیے گئے ہیں۔

    کسٹم آفیسر محمد فیصل کا کہنا ہے کہ 11 لاکھ روپے مالیت کی 6 ہزار کلو اسمگل شدہ چھالیہ بھی برآمد کیا گیا ہے، اسمگل شدہ سامان کی مالیت 33 لاکھ روپے ہے، 2 افراد کو بھی گرفتار کر لیا گیا ہے۔

    یہ بھی پڑھیں:  لاہور: ہیروئن اسمگلنگ میں ملوث جمہوریہ چیک کی ماڈل کو آٹھ سال کی سزا

    یاد رہے کہ 19 مارچ کو وفاقی وزیر برائے بحری امور علی زیدی نے کہا تھا کہ کرپشن اور اسمگلنگ کے خاتمے کے لیے خصوصی نظام لایا جا رہا ہے، پاکستانی بندرگاہوں کو لاس اینجلس اور ہیوسٹن کی طرز پر ترقی دی جائے گی۔

    20 مارچ کو لاہور کی عدالت نے ہیروئن اسمگلنگ کیس میں چیک ریپلک کی ماڈل ٹیریزا ہلسکوا کو 8 برس 8 ماہ قید اور 1 لاکھ 13 ہزار روپے جرمانے کی سزا سنا دی، مجرمہ کو گزشتہ برس جنوری میں گرفتار کیا گیا تھا۔

  • بھارت سے اسمگل کیے جانے والے ٹماٹروں اور انگوروں سے بھرا ٹرک پکڑا گیا

    بھارت سے اسمگل کیے جانے والے ٹماٹروں اور انگوروں سے بھرا ٹرک پکڑا گیا

    اسلام آباد : کسٹم حکام نے کامیاب کارروائی کر کے بھارت سے اسمگل کیے جانے والے ٹماٹروں اور انگوروں سے بھرا ٹرک پکڑ لیا، ملزمان فرار ہونے میں کامیاب ہوگئے۔

    تفصیلات کے مطابق اسلام آباد کے قریب برہان انٹرچینج پر کسٹم حکام نے کشمیر کے راستے بھارت سے اسمگل کیے گئے ٹماٹر،انگور،انار اور دوائیں اسلام آباد اور پنجاب لے جانے کی کوشش ناکام بنا دی۔

    زبانی وفاداری کا دم بھرنے والے مال کے لئےغداری پر اتر آئے، پاکستان پر ٹماٹروں کی پابندی لگانے والا بھارت چوری چھپے کام دکھانے لگا لیکن کسٹم حکام نے اس کی امیدوں پرپانی پھیر دیا۔

    اسلام آباد کے قریب برہان انٹرچینج پر بھارت سے آنے والے کروڑوں روپے کے ٹماٹر اور انگور پکڑ لیے گئے، ان ٹرکوں میں تیرہ ٹن ٹماٹر، بارہ سو پچاس کلو انگور شامل ہیں۔

    مذکورہ کارروائی میں بھارتی دواؤں سے بھرا ٹرک بھی تحویل میں لے لیا گیا، کسٹم حکام کا کہنا ہے کہ سامان تین ٹرکوں میں کشمیر کے راستے اسلام آباد اور پنجاب لایا جا رہا تھا، اسمگلرفرار ہونے میں کامیاب ہوگئے۔

    مزید پڑھیں: بھارتی میڈیا کی بدحواسی، پاکستان کو ٹماٹر فروخت نہ کرنے کے فیصلے کو بریکنگ نیوز بنا دیا

    واضح رہے کہ پلوامہ حملے کے بعد بھارتی میڈیا کی بدحواسی عروج پر پہنچ گئی تھی، بھارتی ٹماٹر پاکستان کو فروخت نہ کرنے کے فیصلے کو بریکنگ نیوز بنا دیا۔

    اپنی رپورٹ میں بتایا کہ بھارتی کسانوں نے اعلان کیا ہے کہ وہ پاکستان کو ٹماٹر برآمد نہیں کریں گے۔ اس خبر کو بھارتی میڈیا نے خوب اچھالا اور بھارت کی پاکستان کےخلاف بڑی کارروائی قرار دے کر شور مچانا شروع کر دیا، بھارتی میڈیا نے کہا کہ پاکستان ہمارے ٹماٹر کھا کر ہم پر حملہ کرتا ہے، اب پاکستان کو ٹماٹر دینےسے انکار کرتے ہیں۔

  • بیرون ملک سے آنے والا 5 موبائل فون لاسکتا ہے، کسٹم حکام

    بیرون ملک سے آنے والا 5 موبائل فون لاسکتا ہے، کسٹم حکام

    اسلام آباد : کسٹم حکام کا کہنا ہے کہ بیرون ملک سے آنے والا  5 موبائل فون لاسکتاہے،  ایک موبائل ڈیوٹی فری ہوگا،4کی کسٹم ڈیوٹی ادا کرنا ہوگی، موبائل فون 30 دن میں رجسٹر نہیں کرایاجاتا تو  10فیصدجرمانہ ہوگا۔

    تفصیلات کے مطابق سینیٹ کی قائمہ کمیٹی برائےآئی ٹی کاروبینہ خالدکی زیرصدارت اجلاس ہوا، کسٹم حکام نے کمیٹی کوموبائل رجسٹریشن کے عمل سے متعلق بریفنگ دی ۔

    کسٹم حکام نے بریفنگ دیتے ہوئے کہا بیرون ملک سے آنے والا 5 موبائل فون لاسکتاہے، ایک موبائل ڈیوٹی فری ہوگا،4کی کسٹم ڈیوٹی اداکرناہوگی، بیرون ملک سے آنے والے کو 30 دن میں موبائل رجسٹر کرانا ہوں گے، موبائل فون 30 دن میں رجسٹر نہیں کرایا تو 10 فیصد جرمانہ ہوگا۔

    حکام نے مزید بتایا کسٹم نے ایک ماہ میں ایئرپورٹ پر27 ہزارفون رجسٹرکیے، 40 فیصد فون اسمگل ہوکر پاکستان آرہےتھے، ڈی آئی آربی ایس نظام سےموبائل فون اسمگلنگ کاخاتمہ ہوگا۔

    کمیٹی نے سفارش کی موبائل فون رجسٹریشن کی ڈیڈلائن کوبڑھایاجائے۔

    مزید پڑھیں : موبائل رجسٹریشن کی تاریخ میں 15 جنوری تک توسیع

    یاد رہے چند روز قبل چیئرمین پی ٹی اے محمد نوید نے اس بات کی تصدیق کی تھی کہ موبائل رجسٹریشن کی تاریخ میں 15 جنوری تک توسیع کردی گئی ہے، رجسٹریشن کی تاریخ میں توسیع کا فیصلہ کابینہ کی منظوری کے بعد کیا گیا۔

    اس سے قبل گذشتہ سال نومبر میں وفاقی کابینہ نے اسمگل شدہ موبائل فونز کی روک تھام کے لیے نئی پالیسی تشکیل دی تھی ، وزیر مملکت برائے ریونیو حماد اظہر کے مطابق بیرون ملک سے ذاتی استعمال کے لیے فون لانے والے افراد ہر سال ایک فون بغیر ڈیوٹی کے لاسکیں گے اور مجموعی طور پر ایک سال میں پانچ فون لانے کی اجازت ہوگی تاہم اگر پاکستان میں قیام 30 دن سے زیادہ کا ہو تو ان چار فونز پر کسٹم ڈیوٹی ادا کرنی ہوگی۔

    وزیر مملکت برائے ریونیو کا کہنا تھا کہ وفاقی کابینہ نے اس بات کی منظوری دی ہے کہ نئے اور استعمال شدہ موبائل فون کی درآمد پر پالیسی میں نرمی کی جائے، استعمال شدہ فون کی درآمد پر پابندی اُٹھانے کا بھی فیصلہ کیا گیا ہے، اگر وہ ماڈل پی ٹی اے کے منظور شدہ ہوں اور ان پر کسٹم ڈیوٹی ادا کیے جائیں۔

  • کراچی ایئرپورٹ سے منشیات اسمگلنگ کی کوشش ناکام

    کراچی ایئرپورٹ سے منشیات اسمگلنگ کی کوشش ناکام

    کراچی : شہرقائد میں کسٹم حکام نے جناح انٹرنیشنل ایئرپورٹ سے بیرون ملک منشیات اسمگل کرنے کی کوشش ناکام بنا دی۔

    تفصیلات کے مطابق جناح انٹرنیشنل ایئرپورٹ پرتعینات عملے نے سعودی ایئرلائن سے بیرون ملک جانے والے مسافر کے بیگ سے 970 گرام ایمفٹا مین منشیات برآمد کر لی۔

    ترجمان کسٹم نے بتایا کہ پاکستانی مسافرعلی مراد کے قبضے سیایک کروڑ روپے مالیت کی 970 گرام ایمفٹا مین منشیات برآمد کرلی۔

    ترجمان کے مطابق منشیات کی نشاندہی مسافرکے بیگ کی اسکریننگ کے دوران ہوئی جس کی قیمت ایک کروڑ روپے سے زائد ہے، ملزم کو گرفتار کرکے اے این ایف کے حوالے کردیا گیا۔

    یاد رہے کہ گزشتہ ماہ اسلام آباد ایئرپورٹ پر اے این ایف نے کارروائی کرتے ہوئے غیر ملکی خاتون سمیت 4 افراد کو گرفتار کرکے آئس ہیروئن برآمد کی تھی۔

    اسلام آباد ایئرپورٹ پرمسافر کے قبضے سے ہیروئن کے کیپسول برآمد

    واضح رہے کہ رواں سال 12 اکتوبرکو اینٹی نارکوٹکس فورس نے اسلام آباد ایئرپورٹ پرکارروائی کرتے ہوئے بیرون ملک جانے والے مسافر کو گرفتار کرکے ہیروئن کے کیپسول برآمد کیے تھے۔

    اے این ایف حکام کے مطابق گرفتار ملزم رحمت اللہ غیرملکی ایئرلائن کی پروازکیو آر633 سے دوحہ جا رہا تھا۔