نیویارک: وزیرامور کشمیر علی امین گنڈا پور کا کہنا ہے کہ کشمیر ہماری شہ رگ ہے، وزیراعظم عمران خان اقوام متحدہ میں مضبوط پیغام دیں گے۔
اپنے ایک بیان میں علی امین گنڈاپور نے واضح کیا کہ اس بار بھی اقوام متحدہ کی قراردادوں پر عمل نہ ہوا تو دوسرے آپشنز استعمال کریں گے، پاک فوج، حکومت اور عوام مل کر مودی کو سبق سکھانے کا دم رکھتے ہیں۔
ان کا کہنا تھا کہ کشمیریوں سے یکجہتی کے لیے ہزاروں لوگ آئیں گے، اقوام عالم کو باور کرایا جائے گا کشمیریوں کو حق دیا جائے، بصورت دیگر دوسرے آپشنز کی طرف جائیں گے۔
انہوں نے کہا کہ یواین صرف موسمیاتی تبدیلیوں پر سیمینار کرانے کیلئے نہیں ہے، کشمیر کا مسئلہ حل کرنا ہوگا، بھارت سے بربریت کی انتہا کردی ہے۔
شاہ محمود قریشی کی مختلف ممالک کے خارجہ حکام سے ملاقات
خیال رہے کہ وفاقی حکومت کے اعلان پر (آج) جمعہ کو ملک بھر میں یوم یکجہتی کشمیر منایا جائےگا جبکہ وزیر اعظم عمران خان اقوام متحدہ میں اپنے خطاب میں پوری دنیا کے سامنے کشمیر کا معاملہ اٹھائیں گے۔
واضح رہے کہ وزیراعظم عمران خان آج اقوام متحدہ میں کشمیر کا مسئلہ رکھیں گے اور اپنے خطاب میں عالمی طاقتوں کو بھارتی جارحیت سے آگاہ کریں گے۔
