Tag: کشمیر کی خبریں

نئی دہلی: مقبوضہ کشمیر میں زبردست احتجاج کے بعد مودی سرکار کے منہ پر ایک اور تمانچا پڑ گیا ہے، بھارت کا حقیقت پسند طبقہ حقایق سامنے لانے لگا۔

تفصیلات کے مطابق سابق بھارتی فوجی، مصنف اور صحافی نے نریندر مودی کے لیے چشم کشا ٹویٹ کر دیا ہے، کہا کہ خطے کے اہم ممالک مسئلہ کشمیر کا حل چاہتے ہیں۔

سابق بھارتی فوجی پراوین ساہنے نے ٹویٹ میں لکھا کہ روس اور چین اعتماد سازی نہیں بلکہ مسئلہ کشمیر کا حل چاہتے ہیں۔

انھوں نے کہا خطے کے اہم ممالک کی طرف سے کشمیر کے مسئلے کی طرف توجہ سے مودی حکومت کے لیے جلد مذاکرات کا آغاز کرنا ناگزیر ہو جائے گا۔

پراوین ساہنے نے اپنے ٹویٹ میں بھارتی فوج کی پیشہ ورانہ صلاحیتوں پر بھی تنقید کی، انھوں نے کہا کہ بھارتی فوج آپریشنز کے علاوہ لڑنے کی صلاحیت نہیں رکھتی۔

یہ بھی پڑھیں:  مقبوضہ کشمیر: کرفیو کے باوجود ہزاروں افراد کا احتجاج، بھارتی فورس کی فائرنگ سے متعدد زخمی

سابق بھارتی فوجی نے لکھا ہم نے اپنی فوج کو دور جدید کی جنگ کے لیے ناکارہ بنا دیا ہے، دوسری طرف آج ایک دور جدید کی جنگ ہمارے چہرے کو گھور رہی ہے۔

خیال رہے کہ گزشتہ روز بھارت کے غیر قانونی اقدام کے خلاف مقبوضہ کشمیر میں‌ شدید احتجاج اور مظاہرے کیے گئے، برطانوی خبر رساں ادارے نے بھارتی دعوؤں کا پردہ چاک کرتے ہوئے واضح کیا کہ مقبوضہ کشمیر میں نماز جمعہ کے بعد بڑے پیمانے پر مظاہرے ہوئے۔

کشمیر کی خصوصی آئینی حیثیت ختم کرنے کے فیصلے کو کشمیریوں نے قبول نہیں کیا، مظاہروں سے بوکھلاہٹ‌ کی شکار بھارتی انتظامیہ نے نہتے شہریوں پر فائرنگ کی، جس سے متعدد افراد شدید زخمی ہوگئے، جن کی حالت تشویش ناک ہے۔

سری نگر: انتہا پسند مودی سرکار کی مقبوضہ جموں و کشمیر میں ریاستی دہشت گردی جاری ہے، بھارتی فورسز کی جانب سے نہتے کشمیریوں پر فائرنگ سے 6 کشمیری شہید، 100 سے زائد زخمی ہو گئے۔

کشمیر میڈیا سروس کے مطابق مقبوضہ کشمیر میں تیسرے روز بھی کرفیو نافذ رہا، اور مواصلات کے ذرایع بند رہے، قابض بھارتی فوج کی فائرنگ سے 6 کشمیری شہید جب کہ 100 سے زائد زخمی ہوئے۔

بھارتی فورسز کی جانب سے مظاہرین پر گولیوں کی بوچھار کی گئی، چھروں اور آنسو گیس کا بے دریغ استعمال کیا گیا۔

نہتے کشمیری بھارت کی جانب سے آرٹیکل 35،370 اے کی منسوخی کے خلاف احتجاج کر رہے تھے۔

خیال رہے مقبوضہ کشمیر میں صورت حال انتہائی کشیدہ ہے، کشمیریوں پر زندگی تنگ کرنے کے لیے مزید اڑتیس ہزار فوجی تعینات کر دیے گئے ہیں اور لوگ گھروں میں محصور ہو کر رہ گئے ہیں، کشمیریوں نے کھانے پینے کی اشیا، دوائیں اور پیٹرول جمع کرنا شروع کر دیا ہے، اس دوران لوٹ مار کی وارداتوں میں بھی اضافہ ہوا ہے۔

یہ بھی پڑھیں:  بھارت کا گھناؤنا منصوبہ، آرٹیکل 370 کی منسوخی پر اقوام متحدہ کا اظہار تشویش

واضح رہے کہ بھارت کی جانب سے مقبوضہ کشمیر میں مسلم اکثریت کو اقلیت میں بدلنے کے گھناؤنے منصوبے پر اقوام متحدہ نے بھی شدید تشویش کا اظہار کیا ہے۔

ترجمان اقوام متحدہ کا کہنا تھا کہ پاک بھارت تصفیہ طلب مسائل کا مذاکرات سے حل نکالا جائے، اقوام متحدہ کے سیکریٹری جنرل مسئلہ کشمیر پر ثالثی کی پیش کش بھی کر چکے ہیں۔

لندن: مقبوضہ کشمیر کی خصوصی حیثیت ختم کرنے پر لندن میں بھارت کے خلاف زبردست مظاہرہ کیا گیا، جس میں مظاہرین نے بھارت کے خلاف شدید نعرے بازی کی۔

تفصیلات کے مطابق بھارت کی جانب سے مقبوضہ کشمیر کی جداگانہ حیثیت کے باقاعدہ خاتمے پر دنیا بھر میں مقیم کشمیری سراپا احتجاج بن گئے ہیں۔

اس سلسلے میں لندن میں بھارتی ہائی کمیشن کے سامنے بڑا مظاہرہ کیا گیا، جس میں طلبہ نے بھی شرکت کی اور ہندو پنڈت بھی بھارتی فیصلے کے خلاف احتجاج کرتے دکھائی دیے۔

مقبوضہ کشمیر کی خصوصی حیثیت کے خاتمے اور مزید فوج کی تعیناتی پر لندن میں ٹریڈ یونینز کے نمایندے بھی کشمیریوں کی حمایت میں نکل آئے۔

لندن میں سراپا احتجاج مظاہرین کا کہنا تھا کہ بھارت کشمیر میں اسرائیل کی طرز پر آپریشن کرنے جا رہا ہے۔

یہ بھی پڑھیں:  پاکستان نے مقبوضہ کشمیر سے متعلق بھارتی اعلان مسترد کردیا

دریں اثنا، بھارتی اقدام پر برطانیہ میں پاکستانی کمیونٹی بھی ناراض دکھائی دے رہی ہے، مسیحی مبلغ جیمز شیرا نے برطانوی وزیر اعظم بورس جانسن کو خط لکھ کر تحفظات کا اظہار کر دیا ہے۔

جیمز شیرا نے خط میں لکھا کہ بھارت آرٹیکل 370 ختم کر کے کشمیر میں آبادی کا تناسب بگاڑنا چاہتا ہے، کشمیر کے خصوصی تشخص کو ختم کرنے سے خطے میں بگاڑ پیدا ہوگا۔

عیسائی رہنما کا کہنا تھا کہ بھارت کشمیر میں انسانی حقوق کی خلاف ورزیاں بند کرے، برطانوی حکومت کشمیر کے معاملے میں بھارت پر دباؤ ڈالے۔

واضح رہے کہ بھارت نے آئین کے آرٹیکل 370 کا خاتمہ کر کے مقبوضہ کشمیر کی جداگانہ حیثیت کا خاتمہ کر دیا ہے جس پر دنیا بھر کے کشمیری سراپا احتجاج ہیں۔

برسلز میں یورپی کشمیر کونسل کے چیئرمین علی رضا نے اپنے بیان میں کہا کہ اب جموں و کشمیر کی حیثیت 1947 جیسی ہو گئی ہے، جموں و کشمیر کی جداگانہ حیثیت ختم کر کے کشمیر کا بھارت سے مشروط الحاق ختم کر دیا گیا ہے، اس لیے اقوام متحدہ اپنی امن فوجیں مقبوضہ وادی روانہ کرے۔