ARYNews.tv | Urdu – Har Lamha Bakhabar

Tag: کلثوم نواز

  • بیگم کلثوم اسپتال سے فارغ، ہمیں دعاؤں کی ضرورت ہے، نوازشریف

    بیگم کلثوم اسپتال سے فارغ، ہمیں دعاؤں کی ضرورت ہے، نوازشریف

    لندن: نواز شریف کی اہلیہ بیگم کلثوم نواز کو اسپتال سے ڈسچارج کردیا گیا، نوازشریف اور ان کے بچے کلثوم نواز کو لیکرگھر روانہ ہوگئے۔

    تفصیلات کے مطابق گلے کے کینسر کے عارضے میں مبتلا نواز شریف کی اہلیہ بیگم کلثوم نواز کو ان کی تیسری بار سرجری کرنے کے بعد ہارلی اسٹریٹ کلینک سے فارغ کردیا گیا، وہ اپنے شوہر اور بچوں کے ہمراہ اسپتال سے رہائش گاہ کی جانب روانہ ہوگئیں۔

    اس موقع پر میڈیا سے بہت مختصر گفتگو کرتے ہوئے نواز شریف نے کہا کہ ہمیں دعاؤں کی ضرورت ہے، لندن سے ملنے والی تفصیلات میں بتایا گیا ہے کہ بیگم کلثوم نواز کی تیسری سرجری بھی کامیاب رہی ہے جس بعد انہیں گھر منتقل کیا جارہا ہے۔

    کلثوم نواز کے صاحبزادے حسین نواز نے میڈیا سے گفتگو کرتے ہوئے کہا کہ ابھی والدہ کی مزید رپورٹس آنا باقی ہیں ، قوم سے دعاﺅں کی درخواست ہے۔

    مزید پڑھیں: کلثوم نواز کی تیسری سرجری ہارلی اسٹریٹ کلینک میں جاری

    واضح رہے کہ گلے کے کینسر میں مبتلا بیگم کلثوم نواز لندن میں زیر علاج ہیں، کینسر کی تشخیص کے بعد بیگم کلثوم نواز کے دو آپریشن ہوچکے ہیں، جس میں حلق اور سینے کا آپریشن کیا گیا تھا، بعد ازاں ماہر معالجین کی ٹیم نے ایک اور آپریشن کا فیصلہ کیا تھا۔

    مزید پڑھیں: این اے 120، کلثوم نواز کی جیت، یاسمین راشد کو شکست

    چند روز قبل قومی اسمبلی کے حلقہ این اے 120 کے نتائج کے مطابق مسلم لیگ ن کی امیدوار بیگم کلثوم نواز کامیاب قرار پائیں، انہوں نے 61745 ووٹ حاصل کیے تھے۔

  • کلثوم نواز کے کاغذات نامزدگی کی منظوری کے خلاف اپیلیں مسترد

    کلثوم نواز کے کاغذات نامزدگی کی منظوری کے خلاف اپیلیں مسترد

    اسلام آباد: سپریم کورٹ نے لاہور کے حلقہ این اے 120 سے فتح یاب امیدوار کلثوم نواز کے کاغذات نامزدگی منظور کیے جانے کے خلاف 2 اپیلیں مسترد کردیں۔

    تفصیلات کے مطابق پاکستان عوامی تحریک کےامیدوار اشتیاق احمد کی جانب سے دائر درخواست کاغذات نامزدگی واپس لینے کی بنیاد پر مسترد کی گئی۔

    دوسری مسترد شدہ اپیل پیپلز پارٹی کے امیدوار فیصل میر کی جانب سے دائر کی گئی تھی۔

    سماعت کے دوران جسٹس فائز عیسیٰ نے کہا کہ کسی پر انگلی اٹھانے کے لیے ٹھوس وجوہات درکار ہوتی ہیں۔ عوام نے کل اپنی رائے دے دی ہے۔

    جسٹس قاضی فائز عیسیٰ نے سوال کیا کون سا گھر یا گاڑی کلثوم نواز نے ظاہر نہیں کیے۔

    عدالت کے باہر مسلم لیگ ن کے رہنما آصف کرمانی کا کہنا تھا کہ کچھ لوگ اپنا اور عدالتوں کا وقت ضائع کر رہے ہیں۔

    دوسری جانب مختلف وکلا نے فیصلے کے خلاف اپیل کا عندیہ ظاہر کیا ہے۔ فیصلے میں سپریم کورٹ کا کہنا تھا کہ پیپلز پارٹی کے امیدوار فیصل میر چاہیں تو متعلقہ فورم سے رجوع کر سکتے ہیں۔

    یاد رہے کہ کلثوم نواز کے این اے 120 کے لیے کاغذات نامزدگی منظور ہونے کے بعد پیپلز پارٹی کے امیدوار فیصل میر نے اپنی درخواست میں مؤقف اختیار کیا کہ کلثوم نواز اپنے درست مالی گوشوارے فراہم کرنے، بالواسطہ یا بلاواسطہ اپنے زیراستعمال اثاثے بتانے میں ناکام رہیں۔

    ان کا کہنا تھا کہ کلثوم نواز نے بدنیتی کی، جان بوجھ کر اپنے اثاثے چھپائے اور اقامہ بھی ظاہر نہیں کیا جس کی بنا پر وہ آرٹیکل 63-62 کے تحت الیکشن میں حصہ لینے کی اہل نہیں۔

    عوامی تحریک کے رہنما اشتیاق چوہدری کی جانب سے دائر کردہ درخواست میں کہا گیا کہ کلثوم نواز نے کاغذات نامزدگی میں اپنے خلاف سندھ میں درج بغاوت کی ایف آئی آر کے متعلق ذکر تک نہیں کیا۔

    ان کے مطابق کلثوم نواز نے جان بوجھ کر حقائق چھپائے، لہٰذا جھوٹ بولنے کی وجہ سے کلثوم نواز الیکشن لڑنے کی اہل نہیں۔

    کلثوم نواز کی کاغذات نامزدگی سے متعلق درخواستوں کے لیے 2 بینچ تشکیل دے کر تحلیل کردیے گئے، اب تیسرے بینچ نے دونوں درخواستوں کومسترد کردیا ہے۔

    مزید پڑھیں: کلثوم نواز کے کاغذات نامزدگی کا کیس، تیسری بار فل بنچ تشکیل

    یاد رہے کہ گزشتہ روز ہونے والے حلقہ این اے 120 لاہور کے ضمنی انتخاب میں غیر سرکاری نتائج کے مطابق کلثوم نواز فاتح قرار پائی ہیں۔

    وہ سابق وزیر اعظم نواز شریف کی اہلیہ ہیں جنہیں پاناما کیس میں نا اہل کردیے جانے کے بعد ان کی نشست پر مذکورہ انتخاب منعقد ہوئے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • کلثوم نوازکی کامیابی عوام کا مسلم لیگ ن سے والہانہ محبت کا اظہار ہے‘ شہبازشریف

    کلثوم نوازکی کامیابی عوام کا مسلم لیگ ن سے والہانہ محبت کا اظہار ہے‘ شہبازشریف

    لاہور: وزیراعلیٰ پنجاب شہبازشریف کا کہنا ہے کہ این اے 120 کے نتائج سے ثابت ہوگیا کہ عوام خدمت کی سیاست کرنے والوں کے ساتھ ہیں۔

    تفصیلات کے مطابق وزیراعلیٰ پنجاب شہبازشریف نے کہا کہ این اے 120 کے ضمنی الیکشن نے ثابت کیا کہ عوام احتجاجی سیاست سے تنگ آچکے ہیں۔

    شہبازشریف نے سماجی رابطے کی ویب سائٹ ٹویٹر پر اپنے پیغام میں بیگم کلثوم نواز اور کارکنوں کو این اے 120 میں کامیابی پر مبارکباد دی۔

    وزیراعلیٰ پنجاب نے ٹویٹر پر اپنے ایک اور پیغام میں کہا کہ کلثوم نوازکی کامیابی عوام کا مسلم لیگ ن سے والہانہ محبت کا اظہار ہے،ثابت ہوگیا عوام خدمت کی سیاست کرنے والوں کے ساتھ ہیں۔

    شہبازشریف کا کہنا تھا کہ جھوٹ کی سیاست کوعوام نے ووٹ کی طاقت سے رد کردیا،انہوں نے کہا کہ 4 سال بعد بھی ن لیگ ملک کی مقبول ترین جماعت ہے۔

    وزیراعلیٰ پنجاب کا کہنا تھا کہ عوام موجودہ حکومت کی پالیسیوں کا تسلسل چاہتے ہیں، مسلم لیگ عوامی خدمت کا سفر عزم کے ساتھ جاری رکھے گی۔

    این اے 120 : کلثوم نواز کی جیت کا غیرسرکاری اعلان

    واضح رہے کہ گزشتہ روز این اے 120 کے ضمنی انتخاب بیگم کلثوم نواز نے 61745 ووٹ حاصل کرکے جیت لیا تھا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • عوام نے دھرنا سیاست مسترد کردی، سعد، عوام ن لیگ کے ساتھ ہیں، شہباز

    عوام نے دھرنا سیاست مسترد کردی، سعد، عوام ن لیگ کے ساتھ ہیں، شہباز

    لاہور : وفاقی وزیر ریلوے خواجہ سعد رفیق نے کہا ہے کہ لاہوریوں نے ایک بار پھر دھرنے اور انتشارکی سیاست کو مسترد کیا ہے، شہباز شریف کا کہنا ہے کہ عوام کے دل ن لیگ کے ساتھ دھڑکتے ہیں۔

    ان خیالات کا اظہار انہوں نے این اے 120 کے ضمنی انتخاب میں کلثوم نواز کی فتح کے بعد اپنے علیحدہ علیحدہ بیان میں کیا۔

    خواجہ سعد رفیق نے کہا کہ آج کادن ایک تاریخ سازدن ہے،عوام نے پاکستان کوترقی کی شاہراہ پرڈالنےوالوں پراعتماد کیا، اہل لاہور اوراین اے 120 کےعوام کاشکریہ ادا کرتے ہیں، نوازشریف اورن لیگ کےخلاف چار سال سےمہم چلائی جارہی ہے۔

    نواز شریف کی ترقی کا وژن جیت گیا ہے، وہ عوام کے دلوں میں بستے ہیں،خواجہ سعد رفیق کا مزید کہنا تھا کہ سی پیک اور ملکی اقتصادی حالت بہترکرنا نوازشریف کا جرم ہے، ان کاجرم یہ ہے کہ وہ بلوچستان میں امن لائے۔

    خواجہ سعدرفیق نے کہا کہ ہمارےچند کارکنان ابھی تک لاپتہ ہیں، ہمارے ہزاروں ووٹ کاسٹ نہیں کرنے دیئےگئے۔

    این اے 120: کلثوم نوازکی فتح، یاسمین راشد کو شکست

    علاوہ ازیں وزیر اعلی پنجاب میاں شہباز شریف نے کلثوم نواز کی جیت پر عوام کو مبارکباد دیتے ہوئے کہا ہے کہ کلثوم نواز کی جیت ن لیگ کی قیادت اور اس کی کارکردگی پراعتماد کا اظہار ہے، ضمنی الیکشن نے ثابت کردیا کہ عوام کے دل ن لیگ کے ساتھ دھڑکتے ہیں۔

     

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • وزیراعلیٰ پنجاب شہبازشریف لاہور پہنچ گئے

    وزیراعلیٰ پنجاب شہبازشریف لاہور پہنچ گئے

    لاہور : وزیراعلیٰ پنجاب میاں محمد شہبازشریف لندن سے وطن واپس پہنچ گئے ،شہبازشریف کلثوم نواز کی عیادت کے لیے لندن گئے تھے۔

    تفصیلات کے مطابق وزیراعلیٰ پنجاب دورہ لندن کے بعد آج صبح لاہور ایئرپورٹ پہنچے، شہباز شریف نے لندن میں بیگم کلثوم نوازکی عیادت کی۔

    وزیراعلیٰ پنجاب شہباز شریف قومی ایئرلائن کی پروازپی کے758کےذریعےآج صبح 7 بجے لندن سےلاہورپہنچے۔

    خیال رہے کہ گزشتہ ماہ کلثوم نواز کے بعد وزیراعلیٰ پنجاب شہبازشریف کے بیٹے حمزہ شہباز نجی دورے پر لندن روانہ ہوگئے تھے۔

    حمزہ شہبازشریف نجی دورے پرلندن روانہ

    لندن روانگی سے قبل پارٹی عہدیداران سے گفتگو کرتے ہوئے انہوں نے کہا کہ کلثوم نواز میری والدہ ہیں۔

    شہبازشریف کا کہنا تھا کہ الیکشن سے پہلے کلثوم نواز اور میں وطن واپس آجائیں گے اور این اے 120 کا الیکشن ہم سب کا الیکشن ہے اور ہم سب مل اس ضمنی انتخاب میں حصہ لیں گے۔

    شریف خاندان کے افراد اچانک لندن روانہ

    بعدازاں سابق وزیراعظم نوازشریف اور شہبازشریف کے اہل خانہ قومی علامہ اقبال انٹرنیشنل ایئرپورٹ سے قومی ایئرلائن کی پرواز پی کے 757 سے اچانک لندن روانہ ہوگئے تھے۔

    وزیراعلیٰ پنجاب شہبازشریف لندن روانہ

    واضح رہے کہ گزشتہ ہفتے وزیراعلیٰ پنجاب میاں محمد شہبازشریف کلثوم نواز کی عیادت کرنے کے لیے لندن روانہ ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں

     

  • کلثوم نواز کے کاغذات نامزدگی کی منظوری کے خلاف درخواستیں مسترد

    کلثوم نواز کے کاغذات نامزدگی کی منظوری کے خلاف درخواستیں مسترد

    لاہور: صوبہ پنجاب کے دارالحکومت میں لاہور ہائیکورٹ نے حلقہ این اے 120 کے لیے کلثوم نواز کے کاغذات نامزدگی کے خلاف درخواستیں مسترد کرتے ہوئے انہیں الیکشن لڑنے کی اجازت دے دی۔ 3 رکنی بنچ نے 1۔2 سے اکثریتی فیصلہ سنایا۔

    تفصیلات کے مطابق جسٹس امین الدین، جسٹس عباد الرحمٰن لودھی اور جسٹس شاہد جمیل پر مشتمل 3 رکنی بنچ نے پیپلز پارٹی کے فیصل میر، عوامی تحریک کے اشتیاق چوہدری سمیت 4 درخواستوں کی سماعت کی۔

    درخواست گزاروں کے وکلا نے دلائل دیے کہ کلثوم نواز نے اپنے کاغذات نامزدگی میں اقامہ کے متعلق تفصیلات فراہم نہیں کیں۔ انہوں نے کاغذات نامزدگی میں اقامہ کا ذکر کیا مگر اس سے حاصل ہونے والی آمدن اور اکاؤنٹس کی تفصیلات فراہم نہیں کیں۔ کلثوم نواز نے مختلف کمپنیوں کے حصص کے متعلق تفصیلات بھی فراہم کیں نہ مری میں جائیداد کے متعلق ذکر کیا۔

    مزید پڑھیں: کلثوم نواز کے کاغذات نامزدگی کے خلاف درخواستیں سماعت کے لیے منظور

    درخواست گزاروں کے مطابق کلثوم نواز کے خلاف سندھ میں بغاوت کا مقدمہ درج ہے مگر انہوں نے کاغذات نامزدگی میں اسے جان بوجھ کر ظاہر نہیں کیا۔ کلثوم نواز نے حقائق چھپائے اور جھوٹ بولا لہٰذا وہ الیکشن لڑنے کی اہل نہیں۔

    درخواست میں کہا گیا کہ ریٹرننگ افسر کو ٹھوس شواہد دیے گئے مگر انہوں نے کاغذات نامزدگی منظور کرلیے لہٰذا عدالت ریٹرننگ افسر کا فیصلہ کالعدم قرار دے اور کلثوم نواز کو الیکشن میں حصہ لینے سے روکے۔

    عدالت نے استفسار کیا کہ کیا ریٹرننگ افسر نے اپنی ذمہ داری پوری کی؟ جس پر سرکاری وکیل نے بیان دیا کہ ریٹرننگ افسر نے قانون کے مطابق فیصلہ کیا ہے۔ وفاقی حکومت کے وکلا نے بھی درخواستوں کو نا قابل سماعت قرار دے کر مسترد کرنے کی استدعا کی۔

    عدالت نے وکلا کے دلائل مکمل ہونے کے بعد درخواستیں مسترد کردیں۔ بنچ کے 2 فاضل اراکین نے درخواستیں مسترد کردیں تاہم ایک رکن نے اختلافی نوٹ دیا اور درخواستیں منظور کر لیں۔

    پیپلز پارٹی کے فیصل میر اور عوامی تحریک کے اشتیاق چوہدری کی جانب سے فیصلے کے خلاف سپریم کورٹ میں اپیل دائر کرنے کا بھی اعلان کیا گیا ہے۔

     

  • کلثوم نواز کے کاغذات نامزدگی کے خلاف درخواستیں سماعت کے لیے منظور

    کلثوم نواز کے کاغذات نامزدگی کے خلاف درخواستیں سماعت کے لیے منظور

    لاہور: لاہور ہائیکورٹ نے این اے 120 کے لیے کلثوم نواز کے کاغذات نامزدگی کے خلاف دائر درخواستیں سماعت کے لیے منظور کرلیں۔ عدالت نے نوٹس جاری کرتے ہوئے کلثوم نواز سمیت فریقین سے جواب طلب کر لیا۔

    تفصیلات کے مطابق جسٹس امین الدین، جسٹس عباد الرحمٰن لودھی اور جسٹس شاہد جمیل پر مشتمل 3رکنی بنچ نے درخواستوں کی سماعت کی۔

    عدالت نے پیپلز پارٹی کے فیصل میر، عوامی تحریک کے اشتیاق چوہدری سمیت 4 درخواستوں کو سماعت کے لیے منظور کرتے ہوئے 13 ستمبر کو سابق وزیر اعظم نواز شریف کی اہلیہ کلثوم نواز، فیڈریشن اور الیکشن کمیشن سے جواب طلب کر لیا۔

    درخواست گزاروں کی جانب سے مؤقف اختیار کیا گیا ہے کہ کلثوم نواز نے اپنے کاغذات نامزدگی میں اقامہ کے متعلق تفصیلات فراہم نہیں کیں۔ انہوں نے کاغذات نامزدگی میں اقامہ کا ذکر کیا مگر اس سے حاصل ہونے والی آمدن اور اکاؤنٹس کی تفصیلات فراہم نہیں کیں۔

    مزید پڑھیں: کلثوم نوازکی اہلیت جانچنے والا بنچ دوسری بار تحلیل

    درخواست گزاروں کے مطابق کلثوم نواز کے خلاف سندھ میں بغاوت کا مقدمہ بھی درج ہے مگر انہوں نے کاغذات نامزدگی میں اسے جان بوجھ کر ظاہر نہیں کیا۔ کلثوم نواز نے حقائق چھپائے اور جھوٹ بولا لہٰذا وہ الیکشن لڑنے کی اہل نہیں۔

    دائر شدہ درخواستوں میں مزید کہا گیا کہ ریٹرننگ افسر کو ٹھوس شواہد دییے مگر انہوں نے کاغذات نامزدگی منظور کر لیے لہٰذا عدالت ریٹرننگ افسر کا فیصلہ کالعدم قرار دے اور کلثوم نواز کو الیکشن میں حصہ لینے سے روکے۔

    یاد رہے کہ اس سے قبل بھی ہائیکورٹ نے مذکورہ درخواستوں کی سماعت کے لیے 2 بار فل بنچ تشکیل دیا تاہم دونوں بنچ تحلیل کردیے گئے اور سماعت نہ ہو سکی جس کے بعد اب یہ تیسرا بنچ تشکیل دیا گیا ہے۔

     

  • حلقہ این اے120 مسائل کی آماجگاہ ہے‘ یاسمین راشد

    حلقہ این اے120 مسائل کی آماجگاہ ہے‘ یاسمین راشد

    لاہور: تحریک انصاف کی رہنما یاسمین راشد کا کہنا ہے کہ حلقہ این اے 120 کے عوام پینے کا پانی خریدتے ہیں۔

    تفصیلات کے مطابق پاکستان تحریک انصاف کی رہنما یاسمین راشد نے میڈیا سے گفتگوکرتے ہوئے کہا کہ حلقےکےاسپتال میں ایک بستر پر 3،3 مریض زیر علاج ہیں۔

    پی ٹی آئی کی رہنما یاسیمن راشد کا کہنا تھا کہ این اے 120 مسائل کی آماجگاہ ہے، حلقے کے تمام گھروں میں معلوم کرلیں کہ پانی آتا ہے ؟۔

    تحریک انصاف کی رہنما کا کہنا تھا کہ وزیراعلیٰ پنجاب شہبازشریف 6 ماہ میں انڈر پاس اور پل بنا لیتے ہیں تو اسپتال کیوں نہیں بنا سکتے۔

    یاسمین راشد کا کہنا تھا کہ ہم الیکشن کمیشن کے قوانین پرعمل کررہے ہیں، تحریک انصاف کی رہنما کا کہنا تھا کہ کیا قانون صرف ہمارے لیے ہے حکمران کے لیے نہیں؟۔

    این اے 120کے ضمنی انتخاب میں ملک کے مستقبل کا فیصلہ ہوگا، عمران خان

    واضح رہے کہ گزشتہ روز پاکستان تحریک انصاف کے سربراہ عمران خان کا کہنا تھا کہ این اے 120 کے ضمنی انتخاب میں پاکستان کا فیصلہ ہوگا، لوگ ووٹ دے کر سب سے بڑے چور کا احتساب کرنے پرسپریم کورٹ کا شکریہ ادا کریں گے، نوازشریف کو ووٹ دینے والے پہلے بار بار سوچیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • کلثوم نواز کے کاغذات نامزدگی کی منظوری کے خلاف سماعت، فل بینچ تشکیل

    کلثوم نواز کے کاغذات نامزدگی کی منظوری کے خلاف سماعت، فل بینچ تشکیل

    اسلام آباد: سابق وزیر اعظم نواز شریف کی اہلیہ کلثوم نواز کے کاغذات نامزدگی کی منظوری کے خلاف درخواست کی سماعت کے لیے فل بینچ تشکیل دے دیا گیا۔

    تفصیلات کے مطابق یہ فل بینچ کل کلثوم نواز کے کاغذات نامزدگی کے خلاف درخواست کی سماعت کرے گا۔ بینچ میں جسٹس قاضی امین الدین، جسٹس شمس محمود مرزا، جسٹس عبید الرحمٰن شامل ہیں۔

    کلثوم نواز کے کاغذات نامزدگی کی منظوری کے خلاف حلقہ این اے 120 سے پیپلز پارٹی کے امیدوار فیصل میر نے درخواست دی تھی۔

    یاد رہے کہ کلثوم نواز اپنی علالت کے باعث آج کل لندن میں زیر علاج ہیں۔

    این اے 120 کی انتخابی مہم فی الحال ان کی صاحبزادی مریم نواز چلا رہی ہیں، تاہم ذرائع کا کہنا ہے کہ 7 ستمبر کو سابق وزیر اعظم نواز شریف وطن واپس آرہے ہیں جو آتے ہی انتخابی مہم کا میدان سنبھال لیں گے۔

     

  • وزیراعلیٰ پنجاب شہبازشریف لندن روانہ

    وزیراعلیٰ پنجاب شہبازشریف لندن روانہ

    لاہور : وزیراعلیٰ پنجاب میاں محمد شہبازشریف 3 روزہ دورے پر لندن روانہ ہوگئے جہاں وہ بیگم کلثوم نواز کی عیادت کریں گے۔

    تفصیلات کے مطابق وزیراعلیٰ پنجاب شہبازشریف 3 روزہ دورے پر پی آئی اے کی پرواز پی کے 757 سے لندن روانہ ہوگئے جہاں وہ کلثوم نواز کی عیادت کریں گے۔

    شہبازشریف اپنا میڈیکل چیک اپ بھی کرائیں گے اور لندن ایئرپورٹ پر میڈیا سے گفتگو بھی کریں گے۔

    شریف خاندان کے افراد اچانک لندن روانہ

    خیال رہے کہ 26 اگست کو وزیراعظم نوازشریف اور شہبازشریف کے اہل خانہ قومی علامہ اقبال انٹرنیشنل ایئرپورٹ سے قومی ایئرلائن کی پرواز پی کے 757 سے اچانک لندن روانہ ہوگئے تھے۔

    حمزہ شہبازشریف نجی دورے پرلندن روانہ

    شریف خاندان کے لندن جانے والے افراد میں نوازشریف کی بیٹی اور اسحاق ڈار کی بہو اسماء علی، شہبازشریف کی بیٹی، حمزہ شہباز کے بیوی بچے اورشہباز شریف کے صاحبزادے سلیمان شہباز شامل تھے۔

    یاد رہے کہ اس سے قبل وزیراعلیٰ پنجاب شہبازشریف کے صاحبزادے اور رکن اسمبلی حمزہ شہباز نجی دورے پر لندن روانہ ہوگئے تھے۔

    سابق وزیراعظم نوازشریف لندن کےلئے روانہ

    واضح رہے کہ گزشتہ ہفتے سابق وزیراعظم نوازشریف غیرملکی ایئرلائن کی پرواز625سے لندن روانہ ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔