اسلام آباد : کل بروزجمعہ کشمیری عوام کے ساتھ اظہار یکجہتی کے لئے دن 12بجےقومی ترانہ اور پھر آزاد کشمیر کا ترانہ بجایا جائےگا، وزیراعظم پارلیمنٹ ہاؤس کے باہر نوجوانوں، طلباء سے خطاب کریں گے۔
تفصیلات کے مطابق وفاقی حکومت نے کل بروزجمعہ کشمیری عوام کے ساتھ اظہار یکجہتی کا پروگرام تیار کرلیا ہے، جس کے تحت کل دن بارہ بجے سے بارہ بج کر تین منٹ تک قومی ترانا بجایا جائے گا اور بعد میں آزادکشمیر کا ترانا بجایا جائے گا بارہ سے ساڑھے بارہ بجے تک تمام انسان،گاڑیاں رک جائیں گی، ہنگامی صورت حال یا ایمرجنسی کی صورت میں گاڑیوں کی روانگی جاری رہے گی۔
وزیراعظم عمران خان ارکان اسمبلی کے ہمراہ پارلیمنٹ ہاؤس کے سامنے آئیں گے اور پارلیمنٹ ہاؤس کے باہر نوجوانوں، طلباء سے خطاب کریں گے۔
پروگرام کے مطابق ملک بھرمیں عوام گھروں، دفاترسے باہر نکل کر گلیوں میں جمع ہوں گے، مساجد میں نماز جمعہ کے دوران کشمیری بہن بھائیوں کے لئے خصوصی دعائیں ہوں گی۔
دوپہر 2 بجے سے شام 5 بجے تک ریلیاں نکالی جائیں گی، ریلیوں میں پاکستان اور کشمیر کے پرچم لہرائے جائیں گے، ریلیوں کی قیادت ارکان قومی و صوبائی اسمبلی کریں گے جبکہ سول سوسائٹی اور اسکول کے طلباء کی بڑی تعداد ریلیوں میں شریک ہوگی۔
مزید پڑھیں : کشمیریوں سے اظہار یکجہتی، وزیراعظم عمران خان کی عوام سے کل باہر نکلنے کی اپیل
خیال رہے وزیر اعظم عمران خان نے کشمیریوں سے یکجہتی کے اظہار کے لئے تمام پاکستانیوں سے کل بارہ سے ساڑھے بارہ بجےکے دوران باہر نکلنے کی اپیل کرتے ہوئے کہا ہے کہ بھارت کےفاشسٹ قبضے اور کرفیو کیخلاف قوم کشمیریوں کیساتھ ہے۔
دوسری جانب کشمیرآور’ پراسلام آباد کے تمام چوراہوں پر ٹریفک سگنل بارہ بجے ریڈ کرنے کا فیصلہ کیا گیا ہے، اشاروں اور شاہراہوں پر کشمیریوں سے اظہاریکجہتی کیلئے احتجاج کیا جائے گا۔
واضح رہے یاد رہے وزیراعظم نے اپنے قوم سے خطاب میں کہا تھا کہ آخری سانس تک کشمیریوں کا ساتھ دیں گے، پاکستان کشمیر کے لیےہر حد اور ہر سطح تک جائےگا، اس جمعے سے ہر ہفتے آدھا گھنٹہ کشمیری بھائیوں کے نام کریں گے۔
