اسلام آباد: محکمہ موسمیات نے بالائی علاقوں میں مزید ہلکی بارش اور برف باری کی پیش گوئی کردی ہے۔
محکمہ موسمیات کے مطابق ملاکنڈ، ہزارہ ڈویژن، گلگت بلتستان اور کشمیر اور اس سے ملحقہ پہاڑی علاقوں میں مطلع جزوی طور پر ابر آلود رہےگا۔ چند مقامات پر ہلکی بارش اور پہاڑوں پر ہلکی برفباری کا بھی امکان ہے۔
محکمہ موسمیات کے مطابق گزشتہ چوبیس گھنٹوں کے دوران سب سے زیادہ بارش بالاکوٹ میں دو ملی میٹر ریکارڈ کی گئی جبکہ کم سے کم درجہ حرارت سکردو میں منفی چھ ڈگری سینٹی گریڈ ریکارڈ کیا گیا ہے۔
لاہور: پاکستان مسلم لیگ کے سینئرمرکزی رہنما و سابق نائب وزیراعظم چودھری پرویزالٰہی نے کہا ہے کہ پاکستان کے تاجر اور منافع خور حکمران فیصلہ کرلیں کہ بھارت سے آلو پیاز لینا ہے یا مقبوضہ کشمیر؟
کشمیر پر بھارتی تسلط کے دن کی مناسبت کے حوالے سے مقبوضہ علاقہ میں ظلم و بربریت اور اس پر پاکستانی حکمرانوں کی سردمہری پر کڑی تنقید کرتے ہوئے ان کا کہنا تھا کہ مقبوضہ کشمیر کو زیر تسلط رکھنے کیلئے وہاں آٹھ لاکھ سے زائد بھارتی فوج تعینات ہے جو کسی بھی علاقہ میں قابض فوج کی سب سے بڑی تعداد ہے۔
عالمی برادری کی توجہ اس جانب مبذول کرانے کی ضرورت پر زور دیتے ہوئے انہوں نے کہا کہ پاکستانی حکمرانوں کو سب سے پہلے کشمیر سے بھارتی فوجوں کی جلد از جلد واپسی کا مطالبہ کرنا چاہئے تاکہ وہاں بھارتی مظالم میں کمی آئے۔
انہوں نے خبردار کیا کہ کشمیریوں کی امنگوں اور مطالبات کے منافی سودے بازی کو کشمیری عوام قبول کریں گے اور نہ ہی پاکستان کے غیور عوام اس کی اجازت دیں گے۔
انہوں نے کہا کہ مودی سرکار کو بھی چاہئے کہ وہ زمینی حقائق کو سامنے رکھتے ہوئے اربوں ڈالر کا اسلحہ خریدنے کی بجائے خطہ کے اس سب سے بڑے مسئلہ کو حل کرنے پر توجہ دے تاکہ وسائل کو سماجی مسائل کے حل پر صرف کر کے کروڑوں عوام کو غربت اور جہالت سے نجات دلائی جا سکے کیونکہ اس حقیقت سے انکار نہیں کیا جاسکتا کہ پاک بھارت امن کا راستہ کشمیر سے گزرتا ہے
اسلام آباد: مقبوضہ کشمیرپرناجائز بھارتی تسلط کے خلاف کل جماعتی حریت کانفرنس جموں و کشمیر کی کال پر اسلام آباد میں اقوام متحدہ مبصر مشن کے دفتر کے باہر پر امن احتجاجی مظاہرہ کیا گیا ۔
جس کی قیادت حریت رہنماءعبدالحمید لون نے کی ۔مظاہرین نے بھارت کے خلاف اور تحریک آزادی کے حق میں نعرے بازی کی ۔اس موقع پر مقررین کا کہنا تھا کہ بھارت نے مقبوضہ کشمیر پر قبضہ کشمیریوں کی خواہشات کے برعکس کیا تھا جس کے بعد سے بھارتی فوج کی جانب سے انسانی حقوق کی خلاف ورزیوں کا سلسلہ جاری ہے ۔
ان کا کہنا تھا کہ کشمیریوں کا قتل عام بھارتی ریاستی دہشت گردی کی بدترین مثال ہے ۔اس موقع پر اقوام متحدہ کے سیکر ٹری جنرل کے نام یاداشت پیش کی گئی ۔
جس میں اقوام متحدہ پر زور دیا گیا ہے کہ وہ مقبوضہ کشمیر سے بھارتی فوج کے انخلاء سمیت مسئلہ کے حل کےلئے عالمی برادری کے ساتھ مل کر اپنا کردار ادا کرے ۔
کراچی: وزیراعظم کے مشیربرائے خارجہ امورسرتاج عزیز نے کہا ہے کہ پاکستان مسئلہ کشمیرپراخلاقی اورسفارتی حمایت جاری رکھے گا۔
کراچی میں سیمینار سے خطاب کرتے ہوئے سرتاج عزیز کا کہنا تھا کہ مسئلہ کشمیراقوام متحدہ کی قراردادوں کے ذریعے ہی حل کیا جا سکتا ہے، پاکستان نے ہمیشہ اقوام متحدہ کے فورم پرمسئلہ کشمیرکواجاگرکیا ہے،پاکستان ایک ذمہ دارملک ہے اورعالمی قدروں اور اصولوں کا احترام کرتا ہے، مشیرخارجہ نے کہا کہ حکومت جموری انداز میں کام کررہی ہے، مسائل کا حل مستحکم جمہوریت سے ہی نکالا جا سکتا ہے۔
سیالکوٹ: بھارتی سیکیورٹی فورسز نےجنگ بندی کی ایک بار پھرخلاف ورزی کرتے ہو ئے سیالکوٹ کےقریب پوکھلیاں سیکٹرمیں بلااشتعال فائرنگ کی، جس کا پاک فوج نےبھرپورجواب دیا۔
آئی ایس پی آر کی جانب سے جاری کردہ ایک بیان کے مطابق بھارتی سیکیورٹی فورسز کی جانب سے لائن آف کنٹرول اور ورکنگ باؤنڈری کی خلاف ورزی کاسلسلہ جاری ہے اور بھارت کی جانب سے آج صبح سیالکوٹ کےقریب پوکھلیاں سیکٹرمیں نواحی دیہات پر بلااشتعال فائرنگ کی گئی۔
آئی ایس پی آر کے مطابق ورکنگ باؤنڈری پرفائرنگ کاپاک فوج نےمؤثرجواب دیا، دوسری جانب مقامی افرادکاکہنا تھا کہ بھارت ہمیشہ فائرنگ اس وقت شروع کرتا ہے جب پاکستانی شہری نماز یا دیگر عبادات میں مشغول ہو تے ہے۔
بھارت کی بلا اشتعال فائرنگ کا پاک فوج نے فوری اور پھر پور جواب دیا جس سے بھارتی توپیں خاموش ہو گئیں۔
آئی ایس پی آر کے مطابق رواں ماہ میں بھارت کی جانب سےمتعدد بارسرحدی حدود کی خلاف ورزی کی گئی ہے، جس میں گیارہ پاکستانی شہید ہوچکے ہے، بھارتی فائرنگ پر پاکستان نےعالمی سطح پر احتجاج بھی ریکارڈ کرایا گیا ہے۔
دوسر جانب پی ٹی آئی نے سرحد پر بلااشتعال بھارتی گولہ باری پر شدید مذمت کی ہے۔ پی ٹی آئی کے ترجمان کے مطابق پاک بھارت سرحد پر بھارتی جارحیت انتہائی تشوشناک ہے۔ وزیراعظم نواز شریف بھارتی اشتعال انگیزیاں روکنےکےلیے لینڈ ٹرانزٹ روٹ بند کرنے کا فیصلہ کریں۔ پی ٹی آئی کے مطابق وفاقی حکومت عوام کے جان ومال کے ساتھ ملکی سرحدوں کی تحفظ میں بھی ناکام ہوگئی ہے۔
اسلام آباد: پاکستان کے قومی سلامتی اور خارجہ امور کے مشیرسرتاج عزیزنے اقوامِ متحدہ کےسیکرٹری جنرل بان کی مون کو بھارت کی جانب سے لائن آف کنٹرول پر بلا اشتعال فائرنگ کے متعلق فون کیا اور ان کو فائرنگ سے ہو نے والے نقصانات کے بارے میں آگاہ کیا۔
تفصیلات کے مطابق پاکستان کی قومی سلامتی اور خارجہ امور کے مشیر سرتاج عزیز نے اقوام متحدہ کے جنرل سیکرٹری بان کی مون سے ٹیلی فونک رابطہ کیا جس میں انھوں نے بان کی مون کو لائن آف کنٹرول اورورکنگ باؤنڈری کی صورتحال سے آگاہ کیا۔ سرتاج عزیزنے بان کی مون کو بھارت کی جانب سے ورکنگ باونڈری پر بلااشتعال فائرنگ اوراس سے ہونے والے نقصانات سے بھی آگاہ کیا۔
سرتاج عزیزکا کہنا تھا کہ بھارت کو اشتعال انگیزاقدامات سے روکا جائے۔ پاکستان کسی بھی جارحیت کا بھرپورجواب دینے کی صلاحیت رکھتا ہے تاہم عالمی امن کو قائم رکھنے کے لئے عالمی برادری کو زور دینگے کے وہ بھارت کو روکے۔ انہوں نے کہا کہ پاکستان مسئلہ کشمیرسمیت تمام مسائل کا حل چاہتا ہے۔
سیکرٹری جنرل بان کی مون نےلائن آف کنٹرول کی موجودہ صورتحال پرتشویش کا اظہارکرتے ہوئے کہا کہ دونوں ملکوں کو مسائل مذاکرات کے ذریعے حل کرنے چاہیے۔ مشیرِخارجہ نے اس سے پہلے گیارہ اکتوبرکو سیکرٹری جنرل کومعاملے پرخط بھی تحریرکیا تھا۔
لاہور: بھارتی ہیکرز کی جانب سے لاہور ہائی کورٹ کی ویب سائٹ ہیک کر کے اس پر بھارتی جھنڈا لگا دیا گیاہیکرز کی جانب سے پیغام دیا گیا کہ بلاول بھٹو کے کشمیر کے متعلق بیانات کے ردعمل میں ویب سائٹ کو ہیک کیا گیا۔
پیغام میں کہا گیا ہے کہ اگر بلاول بھٹو نے نے کشمیر پر اس طرح کے بیانات دینا بند نہ کیے تو وہ مستقبل میں بھی حساس پاکستانی ویب سائٹ کو ہیک کیے جانے کی ذمہ داری ان پر عائد ہو گی، ویب سائٹ پر کشمیر کے حوالے سے بلاول بھٹو کے دو ٹویٹ اور مختلف تصاویر بھی لگائی گئی ہیں۔
کراچی: پاکستان پیپلزپارٹی کے سربراہ بلاول بھٹو زرداری نے کہا ہے کہ ایٹمی دھماکوں کے بعد اقوام متحدہ نے پاکستان اور بھارت کیخلاف کسی بھی قسم کی جوہری ٹیکنالوجی ،سامان یا اشیاء کی فراہمی کو ممنوعہ قرار دیااور اب ایک ایک کرکے صرف بھارت کیلئے یہ پابندیاں ہٹائی جارہی ہیں جو امن پسند جمہوری مسلمان ریاست کیخلاف تعصب پر مبنی رویہ ہے جسے کسی صورت بھی برداشت نہیں کیا جائے گا۔
سندھ اسمبلی کے تاریخی ہال میں ماڈل یو این ڈیلی گیٹ سے خطاب کرتے ہوئے بلاول بھٹو زرداری کا کہنا تھا کہ 6جون1988کو اقوام متحدہ نے ہر قسم کی جوہری ٹیکنالوجی پر پابندی پاکستان ا ور بھارت پر لگائی تھی جو جوہری دروازے پاکستان اور بھارت کے لئے بند کئے گئے تھے وہ اب ایک ایک کرکے بھارت کیلئے کھولے جارہے ہیں۔
انہوں نے کہا کہ کشمیر کی عوام66برس سے حق کے ارادیت حاصل کرنے کیلئے منتظر ہیں اور یہ بھی ایک حقیقت ہے اقوام متحدہ مسئلہ کشمیر کے حل میں ناکام ہوگئی ہے ۔بلاول بھٹو زرداری کا کہنا تھا کہ ہم انصاف پسند ،جمہوریت پسند ہیں عالمی قوانین اور عالمی عدالتوں پر یقین رکھتے ہیں اس صورتحال میں ہماری آواز کو سنا جائے مسلم ریاست کیخلاف اقوام متحدہ کا یہ تعصب پر مبنی رویہ اب مزید برداشت نہیں کیا جاسکتا۔
اپنے خطاب میں بلاول بھٹو زرداری کا کہنا تھا کہ ہمارے پاس دو ہی راستے ہیں یا تو ہم پر امن خوشحال اور ترقی پسند ملک بنیں یاپھرایک فسطائتی مملکت بن کر پوری دنیا کیلئے خطرہ بن جائیں۔بلاول بھٹو زرداری نے کہا کہ جس خطے میں ہم رہتے ہیں یہ پہلے سے زیادہ خطرناک بن گیا ہے آج ہم جس راستے کا تعین کریں گے وہ صرف ہمارا خطہ ہی نہیں بلکہ پوری دنیا پر اثر انداز ہوگا۔
انہوں نے اپنے خطاب میں کہا کہ 1980ء میں افغان وار کے دوران روس کیخلاف پوری دنیا نے حصہ لیا مگر اس دوران غیر ریاستی عناصر کو پیسہ اور اسلحہ دیکر ایک انجان غلطی کی گئی جس کی وجہ سے آج پوری دنیا اس وقت کے مجاہدین کو اب دہشت گرد کہتی ہے اور تیس سال سے پاکستان اس کا خمیازہ بھگت رہا ہے ۔
میں یہ بتانا چاہتا ہوں کہ جب غیر ریاستی عناصر کو طاقت دیدی جائے تو وہ کسی قانون کو نہیں مانتے اور نہ ہی ریاست اور عوام کو جوابدہ ہوتے ہیں وہ صرف اپنے مقاصد کیلئے لڑتے ہیں۔
بلاول بھٹو زرداری کا کہنا تھا کہ آج پھر مغربی دنیا شام ،لیبیا،مصر میں عرق اسپرنگ مدد کرنے کیلئے چھوٹے اور جلدمقاصد کے حصول کیلئے غیر ریاستی عناصر کو اسلحہ اور پیسے سے لیس کر رہی ہے جو آگے چل کہ پوری دنیا کیلئے اور بھی زیادہ خطرناک ہوجائے گا۔
بلاول بھٹو زرداری نے کہا کہ پاکستان کی آواز کو سننا بہت ضروری ہے میں عالمی برادری سے کہتا ہوں کہ وہ شہید ذوالفقار علی بھٹو اور بے نظیر بھٹوکی پاکستان کی عوام کو سنیں ہمیں ایک جمہوری ، روشن خیال اور ترقی پسند مسلم ملک بننے دیا جائے۔
انہوں نے کہا کہ مذہبی فسطائیت میں میرے نانا اوردوماموں اور میری والدہ کو شہید کردیا گیا آج میری پاک سر زمین کو خون میں نہلا دیا گیا ہے اور یہ آگ پاکستان میں بڑھ رہی ہے عالمی برادری پاکستان کی آواز کو سنیں اور پاکستان کی تاریخ سے سیکھے۔
بلاول بھٹو زرداری کا کہنا تھا کہ دہشتگردی کیخلاف،جمہوریت کیلئے مسلسل جدوجہد،کشمیر پر قبضے اور کشمیر میں مظالم کیخلاف اگر عالمی دنیا نے ذوالفقارعلی بھٹو اور بے نظیر بھٹو کی آواز سنی ہوتی تو آج عالمی دنیا میں امن کا خواب ایک حقیقت ہوتا۔
واشنگٹن: ورکنگ باؤنڈری پر بھارتی فائرنگ اور گولہ باری پر امریکا نے تشویش کا اظہار کرتے ہوئے کہا کہ کشمیر کے بارے میں امریکا کی پالیسی تبدیل نہیں ہوئی۔
امریکی محکمہ خارجہ کی خاتون ترجمان جین ساکی نے کہا کہ پاک بھارت سرحد پر گولہ باری پر امریکا کو تشویش ہے۔ ان کا کہنا تھا کشمیر کے بارے میں امریکہ کی پالیسی تبدیل نہیں ہوئی، مذاکرات سے ہی مسائل کا حل نکلتا ہے، دونوں ملکوں کے درمیان بات چیت ضروری ہے، کشمیر پر مذاکرات کے مستقبل اور نوعیت کا تعین پاکستان اور بھارت نے ہی کرنا ہے۔
کراچی: پاکستان پیپلزپارٹی کی مرکزی ویب سائٹ ہیک کرلی گئی،انڈین ہیکرز آن لائن اسکواڈ نے ویب سائٹ پر بھارتی پرچم لگا دیا,بھارتی ہیکرز کا کہنا ہے کہ ان کا یہ اقدام بلاول بھٹو کے بیان کا رد عمل ہے۔
بھارتی ہیکرز نے پیپلزپارٹی کی مرکزی ویب سائٹ پر بھارتی ترنگے کے علاوہ اپنے کمنٹس بھی دیئے ہیں، علاوہ ازیں پیپلزپارٹی کے رہنماءاویس مظفر نے بھارتی ہیکرز کی اس حرکت پر اپنے ردعمل کا اظہار کرتے ہوئے کہا ہے کہ بلاول بھٹوکی2ٹوئٹس نےبھارتیوں کی نیندیں اڑادیں ہیں۔
انہوں نے کہا کہ بھارت سمجھ لے،کشمیرہمارااٹوٹ انگ ہے۔