ARYNews.tv | Urdu – Har Lamha Bakhabar

Tag: کشمیر

  • مقبوضہ کشمیر میں 4 کشمیری جعلی مقابلوں میں شہید، پاکستان کی مذمت

    مقبوضہ کشمیر میں 4 کشمیری جعلی مقابلوں میں شہید، پاکستان کی مذمت

    اسلام آباد: پاکستان نے مقبوضہ کشمیر میں بھارتی فورسز کے ہاتھوں جعلی مقابلوں اور ماورائے عدالت قتل عام کی مذمت کی ہے۔

    تفصیلات کے مطابق دفتر خارجہ کے ترجمان نے کہا ہے کہ مقبوضہ کشمیر کے علاقے شوپیاں میں 4 کشمیریوں کو جعلی مقابلوں میں شہید کر دیا گیا ہے، پاکستان ان جعلی مقابلوں کی شدید مذمت کرتا ہے۔

    ترجمان نے کہا پاکستان مقبوضہ کشمیر میں محرم جلوسوں پر پابندیوں کی بھی مذمت کرتا ہے، کشمیریوں کو محکوم بنانے کے بھارتی ہتھکنڈے ناکام رہیں گے۔

    انھوں نے کہا کہ 1 سال میں بھارتی فوج نے جعلی مقابلوں میں 300 کشمیریوں کو شہید کیا ہے، کشمیری شہدا میں عورتیں اور بچے بھی شامل ہیں، بھارتی ریاستی دہشت گردی کشمیریوں کے حوصلے پست نہیں کر سکتی۔

    بھارتی فوج کی بربریت سے مزید 4 کشمیری نوجوان شہید

    ترجمان دفتر خارجہ نے کہا پاکستان حق خود مختاری کے لیے مظلوم کشمیریوں کی حمایت جاری رکھے گا۔

    یاد رہے کہ آج کشمیر میڈیا سروس کی جانب سے کہا گیا تھا کہ شوپیاں کے علاقے میں ریاستی دہشت گردی کی ایک نئی کارروائی میں قابض بھارتی فوج نے 4 کشمیریوں کو شہید کر دیا ہے۔

    کشمیر میڈیا سروس کے مطابق بھارت نے مقبوضہ کشمیر میں ریاستی دہشت گردی کا بازار گرم کر رکھا ہے، دوسری طرف قابض بھارتی فوج کی علاقے میں کارروائی کے خلاف احتجاج کو دنیا کی نظروں سے اوجھل کرنے کے لیے علاقے میں انٹر نیٹ سروس بھی معطل کر دی گئی ہے۔

  • کشمیری شاعری، دردناک موسیقی کی دنیا میں تشہیر سے مسئلہ کشمیر اجاگر کیا جا سکتا ہے: شیریں مزاری

    کشمیری شاعری، دردناک موسیقی کی دنیا میں تشہیر سے مسئلہ کشمیر اجاگر کیا جا سکتا ہے: شیریں مزاری

    اسلام آباد: وفاقی وزیر برائے انسانی حقوق ڈاکٹر شیریں مزاری نے کہا ہے کہ ہمیں کشمیر کے حوالے سے روایتی ڈپلومیسی سے آگے بڑھنا ہوگا، کشمیری ثقافت، شاعری، ان کی دردناک موسیقی کو دنیا بھر میں پھیلا کر مسئلہ کشمیر اجاگر کیا جا سکتا ہے۔

    ڈاکٹر شیریں مزاری نے ’کشمیر آرٹ کے ذریعے‘ کے موضوع پر آج اسلام آباد میں منعقدہ نمائش کے موقع پر تقریب سے خطاب کرتے ہوئے کہا ہمیں کشمیر کے حوالے سے روایتی ڈپلومیسی سے آگے بڑھنا ہوگا، وزیراعظم عمران خان نے مسئلہ کشمیر کے حوالے سے ایک بہترین بیانیہ پیش کیا جس کو دنیا بھر میں نہ صرف سراہا گیا بلکہ مودی کے شرم ناک عزائم بھی بے نقاب ہوئے۔

    انھوں نے کہا کسی بھی معاشرے میں مسائل کو اجاگر کرنے اور تحریکوں کو کامیاب بنانے میں سول سوسائٹی کا بنیادی کردار ہوتا ہے، فلسطین کی تحریک کو بھی دنیا بھر میں کامیاب بنانے میں دنیا بھر کی سول سوسائٹی نے اہم کردار ادا کیا، یہی وجہ ہے کہ متحدہ عرب امارات اور اسرائیل کے درمیان تعلقات قائم ہونے پر کوئی بھی یورپین ملک واہ واہ نہیں کر رہا کیوں کہ وہاں پر سول سوسائٹی بہت فعال ہیں۔

    شیریں مزاری کا کہنا تھا ہمیں وزیر اعظم کے کشمیر کے حوالے سے پیغام کو آگے لے کر جانا ہے تاکہ کشمیریوں کو ان کی منزل تک پہنچایا جا سکے۔

    انھوں نے کہا ہماری وزارت کی طرف سے ڈیجیٹل فلم فیسٹیول جاری ہے جس میں پہلی فلم کشمیر کے حوالے سے وزارت کی ویب سائٹ پر جاری کی گئی اور اس فلم کا نام فریاد تھا جس کو 5 لاکھ افراد نے آن لائن دیکھا۔

    وفاقی وزیر نے کہا ہمیں کشمیر کا مقدمہ لڑنے کے لیے نئے طریقے اختیار کرنا ہوں گے تاکہ ہم معنی خیز انداز میں کشمیر کا بیانیہ اجاگر کر سکیں۔

    تقریب میں میں 100 سے زائد تصاویر رکھے گئے تھے جن میں کشمیر میں جاری لاک ڈاؤن کی منظر کشی کی گئی تھی، یہ تصاویر ملک کے نامور مصوروں، طالب عملوں اور دیگر شعبہ زندگی سے تعلق رکھنے والے افراد نے تیار کی تھیں۔

  • مقبوضہ کشمیر: بھارتی فورسز کے آپریشن میں 3 کشمیری شہید، 5 بھارتی اہلکار بھی ہلاک

    مقبوضہ کشمیر: بھارتی فورسز کے آپریشن میں 3 کشمیری شہید، 5 بھارتی اہلکار بھی ہلاک

    سرینگر: مقبوضہ کشمیر کے ضلع بارہ مولہ میں بھارتی فورسز کے نام نہاد آپریشن کے دوران 3 کشمیری شہید گئے جبکہ 5 بھارتی فوجی اہلکار بھی ہلاک ہوگئے۔

    تفصیلات کے مطابق مقبوضہ کشمیر کے ضلع بارہ مولہ میں بھارتی فورسز کا نام نہاد آپریشن جاری ہے، بارہ مولہ میں نام نہاد آپریشن کے دوران 3 کشمیری شہید ہوگئے۔

    کشمیری میڈیا کے مطابق بارہ مولہ میں آپریشن کے دوران 5 بھارتی فوجی اہلکار بھی ہلاک ہوگئے۔

    بھارتی میڈیا کا کہنا ہے کہ بھارتی فوج اور کشمیری نوجوانوں کے درمیان ناکے پر جھڑپ شروع ہوئی۔

    خیال رہے کہ حریت کانفرنس نے مقبوضہ کشمیر میں کل یعنی بدھ کو ہڑتال کا اعلان کیا ہے، ہڑتال کا اعلان سری نگر میں 3 کشمیری مزدوروں کے قتل کے خلاف کیا گیا ہے۔

    بھارتی فورسز نے 18 جولائی کو 3 کشمیریوں کو شہید کر کے تدفین کر دی تھی، مزدور کام ڈھونڈنے کے لیے سرینگر گئے تھے۔ قتل کیے گئے 3 کشمیریوں کے اہلخانہ نے ڈی این اے ٹیسٹ کا مطالبہ کیا تھا۔

    ایمنسٹی انٹرنیشنل نے بھی کشمیری نوجوانوں کے ماورائے عدالت قتل کی تحقیقات کا مطالبہ کیا ہے۔

    خیال رہے کہ مقبوضہ کشمیر میں بھارتی فورسز نے 1 سال سے غیر قانونی محاصرے کے دوران 214 کشمیریوں کو شہید کیا جبکہ بھارتی فورسز کے تشدد سے 13 سو  90 کشمیری زخمی ہوئے۔

  • بھات کے یوم آزادی پر مقبوضہ وادی میں یوم سیاہ منایا جا رہا ہے

    بھات کے یوم آزادی پر مقبوضہ وادی میں یوم سیاہ منایا جا رہا ہے

    سری نگر: بھات کے یوم آزادی پر آج مقبوضہ وادی میں یوم سیاہ منایا جا رہا ہے۔

    تفصیلات کے مطابق بھات کے یوم آزادی پر آج مقبوضہ وادی میں یوم سیاہ منایا جا رہا ہے، حریت رہنما کی کال پر آج مقبوضہ وادی میں مکمل ہڑتال ہوگی۔

    گزشتہ روز مقبوضہ وادی میں پاکستان کے یوم آزادی کا جشن منایا گیا تھا، اس موقع پر سرینگر میں پاکستانی پرچم لہرائے گئے تھے، آج بھارت کے یوم آزادی پر دنیا بھر میں مقیم کشمیری یوم سیاہ منائیں گے۔

    یوم سیاہ پر بھارتی غیر قانونی مقبوضہ جموں و کشمیر میں مکمل ہڑتال ہوگی، قابض انتظامیہ نے مظاہرے روکنے کے لیے مقبوضہ علاقے میں پابندیوں کو مزید سخت کر دیا ہے۔

    ادھر کشمیر کونسل یورپ نے بیان جاری کرتے ہوئے کہا ہے کہ ہم بھارت کا یوم آزادی یوم سیاہ کے طور پر منائیں گے، یورپی ہیڈکوارٹرز میں بھارتی سفارت خانے کے سامنے مظاہرہ بھی کیا جائے گا۔

    کشمیر کونسل کا کہنا ہے کہ ملٹری لاک ڈاؤن سے کشمیریوں کی مشکلات میں اضافہ ہو گیا ہے، ہم کشمیر کی آزادی اور بھارتی مظالم کے خلاف جدوجہد جاری رکھیں گے۔

    واضح رہے کہ جموں و کشمیر کی قانونی جداگانہ حیثیت ختم کرنے کا رواں ماہ ایک سال پورا ہو گیا ہے، وادی میں اس عرصہ بدترین لاک ڈاؤن رہا، ہزاروں کشمیری بھارتی فورسز کے تشدد اور فائرنگ سے زخمی ہوئے اور سیکڑوں لاپتا کیے گئے ہیں۔

  • مودی اور امیت شاہ ہندو راشٹریا کے تحت کشمیر کا حل چاہتے ہیں: سردار مسعود خان

    مودی اور امیت شاہ ہندو راشٹریا کے تحت کشمیر کا حل چاہتے ہیں: سردار مسعود خان

    اسلام آباد: آزاد کشمیر کے صدر سردار مسعود خان کا کہنا ہے کہ مقبوضہ کشمیر میں ایک سال سے ٹارچر اور قتل عام معمول بن گیا ہے، مودی اور امیت شاہ اب ہندو راشٹریا کے تحت کشمیر کا حل چاہتے ہیں۔

    تفصیلات کے مطابق آزاد کشمیر کے صدر سردار مسعود خان نے تقریب سے خطاب کرتے ہوئے کہا کہ اقلیت میں ہونے سے مراد یہ نہیں کہ شہری دوسروں سے کم تر ہیں، پاکستان کے آئین میں اقلیتوں کے حقوق کو مکمل تحفظ حاصل ہے۔

    سردار مسعود خان کا کہنا تھا کہ بھارت میں اقلیتوں سے ناروا سلوک اور کشمیر میں بربریت ہندو توا نظریہ ہے، بھارت میں مسلمانوں کا استحصال ہو رہا ہے۔ مقبوضہ کشمیر میں ایک سال سے ٹارچر اور قتل عام معمول بن گیا۔

    انہوں نے کہا کہ ہٹلر دور میں جو ہوا وہ آج کشمیر میں ہو رہا ہے، مودی اور امیت شاہ اب ہندو راشٹریا کے تحت کشمیر کا حل چاہتے ہیں، کشمیر میں ہندوؤں کو بسانے کا منصوبہ بنایا جا رہا ہے۔

    سردار مسعود خان کا کہنا تھا کہ دنیا مقبوضہ کشمیر میں بھارتی آبادی کے تناسب کی تبدیلی اور نسل کشی روکے، عالمی انسانی حقوق کی تنظیمیں اور اقوام متحدہ کردار ادا کرے۔

  • بھارت کا مکروہ چہرہ پھر بے نقاب، جعلی مقابلے میں 3 مزدوروں کو شہید کر دیا

    بھارت کا مکروہ چہرہ پھر بے نقاب، جعلی مقابلے میں 3 مزدوروں کو شہید کر دیا

    شوپیاں: بھارت کا مکروہ چہرہ ایک بار پھر بے نقاب ہو گیا ہے، مقبوضہ کشمیر کے علاقے شوپیاں میں جعلی مقابلے میں 3 مزدوروں کو شہید کر دیا گیا۔

    تفصیلات کے مطابق بھارت کا مکروہ چہرہ پھر بے نقاب ہو گیا ہے، مزدوری کے لیے جانے والے تین نوجوانوں کو دہشت گرد قرار دے کر جعلی مقابلہ میں شہید کر دیا گیا۔

    18 جولائی کو شوپیاں میں مبینہ مقابلہ میں شہید کیے جانے والے نوجوان مزدور تھے اور ان کے نام ابرار گجر، امتیاز گجر اور ابرار خان تھے۔

    خیال رہے کہ پاکستان متعدد بار عالمی برادری کی توجہ بھارتی مظالم کی طرف مبذول کرا چکا ہے، گزشتہ سال 5 اگست کو یک طرفہ ظالمانہ اور غیر قانونی بھارتی اقدام کے ذریعے مقبوضہ کشمیر کی حیثیت تبدیل کی گئی تھی، جس کے بعد سے کشمیر کو ایک بہت بڑے انسانی جیل میں بدلا جا چکا ہے۔

    بھارت ہجرت کرنے والے ہندوخاندان کے 11 افراد پراسرار طور پر ہلاک

    ایک سالہ مکمل لاک ڈاؤن کے ذریعے ہزاروں کشمیری نوجوانوں کو لاپتا کیا جا چکا ہے، جب کہ بے شمار کشمیری زخمی اور شہید کیے جا چکے ہیں، لاک ڈاؤن کے دوران کھانے پینے کی اشیا کی قلت کے باعث بھی کشمیر میں انسانی المیے نے جنم لیا۔

    ادھر ایک اور ہول ناک خبر بھی آئی ہے کہ پاکستان سے بھارت ہجرت کرنے والے ایک ہندو خاندان کے 11 افراد پراسرار طور پر ہلاک ہو گئے ہیں، اور اس خدشے کا اظہار کیا جا رہا ہے کہ انھیں بی جے پی نے قتل کر دیا ہے، تھرپار سے تعلق رکھنے والا ہندو خاندان کچھ عرصہ قبل راجھستان میں آباد ہو گیا تھا، ہندو خاندان نے جودھ پور کے علاقے ڈیچو کے لوڈتہ گاؤں میں سکونت اختیار کی تھی۔

    مقامی افراد کے مطابق خاندان کے افراد پر اسرار طور پر صبح مردہ پائے گئے، بھارتی میڈیا کا کہنا تھا کہ پولیس نے پراسرار موت کے معاملے میں خاندانی تنازع میں قتل کے شبہے کا اظہار کیا ہے۔

    ایک طرف قائد اعظم کا پاکستان اور دوسری جانب انتہا پسند مودی کا بھارت ہے، پاکستان میں قدرتی آفت میں بلاتفریق ہندو برادری کے لوگوں کو ریسکیو کیا گیا۔

  • توقع ہے کہ جنرل اسمبلی مقبوضہ کشمیر پر مؤثرکردار ادا کرے گی: وزیر خارجہ

    توقع ہے کہ جنرل اسمبلی مقبوضہ کشمیر پر مؤثرکردار ادا کرے گی: وزیر خارجہ

    اسلام آباد: وزیر خارجہ شاہ محمود قریشی سے اقوام متحدہ کی جنرل اسمبلی کے نو منتخب صدر وولکن بوزکر کی ملاقات ہوئی، وزیر خارجہ کا کہنا تھا کہ توقع ہے کہ اقوام متحدہ جنرل اسمبلی مقبوضہ کشمیر پر مؤثرکردار ادا کرے گی۔

    تفصیلات کے مطابق وزیر خارجہ شاہ محمود قریشی سے اقوام متحدہ کی جنرل اسمبلی کے نو منتخب صدر وولکن بوزکر کی ملاقات ہوئی، ملاقات میں سیکریٹری خارجہ سہیل محمود، ڈائریکٹر جنرل اقوام متحدہ اور وزارت خارجہ افسران بھی شامل رہے۔

    ملاقات میں جنرل اسمبلی اجلاس سے متعلقہ امور اور ایجنڈے پر تبادلہ خیال ہوا، وزیر خارجہ شاہ محمود قریشی نے وولکن بوزکر کو صدر منتخب ہونے پر مبارکباد دی اور نیک تمناؤں کا اظہار کیا۔

    وزیر خارجہ کا کہنا تھا کہ اقوام متحدہ جنرل اسمبلی اجلاس کے لیے جاری ایجنڈا خوش آئند ہے، جنرل اسمبلی کا 75 واں اجلاس خصوصی اہمیت کا حامل ہوگا۔

    انہوں نے کہا کہ ایک طرف دنیا کرونا وائرس عالمی وبائی چیلنج سے نمٹنے کے لیے کوشاں ہے، دوسری طرف عالمی معاشی بحران کو پنپتا ہوا دیکھ رہے ہیں، پاکستان وبائی تناظر میں جنرل اسمبلی اجلاس کے طریقہ کار سے متفق ہے۔

    وزیر خارجہ نے کرونا وائرس سے نمٹنے اور معیشتوں کی بحالی کے لیے وزیر اعظم عمران خان کی تجویز سے آگاہ کرتے ہوئے کہا کہ کرونا وائرس سے نمٹنے کے لیے عالمی سطح پر مشترکہ کاوشوں کی ضرورت ہے، کرونا ویکسین کی تیاری کے لیے بہت سے ممالک کوششیں کر رہے ہیں، توقع ہے کہ کرونا ویکسین میں ترقی پذیر ممالک کو ترجیح بنائی جائے گی۔

    ملاقات میں وزیر خارجہ نے نو منتخب صدر کو مقبوضہ کشمیر کے معاملے سے بھی آگاہ کیا، انہوں نے کہا کہ بھارت نے مقبوضہ کشمیر میں اقوام متحدہ کی قراردادوں کی خلاف ورزی کی۔ بھارت نے عالمی قوانین کی بھی صریحاً خلاف ورزی کی۔

    انہوں نے کہا کہ بھارت نے 5 اگست 2019 کو یکطرفہ اقدامات کیے، مقبوضہ کشمیر میں ماورائے عدالت قتل، نہتوں پر فائرنگ اور تشدد معمول ہے۔

    وزیر خارجہ کا کہنا تھا کہ بھارت ایل او سی کی مسلسل خلاف ورزیاں کر رہا ہے، بھارتی قابض فوج معصوم شہریوں کو گولیوں کا نشانہ بنا رہا ہے۔

    انہوں نے کہا کہ مسئلہ کشمیر اقوام متحدہ کی قراردوں کے مطابق عالمی سطح پر متنازعہ مسئلہ ہے، اس کی توثیق سیکریٹری جنرل اقوام متحدہ نے 8 اگست 2019 کے بیان میں بھی کی، توقع ہے کہ اقوام متحدہ جنرل اسمبلی مقبوضہ کشمیر پر مؤثرکردار ادا کرے گی، پاکستان تمام عالمی فورمز کو بھارتی عزائم سے متعلق آگاہ کر چکا ہے۔

    ملاقات میں دونوں رہنماؤں درمیان افغان امن عمل اور خطے میں امن و استحکام کی کاوشوں پر بھی گفتگو ہوئی، وزیر خارجہ نے کہا کہ پاکستان، افغانستان میں امن کے لیے مصالحانہ کردار خلوص نیت سے ادا کر رہا ہے، خطے میں دیرپا امن کے لیے بین الافغان مذاکرات کا جلد انعقاد ناگزیر ہے۔

  • اب مجھے کشمیر کیلئے بولنے سے کوئی نہیں روک سکتا، مہاتیر محمد کشمیریوں کی حمایت میں ڈٹ گئے

    اب مجھے کشمیر کیلئے بولنے سے کوئی نہیں روک سکتا، مہاتیر محمد کشمیریوں کی حمایت میں ڈٹ گئے

    کوالالمپور:ملائیشیا کے سابق وزیر اعظم ڈاکٹر مہاتیر محمد کا کہنا ہے کہ کشمیر کے حوالے سے اپنے پچھلے بیانات پر کوئی افسوس نہیں، بیان کے بعد بھارت سےبرآمدات پر اثر پڑامگرافسوس نہیں، اب مجھے کشمیر کیلئے بولنے سے کوئی نہیں روک سکتا۔

    تفصیلات کے مطابق ملائیشیا کے سابق وزیر اعظم ڈاکٹر مہاتیر محمد نے اپنے بیان میں کہا ہے کہ کشمیرمیں گزشتہ برس 5اگست کےبھارتی اقدامات غیر قانونی  ہیں اور بھارت کا آرٹیکل 370اور35اے کی منسوخی بھی غیرقانونی اقدام ہے۔

    ڈاکٹر مہاتیر محمد کا کہنا تھا کہ بھارت کے زیر تسلط جموں وکشمیرمیں 9لاکھ بھارتی فوجی تعینات ہیں ، جس کی وجہ سے کشمیری سخت فوجی محاصرے میں زندگی بسرکرنے پر مجبور ہیں، عالمی برادری مقبوضہ کشمیر میں لوگوں کی حالت زار کا نوٹس لے۔

    ملائیشیا کے سابق وزیراعظم نے کہا انسانیت کیلئے آواز اٹھانے کو ترجیح دی ہے، اپنے پچھلے بیانات پر کوئی افسوس نہیں، کشمیر پر بات کروں گا، اب کسی کے بائیکاٹ کرنے کی پرواہ نہیں، اب مجھے کشمیر کیلئے بولنے سے کوئی نہیں روک سکتا۔

    ان کا مزید کہنا تھا کہ بیان کے بعد بھارت سےبرآمدات پر اثر پڑامگرافسوس نہیں، کشمیرمیں ناانصافیوں پرایکسپورٹ کونقصان ہوا،یہ سودہ مہنگانہیں، کشمیر پرجو بھی میں نے کہا اس پر معافی نہیں مانگوں گا۔

    یاد رہے گذشتہ سال ملیشیا کے وزیراعظم مہاتیر محمد نے اقوام متحدہ کی جنرل اسمبلی سے خطاب کرتے ہوئے بھارتی جارحیت سے دنیا کو آگاہ کیا تھا اور مظلوم کشمیریوں کی آواز بنے تھے۔

    بعد ازاں ان کے اس بیان کے بعد بھارت نے ملیشیا پر شدید برہمی کا اظہار کرتے ہوئے تجارتی معاملات ختم کرنے کا بھی عندیہ دیا تھا۔

    مہاتیرمحمد نے اقوام متحدہ میں تقریر میں کہا تھا کہ بھارت نے کشمیرپرحملہ کر کے قبضہ کیا ہوا ہے، اقوام متحدہ کی قراردادوں کے باوجود بھارت نے مقبوضہ کشمیرپرقبضہ کیا ہوا ہے۔

    ان کا کہنا تھا کہ کشمیر کے مسئلے کو پرامن طریقے سے حل ہونا چاہیے، بھارت کو پاکستان کے ساتھ کام کرنا چاہیے تاکہ یہ مسئلہ حل ہو اور اقوام متحدہ کی قراردادوں کو نظرانداز نہیں کرنا چاہیے کیونکہ یہ اقدام عالمی ادارے اور قانون کی حکمرانی کو دیگر طریقے سے نظرانداز کرنے کا باعث بنے گا۔

  • کشمیر کی قانونی حیثیت تبدیل کرکے جدوجہد کو روکا نہیں جاسکتا، وزیراعظم

    کشمیر کی قانونی حیثیت تبدیل کرکے جدوجہد کو روکا نہیں جاسکتا، وزیراعظم

    اسلام آباد: وزیراعظم عمران خان کا کہنا ہے کہ کشمیر کی قانونی حیثیت تبدیل کرکے جدوجہد کو روکا نہیں جاسکتا۔

    اے آر وائی نیوز کی رپورٹ کے مطابق وزیراعظم عمران خان سے آل پارٹیز حریت کانفرنس کے وفد نے ملاقات کی، وفد نے مقبوضہ کشمیر کی موجودہ صورتحال سے متعلق وزیراعظم کو آگاہ کیا۔

    آل پارٹیز حریت کانفرنس کے وفد نے بھارت کے غیرقانونی جابرانہ و یکطرفہ اقدام کی مذمت کی، وفد نے حکومت اور وزیراعظم کی ذاتی کاوشوں کو بھرپور خراج تحسین پیش کیا۔

    وفد کے ارکان کا کہنا تھا کہ وزیراعظم عمران خان مظلوم کشمیریوں کی موثر آواز بنے ہیں، موثر آواز بننے پر کشمیری قوم وزیراعظم کی مشکور ہے۔

    وفد کے ارکان کا کہنا تھا کہ وزیراعظم عمران خان نے مودی کے فاشسٹ چہرے کو بے نقاب کیا، عمران خان نے دنیا کو بھارت کا اصل روپ دکھایا ہے۔

    وزیراعظم نے کہا کہ 9 لاکھ قابض افواج کے ذریعے کشمیریوں کی آواز کو دبایا نہیں جاسکتا، آر ایس ایس فلسفے پر عمل پیرا مودی کے فاشسٹ عزائم واضح ہوچکے ہیں۔

    مزید پڑھیں: کشمیرجلد آزاد ہوگا، سید علی گیلانی کو نشان پاکستان دیں گے، عمران خان

    عمران خان نے کہا کہ ہر سطح پر اور فورم پر کشمیریوں کی آواز بلند کرتا رہوں گا، ظلم و ستم سے متاثرہ کشمیریوں کی آوازیں عالمی ضمیر کو جھنجھوڑ رہی ہیں، پاکستان ہر محاذ پر کشمیریوں کی اخلاقی، سفارتی، سیاسی حمایت جاری رکھے گا۔

    واضح رہے کہ اس سے قبل وزیر اعظم نے کہا تھا کہ5 اگست2019 کو مودی نے بہت بڑی غلطی کی،اس اقدام کے بعد کشمیریوں کی آزادی قریب ہے، وزیراعظم عمران خان نے حریت رہنما سید علی گیلانی کو نشان پاکستان دینے کااعلان کرتے ہوئے کہا کہ سید علی گیلانی کونشان پاکستان اعزاز سے نوازیں گے۔

    عمران خان کا کہنا تھا کہ5اگست 2019کو نریندر مودی نے جو قدم اٹھایا وہ اسٹریٹجک بلنڈر ہے، مودی نے پاکستان کی نفرت اور ہندو کارڈ کی بنیاد پر الیکشن جیتا تھا کشمیریوں کی جدوجہد کے نتیجے میں کشمیر آزاد ہوگا۔

  • سینیٹ میں کشمیریوں سے اظہار یکجہتی کی قرارداد متفقہ طور پر منظور

    سینیٹ میں کشمیریوں سے اظہار یکجہتی کی قرارداد متفقہ طور پر منظور

    اسلام آباد: سینیٹ میں کشمیریوں سے اظہار یک جہتی کی قرارداد متفقہ طور پر منظور کر لی گئی، وزیر خارجہ شاہ محمود قریشی کی جانب سے قرارداد پیش کی گئی۔

    اے آر وائی نیوز کے مطابق آج شاہ محمود قریشی نے سینیٹ اجلاس میں مظلوم کشمیریوں کے ساتھ اظہار یک جہتی کی قرار داد پیش کی، جس میں کہا گیا ہے کہ ہم کشمیریوں پر مظالم کی شدید مذمت کرتے ہیں، بھارتی اقدامات جنوبی ایشیا کے امن و استحکام کے لیے شدید خطرہ ہیں۔

    قرارداد میں کہا گیا ہے کہ جموں و کشمیر عالمی سطح پر تسلیم کیا گیا متنازع علاقہ ہے، بھارت غیر قانونی یک طرفہ طور پر مقبوضہ کشمیر کی قانونی حیثیت تبدیل نہیں کر سکتا، بھارت عالمی مبصرین کو مقبوضہ کشمیر میں رسائی دے، اور فوری طور پر وادی سے افواج کو نکالے، نیز سینیٹ بھارت کے غیر قانونی اقدامات کو مسترد کرتا ہے۔

    کشمیرجلد آزاد ہوگا، سید علی گیلانی کو نشان پاکستان دیں گے، عمران خان

    قرارداد کے متن میں یہ بھی کہا گیا کہ جعلی ان کاؤنٹرز کے ذریعے کشمیریوں کو شہید کیا جا رہا ہے، بی جے پی حکومت زہریلے ہندوتوا نظریے پر کاربند ہے، بھارت ایل او سی پر بھی سول آبادی اور کشمیریوں کو نشانہ بنا رہا ہے، پاکستان کی حکومت اور عوام کشمیریوں کے ساتھ مکمل اظہار یک جہتی کرتی ہے، ہمارا مطالبہ ہے کہ کشمیری عوام کے خلاف انسانی حقوق کی سنگین خلاف ورزیاں روکی جائیں۔

    پاکستان کے کونے کونے میں کشمیریوں پر ظلم کے خلاف تاریخ ساز احتجاج

    قبل ازیں، سینیٹ کے خصوصی اجلاس میں کشمیر کے حوالے سے تحریک بھی پیش کی گئی تھی، یہ تحریک مشیر پارلیمانی امور بابر اعوان نے پیش کی، جس میں کہا گیا تھا کہ بھارت اقوام متحدہ کی قراردادوں کی خلاف ورزی کر رہا ہے، بھارتی آئین میں مقبوضہ کشمیر کی حیثیت بدلنے کے لیے ترمیم ہوئی، قابض بھارتی فوج ایک سال سے غیر معمولی نسل کشی میں مصروف ہے، اس لیے مقبوضہ کشمیر میں لاک ڈاؤن سمیت تمام مسائل پر سینیٹ میں بحث کی جائے۔

    آج یوم استحصال کشمیر پر ظالمانہ استحصال کے خلاف پنجاب اسمبلی میں بھی قرارداد جمع کرائی گئی تھی جسے مسلم لیگ ن کی کنول لیاقت ایڈوکیٹ نے جمع کرایا۔ پنجاب اسمبلی میں رکن پنجاب اسمبلی سعدیہ تیمور کی جانب سے کشمیری خواتین کو تاریخ ساز جدوجہد پر خراج تحسین کی بھی قرارداد جمع کرائی گئی۔

    پنجاب اسمبلی میں رکن پنجاب اسمبلی زہرا نقوی کی جانب سے گزشتہ روز پاکستان کا نیا نقشہ جاری ہونے پر بھی وفاقی حکومت کو خراج تحسین کی قرارداد جمع کرائی گئی، جس میں کہا گیا تھا کہ اس اقدام سے وزیر اعظم عمران خان نے عوام کے دل جیت لیے ہیں۔