Tag: کفایت شعاری پالیسی

میکسکو : میکسیکو میں نئے صدر نے سابق صدر کے استعمال میں رہنے والا طیارہ نیلام کرنے کا اعلان کردیا، حکام کا کہنا ہے کہ صدارتی طیارے سمیت ساٹھ سرکاری طیارے فروخت کئے جائیں گے۔

تفصیلات کے مطابق میکسیکو میں صدر بدلتے ہی تبدیلی آگئی ، میکسیکو کے نئے صدر آندریس مینوئل لوپیز اوبراڈور نے کفایت شعاری پالیسی پر عمل کرتے ہوئے سابق صدر کے زیر استعمال طیارہ فروخت کے لئے پیش کردیا، دو سو اٹھارہ ملین ڈالرمالیت کے پر تعیش صدارتی طیارے میں فلیٹ اسکرینز نصب ہیں جبکہ صدارتی بیڈ روم اور دیگر لگژری اشیا بھی موجود ہیں۔

نئی حکومت کا کہنا ہے صدارتی طیارے سمیت ساٹھ سرکاری طیارے فروخت کرکے رقم سرکاری خزانے میں جمع کرائی جائے گی جبکہ ستر ہیلی کاپٹرز بھی فروخت کئے جائیں گے۔

حکام کے مطابق طیارے اور ہیلی کاپٹرزفروخت کرنے کا مقصد ایلیٹ کلچر کا خاتمہ ہے۔

یاد رہے میکسیکو کے نئے صدر آندریس مینوئل لوپیز اوبراڈور نے یکم دسمبر کو اپنے عہدے کا حلف اٹھایا تھا، حلف برداری کی تقریب کے بعد اپنے پہلے خطاب میں مسٹر اوبراڈور کا  کہنا تھا کہ بدعنوانی ملک کے لئے ایک بڑا المیہ ہے، کسی کو بھی ملک کا خزانہ لوٹنے کی اجازت نہیں دیں گے۔

خیال رہے جولائی میں میکسیکو سٹی کے سابق میئر آندرے مینوئل لوپیز اوبراڈور بھاری اکثریت سے میکسیکو کے نئے صدر منتخب ہوئے تھے۔

بعد ازاں نئے صدر نے  اپنی ماہانہ تنخواہ میں  50 فیصد کمی کا اعلان کر تے ہوئے کہا تھا  کہ اعلی سرکاری شخصیات کو  دی جانے والی خصوصی مراعات میں بھی  کمی لائیں  گے  تاکہ  بجٹ خسارے پر قابو پایا جا سکے ۔