مقبوضہ کشمیر میں بھارتی فورسز کے ہاتھوں شہید ہونے والے نوجوان حریت کمانڈر برہان وانی کی دوسری برسی آج منائی جا رہی ہے۔
کشمیری قوم کی جدوجہد آزادی میں نئی روح پھونکنے والے نوجوان کمانڈر برہان مظفروانی کا یوم شہادت آج منایا جارہا ہے۔
شہید برہان وانی 19 ستمبر 1994 میں جموں کشمیر کے ایک گاؤں شریف آباد میں پیدا ہوئے ، برہان وانی نے صرف 15 سال کی عمر میں بھارتی قبضے کے خلاف جدوجہد آزادی کا آغاز کیا۔
برہان وانی کے بھائی خالد وانی کو 2015 میں بھارتی فوجیوں نے ترال کے علاقے میں اس وقت ایک جعلی مقابلے میں شہید کردیا تھا، جب وہ اپنے تین دوستوں کے ہمراہ اپنے بھائی سے ملنے جارہے تھے۔
سوشل میڈیا پربھارتی پروپیگنڈا کے جواب کا جدید طریقہ اختیار کرکے جدوجہد آزادی کو نئی جدت دی جس کی وجہ سے وہ کشمیری قوم کے نئے ہیروکے طور پرسامنے آئے۔
آٹھ لاکھ بھارتی فوج کی 6 سال تک نیندیں اڑانے والے مجاہد برہان وانی کو 8 جولائی 2016 کو کرناگ قصبے کے بم ڈورہ گاؤں میں شہید کردیا تھا۔
22 سال کی عمر میں جام شہادت نوش کرنے والا برہان وانی کشمیر میں جاری تحریک کی نئی شمع روشن کرگیا، وانی کے جنازے پرشروع ہونے والے مظاہروں کا سلسلہ دو سال بعد بھی تھم نہ سکا۔
حریت کمانڈر کی شہادت کے بعد گزشتہ دو سالوں کے دوران 600 سے زائد کشمیریوں کو شہید جبکہ 24 ہزار سے زائد افراد کو زخمی کردیا گیا۔
کشمیر: برہان وانی کی برسی منانے پر پابندی، تین کشمیری شہید
خیال رہے کہ گزشتہ روز مقبوضہ کشمیر میں بھارتی فوج نے شہید برہان وانی کی برسی منانے پر عملاً پابندی لگاتے ہوئے تین کشمیری نوجوانوں کوفائرنگ کرکے شہید کر دیا تھا۔
واضح رہے کہ حریت قیادت نے برہان وانی کی برسی کے موقع پرآج وادی میں مکمل ہڑتال کا اعلان کررکھا ہے اور یہی وجہ ہے کہ قابض انتظامیہ بوکھلاہٹ کا شکار ہے۔
احتجاج اور مظاہرے روکنے کے لیے بھارتی انتظامیہ کی جانب سے وادی میں پابندیاں نافذ کرتے ہوئے فورسز کی اضافی نفری تعینات کردی گئی ہے۔
حریت رہنما میرواعظ عمرفاروق کا کہنا ہے کہ خوفزدہ کٹھ پتلی انتظامیہ مظاہروں میں شرکت سے روکنے کے لیے یہ کام کررہی ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
