ARYNews.tv | Urdu – Har Lamha Bakhabar

Tag: کشمیر ڈے

  • پاکستان کا نیویارک اسٹیٹ اسمبلی میں یوم کشمیر امریکا منانے کی قرارداد کا خیر مقدم

    پاکستان کا نیویارک اسٹیٹ اسمبلی میں یوم کشمیر امریکا منانے کی قرارداد کا خیر مقدم

    اسلام آباد: پاکستان نے نیویارک اسٹیٹ اسمبلی میں 5 فروری کو یوم کشمیر امریکا منانے کی قرارداد کی منظوری کا خیر مقدم کیا ہے۔

    ترجمان دفتر خارجہ نے کہا نیویارک اسٹیٹ اسمبلی میں 5 فروری کو یوم کشمیر امریکا منانے کی قرارداد منظور کی گئی ہے، پاکستان اس کا خیر مقدم کرتا ہے۔

    دفتر خارجہ نے کہا قرارداد یوم یک جہتئ کشمیر کے موقع پر منظور کی گئی جو خوش آئند ہے، اس میں کہا گیا ہے کہ پاکستانی اور کشمیری، بھارتی زیر قبضہ کشمیر میں حق خود ارادیت کی حمایت کا اعادہ کرتے ہیں۔

    دفتر خارجہ نے کہا کہ یہ قرارداد کشمیریوں کی جدوجہد کو تقویت دیتی اور حوصلے کو سراہتی ہے، اور کشمیریوں کی منفرد ثقافت، مذہبی شناخت کو تسلیم کرتی ہے۔

    ترجمان نے کہا یہ قرارداد انسانی حقوق، مذہبی حقوق اور نقل و حرکت کی آزادیوں کی عکاس ہے، قرارداد کشمیریوں کے حقیقی جذبات اور حق خود ارادیت کی بھی عکاس ہے۔

    ترجمان کا کہنا تھا کہ قرارداد میں کہا گیا ہے کہ کشمیریوں کو یو این قراردادوں کے تحت حق استصواب کی ضمانت دی گئی ہے، اور یہ قرارداد اس کا ثبوت ہے کہ بھارت کشمیریوں کے انسانی حقوق کی پامالیاں چھپا نہیں سکتا۔

    ترجمان نے کہا نیویارک اسٹیٹ اسمبلی میں اس قرارداد کی منظوری میں رکن اسمبلی نادر سیگاہ کا کردار قابل قدر ہے، قرارداد ک منظوری میں امریکی پاکستان اڈوکیسی گروپ کا کردار بھی سراہتے ہیں۔

  • کل کشمیریوں کا خاص دن، مودی سرکار کی پریشانیوں میں اضافہ، اشرف صحرائی گرفتار

    کل کشمیریوں کا خاص دن، مودی سرکار کی پریشانیوں میں اضافہ، اشرف صحرائی گرفتار

    سری نگر: دنیا بھر میں کشمیری کل 13 جولائی کو یوم شہدائے کشمیر منائیں گے، دنیا بھر میں ایک بار پھر نہتے کشمیریوں پر بھارتی فورسز کے مظالم آشکار کیے جائیں گے، جس سے مودی سرکار ایک بار پھر تنقید کی زد پر ہوگی۔

    حریت رہنماؤں نے کل یوم شہدائے کشمیر کے موقع پر مقبوضہ وادی میں مکمل ہڑتال کی کال دے دی ہے۔

    13 جولائی 1931 کو سرینگر میں 22 کشمیریوں کو شہید کیا گیا تھا، پاکستان اور بیرون ممالک مقیم کشمیریوں کی جانب سے کل ریلیاں نکالی جائیں گی، جن میں بھارت کے مظالم اور قبضے کے حوالے سے مسئلہ کشمیر کو اجاگر کرتے ہوئے عالمی برادری سے اقوام متحدہ کی قراردادوں کے مطابق مسئلہ کشمیر حل کرنے کے پُر زور مطالبات کیے جائیں گے۔

    حریت رہنما سید علی گیلانی نے ایک ٹویٹ میں یوم شہدا منانے کی اپیل کی اور کہا کہ کشمیری بھارتی مظالم کے آگے کبھی نہیں جھکیں گے، اور آزادی کے لیے جدوجہد جاری رہے گی۔

    سربرینیکا میں قتل عام کا دن، ’ہمیں خطرہ ہے مقبوضہ کشمیر میں بھی ایسا افسوسناک سانحہ نہ ہو‘

    دوسری طرف وادی میں بھارتی فورسز کی جارحیت جاری ہے، حریت رہنما اشرف صحرائی کو گرفتار کر لیا گیا ہے، اشرف صحرائی کو صبح سویرے سرینگر میں ان کے گھر سے گرفتار کیا گیا، قابض فورسز اشرف صحرائی کے بیٹے جنید صحرائی کو پہلے ہی نام نہاد آپریشن کے دوران شہید کر چکی ہے۔

    دنیا کی انوکھی اذان

    یوم شہدا ہر سال 13 جولائی 1931 کو برطانوی دور حکومت میں سرینگر کی سینٹرل جیل کے سامنے فائرنگ سے شہید ہونے والوں کی یاد میں منایا جاتا ہے، قرآن پاک کی بے حرمتی کے ایک واقعے کے خلاف مسلمان احتجاج کر رہے تھے، تو ان پر مقدمات بنا دیے گئے، عبدالقدیر نامی کشمیری رہنما کو بھی گرفتار کیا گیا، جن کا ٹرائل جیل میں ہو رہا تھا۔

    گرفتار کشمیریوں کے ساتھ اظہار یک جہتی کے لیے سینٹرل جیل سرینگر کے باہر کشمیر کے مسلمان سراپا احتجاج بن گئے، اس دوران ظہر کی نماز کا وقت ہوا تو مظاہرین نے اذان بلند کی، ڈوگرہ حکمرانوں سے اللہ کی بڑائی برداشت نہ ہوئی، ڈوگرہ فوجیوں نے اذان دینے والے پر فائرنگ کھول دی جس سے وہ نوجوان شہید ہو گیا۔ اس کے بعد ایک اور نوجوان نے اٹھ کر اذان جاری رکھی اور اسے بھی فوجیوں نے گولی مار کر شہید کر دیا۔ اس طرح سے اذان مکمل ہونے تک 22 نوجوانوں نے اپنی جانوں کی قربانی دے دی۔

    اس ایمان افروز واقعے نے پوری ریاست کشمیر میں آگ لگا دی اور کشمیر میں جدوجہد آزادی کا باقاعدہ آغاز ہو گیا۔

  • پی آئی اے کی بدولت یوم کشمیر فضاؤں میں بھی منایا گیا

    پی آئی اے کی بدولت یوم کشمیر فضاؤں میں بھی منایا گیا

    کراچی: فضاؤں میں بھی کشمیری پرچموں کی بہار آ گئی، پی آئی اے کی بدولت یوم یک جہتئ کشمیر زمین سے بلند فضاؤں میں بھی منایا گیا۔

    اے آر وائی نیوز کے مطابق قومی ایئر لائن پی آئی اے کی جانب سے مظلوم کشمیری عوام سے یک جہتی کا اظہار اپنی پروازوں میں بھی کیا گیا، اس سلسلے میں اندرون اور بیرون ملک جانے والی پروازوں میں فضائی میزبانوں کی جانب سے کشمیر سے اظہار یک جہتی کے اعلانات کیے گئے۔

    پی آئی اے کے عملے نے دوران پرواز مسافروں میں کشمیری پرچم بھی تقسیم کیے، پروازوں کے اندر کشمیری پرچم لہراتے دکھائی دیے، اور بھرپور طریقے سے کشمیر ڈے منایا گیا۔

    پی آئی اے کا یوم کشمیر پر مسافروں کے لیے انوکھی پیش کش کا اعلان

    فلائٹ اٹینڈنٹ کشمیر کے سلسلے میں اعلان کرتے اور پرچم بانٹتے ہوئے

    مسافروں کی جانب سے بھی جوش و جذبے کا اظہار کیا گیا اور انھوں نے کشمیری پرچم تھام کر کشمیریوں سے اظہار یک جہتی کیا۔

    دنیا بھر میں آج یوم یک جہتی کشمیر منایا جا رہا ہے، پاکستان میں ایک منٹ کی خاموشی

    خیال رہے کہ آج مظلوم کشمیریوں پر بھارتی فوج کی جانب سے مسلسل اور بدترین مظالم کے خلاف دنیا بھر میں یوم یک جہتی کشمیر منایا گیا، کشمیری شہدا کوخراج عقیدت پیش کرنے کے لیے صبح 10 بجے ملک بھر میں ایک منٹ کی خاموشی بھی اختیار کی گئی۔

    وزیر اعظم عمران خان نے آزاد کشمیر کا خصوصی دورہ کیا اور وہاں آزاد کشمیر کی قانون ساز اسمبلی سے خطاب کیا، انھوں نے کہا کہ مودی نے 6 ماہ پہلے جو قدم اٹھایا تھا، میرا ایمان ہے کشمیر اب آزاد ہوگا، 5 اگست کو مودی وہ غلطی کر بیٹھا ہے جس سے اب پیچھے نہیں ہٹ سکتا۔

  • مودی کے اقدام کے بعد میرا ایمان ہے کشمیر آزاد ہوگا: آزاد کشمیر اسمبلی سے خطاب

    مودی کے اقدام کے بعد میرا ایمان ہے کشمیر آزاد ہوگا: آزاد کشمیر اسمبلی سے خطاب

    مظفر آباد: وزیر اعظم عمران خان نے کہا ہے کہ مودی نے 6 ماہ پہلے جو قدم اٹھایا تھا، میرا ایمان ہے کشمیر اب آزاد ہوگا، 5 اگست کو مودی وہ غلطی کر بیٹھا ہے جس سے اب پیچھے نہیں ہٹ سکتا۔

    اے آر وائی نیوز کے مطابق وزیر اعظم عمران خان آزاد کشمیر کی قانون ساز اسمبلی سے خطاب کر رہے تھے، اسمبلی میں وزیر اعظم آزاد کشمیر راجہ فاروق حیدر، شاہ محمود قریشی، علی امین گنڈاپور اور فخر امام بھی موجود تھے۔ انھوں نے کہا کہ آزاد کشمیر کی قیادت کی مشاورت سے مسئلہ کشمیر کو اوپر لے کر جانا ہے۔

    وزیر اعظم نے کہا کہ مودی بھارت کو جس مقام پر لے گیا ہے وہ یہاں سے باہر نہیں جا سکتا، اب مودی کو بھارت کے اندر بڑی مزاحمت کا سامنا ہوگا، یہ وہ وقت ہے کہ کشمیر آزادی کی طرف بڑھے گا، میں یقین دلاتا ہوں ہر فورم پر مسئلہ کشمیر کو اور تیزی سے اٹھائیں گے، ہم نے ہر فورم پر آر ایس ایس کا فلسفہ بھی دنیا کے سامنے رکھا، تین بار ڈونلڈ ٹرمپ کو سمجھایا کہ کشمیر ایشو کیا ہے، ایک بار کہنے سے فرق نہیں پڑے گا کیوں کہ ان کے بھارت کے ساتھ کمرشل مفادات وابستہ ہیں۔

    دنیا بھر میں آج یوم یک جہتی کشمیر منایا جا رہا ہے، پاکستان میں ایک منٹ کی خاموشی

    عمران خان نے خطاب میں کہا کہ بھارت میں شہریت کے متنازع قانون کی وجہ سے تمام اقلیتوں کو خطرہ ہو گیا ہے، آج دنیا دیکھ رہی ہے، تمام انٹرنیشنل اخباروں میں بھارت کا چہرہ بے نقاب ہوا، دنیا کشمیر پر ہمارے نکتہ نظر کو سمجھنے لگی ہے، نریندر مودی کہتا ہے پاکستان کو 11 دن میں فتح کر سکتا ہے، جب دونوں ممالک ایٹمی طاقت ہیں تو یہ بات کوئی نارمل انسان نہیں کر سکتا، مودی اپنے ہندوؤں کو خوش کرنے کے لیے ایسی باتیں کر رہا ہے۔

    انھوں نے کہا بھارت کے خلاف جنگ سیاسی اور سفارتی محاذ کی ہے، بھارت اس لیے پھنس گیا ہے کہ کشمیر پر اب پوری دنیا کی نظر ہے، ایسا پہلی بارہوا، اب ہمیں دیکھنا ہے بھارت کا کیا گیم پلان ہے۔

  • مسئلہ کشمیر کا حل اسلامی دنیا کے عزم سے ہاتھ بھر دوری پر ہے: بلاول بھٹو

    مسئلہ کشمیر کا حل اسلامی دنیا کے عزم سے ہاتھ بھر دوری پر ہے: بلاول بھٹو

    کراچی: پاکستان پیپلز پارٹی کے چیئرمین بلاول بھٹو زرداری نے یوم یک جہتئ کشمیر پر اپنے پیغام میں کہا ہے کہ مسئلہ کشمیر کا حل اسلامی دنیا کے سیاسی عزم اور عالمی ضمیر کے جاگنے سے ہاتھ بھر کی دوری پر ہے۔

    اے آر وائی نیوز کے مطابق پی پی چیئرمین نے اپنے پیغام میں حق خود ارادیت کے لیے بدترین جبر کا سامنا کرنے والی کشمیری عوام کو سلام پیش کرتے ہوئے کہا میں کشمیر کے ہزاروں شہدا کو خراج عقیدت پیش کرتا ہوں، مسئلہ کشمیر کا واحد حل یو این قراردادوں کی روشنی میں ہے، دنیا مسئلہ کشمیر کے حل کے لیے ذمہ داری سے مزید پیچھے نہیں ہٹ سکتی۔

    انھوں نے کہا کہ پی پی کشمیر کی آزادی تک بھارت کا مکروہ چہرہ دنیا کو دکھاتی رہے گی اور دنیا کا ضمیر جھنجھوڑتی رہے گی۔

    دنیا بھر میں آج یوم یک جہتی کشمیر منایا جا رہا ہے، پاکستان میں ایک منٹ کی خاموشی

    بلاول بھٹو کا کہنا تھا کہ آج کے دن پاکستان کا ہر شہر، گلی، گاوَں ایک آواز ہو چکے ہیں، ہم سب اپنے کشمیری بھائیوں اور بہنوں کے ساتھ ہیں، پاکستانی قوم کا دو ٹوک مؤقف ہے کہ کشمیر ہماری شہ رگ ہے، شہید بھٹو نے ہر عالمی فورم پر کشمیر کا مقدمہ لڑا، یوم یک جہتی کشمیر کا فیصلہ بھی شہید بے نظیر بھٹو کی حکومت نے کیا تھا۔

    انھوں نے کہا کہ جنت نظیر وادی میں 185 دنوں سے لاک ڈاؤن جاری ہے، نہتے کشمیریوں پر مودی کے مظالم عالمی ضمیر پر بوجھ ہیں، کشمیریوں کی سات دہائیوں سے جاری جدوجہد کو بھارت دبانے میں ہمیشہ ناکام ہوا۔

  • مقبوضہ کشمیر میں لوگ ڈپریشن کا شکار ہو گئے: بی بی سی رپورٹ

    مقبوضہ کشمیر میں لوگ ڈپریشن کا شکار ہو گئے: بی بی سی رپورٹ

    سری نگر: بی بی سی نے ایک رپورٹ جاری کی ہے جس میں کہا گیا ہے کہ مقبوضہ کشمیر میں لوگ ڈپریشن کا شکار ہو گئے ہیں۔

    تفصیلات کے مطابق برطانوی نشریاتی ادارے نے اپنے رپورٹ میں انکشاف کیا ہے کہ مسلسل لاک ڈاؤن اور کرفیو کے شکار مقبوضہ کشمیر میں لوگ مایوسی اور ڈپریشن کا شکار ہو گئے ہیں، پلواما میں ڈپریشن کے مریضوں میں 150 فی صد اضافہ ہو گیا ہے۔

    بی بی سی رپورٹ میں بتایا گیا ہے کہ سرینگر میں بھی ذہنی مریضوں کی تعداد میں اضافہ ہو رہا ہے، کشمیریوں میں زیادہ خوف بھارتی فوج کی جانب سے حراست میں لینے کا ہے، کشمیریوں کا کہنا ہے کہ وہ خواب میں بھی بھارتی فوجیوں کے سوالوں کا جواب دے رہے ہوتے ہیں۔

    بھارتی سفارت خانوں کے باہر کشمیریوں کے ساتھ یک جہتی کا اظہار

    برطانوی نشریاتی ادارے کی اس رپورٹ سے مقبوضہ کشمیر کے مظلوم عوام کی تشویش ناک صورت حال سامنے آتی ہے، 185 دنوں سے انھیں بھارتی فوج نے محصور کر کے رکھا ہوا ہے، ان کی معمولی کی زندگی بڑی حد تک معطل پڑی ہوئی ہے جس سے کشمیریوں کی ذہنی صحت پر نہایت برے اثرات مرتب ہو رہے ہیں۔ اس رپورٹ کے بعد یہ سوال اٹھا ہے کہ کیا مودی سرکار کی پالیسی یہ ہے کہ کشمیریوں کو ذہنی مریض بنایا جائے۔

    خیال رہے کہ اس سے قبل ایسی رپورٹس بھی سامنے آ چکی ہیں جن سے معلوم ہوا کہ بھارتی فوج کشمیریوں کے خلاف آتشی ہتھیاروں کے ساتھ ساتھ نفسیاتی ہتھیار بھی استعمال کر رہی ہے، جن میں سرفہرست خواتین پر جنسی تشدد ہے۔ بھارتی فوجی درندگی میں مزید آگے بڑھتے ہوئے کشمیری بچوں کو بھی نہیں بخش رہے، بچوں کو بھی بدترین تشدد کا نشانہ بنایا جا رہا ہے۔

  • بھارتی سفارت خانوں کے باہر کشمیریوں کے ساتھ یک جہتی کا اظہار

    بھارتی سفارت خانوں کے باہر کشمیریوں کے ساتھ یک جہتی کا اظہار

    نیویارک: پاکستان سمیت آج دنیا بھر میں یوم یک جہتئ کشمیر منایا جا رہا ہے، اس سلسلے میں نیویارک میں بھارتی سفارت خانے کے باہر ٹیکسیوں کی ریلی نکالی گئی، کشمیر کونسل ای یو نے یورپی پارلیمنٹ کے سامنے شدید بارش میں بھی کشمیریوں سے اظہار یک جہتی کیا۔

    تفصیلات کے مطابق آج نیویارک میں بھارتی سفارت خانے کے باہر مظلوم کشمیریوں کے ساتھ اظہار یک جہتی کے لیے ٹیکسیوں کی ریلی نکالی گئی، 550 ٹیکسیوں پر فری کشمیر آگاہی پلے کارڈز چسپاں کیے گئے تھے، ٹیکسیوں کے قافلے نے مین ہیٹن سمیت مختلف علاقوں میں گشت کیا، قافلے نے اقوام متحدہ کے دفتر کے سامنے بھی چکر لگائے۔

    ادھر برسلز میں کشمیر کونسل ای یو نے بھی یورپی پارلیمنٹ کے سامنے شدید بارش میں کشمیریوں سے اظہار یک جہتی کیا، عوام کی بڑی تعداد نے مقبوضہ کشمیر کے مظلوم عوام سے ہم دردی کا اظہار کیا، چیئرمین کشمیر کونسل ای یو نے اس موقع پر کہا کہ مسئلہ کشمیر کے حل تک کشمیریوں کے لیے آواز اٹھاتے رہیں گے۔

    دنیا بھر میں آج یوم یک جہتی کشمیر منایا جا رہا ہے، پاکستان میں ایک منٹ کی خاموشی

    مظاہرے کے منتظمین کا مطالبہ تھا کہ عالمی برادری مسئلہ کشمیر کے پر امن حل کے لیے اپنا مؤثر کردار ادا کرے۔ علی رضا سید کا کہنا تھا کہ اقوام متحدہ اور یورپی یونین بھارت پر دباؤ ڈالیں۔

    نیوزی لینڈ میں پاکستانی ہائی کمیشن کے زیر اہتمام ویلنگٹن میں یوم یک جہتی کشمیر منایا گیا، یوم یک جہتی کشمیر کی تقریب میں بڑی تعداد میں کشمیریوں اور پاکستانیوں نے شرکت کی، احتجاج میں پاکستانی خواتین کی ٹینس ٹیم نے بھی حصہ لیا، ہائی کمشنر ڈاکٹر عبدالمالک نے اس دن کی مناسبت سے کشمیر کے مسئلے کو اجاگر کیا۔

    خیال رہے کہ آج پانچ فروری کا دن پاکستان سمیت پوری دنیا میں یوم یک جہتی کشمیر کے طور پر منایا جا رہا ہے، اس سلسلے میں پاکستان میں صبح دس بجے ایک منٹ کی خاموشی بھی اختیار کی گئی، اور وزیر اعظم پاکستان عمران خان، آرمی چیف جنرل قمر جاوید باجوہ سمیت اعلیٰ شخصیات نے خصوصی پیغامات جاری کیے۔

  • دنیا بھر میں آج یوم یک جہتی کشمیر منایا جا رہا ہے، پاکستان میں ایک منٹ کی خاموشی

    دنیا بھر میں آج یوم یک جہتی کشمیر منایا جا رہا ہے، پاکستان میں ایک منٹ کی خاموشی

    مظفرآباد: مظلوم کشمیریوں پر بھارتی فوج کی جانب سے مسلسل اور بدترین مظالم کے خلاف دنیا بھر میں آج یوم یک جہتی کشمیر منایا جا رہا ہے، کشمیری شہدا کوخراج عقیدت پیش کرنے کے لیے صبح 10 بجے ملک بھر میں ایک منٹ کی خاموشی اختیار کی گئی۔

    تفصیلات کے مطابق آج پاکستان سمیت دنیا بھر میں مظلوم کشمیریوں کے ساتھ اظہار یک جہتی کے لیے ریلیاں نکالی جائیں گی اور تقریبات منعقد کیے جائیں گے، اس سلسلے میں آزاد کشمیر میں بھی ریلیاں اور دیگر تقریبات کا انعقاد کیا جا رہا ہے۔

    یوم یک جہتی کشمیر پر آزاد کشمیر کی قانون ساز اسمبلی کا اجلاس بھی طلب کیا گیا ہے، اجلاس سے وزیر اعظم پاکستان عمران خان خصوصی خطاب کریں گے، کوہالہ پل پر سائرن بجائے گئے اور ایک منٹ کی خاموشی اختیار کی گئی، انسانی ہاتھوں کی زنجیر بھی بنائی گئی۔

    حکومت سندھ کی جانب سے کراچی میں یوم یک جہتی کشمیر ریلی اور جلسے کا انعقاد کیا جائے گا، کشمیر روڈ سے مزار قائد تک وزیر اعلیٰ سندھ مراد علی شاہ کی قیادت میں ریلی نکالی جائے گی، پیپلز پارٹی کی جانب سے کشمیر کالونی میں جلسہ عام ہوگا، جس سے فریال تالپور اور دیگر رہنما خطاب کریں گے۔

    راولپنڈی ہولاڑپل پر کشمیریوں سے یک جہتی کے لیے انسانی ہاتھوں کی زنجیر بنائی گئی، اراکین اسمبلی، اے سی کہوٹہ، سماجی کارکنان اور اسکول کے بچوں سمیت سیکڑوں افراد نے شرکت کی۔ کوئٹہ، چمن شہر میں بھی یوم یک جہتی کشمیر جوش و جذبے سے منایا جا رہا ہے، شہر کی اہم شاہراہوں اور اہم عمارتوں پر کشمیر کے پرچم لہرا دیے گئے ہیں، ضلع بھر میں مختلف ریلیوں کا انعقاد بھی کیا جا رہا ہے۔

    خیال رہے کہ مقبوضہ جموں کشمیر میں کرفیو اور لاک ڈاؤن مسلسل 185 روز سے جاری ہے، مقبوضہ وادی میں انٹرنیٹ، موبائل فون سروس بدستور معطل ہے، ہزاروں کشمیریوں کو جیلوں میں ڈالا جا چکا ہے، خواتین پر بھی تشدد کیا جا رہا ہے اور ان کے خلاف جنسی حملوں کو ایک ہتھیار کے طور پر استعمال کیا جا رہا ہے۔

  • یوم کشمیر: پاک فوج نے خصوصی نغمہ جاری کردیا

    یوم کشمیر: پاک فوج نے خصوصی نغمہ جاری کردیا

    راولپنڈی: پاک فوج کے شعبہ تعلقات عامہ(آئی ایس پی آر) نے کشمیر ڈے کے موقع پر کشمیریوں سے اظہار یکجہتی کے لیے خصوصی ملی نغمہ جاری کردیا۔

    اے آر وائی نیوز کے مطابق آج دنیا بھر میں کشمیر ڈے منایا جارہا ہے، بھارتی فوج کی بربریت تلے زندگی گزارنے والے مظلوموں سے اظہار یکجہتی کے لیے پاکستان سمیت دیگر ممالک میں ریلیاں نکالی جائیں گی اور احتجاجی مظاہرہ بھی کیا جائے گا۔ مقبوضہ وادی میں کشمیر بنے گا پاکستان کے نعرے آج بھی گونج رہے ہیں۔

    کشمیر کی آواز بنتے ہوئے آئی ایس پی آر نے یوم یکجہتی کشمیر پر خصوصی ملی نغمہ جاری کردیا۔

    نغمے کے بول کچھ یوں ہیں

    ’’ ہے جاگ اٹھی وادی ساری۔۔۔کر فکر ذرا اپنے تو انجام کی‘‘

    ’’منزل میری آزادی ہے ۔۔۔ پرواہ نہیں چاہے جاتی ہے جان بھی‘‘

    ’’کشمیر ہوں میں، کشمیر ہوں میں ۔۔۔شہ رگ پاکستان کی‘‘

  • نو فادرز ان کشمیر: تین دہائیوں‌ پر محیط لہو رنگ انتظار!

    نو فادرز ان کشمیر: تین دہائیوں‌ پر محیط لہو رنگ انتظار!

    2014 میں ایشون کمار نے اس فلم کی عکس بندی شروع کی تھی اور پچھلے سال بھارت میں‌ بڑے پردے پر اس کی نمائش کی گئی۔

    بھارتی فلم ڈائریکٹر اور ہدایت کار ایشون کمار کو اپنی اس فلم پر کڑی تنقید جھیلنا پڑی، کیوں کہ انھوں نے اس فلم میں‌ مقبوضہ کشمیر میں بھارتی افواج کی درندگی اور انسانی حقوق کی خلاف ورزیوں‌ کا پردہ چاک کیا اور بتایا ہے کہ معصوم اور نہتے کشمیریوں کیسے گھروں سے اٹھا کر لاپتا کردیا گیا اور کئی برس بعد بھی اہلِ خانہ اپنے پیاروں کے منتظر ہیں۔ انھیں نہیں معلوم کہ وہ زندہ ہیں یا موت ان کا مقدر بن چکی ہے۔

    اس فلم کا ٹائٹل "نو فادرز ان کشمیر” ہے جو ان دنوں برطانیہ میں بڑے پردے پر دیکھی جارہی ہے اور اس کا بہت چرچا ہو رہا ہے۔ برطانوی اخبارات اور مختلف جریدوں میں اس فلم پر بات کی گئی ہے اور تبصرہ نگاروں کے مطابق یہ مقبوضہ کشمیر میں انسانی حقوق کی بدترین خلاف ورزیوں کو بے نقاب کرتی ہے۔

    فلم کی کہانی ان افراد کے گرد گھومتی ہے جن کی اولادیں تین دہائیوں سے اپنے والدین کی صورت دیکھنے کو ترس رہی ہیں اور آج بھی ان کی تلاش میں ہیں۔ یہ لوگ آزادی کے حصول کے لیے تحریک کا حصہ بنے تھے اور بھارتی فوج کی حراست میں لاپتا ہوئے۔ ان کے اہلِ خانہ کو ان کے بارے میں کچھ بھی نہیں بتایا جارہا اور اب انھیں نہ دیکھے ہوئے تین دہائیاں گزر چکی ہیں۔

    ان کے اہلِ خانہ یہ جاننا چاہتے ہیں‌ کہ ان کے پیارے زندہ ہیں یا مر چکے ہیں۔ اگر انھیں موت کے گھاٹ اتارا گیا ہے تو کم از کم یہی بتا دیا جائے کہ وہ کہاں دفن ہیں؟

    ایشون کمار کی اس فلم کی نمائش بھارتی سنیماؤں میں تو چند روز ہی جاری رہ سکی تھی۔ مگر اب یہ برطانیہ کے ہاؤس آف کامنز میں بھی دکھائی جارہی ہے جب کہ چند یورپی ممالک اور امریکا میں بھی اس کی نمائش متوقع ہے۔