سری نگر: ،کشمیری حریت رہنمایاسین ملک کو تقریباً چار ماہ کی قید کے بعد سری نگر کی سینٹرل جیل سے رہا کردیا گیا ہے۔

تفصیلات کےمطابق جموں و کشمیر لبریشن فرنٹ کے ترجمان نے یاسین ملک کی رہائی کی تصدیق کرتے ہوئے بتایا ہے کہ سینٹرل جیل میں قید حریت رہنما کو گزشتہ شام رہا کیا گیا جس کے بعد وہ اپنے گھر بھی پہنچ گئے ہیں۔

خیال رہے کہ کشمیری حریت رہنما یاسین ملک کو آٹھ جولائی کو حزب المجاہدین کے نوجوان کمانڈر برہان وانی کی شہادت کے بعد گرفتار کیا گیا تھا۔

حریت رہنما کو برہان وانی کی شہادت کے بعد غیر قانونی طور پر قید میں رکھا گیا جہاں ان کی صحت بگڑتی گئی۔ گذشتہ دنوں انہیں مبینہ طور پر طبی امداد نہ فراہم کرنے پر سری نگر میں بھارتی حکومت کے خلاف مظاہرے بھی ہوئے تھے۔

مزید پڑھیں:کشمیری رہنما یاسین ملک کی حالت بدستور تشویشناک

یاد رہے کہ یاسین ملک کو گزشتہ ہفتے اسپتال میں غلط انجیکشن لگنے کی وجہ سے ان کی طبعیت خراب ہوگئی تھی اور ان کے بائیں بازو نے کام کرنا چھوڑ دیا تھا۔

اس سے قبل گزشتہ ہفتے پیرکو حریت رہنما میر واعظ عمر فاروق کو دو ماہ کی قید کے بعد رہا کیا گیا تھا تاہم انہیں ابھی ان کے گھر پر نظر بند رکھا گيا ہے۔

مزید پڑھیں:یاسین ملک کو اسپتال سے جیل منتقل کردیا گیا

یاد رہے کہ دو روز قبل معروف حریت پسند رہنما یاسین ملک کو علاج مکمل کیے بغیر اسپتال سے سینٹرل جیل منتقل کردیا گیا تھاحریت رہنما غلط انجیکشن لگنے کے باعث چھ روز قبل تشویشناک حالت میں اسپتال لائے گئے تھے۔

واضح رہے کہ مقبوضہ کشمیر میں گذشتہ 114 دنوں سے جاری عوامی احتجاج میں اب تک 100سے زیادہ افراد شہیداور پندرہ ہزار سے زیادہ زخمی ہو چکے ہیں۔

نیویارک:وزیراعظم نوازشریف کے خصوصی وفد نے نیویارک میں جنرل اسمبلی کے صدر کو کشمیر میں انسانی حقوق کی خلاف ورزیوں سے متعلق دستاویزات فراہم کردیں۔

تفصیلات کےمطابق وزیر اعظم نوازشریف کے خصوصی نمائندے سینیٹر مشاہد حسین سید اور ڈاکٹر شذرا نے جنرل اسمبلی کے صدر سے ملاقات کی اس موقع پر اقوم متحدہ میں پاکستانی سفیر ڈاکٹر ملیحہ لودھی بھی ان کے ہمراہ تھی۔

اقوام متحدہ کے جنرل اسمبلی کے صدر سے ملاقات میں وزیراعظم کے خصوصی وفد نے مقبوضہ کشمیر میں بھارتی مظالم اور بگرٹی ہوئی صورتحال پر پیٹر تھامسن کو تفصیلی بریفنگ دی۔

اقوام متحدہ کی جنرل اسمبلی کے صدر نے صورت حال پر تشویش کا اظہار کیا اور دورے پر آئے ہوئے وفدکو یقین دلایا کہ وہ امن کو فروغ دینے کی ہر ممکن کوشش کریں گے۔

پیٹر تھامسن نے کہا کہ وہ امن کاری کی کارروائیوں کے اقوام متحدہ کے محکمہ کی طرف سے موجودہ صورتحال پراپ ڈیٹ حاصل کریں گے۔

واضح رہے کہ وزیراعظم پاکستان کے خصوصی وفدنے اقوام متحدہ کے امن کے محکمے کے حکام کو لائن آف کنٹرول پر بڑھتی کشیدگی پر تفصیلی بریفنگ دی۔

استبول: ترک وزیراعظم بن علی یلدرم نے مسئلہ کشمیر کےمعاملے پر پاکستان کے ساتھ اظہار یکجہتی اور کشمیر پر پاکستان کے موقف کی حمایت کی۔

تفصیلات کےمطابق وزیردفاع خواجہ محمد آصف نے استنبول میں ترک وزیراعظم بن علی یلدرم سے ملاقات کی اور مقبوضہ کشمیر میں بھارتی فورسز کی جانب سے مجموعی انسانی حقوق کی خلاف ورزیوں کے بارے میں ترک وزیراعظم کو آگاہ کیا۔

ترک وزیراعظم نے وزیر دفاع خواجہ آصف سے ملاقات میں ترکی کی پاکستان کے ساتھ مسئلہ کشمیر پراظہار یکجہتی کی۔

دریں اثنا،ترکی کےشہر استنبول میں عالمی توانائی کونسل کے اجلاس میں وزیر دفاع نے پاکستان کی نمائندگی کی اوراس کے علاوہ ترکی اور روس کے صدور کے ساتھ تفصیلی ملاقات بھی کی۔

وزیراعظم پاکستان کے خصوصی ایلچی محمدمحمد پرویز ملک اور محسن شاہ نواز رانجھا نے ترکی کی قومی اسمبلی کے اسپیکر اسماعیل کہرامان سےملاقات کی اور مقبوضہ کشمیر میں نہتے کشمیریوں پر بھارتی فورسز کی جانب سے کیے جانے والے مظالم کے بارے میں آگاہ کیا۔

انہوں نےترک اسپیکر قومی اسمبلی سے خطے کی سیکیورٹی کی صورتحال کے ساتھ ساتھ لائن آف کنٹرول پر بھارتی فوج کی جانب سے کی جانے والے خلاف ورزیوں کا بھی ذکر کیا۔

واضح رہے کہ ترکی کی قومی اسمبلی کے اسپیکر نے کشمیر پر مذاکرات اقوام متحدہ کی قرارداوں کے ذریعے حل کرنے کے لیے پاکستان کی حمایت کا اظہار کیا۔

اسلام آباد : وزیراعظم نوازشریف کا کہنا ہے کہ مسئلہ کشمیر پر بھارت کا دوہرا معیار ہے ہے جس سے خطے میں مسائل پیدا ہو رہے ہیں۔

تفصیلات کےمطابق وزیر اعظم نواز شریف سے نیٹو ملٹری کمیٹی کے چیئر مین جنرل پیٹر نے ملاقات کی ہے جس میں مسئلہ کشمیر،پاک بھارت کشیدگی،خطے کی سیکورٹی صورتحال اور دو طرفہ امور پر تبادلہ خیال کیاگیا۔

اس موقع پر وزیر اعظم نواز شریف نے کہاکہ بھارت کا اڑی حملے کا پاکستان پر الزام غیر منصفانہ ہے۔ان کا کہنا تھا کہ پاکستان کی افغانستان سے متعلق پالیسی بالکل واضح ہے،افغانستان کا دشمن پاکستان کا دشمن ہے ،ہم نے ہمیشہ کہا کہ دہشت گردی مشترکہ دشمن ہے۔

نوازشریف نے کہا کہ افغانستان میں امن نہ صرف خطے بلکہ پاکستان کے لیے بھی ضروری ہے،امن کے حصول کے لیے پاکستان کی سول اور عسکری قیادت افغان حکام سے رابطے میں ہے۔

ان کا کہنا تھا کہ آرمی چیف اور میں نے افغانستان کا دورہ کر کے افغان حکام کو ہر ممکن تعاون کی یقین دہانی کرائی ہے۔

دوسری جانب جنرل پیٹر نے کہا کہ دنیا مسئلہ کشمیر سے الگ نہیں رہ سکتی۔ان کا کہنا تھا کہ دہشت گردی کے خلاف جنگ میں پاک فوج کا کردار قابل ستائش ہے جنہوں نے اس جنگ میں بہت کامیابیاں حاصل کی ہیں۔

نیٹو ملٹری کمیٹی کے چیئر مین کا کہنا تھا کہ پاکستان نیٹو کا روایتی اتحادی اور اہم ملک ہے۔جنرل پیٹر نے مسلح افواج کے سربراہوں سے ملاقاتوں پر بھی اطمینان کا اظہار کیا۔

واضح رہے نیٹو ملٹری کمیٹی کے چیئر مین جنرل پیٹر نے گزشتہ دور روز میں چیئر مین جوائنٹ چیف آف اسٹاف کمیٹی جنرل راشد محمود اور آرمی چیف جنرل راحیل شریف سے بھی ملاقاتیں کی تھی۔