Tag: کلدیپ یادیو

روہت شرما کی جانب سے جھاڑ پلانے کے بعد کلدیپ یادیو صفائیاں پیش کرنے لگے، انھوں نے اسے کپتان کا پیار قرار دیدیا۔

فیلڈ میں بھارتی کپتان روہت شرما اپنے جارحانہ طرز عمل کے لیے بھی جانے جاتے ہیں اور کئی بار اپنے ساتھی پلیئرز کو ڈانٹتے ہوئے بھی پائے گئے ہیں۔ حال ہی میں انگلینڈ اور بھارت کے درمیان ہونے والی ٹیسٹ سیریز میں بھی انھوں نے اپنے پلیئرز کو جھاڑ پلائی تھی۔

بہت سے لوگ بھارتی اوپنر کے اس رویے کو تنقید کا نشانہ بناتے ہوئے اسے بدتمیزی اور غیر مہذب طرز عمل بھی قرار دیتے ہیں۔ حالیہ اختتام پذیر سیریز میں انھوں نے کھلاڑیوں کو تنبیہ کی تھی کہ میدان میں زیادہ آرام دہ نہ ہوں، وہ باغ میں ٹہلنے نہیں آئے۔

اسی بارے میں بات کرتے ہوئے کلدیپ یادیو نے وضاحت کی ہے ان کا کہنا ہے کہ یہ کپتان کی محبت ہے اور اسے کسی خاص انسانی طرز عمل سے بالاتر ہوکر دیکھنا چاہیے۔

کلدیپ یادیو نے کہا کہ ہمارا بہت اچھا تعلق ہے، ایک ساتھ بہت زیادہ گھومتے ہیں، ہم ذاتی چیزوں کے بارے میں بھی گفتگو کرتے ہیں۔ اس لیے ہماری بانڈنگ بہت اچھی رہی ہے۔

لیگ اسپنر نے کہا کہ جو چیزیں کپتان میدان میں کہتے ہیں کسی کو اس پر کوئی اعتراض نہیں ہے۔ ہمارا اس طرح کا رشتہ ہے جو بھی وہ بولتے ہیں، انکا یہ ہمارے لیے پیار ہے۔

واضح رہے کہ بھارتی کپتان نے بطور اسپنر کلدیپ کو دوبارہ سے بنانے میں اہم کردار ادا کیا ہے۔ اس سے قبل بائیں ہاتھ کے اسپنر کو بولنگ میں تیز رفتاری کی کمی کی وجہ سے کافی مشکلات کا سامنا تھا۔

کلدیپ مانتے ہیں کہ روہت شرما نے انھیں غیر متزلزل تعاون فراہم کیا، روہت کے مشوروں کے باعث انھیں پہلے سے بہتر بولر بننے میں کافی مدد ملی۔

ایشیا کپ میں اب تک بھارت کی جانب سے کلدیپ یادیو نے سب سے زیادہ وکٹیں لی ہیں، لیفٹ آرم اسپنر کا کہنا ہے کہ ایکشن کی تبدیلی کی وجہ سے ان کی بولنگ میں بہتری آئی ہے۔

بھارتی لیگ اسپنر نے ایشیا کپ کے سپر فور مرحلے کے دونوں میچز میں عمدہ بولنگ کی، بالخصوص پاکستانی بیٹرز کے خلاف وہ کافی متاثر کن رہے جو اسپنرز کو کھیلنے میں مہارت رکھتے ہیں۔ انھوں نے گرین شرٹس کے خلاف پانچ وکٹیں حاصل کی تھیں۔

کلدیپ کا کہنا تھا کہ سرجری کے بعد ان کا رن اپ سیدھا ہوگیا ہے، وہ اب زیادہ جارحانہ طریقے سے بولنگ کرسکتے ہیں۔ انھوں نے بتایا کہ پہلے گیند کو ریلیز کرتے ہوئے ان کا دایاں ہاتھ گرجاتا تھا لیکن اب اس پر کنٹرول حاصل کرلیا ہے۔

ڈیڑھ سال قبل سرجری کے عمل سے گزرنے والے بولر نے کہا کہ ان کی اسپن اور ڈرفٹ پہلے جیسی ہی ہے لیکن رفتار بڑھ گئی ہے۔ ان سب چیزوں کے ملاپ نے ان کی بولنگ کو بیٹرز کے لیے مشکل بنادیا ہے۔

انھوں نے مزید بتایا کہ سرجری کے پانچ ماہ بعد انھوں نے کرکٹ کا دوبارہ آغاز کیا تھا۔ میرے فزیو نے مجھے ایکشن تبدیل کرنے کا مشورہ دیا تھا تاکہ میرے گھٹنوں پر بوجھ کم ہوسکے۔ اس پر عمل کرنے سے چھ ساتھ ماہ کے دوران میری بولنگ میں بہتری آئی ہے۔

واضح رہے کہ بھارت کے خلاف سپر فور مرحلے کے میچ میں پاکستان کو 228 رنز کے بڑے مارجن سے شکست ہوئی تھی۔ کلدیپ نے شاندار بولنگ کا مظاہرہ کرتے ہوئے صرف 25 رنز دے کر 5 بیٹرز کو چلتا کیا تھا۔