ARYNews.tv | Urdu – Har Lamha Bakhabar

Tag: کشمیر

  • صدر آزاد کشمیرنےمسئلہ کشمیرکےحل کےلیے6 نکاتی ایجنڈا پیش کردیا

    صدر آزاد کشمیرنےمسئلہ کشمیرکےحل کےلیے6 نکاتی ایجنڈا پیش کردیا

    واشنگٹن : صدرآزاد جموں و کشمیرسردار مسعود خان کا کہنا ہے کہ مسئلہ کشمیر کے حل میں تمام اسٹیک ہولڈرز کو مذاکرات میں شامل کیا جائے۔

    تفصیلات کے مطابق صدرآزا د کشمیر مسعود خان نے پاک امریکی کانگرس سے خطاب کے دوران مسئلہ کشمیرکے حل کے لیے 6 نکاتی ایجنڈا پیش کردیا۔

    صدرآزاد جموں و کشمیرسردار مسعود خان کا کہنا ہے کہ سیکیورٹی کونسل جموں وکشمیرمیں استصواب رائے یا ریفرنڈم کرائے۔

    مسعود خان نے کہا کہ یواین آبزورگروپ ایل اوسی پرانسانی حقوق کی خلاف ورزیاں روکے، بھارت مقبوضہ کشمیر کو متنازعہ علاقہ تسلیم کرے۔

    انہوں نے کہا کہ بھارت مقبوضہ کشمیر سے اپنی فوجیں واپس بلائے اور مقبوضہ کشمیر سے کالے قوانین ختم کرے۔

    صدرآزاد جموں و کشمیرسردار مسعود خان کا کہنا ہے کہ بھارت اقوام متحدہ انسانی حقوق کونسل کو مقبوضہ وادی میں رسائی دے، مسئلہ کشمیر کے حل میں تمام اسٹیک ہولڈرز کو مذاکرات میں شامل کیا جائے۔

    کشمیریوں کی تحریک آزادی کو بھارت کمزورنہیں کرسکتا‘ مسعود خان

    خیال رہے کہ گزشتہ روز واشنگٹن میں امریکی اور پاکستانی صحافیوں سے گفتگو کرتے ہوئے کہا تھا کہ مقبوضہ کشمیر میں انسانی حقوق کی خلاف ورزیاں روکنے کے لیے امریکہ کردارادا کرے۔

    مسعود خان کا کہنا تھا کہ 70سال سے جاری کشمیریوں کی تحریک آزادی کو بھارت کمزور نہیں کرسکتا، کشمیریوں کی جدوجہد کو دہشت گردی کا رنگ دے کربھارت عالمی برادری کوگمراہ نہیں کرسکتا۔

    بھارت کشمیریوں کی پرامن اورغیرمسلح جدوجہد آزادی کودبانا چاہتا ہے‘ مسعود خان

    یاد رہے کہ گزشتہ ماہ صدر آزاد جموں و کشمیرسردار مسعود خان کا کہنا تھا کہ بھارتی قابض افواج کی جانب سے قتل وغارت اورظلم و بربریت کے باوجود کشمیری اپنے پیدائشی حق، حق خودارادیت حاصل کرنے سے کبھی پیچھے نہیں ہٹیں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • زیادتی کا شکار آصفہ بانو کی وکیل جرات کی مثال بن گئیں

    زیادتی کا شکار آصفہ بانو کی وکیل جرات کی مثال بن گئیں

    سرینگر: مقبوضہ کشمیر میں بھارتی پولیس کے ہاتھوں زیادتی کا شکار بننے والی 8 سالہ معصوم بچی آصفہ بانو کی وکیل دپیکا سنگھ ملک بھر میں جرات اور ہمت کی مثال بن گئی۔ ہالی ووڈ اداکارہ ایما واٹسن بھی وکیل کی حمایت میں بول اٹھیں۔

    بھارتی وکیل دپیکا سنگھ کو مظلوم کشمیری بچی کا کیس لڑنے پر انتہا پسند ہندوؤں کی جانب سے قتل اور زیادتی کا نشانہ بنا دینے کی دھمکیاں بھی مل رہی ہیں تاہم وہ حوصلے کے ساتھ محاذ پر ڈٹی ہوئی ہیں۔

    حال ہی میں ان کی ایک تصویر سوشل میڈیا پر بے حد وائرل ہوگئی اور لوگوں نے انہیں عزم و استقامت کی عظیم مثال قرار دیا۔

    وائرل ہونے والی تصویر میں دیکھا جاسکتا ہے کہ دپیکا بنا کسی خوف کے نہایت پراعتماد انداز سے عدالت سے باہر نکل رہی ہیں۔ ان کے ساتھ کچھ مرد وکلا بھی ہیں جو ان کا ساتھ دینے کے لیے پر عزم دکھائی دے رہے ہیں۔

    سماجی رابطوں کی ویب سائٹ ٹویٹر پر صارفین نے دپیکا کو ان کی بہادری پر خراج تحسین پیش کیا۔

    ٹویٹر پر ایک صارف کا کہنا تھا، ’ہمیں کتنی بار ایسی تصویر دیکھنے کو ملتی ہے جس میں ایک بااعتماد پروفیشنل خاتون موجود ہے اور اس کے ساتھی مرد اسے گھور نہیں رہے‘۔

    ایک شخص نے لکھا، ’دپیکا ایک تنہا جنگجو ہیں جو دھمکیوں اور سماجی بائیکاٹ کے باوجود آصفہ بانو کا کیس لڑ رہی ہیں‘۔

    ہالی ووڈ اداکارہ ایما واٹسن نے بھی ان کی تصویر ٹویٹ کرتے ہوئے ان کے لیے نیک خواہشات کا اظہار کیا۔

    خیال رہے کہ مقبوضہ کشمیر کی 8 سالہ آصفہ بانو رواں برس 7 جنوری کو مویشی چرانے گھر سے باہر گئی تھی جس کے بعد اسے 7 ہندو پولیس اہلکاروں نے اغوا کیا اور مندر میں قید کر کے چار روز تک زیادتی کا نشانہ بنانے کے بعد بے دردی سے قتل کر کے جھاڑیوں میں پھینک دیا تھا۔

    آصفہ بانو کی لاش 17 جنوری کو مندر سے برآمد ہوئی۔ واقعے کے بعد رسمی کارروائی کے طور پر چند پولیس اہلکاروں کو گرفتار کیا گیا تاہم کچھ عرصے بعد ہی انہیں رہا کردیا گیا جس کے بعد یہ واقعہ منظر عام پر آگیا اور بھارت بھر میں اس کے خلاف مظاہرے پھوٹ پڑے۔

    مزید پڑھیں: خواتین یاد رکھیں، بھارت آپ کا مقبرہ بھی بن سکتا ہے

    آصفہ کے بہیمانہ قتل اور ملزمان کی رہائی کے خلاف بھارت اور کشمیر میں احتجاج شروع ہوگیا۔ کئی بالی ووڈ اداکاروں نے بھی ننھی آصفہ کو انصاف دینے اور ذمہ داران کے خلاف سخت کارروائی کا مطالبہ کیا۔

    آصفہ بانو کا کیس بھارتی وکیل دپیکا سنگھ لڑ رہی ہیں جنہیں نہ صرف سنگین دھمکیاں دی جارہی ہیں بلکہ ان کا سماجی بائیکاٹ بھی کردیا گیا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سلمان خان کی "ریس”: سپر اسٹار کشمیر پہنچ گئے

    سلمان خان کی "ریس”: سپر اسٹار کشمیر پہنچ گئے

    ممبئی : جیل سے رہائی پانے والے بالی وڈ کے سپراسٹار سلمان خان کشمیر پہنچ گئے، معروف ہدایت کار ریمو ڈی سوزا بھی ان کے ہمراہ ہیں۔

    تفصیلات کے مطابق دبنگ خان مقبوضہ کشمیر کے مشہور ہل اسٹیشن پہنچ گئے ہیں، جہاں ریس تھری کی شوٹنگ جاری ہے۔

    یاد رہے کہ سلمان خان اس وقت سپرہٹ فلم سیریز ”ریس“ کے تیسرے پارٹ کی شوٹنگ میں مصروف ہیں، اس فلم کے گذشتہ دو پارٹس میں سیف علی خان نے مرکزی کردار نبھایا تھا، مگر اس فلم میں دبنگ خان کی انٹری نے فلم کی اہمیت دو چند کر دی۔

    فلم میں سلمان کے ساتھ ساتھ جیکولین فرنانڈس، انیل کپور، بوبی دیول مرکزی کردار نبھا رہے ہیں، فلم عید پر بڑے پردے پر ریلیز کی جائے گی۔

    اس ایکشن تھرلر فلم کے ہدایت کار ریمو ڈی سواز ہیں، جنھوں نے بہ طور ڈانس ڈائریکٹر اپنے کیریر کا آغاز کیا اور اس میدان میں جھنڈے گاڑنے کے بعد ہدایت کاری کی دنیا میں قدم رکھا۔ ریمو ”اے بی سی ڈی“ کے نام سے دو سپرہٹ فلمیں بنا چکے ہیں۔

    خبریں گردش میں ہیں کہ انھوں نے دبنگ خان کو ”اے بی سی ڈی“ کے تیسرے حصے میں کام کرنے پر راضی کر لیا ہے۔

    ریس تھری کی کاسٹ سلمان خان کے ہمراہ کشمیر کی جنت نظیر وادی میں پہنچ چکی ہے، یہ شیڈول تین روز پر مشتمل ہے۔

    فلمی پنڈتوں کو یقین ہے کہ یہ فلم باکس آفس پر بلاک بسٹر ثابت ہوگی۔

    جیل سے نکلتے ہی سلمان خان ریس تھری کے سیٹ پر پہنچ گئے

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • اسلام آباد، لاہورسمیت ملک کےمختلف علاقوں میں بارش سےموسم خوشگوار

    اسلام آباد، لاہورسمیت ملک کےمختلف علاقوں میں بارش سےموسم خوشگوار

    اسلام آباد : وفاقی دارالحکومت اسلام آباد، راولپنڈی لاہور سمیت ملک کے مختلف شہروں میں تیز ہواؤں اور گرج چمک کے ساتھ ہونے والی بارش نے موسم خوشگوار بنادیا۔

    تفصیلات کے مطابق اسلام آباد، روالپنڈی، لاہور، ننکانہ صاحب، سکھیکی، پنڈی بھٹیاں، فاٹا، کشمیراور گلگت بلتستان سمیت مختلف علاقوں میں موسلادھار بارش نے موسم سہانا کردیا۔

    محکمہ موسمیات کے مطابق آئندہ 3روزتک بالائی پنجاب اورخیبرپختونخوا میں بارشیں جاری رہنے کا امکان ہے جبکہ شمال مشرقی بلوچستان وسطی اورجنوبی پنجاب میں چند مقامات پر بارش کا امکان ہے۔

    محکمہ موسمیات نے خیبرپختونخوا، کشمیر، گلگت بلتستان کے پہاڑی علاقوں میں لینڈ سلائیڈنگ کا خدشہ ظاہرکیا ہے۔

    پنجاب میں بارش اورآندھی کے باعث مختلف حادثات میں لڑکی جاں بحق‘ 12افراد زخمی

    خیال رہے کہ گزشتہ ہفتے صوبہ پنجاب کے دارالحکومت لاہور سمیت مختلف شہروں میں موسلادھار بارش اور تیز آندھی کے باعث مختلف حادثات میں لڑکی جاں بحق اور 12 افراد زخمی ہوگئے تھے۔

    یاد رہے کہ گزشتہ دنوں محکمہ موسمیات نے پیشگوئی کی تھی کہ 7 اپریل کو ملک میں بارشوں کا باعث بننے والی ہواؤں کا سلسلہ داخل ہوجائے گا جس کے بعد آئندہ ہفتے بارشیں ہوسکتی ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • مقبوضہ کشمیر میں بھارتی فوج کی دہشت گردی کے خلاف ہڑتال

    مقبوضہ کشمیر میں بھارتی فوج کی دہشت گردی کے خلاف ہڑتال

    سرینگر: مقبوضہ کشمیر میں بھارتی فوج کی دہشت گردی کے خلاف ہڑتال ہے۔ وادی میں تمام تعلیمی ادارے، کاروباری مراکز اور ٹرانسپورٹ بند ہیں۔

    تفصیلات کے مطابق کشمیر میڈیا سروس کا کہنا ہے کہ مقبوضہ کشمیر میں بھارتی فوج کی ریاستی دہشت گردی اور بربریت کے خلاف ہڑتال ہے۔

    ہڑتال کی کال کشمیری نوجوانوں کی شہادت پر حریت رہنماؤں نے دی ہے۔ ہڑتال کے موقع پر وادی میں تمام تعلیمی ادارے، کاروباری مراکز اور ٹرانسپورٹ بند ہیں۔

    بھارتی فوج کی جانب سے موبائل اور انٹرنیٹ سروس بھی بند کر دی گئی۔

    کشمیر میڈیا سروس کا کہنا ہے کہ بھارتی فوج نے حریت رہنما یاسین ملک کو گرفتار کر رکھا ہے جبکہ علی گیلانی اور میر واعظ عمر فاروق نظر بند ہیں۔

    خیال رہے کہ رواں ماہ کے آغاز میں بھارتی فوج نے سرچ آپریشن کے نام پر مقبوضہ وادی میں ظلم و بربریت کی انتہا کرتے ہوئے 20 کشمیری نوجوانوں کو شہید کردیا تھا جبکہ 300 سے زائد زخمی ہوگئے تھے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • مقبوضہ کشمیر میں خواتین کی آبرو ریزی پر اقوام متحدہ کا نمائندہ روپڑا

    مقبوضہ کشمیر میں خواتین کی آبرو ریزی پر اقوام متحدہ کا نمائندہ روپڑا

    اسلام آباد: اقوام متحدہ کے بین الاقوامی انسانی حقوق کمیشن کے سیکریٹری جنرل مقبوضہ کشمیرمیں بھارتی مظالم پرآب دیدہ ہوگئے۔

    تفصیلات کے مطابق یو این ہیومن رائٹس کمیشن کے سفیر ملک ندیم عابد نے اقوام متحدہ کے ایک اجلاس میں خواتین سے متعلق سیشن میں بھارتی فوج کے مظالم پر رپورٹ پیش کرتے ہوئے کہا کہ بھارتی فوج کشمیر میں عورتوں اور بچوں پر انسانیت سوز مظالم ڈھا رہی ہے۔

    رپورٹ پیش کرتے ہوئے سیکریٹری جنرل کا اپنے جذبات پر قابو نہ رہا اور وہ بے اختیار رو پڑے، انھوں نے اجلاس کے شرکا کو بتایا کہ بھارتی فوج نے اب تک دس ہزار سے زائد خواتین کو جنسی زیادتی کا نشانہ بنایا ہے۔

    انھوں نے اجلاس میں رپورٹ پیش کرتے ہوئے کہا کہ بھارتی فوج سے نہ بچیاں محفوظ ہیں نہ معمر خواتین۔ رپورٹ کے مطابق جنسی زیادتی کا شکار بننے والی خواتین میں سات سال کی کم سن بچیوں سے لے کر 77 سال تک کی خواتین شامل ہیں۔

    اقوام متحدہ کے اس اجلاس میں سہ فریقی ممالک کی خواتین اول کے علاوہ پانچ وفاقی خواتین وزرا بھی موجود تھیں۔

    پاکستانی مشن اقوام متحدہ میں کشمیریوں کی آواز ہے‘ ملیحہ لودھی

    واضح رہے کہ مقبوضہ کشمیر میں بھارتی مظالم میں اس وقت ایک بار پھر شدت آئی جب بھارتی فورسز کے ہاتھوں کشمیری مجاہد برہان وانی کی شہادت کے بعد وادی میں تحریک آزادی میں نیا جوش اور ولولہ پیدا ہوا۔ بھارتی فورسز کی جانب سے نہتے کشمیریوں پر پیلٹ گن کے استعمال سے اب تک ایک ہزار سے زائد کشمیری بصارت سے محروم ہوچکے ہیں۔ خیال رہے کہ پیلٹ گن کا استعمال انسانی حقوق کی سنگین خلاف ورزی ہے۔

    پیلٹ گن کا استعمال: 1،314 کشمیری شہری بصارت سے محروم

    یاد رہے کہ اقوام متحدہ میں پاکستانی کمیشن مستقل طور پر مظلوم کشمیریوں کے لیے آواز اٹھارہا ہے اور اس سلسلے میں اقوام عالم کو کامیابی کے ساتھ بھاری فورسز کے مظالم کی طرف متوجہ کیا گیا ہے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • کسٹم حکام کے کشمیرمیں بھارتی اشیاء کی اسمگلنگ کی روک تھام کیلئے اقدامات

    کسٹم حکام کے کشمیرمیں بھارتی اشیاء کی اسمگلنگ کی روک تھام کیلئے اقدامات

    کراچی : ترجمان پاکستان کسٹم نے کہا ہے کہ بھارت سے اسمگل ہونے والی اشیاء کی روک تھام کیلئے مؤثر اقدامات کیے جائیں گے، بھارت اپنی غیر قانونی حرکتوں سے کشمیر کاز کو نقصان پہچانا چاہتا ہے۔

    یہ بات ترجمان نے اپنے ایک بیان میں کہی، ترجمان پاکستان کسٹم کے مطابق بھارتی مصنوعات کی غیرقانونی طریقے سے اسمگلنگ اور آزاد کشمیر میں اس کی تشہیر کے خلاف کارروائیاں جاری رکھی جائیں گی۔

    پاکستان کسٹم کے ترجمان نے اپنے جاری کردہ بیان میں کہا کہ ایک جانب بھارت نے مقبوضہ کشمیر میں جارحیت کو جاری رکھا ہوا ہے تو دوسری جانب آزاد کشمیر میں اپنی مصنوعات کی اسمگلنگ میں بھی اضافہ کردیا ہے۔

    کسٹم حکام نے واضح کیا ہے کہ ایسے عناصر کے خلاف بھرپور کارروائی کی جائے گی، بھارت اپنی مصنوعات کی اسمگلنگ کے ذریعے کشمیرکاز کو نقصان پہنچانے اور پاکستانی مصنوعات کے خلاف سازش کررہا ہے۔

    کسٹم حکام نے کہا کہ بھارتی اشیاء کو فروخت کرنے والے عناصر کےخلاف محب وطن کشمیری کامیاب نہیں ہونے دیں گے، اس سلسلے میں غیرقانونی اسمگلنگ کے خلاف آپریشن کو مزید تیز کیا جائے گا۔

  • تنقید کی پروا نہیں، کشمیرایشو آج ہماری کمیٹی ہی کی وجہ سے زندہ ہے: مولانا فضل الرحمان

    تنقید کی پروا نہیں، کشمیرایشو آج ہماری کمیٹی ہی کی وجہ سے زندہ ہے: مولانا فضل الرحمان

    لاہور: سربراہ جمعیت علمائے اسلام ف اور کشمیر کمیٹی کے چیئرمین مولانا فضل الرحمان نے کہا ہے کہ پاکستانی عوام کو بھارتی بربریت کے خلاف پرزوراحتجاج کرنا چاہیے.

    ان خیالات کا اظہار انھوں نے میڈیا سے گفتگو کرتے ہوئے کیا. ان کا کہنا تھا کہ جمعے کے روز ملک بھر میں بھارتی ظلم وستم پراحتجاج ہوگا، امریکا، اسرائیل اورانڈیا مردہ باد کا نعرہ لگے گا، بھیڑ کے لبادے میں چھے لوگوں کو احتجاج پرتکلیف ہوگی، میں‌ جانتا ہوں‌ کہ پاکستان میں کون امریکا، اسرائیل کا خیرخواہ ہے.

    [bs-quote quote=”نائن الیون کے بعد کشمیر کا لفظ ہماری زبانوں سے مٹ گیا تھا، ہمارے ہوائی اڈے امریکا کے حوالے کر دیے گیا اور ملک کی عزت اور وقار کو بیچ دیا گیا” style=”style-2″ align=”left” author_name=”مولانا فضل الرحمان” author_avatar=”https://arynewsudweb.wpengine.com/wp-content/uploads/2018/04/fazalurrehman60x60.jpg”][/bs-quote]

    ان کا کہنا تھا کہ نائن الیون کے بعد کشمیر کا لفظ ہی ہماری زبانوں سے مٹ گیا تھا، ہمارے ملکی ہوائی اڈے، فضاؤں کو امریکا کے حوالے کر دیا گیا، نائن الیون کے بعد ملک کی عزت اور وقار کو بیچ دیا تھا، مشرف نے یہ بھی کہا تھا کہ مسئلہ کشمیر کو سائیڈ لائن کیا جا سکتا ہے.

    مولانا فضل الرحمان کا کہنا تھا کہ 2008 کے بعد کشمیر کمیٹی میرے حوالے کی گئی، کمیٹی کی سربراہی ملنے کے بعد ہر فورم پر کشمیرکی بات کی جارہی تھی، آج وزیراعظم کہیں جاتے ہیں، تو کشمیر کی بات ہوتی ہے، وزیر خارجہ کشمیر کا مسئلہ اٹھاتے ہیں، یہ کشمیر کے حوالے اس کشمیر کمیٹی کا ہی کردار ہے.

    ان کا کہنا تھا کہ ہمارے ہاں صرف چیئرمین کشمیر کمیٹی پرتنقید ہوتی ہے، مجھے تنقید کی پروا نہیں، مسلسل جدوجہد کرنے پر یقین ہے. اگر کشمیر ایشو برقرارہے، تو یہ کشمیر کمیٹی کی کامیابی ہے.

    ان کا کہنا تھا کہ مسئلہ کشمیر کا کیا حل ہے، ہم نے بھارت سے بھی کہا ہے کہ کشمیر کے فوجی حل سے باہر نکلے، بھارتی عوام حکومت پردباؤ ڈالیں تنازعے کے فوجی حل سے باز رہے.

    ان کا کہنا تھا کہ پارلیمنٹ کیا اسی لئے ہے کہ تنقید ہو تو اسی پر ہو، مجھ پرہزار تنقید کریں، لیکن کشمیر پرجو یکجہتی ہے اس کااحترام کریں، سیاسی فریق بن کر کشمیرکاز کو نقصان پہنچانے کا باعث بن رہے ہیں۔

    ان کا کہنا تھا کہ صحیح پیرائے میں مسئلہ کشمیر کی اشاعت کی ضرورت ہے، کہا جاتا ہے کہ کشمیر کمیٹی کا اجلاس نہیں ہوتا، قومی سلامتی کمیٹی کا اجلاس نہیں ہوتا اس پرسوال نہیں اٹھتا، ہم معاملات کو سمیٹنا چاہتے ہیں، بکھیرنا نہیں چاہتے.

    الیکشن وقت پر ہونے کے بارے میں کچھ کہنے کی پوزیشن میں نہیں: مولانا فضل الرحمان

      خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کشمیرمیں بھارتی فوج کے مظالم سے حق خود ارادیت کو دبایا نہیں جاسکتا، آرمی چیف

    کشمیرمیں بھارتی فوج کے مظالم سے حق خود ارادیت کو دبایا نہیں جاسکتا، آرمی چیف

    راولپنڈی : آرمی چیف جنرل قمر جاوید باجوہ نے کہا ہے کہ مقبوضہ کشمیر میں بھارتی فوج کے مظالم سے حق خود ارادیت کو دبایا نہیں جاسکتا، ریاستی بربریت کی پرزور مذمت کرتے ہیں۔

    یہ بات انہوں نے کشمیر میں جاری حالیہ صورتحال  پر اپنے جاری بیان میں کہی، ارمی چیف نے دشمن کو دو ٹوک پیغام دے دیا، سپہ سالار کا کہنا ہے کہ مقبوضہ کشمیر میں بھارتی فوج کے مظالم سے ان کے حق خودارادیت کو دبایا نہیں جا سکتا۔

    کشمیری اپنے سیاسی حق خودارادیت کے حصول کیلئے کوشاں ہیں۔ پاک فوج کے شعبہ تعلقات عامہ آئی ایس پی آر کے مطابق آرمی چیف نے کہا کہ بھارتی فورسز مقبوضہ کشمیر میں نہتے کشمیریوں پر بربریت روا رکھے ہوئے ہیں۔

    بھارتی سکیورٹی فورسز کی بربریت کی شدید مذمت کرتے ہیں۔ بھارتی فوج کی جانب سے ایل او سی اور ورکنگ باؤنڈری پر سیزفائر کی مسلسل خلاف ورزیاں اور بھارتی فوج کا لائن آف کنٹرول پر عام شہریوں کو نشانہ بنانا انتہائی قابل مذمت ہے۔

    آرمی چیف سے امریکی قائم مقام نائب وزیرخارجہ کی ملاقات

    علاوہ ازیں آرمی چیف سے امریکی قائم مقام نائب وزیرخارجہ نے ملاقات کی ہے، ملاقات میں باہمی دلچسپی اورعلاقائی سیکیورٹی سے متعلق گفتگو کی گئی۔

    آئی ایس پی آر کے مطابق امریکی قائم مقام نائب وزیرخارجہ ایلس ویلز نے جی ایچ کیو میں آرمی چیف جنرل قمر جاوید باجوہ سے ملاقات کی، اس موقع پر گفتگو کرتے ہوئے آرمی چیف کا کہنا تھا کہ پاکستان خطے میں امن واستحکام کیلئے کوشاں اور افغانستان میں بھی دیرپا امن کا خواہاں ہے،

    خطے کے دیگرفریق بھی دیرپا امن کیلئے اپنا مثبت کردار ادا کریں۔ امریکی نائب وزیر خارجہ ایلس ویلز کا کہنا تھا کہ امریکا خطے میں امن واستحکام کیلئے اپنا مکمل تعاون جاری رکھے گا، ملاقات میں باہمی مشاورت سے مثبت پیشرفت کو آگے بڑھانے پر بھی اتفاق کیاگیا۔

    مقبوضہ کشمیرمیں بھارتی فوج کی فائرنگ‘ 20 نوجوان شہید

    یاد رہے کہ بھارت کی دہشت گرد فوج نے مقبوضہ وادی میں نہتے کشمیریوں پر ظلم و ستم کا بازار گرم کر رکھا ہے، 24گھنٹوں کے دوران مقبوضہ کشمیر کے ضلع اسلام آباد اور شوپیاں میں غاضب بھارتی فورسز نے سرچ آپریشن کے دوران16کشمیری نوجوانوں جبکہ 4 نوجوانوں کو نماز جنازہ کے دوران فائرنگ کرکے شہید کیا۔

    بھارتی فوج کی کارروائیوں میں 300 سے زائد افراد زخمی بھی ہوئے ہیں جن میں سے بیشترکی حالت تشویش ناک بتائی جا رہی ہے جبکہ اس دوران 4 رہائشی مکانات کو بھی تباہ کردیا گیا ہے۔

    واضح رہے کہ مقبوضہ کشمیر میں بھارتی فوج آزادی کی آواز کو دبانے کے لیے مختلف ہتھکنڈے استعمال کررہی ہے اور اب تک ہزاروں کشمیری شہید اور زخمی ہوچکے ہیں۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • مسئلہ کشمیر تقسیم ہند کا نامکمل ایجنڈا ہے:صدر آزاد کشمیر مسعود خان

    مسئلہ کشمیر تقسیم ہند کا نامکمل ایجنڈا ہے:صدر آزاد کشمیر مسعود خان

    اسلام آباد: صدرآزاد کشمیر مسعود خان نے کہا ہے کہ مسئلہ کشمیر تقسیم ہند کا نامکمل ایجنڈا ہے.

    ان خیالات کا اظہار انھوں نے آکسفورڈ اینڈ کیمبرج ٹرسٹ کے زیر اہتمام مسئلہ کشمیر پر منعقدہ سیمینار سے خطاب کرتے ہوئے کیا. ان کا کہنا تھا کہ بھارت نے کشمیریوں کو حق خودارادیت سے محروم کر رکھا ہے.

    [bs-quote quote=” اقوام متحدہ کے سیکریٹری جنرل مسئلہ کشمیرکے حل کے لئے مداخلت کریں اور اس ضمن میں ثالثی کا کردارادا کریں” style=”style-2″ align=”left” author_name=”مسعود خان” author_job=”صدر آزاد کشمیر” author_avatar=”https://arynewsudweb.wpengine.com/wp-content/uploads/2018/03/masood60x60.jpg”][/bs-quote]

    صدر آزاد کشمیر کا کہنا تھا کہ بھارتی فوج کشمیریوں کا قتل عام کررہی ہے، کشمیری خواتین کی سرعام بے حرمتی کی جارہی ہے، مگر کوئی عالمی سطح‌ کوئی پر ردعمل سامنے نہیں آتا.

    صدرآزاد کشمیر مسعود خان نے مسئلہ کشمیرپرعالمی برادری کی خاموشی کو افسوس ناک قرار دیتے ہوئے کہا کہ مسئلہ کشمیر پاکستان اور بھارت کے درمیان دوطرفہ معاملہ نہیں، یہ تقسیم ہند کا نامکمل ایجنڈا ہے.

    انھوں نے الزام عائد کیا کہ بھارت کشمیریوں کومذاکرات سے باہر رکھنے کے لئے کوشاں ہے، حالاں کہ کشمیری مسئلہ کشمیرکے بنیادی فریق ہیں.

    بھارتی فوج مقبوضہ کشمیر میں خون کی ہولی کھیل رہی ہے: مشعال ملک

    مسعود خان نے مطالبہ کیا کہ اقوام متحدہ کے سیکریٹری جنرل مسئلہ کشمیرکے حل کے لئے مداخلت کریں اور اس ضمن میں ثالثی کا کردارادا کریں. بھارت یواین فوجی مبصر گروپ کومقبوضہ کشمیرتک رسائی دے، مسئلہ کشمیرکو اقوام متحدہ کی سلامتی کونسل میں دوبارہ لے جانا ہوگا.

    انھوں نے مزید کہا کہ کشمیریوں کی رضامندی کے بغیرمسئلہ کشمیرکاحل ناممکن ہے، ایسی کوششوں‌ کو مکمل ناکامی ہوگی. کشمیری کسی قسم کی دہشت گردی میں ملوث نہیں، الٹا بھارت ایل او سی پر انھیں دہشت گردی کا نشانہ بنا رہا ہے.

    کشمیر ہماری خارجہ پالیسی کا بنیادی نقطہ ہے: خواجہ آصف

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں