Tag: کشمیر کی خبریں

نیویارک: اقوام متحدہ ہیڈ کوارٹرز کے سامنے عیسائی کمیونٹی نے بھارتی وزیر اعظم نریندر مودی کے خلاف مظاہرہ کیا، جس میں اقلیتوں کے نمایندوں نے مودی کی ہندو انتہا پسند پالیسیوں کے خلاف احتجاج کیا۔

تفصیلات کے مطابق مقبوضہ کشمیر میں نریندر مودی کی ظالمانہ پالیسیوں کے خلاف اقوام متحدہ، ہیوسٹن اور گلاسگو میں سیکڑوں مظاہرین سڑکوں پر نکل آئے۔

مظاہرین کا کہنا تھا کہ مسلمانوں، سکھوں، کرسچنز اور نچلی ذات والے ہندؤوں پر تشدد کے واقعات میں اضافہ ہوا ہے، مودی ایک ہندو انتہا پسند ہے اور گجرات میں مسلمانوں کا قاتل ہے۔

ان کا کہنا تھا کہ مودی کے بر سر اقتدار آنے کے بعد اقلیتوں کے ساتھ مظالم میں اضافہ ہوا ہے، ایسے شخص کا اقوام متحدہ میں جانا ایک سوالیہ نشان ہے۔

مزید تازہ خبریں:  نیویارک، مودی کے خلاف مظاہرے، عوام کی بڑی تعداد جمع ہونے کا امکان، ایڈوائزری جاری

ادھر ریاست ٹیکساس میں ہیوسٹن کی فضا بھی گو مودی گو کے نعروں سے گونج اٹھی، ہیوسٹن میں بھارتی وزیر اعظم نریندر مودی کے خطاب کے خلاف احتجاج کیا گیا، جس میں پاکستانی سمیت کشمیری اور سکھ کمیونٹی بھی شریک ہوئی۔

ٹیکساس کے مختلف شہروں سے لوگوں کی بڑی تعداد مظاہرے میں شریک ہوئی، مظاہرین نے مطالبہ کیا کہ مقبوضہ کشمیر میں انسانیت سوز مظالم کا نوٹس لیا جائے۔

گلاسگو میں بھی کشمیریوں سے اظہار یک جہتی کے لیے احتجاجی ریلی نکالی گئی، ریلی کا اہتمام جارج اسکوارم میں اسکاٹش ہیومن رائٹس فورم نے کیا، ریلی میں برطانوی ممبر پارلیمنٹ، ممبر آف اسکاٹش پارلیمنٹ نے شرکت کی۔

شرکا نے مطالبہ کیا کہ اقوام متحدہ مقبوضہ کشمیر میں انسانی حقوق کی پامالی پر خاموشی کو توڑے، اور کشمیریوں کو ان کا حق خود ارادیت دلوائیں۔

لیڈز: مقبوضہ کشمیر میں بھارتی مظالم کے خلاف برطانوی شہر لیڈز کے ملینیم اسکوائر میں احتجاجی مظاہرہ کیا گیا، جس میں پارلیمنٹ اراکین سمیت سیکڑوں لوگوں نے شرکت کر کے بھارتی اقدامات کو مسترد کر دیا۔

تفصیلات کے مطابق لیڈز سِوک ہال کے باہر مقبوضہ کشمیر میں بھارتی مظالم کے خلاف زبردست احتجاجی مظاہرہ کیا گیا، احتجاجی مظاہرے میں لیڈز کے شیڈو وزیر رچرڈ برگن اور فیبین ہملٹن نے بھی شرکت کی۔

مظاہرے میں لیڈز کے شیڈو وزیر سمیت لوکل ممبران پارلیمنٹ، سیاسی ایکٹویسٹس، انسانی حقوق کے لیے کام کرنے والوں اور کشمیریوں کی بڑی تعداد شریک ہوئی، شرکا نے کشمیر کے ساتھ اظہار یک جہتی کیا۔

مظاہرے میں شریک ہونے والے پارلیمنٹ اراکین میں آلیکس ڈیوڈ سوبیل اور ہیلری بین شامل تھے، مظاہرے میں بچے، بوڑھے، جوان اور خواتین نے بڑی تعداد میں شرکت کی۔

یہ بھی پڑھیں:  مقبوضہ کشمیر میں کرفیو کا 41 واں روز، انسانی حقوق کی پامالی عروج پر

مظاہرین نے کشمیر کی آزادی کے حق میں نعرے لگائے۔ لیڈز کی فضائیں مودی دہشت گرد کے نعروں سے بھی گونج اُٹھیں۔

شرکا نے مقبوضہ کشمیر میں بھارتی مظالم کی شدید مذمت کی، مقبوضہ کشمیر سے کرفیو کے خاتمے اور وادی کی حیثیت بحال کرنے کا مطالبہ کیا۔

واضح رہے کہ بھارت کی جانب سے آرٹیکل 370 اے ختم کرنے کے بعد مقبوضہ کشمیر میں کرفیو نافذ ہوئے 41 دن ہو گئے ہیں، اس دوران وادی میں کرفیو کے باعث 3 ہزار 9 سو کروڑ کا نقصان ہو چکا ہے، انسانی حقوق کی پامالی عروج پر ہے۔

واشنگٹن: مقبوضہ کشمیر کی تشویش ناک صورت حال پر امریکی سینیٹرز نے بھی صدر ڈونلڈ ٹرمپ کو خط لکھا دیا ہے، سینیٹرز نے مطالبہ کیا ہے کہ کشمیر میں انسانی حقوق کی خلاف ورزیوں پر فوری کارروائی کی جائے۔

تفصیلات کے مطابق مقبوضہ کشمیر پر صدر ٹرمپ کی جماعت سے بھی آوازیں اٹھنا شروع ہو گئی ہیں، امریکی سینیٹرز نے صدر ٹرمپ کو خط لکھ کر کہا کہ مقبوضہ کشمیر میں کرفیو ختم کروا کر رابطہ کاری کی سہولیات بحال کرائی جائیں۔

سینیٹرز نے خط میں لکھا کہ بھارت کے ساتھ تعلقات کشمیر کے معاملے کو حل کرنے میں اہم کردار ادا کر سکتے ہیں۔

سینیٹرز کا کہنا تھا کہ کشمیر کی حیثیت تبدیل کرنے پر انھیں تشویش ہے، امریکا پاک بھارت تعلقات بہتر کرنے میں کردار ادا کر سکتا ہے۔

یہ بھی پڑھیں:  برطانیہ: اقوام متحدہ کے ساتھ مل کر مسئلہ کشمیر حل کرے، قرارداد منظور

یہ خط سینیٹر کرس وان ہولین، ٹوڈ ینگ، بین کارڈن اور لنزے گراہم کی جانب سے لکھا گیا۔

انھوں نے لکھا کہ ہر گزرتے دن کے ساتھ کشمیر کے باسیوں کے لیے صورت حال مشکل تر ہوتی جا رہی ہے، اس لیے ہم مطالبہ کرتے ہیں کہ وزیر اعظم مودی وادی میں ٹیلی کمیونی کیشن اور انٹرنیٹ سروس مکمل طور پر بحال کرتے ہوئے بلیک آؤٹ ختم کر دیں۔

ان کا کہنا تھا کہ مقبوضہ کشمیر کی تشویش ناک صورت حال کے جمہوریت، انسانی حقوق اور علاقائی استحکام پر بد ترین اثرات مرتب ہوں گے۔

لندن: مقبوضہ کشمیر کی صورت حال پر برطانوی خبر رساں ایجنسی نے رپورٹ شایع کرتے ہوئے کہا ہے کہ بھارتی فوج رات کو گھروں پر چھاپے مار کر نوجوانوں کو اٹھا کر بد ترین تشدد کا نشانہ بنا رہی ہے۔

تفصیلات کے مطابق عالمی میڈیا پر ایک اور رپورٹ نے مقبوضہ کشمیر کی تشویش ناک صورت حال کو اجاگر کر دیا ہے، برطانوی خبر رساں ایجنسی نے بھارتی فورسز کی جانب سے رات کو گھروں پر چھاپے مارنے کی تفصیلی رپورٹ جاری کر دی ہے۔

رپورٹ میں کہا گیا ہے کہ مقبوضہ کشمیر میں بھارتی فورسز رات کو گھروں پر چھاپے مارتی ہیں اور نوجوانوں کو اٹھا کر بد ترین تشدد کا نشانہ بنایا جاتا ہے۔

یہ بھی پڑھیں:  مقبوضہ کشمیر میں37 ویں روز بھی کرفیو

رپورٹ میں کشمیری شہریوں کے حوالے سے کہا گیا ہے کہ بھارتی فوجی نوجوانوں کو سڑکوں پر لے جا کر بری طرح زد و کوب کرتے ہیں، تشدد کے لیے وہ لوہے کی راڈ، بندوق کے بٹ اور اسٹک کا استعمال کر رہے ہیں۔

رپورٹ کے مطابق کشمیریوں کا کہنا ہے کہ جب بھارتی فوجی نوجوانوں پر تشدد کرتے ہیں تو گھر والوں تک ان کی چیخیں آتی ہیں مگر وہ کچھ نہیں کر سکتے، بھارتی فوجی گھنٹوں تک کشمیریوں پر تشدد کرتے رہتے ہیں۔

واضح رہے کہ آج آرٹیکل 370 اے ختم کرنے کے بعد مقبوضہ کشمیر میں 37 ویں روز بھی کرفیو جاری ہے، موبائل فون، انٹرنیٹ سروس بند اور ٹی وی نشریات معطل ہیں۔